د لاسرسۍ وړ لېنکونه

تازه خبر
سه شنبه ۸ تله ۱۳۹۹ کابل ۰۲:۳۶

د بحرین، اماراتو او اسرائیل ترمنځ موافقه؛ فلسطینیانو پر اسرائیل راکټ توغولی


ارشیف

۱۶ساعته وروسته له دې چې په غزه کې مېشتو فلسطیني وسله والو د اسرائیل پر یوه ساحلي ښار راکټ وویشت او دوه تنه یې ژوبل کړل، د اسرائیل الوتکې نن په غزې تړانګه کې ځینې هدفونه وویشتل.

اسرائیلو دا ځوابي برید په واشنګټن کې له متحده عربي اماراتو او بحرین سره د اسرائیل د دیپلوماتیکو اړیکو د ټینګولو د موافقو د لاسلیک په سهار وکړ.

د رویټرر خبري اژانس د راپور له مخې، شاهدان وايي، اسرائیلي الوتکې د حماس سختدریځې ډلې، چې غزه یې په کنټرول کې ده، د روزنې د یوې اډې په شمول هدفونه په نښه کړل.

تراوسه پورې د دې هوايي برید په نتیجه کې د مرګ ژوبلو په اړه څه نه دي ویل شوي.

څو ساعته وړاندې په واشنګټن کې د درو هېوادونو د اړیکو د عادي کېدو لپاره د موافقې د لاسلیک د مراسمو په مهال په غزه کې فلسطیني وسله والو د اسرائیل اشدود ښار ته توغندی وویشت چې له کبله یې دوه تنه ټپیان شول.

په واشنګټن کې د بحرین، متحده عربي امارات او اسرائیل ترمنځ د اړیکو د عادي کېدو د موافقې د لاسلیک مراسم
په واشنګټن کې د بحرین، متحده عربي امارات او اسرائیل ترمنځ د اړیکو د عادي کېدو د موافقې د لاسلیک مراسم

د اسرائیل پوځ تراوسه پورې د ځوابي یا غچ اخیستونکي اقدام په اړه څه نه دي ویلي.

د فرانس پریس خبري اژانس د راپور له مخې، د فلسطین امنیتي سرچینو حمله تائید کړې ده.

د فلسطینیانو په نظر، چې هڅه کوي د غزې په لوېدیځه غاړه کې خپلواک دولت ولري، په سپینه ماڼۍ کې د اسرائیل، امارات او بحرین ترمنځ پرونۍ لاسلیک شوې موافقې د دوی له ارمان سره خیانت دی.

په موافقو کې د اسرائیل او فلسطینیانو ترمنځ د څو لسیزو لانجې په پام کې نه دي نیول شوي.

فلسطینیانو له اسرائیل سره د عربي هېوادونو د اړیکو عادي کېدا رد کړې او هغه تر هغو چې فلسطین د دولت په توګه نه وي منل شوی، پر شا د خنجر ګوزار بولي.

محمود عباس
محمود عباس

فلسطیني مشر محمود عباس د واشنګټن له پرونۍ موافقو وروسته په یوه بیان کې وویل: "په سیمه کې به تر هغو سوله او ثبات را نه شي چې اسرائیل غضب پای ته نه وي رسولی."

په دغو تړونونو کې د اسرائیل هغه ژمنه شامله ده چې له خپلې خاورې سره ‌یې د لوېدیځې غاړې د ځینو برخو د یوځای کولو د ځنډولو لپاره کړې ده.

دا هغه سیمې دي چې فلسطیینان‌ یې د خپل راتلونکي احتمالي دولت د خاورې برخه بولي.

XS
SM
MD
LG