د لاسرسۍ وړ لېنکونه

تازه خبر
شنبه ۱۰ لړم ۱۳۹۹ کابل ۱۱:۴۳

افغانستان

ایران د افغان دولت او طالبانو ترمنځ د خبرو د پیلېدو ملاتړ وکړ

د ایران د بهرنیو چارو وزیر محمد جواد ظریف او د افغانستان د بهرنیو چارو سرپرست وزیر محمد حنیف اتمر

د ایران د بهرنیو چارو وزیر وایي، هېواد یې د افغانستان د دولت او طالبانو ترمنځ د خبرو د پیلېدو ملاتړ کوي.

محمد جواد ظریف دا څرګندونې پرون د افغانستان د بهرنیو چارو له سرپرست وزیر حنیف اتمر سره په ټیلیفوني خبرو کې کړې دي.

د افغانستان د بهرنیو چارو وزارت له‌خوا په خپره شوې خبرپاڼه کې ویل شوي چې دواړو لورو د سولې د خبرو او د یوه سمدستي اوربند د ټینګېدو لپاره د سیمې او نړۍ د اجماع پر اهمیت او هم په دې پروسه کې د ګاونډیو او د سیمې د هېوادونو د رول په اړه خبرې وکړې.

د خبرپاڼې له مخې ښاغلی اتمر د افغانستان د سولې په بهیر کې د ایران د همکارۍ د دوام غوښتنه وکړه.

د افغانستان د بهرنیو چارو سرپرست وزیر د افغانستان د سولې په بهیر کې د ایران د همکارۍ د دوام غوښتنه داسې مهال کوي چې د تېرې شنبې په ورځ د قطر په پلازمېنه دوحه کې د افغانانو ترمنځ د سولې د خبرو په مقدماتي غونډه کې د ایران په استازیتوب چا برخه وانه‌خیسته.

د اجنډا له مخې په پام کې وه چې د بهرنیو چارو وزیر دې غونډې ته وینا وکړي، خو ښاغلي اتمر وروسته وویل چې له امریکا سره د ایران د اختلاف له امله جواد ظریف په دې غونډه کې ګډون ونه‌کړ.

د ورځې تازه خبرونه دلته ولولئ

میوند قول اردو: هلمند کې د طالبانو د نظامي کمېسیون مرستیال ووژل شو

ارشیف، هلمند کې د افغان ځواکونو عملیات

افغان پوځي چارواکي وایي چې په هلمند کې یې د طالبانو د نظامي کمېسیون مرستیال وژلی دی.

۲۱۵ میوند قول اردو په خبرپاڼه کې څرګندوي چې ملا امان‌الله له اتو نورو طالبانو سره د ناوې ولسوالۍ په خسراباد سیمه کې د جمعې په ورځ د هوایي برید پر مهال ووژل شو.

طالبانو تر اوسه په دې اړه څه نه‌دي ویلي.

چارواکي: کندز کې ۴ طالبان خپل جوړ کړي ماین وژلي

ارشیف، د کندز پولیس

په کندز کې د پوځي چارواکو په وینا څلور طالبان هغه ماین وژلي دي چې خپله‌یې جوړ کړی و.

په شمال ختیځ زون کې د پامیر ۲۱۷ قول اردو مرستیال ویاند عبدالهادي جمال وایي، څلور طالبان د جمعې په ورځ د (نواباد اندرابي) په کلي کې چې د خان‌اباد مربوط سیمه ده د ماین د چاودنې پر مهال ووژل شول او دوه تنه‌یې ټپیان شول.

طالبانو په دې اړه څه نه‌دي ویلي.

افغانستان، پاکستان، بنګله‌دېش او ځینو نورو هېوادونو کې د فرانسې ضد مظاهرې

کابل کې د فرانسې ضد پرونۍ مظاهره

لسګونه زره کسانو پرون په افغانستان، پاکستان، بنګله‌دېش او ځینو نورو اسلامي هېوادونو کې د فرانسې په ضد مظاهرې وکړې.

دوی د اسلام د پیغمر حضرت محمد د کاریکاتور د خپرولو له حقه د فرانسې د دفاع په غبرګون په غصه دي.

په فرانسه کې بیا ګڼ اضافي پوځیان د امنیت د تأمین لپاره ځای پر ځای شوي.

ولسمشر امانوئل مکرون جمعه د نیس ښار هغه سیمه ولیده او خلکو ته‌یې خبرې وکړې چې په‌کې یوه بریدګر درې تنه د چړې په ضربو وژلي و. مکرون دا یوه "اسلامي ترهګریزه حمله" وبلله.

مکرون وویل چې فرانسه د خپلو ارزښتونو په خاطر تر برید لاندې راغلې.

نامعلومو وسله‌والو کندهار کې یو مخکېنی څارنوال وواژه

ارشیف، د کندهار پولیس

نامعلومو وسله‌والو د شبیر احمد قیومي په نوم د کندهار یو مخکېنی څارنوال په ډزو سره وژلی دی.

د کندهار ولایت مطبوعاتي دفتر ازادي راډیو ته وویل چې پر شبیر احمد قیومي باندې دوه موټرسایکل سپرو وسله‌والو د ښار په نهمه حوزه کې ماسپښين مهال برید کړی او هغه‌یې وژلی دی.

قیومي څو کاله مخکې د کندهار د استېناف څارنوال، مدافع وکیل او یو ځل ولسي جرګې ته کاندید هم و.

د هغه د وژل کېدو مسؤلیت تر اوسه چا نه‌دی منلی.

د افغانستان د بایسکل چلونې ملی ټیم لوبغاړي پاکستان ته تللي

ارشیف، یو شمېر افغان بایسکل چلوونکي

د افغانستان د بایسکل چلونې د ملی ټیم لوبغاړي پاکستان ته تللي څو له اسلام‌اباد تر مري په یو لړ سیالیو کې برخه واخلي.

د بایسکل چلونې د فدراسیون مشر فضل احمد فضلي ازادي راډیو ته وویل چې د پاکستان ۱۲۰ کورني ټیمونه او د افغانستان د ملي ټیم شپږ لوبغاړي په دې لوبه کې ګډون کوي چې یکشنبه له اسلام‌اباد تر مري ترسره کېږي.

فضلي هیله وښوده چې افغان لوبغاړي اتلولۍ ته ورسېږي.

دی زیاتوي: "موږ چې ټیم غوره کاوه همدا هدف و او ځکه مو لېږلی چې موږ به دا وار له پاکستانه اتلولي راوړو، خو بیا هم لوبې دي د هغوی خپل مُلک دی لږ به ستونزمن وي زموږ لوبغاړو ته."

د بایسکل چلونې د فدراسیون رئیس په خبره چې افغان لوبغاړو دې لوبې ته له مخکې ډېر تمرینونه کړي او د افغانستان یو ټور یې وهلی دی.

فضلي وویل په پاکستان کې د هلکانو تر دې لوبو وروسته به په افغانستان کې د "ملالې" په عنوان د نجونو د بایسکل چلونې سیالۍ هم ترسره کړي.

'افغانستان کې د استرالیايي پوځیانو بد چلند په اړه څېړنو پایله دې خپره شي'

ارشیف، افغانستان کې یو شمېر استرالیايي ځواکونه

د بشري حقونو یو شمېر استرالیايي، افغان او نړیوالو ډلو د استرالیا له پوځ غوښتي چې په افغانستان کې د استرالیايي پوځیانو د بد چلند د تورونو په اړه د څېړنو پایله خپره کړي.

د بخښنې نړیوال سازمان امنېسټي انټرنشنل، سیف دې چېلډرن او د افغانستان د انتقالي عدالت د همغږۍ ډلې په شمول ۲۵ سازمانونو د استرالیا پوځي چارواکو ته په یوه لیک کې دا غوښتنه مطرح کړې ده.

دا پرانیستی لیک پرون جمعه د نړیوال عدالت لپاره د اسټرالیايي مرکز په وېب‌پاڼه خپور او په‌کې د استرالیا د دفاعي ځواکونو د سرمفتش مرستیال جنرال پاول بریرتون مخاطب شوی.

په دې لیک کې راغلي چې د استرالیا دفاعي ځواکونو سرمفتش څلور کاله وړاندې د هغو ادعاو څېړل پیل کړي چې له مخې یې ځیني استرالیايي پوځیان په ۵۵ قضیو کې په ناقانونه وژنو او له ملکیانو او بندیانو سره په ظالمانه چلند تورن شوي دي.

د بشري حقونو دغو مدافع ډلو ویلي له دې چې د استرالیا د سرمفتش څېړنې په بشپړېدو دي، نو باید پایلې یې له ټولو سره شریکې شي.

د استرالیا حکومت او د پوځ سرمفتش تر اوسه پورې د بشري حقونو د دغو ډلو د لیک په ځواب کې څه نه‌دي ویلي.

'ارغنداب ولسوالۍ کې جګړې شااوخوا ۱۰۰ کورنۍ بې‌ځايه کړي'

بې‌ځایه شوي خلک

په کندهار کې د کډوالو چارو ریاست وايي، په ارغنداب ولسوالۍ کې د جګړې له کبله شااوخوا ۱۰۰ کورنۍ بې کوره شوي دي.

د دې ادارې چارواکي وايي دا کورنۍ د کندهار ښار ته کډه شوي او په ناوړه وضیعت کې دي.

په سیمه کې د ازادي راډیو خبریال د چارواکو له خولې وايي، په ارغنداب ولسوالۍ د سه شنبې په شپه د طالبانو له برید وروسته ولسوالۍ ته نږدې پراته ولسي وګړي د خپلو کورونو پرېښودو ته اړ شول.

د کندهار د کډوالو د چارو ریاست وايي، د دې کورنیو سروې یې پیل کړي او ښايي په نږدې وخت کې ورته مرستې ورسوي.

دا اداره وايي په روان کال کې ۱۵۰۰ کورنۍ په کندهار کې د خپلو کورونو پرېښودو ته اړ شوي دي.

ارزګان کې لا هم د وسله‌والو طالبانو او حکومتي ځواکونو جګړه روانه ده

د ارزګان نقشه

د ارزګان د دهراود ولسوالۍ د امنیې قومندان وايي، د دې ولسوالۍ په بازار کې لا هم د وسله‌والو طالبانو او حکومتي ځواکونو ترمنځ جګړه روانه ده.

جان محمد کریمي څو ساعته مخکې ازادي راډیو ته وویل چې نیم بازار لاهم د طالبانو په ولکه کې دی.

هغه زیاته کړه: "دې خوا نیم بازار زموږ په واک کې دی. دښمن د بازار له غرب څخه ګټه اخیستې، هلته چې مارکیټونه دي له دې ځایه جګړه کوي او د روغتون شاته چې کورونه دي له دې کورونو جګړه کوي."

تر دې مخکې د ارزګان د والي ویاند احمد شاه ساحل ازادي راډیو ته ویلي وو چې تېره شپه افغان هوايي ځواکونو د دهراود بازار په شااوخوا سیمو کې پر طالبانو هوايي بریدونه کړي او لږترلږه ۳۷ وسله‌وال یې وژلي دي.

د ساحل په وینا سیمې ته د طالبانو په شاه تبولو لپاره تازه نوي ځواکونه هم استول شوي دي.

طالبانو له تېرو دوو ورځو راهېسې د دهراود ولسوالۍ پر مرکز پراخ بریدونه پیل کړي دي.

خپله طالبانو د د هراود د وروستۍ جګړې په اړه تبصره نه‌ده کړې.

پروان کې ۵ تنه د یوه ځوان د وژلو په تړاو نیول شوي

ارشیف

پروان کې چارواکي وايي، پنځه تنه‌یې د یو ۲۸ کلن کس د وژلو په تړاو نیولي دي.

د پروان د امنیې قومندانۍ د مطبوعاتي دفتر مشر سلیم نوري ازادي راډیو ته وویل، پولیسو دا کسان د چاریکار ښار په یوولسمه ناحیه کې د پنجشنبې په ورځ نیولي دي.

راپورونه وايي تر دې دوه ورځې مخکې یو ځوان هلک په چاریکار کې په ډزو وژل شوی و.

د دې پېښې علت او انګیزه تر اوسه روښانه نه‌ده.

چارواکي: بدخشان کې هوايي بريد ۲۰ وسله‌وال طالبان ووژل

ارشیف، د افغان ځواکونو هوايي حمله

د بدخشان ولایت چارواکي وايي، د بر یفتل په دوابه سیمه کې پرون چهارشنبه شل تنه وسله‌وال طالبان په هوايي برید کې ووژل شول.

د بدخشان ولایت د امنیه قوماندانۍ ویاند ثناالله روحاني ازادي راډیو ته په دې اړه وویل: "هوايي ځواک پر هغو سنګرونو چې په‌خوا د ولسي پاڅونوالو وو او طالبانو هغه سیمه نیولې وه، برید وکړ چې د طالبانو نږدې ۳ مورچې ویجاړې شوي او د دولت ۲۰ وسله‌وال مخالفان وژل شوي او ۷ نور ژوبل شوي دي"

طالبانو په دې اړه څه نه‌دي ویلي.

د راپورونو له مخې طالبانو نږدې دوې اوونۍ وړاندې د بدخشان ولایت د مرکز فیض اباد ښار په اتمه حوزه کې د بریفتل سیمه ونیوله.

د کاپیسا امنیه قوماندان له دوو نورو سره په یوه غلچکۍ حمله کې ټپي شو

د کاپیسا ولایت امنیه قوماندان فرید احمد مشعل

د کاپیسا ولایت امنیه قوماندان فرید احمد مشعل له دوو تنو نورو سره د طالبانو په یوه غلچکۍ حمله کې ټپي شو.

د کاپیسا د امنیه قوماندانۍ ویندوی عبدالشایق شورش ازادي ته وویل چې دا پېښه پرون مازدیګر وشوه.

هغه زیاته کړه: "قوماندان صاحب د اله‌سای ولسوالۍ د لیدو لپاره تللی و، کله چې بېرته راستنېدو د اله‌سای او تګاب ترمنځ د کورغل په سیمه کې د دښمن له لوري غلچکۍ برید وشو، دوه ساعته جګړه وشوه او له بده مرغه قوماندان صاحب، د پولیسو د امنیت مدیر او یو سرتېری سرسري ټپیان شول او د قوماندان صاحب چلوونکی شهید شو."

طالبانو د دې پېښې په اړه لا څه نه‌دي ویلي.

'زلمي خلیلزاد او سکاټ مېلر له ملا عبدالغني برادر سره لیدلي'

ارشیف، زلمی خلیلزاد په قطر کې له یو شمېر طالب چارواکو سره د لیدو پر مهال.

د طالبانو د قطر دفتر ویاند وايي، د افغانستان د سولې لپاره د امریکا ځانګړي استازي زلمي خلیلزاد او د امریکايي ځواکونو عمومي قوماندان جنرال سکاټ مېلر د طالبانو د سیاسي دفتر له مشر ملا عبدالغني برادر سره وکتل.

د محمد نعیم په وینا په دې کتنه کې چې پرون ماښام په دوحه کې وشوه، دواړو خواوو د امریکا او طالبانو د موافقې د تطبیق، د طالبانو د نورو بندیانو د خلاصون، له تورو لېستونو د طالب مشرانو د نومونو د ایستلو او د جګړې د زیاتېدو پر عواملو خبرې وشوې.

وسله‌والو طالبانو په وروستیو کې د افغانستان په بېلابېلو سیمو کې خپلې جګړې ته زور ورکړی دی.

چارواکي: بغلان کې ۱۸ وسله‌وال طالبان ووژل شول

ارشیف، بغلان کې د افغان ځواکونو عملیات

د بغلان امنیتي چارواکي وايي چې په دغه ولایت کې په یو لړ هوايي او ځمکنیو عملیاتو کې ۱۸ وسله‌وال طالبان وژل شوي دي.

د بغلان امنیه قوماندان مل پاسوال محمد یونس صمیمي وايي، په دې عملیاتو کې چې د بغلان په خوست ولسوالۍ کې وشول، ۱۵ نور وسله‌وال طالبان ژوبل شوي دي.

دی همداراز وايي چې په دې ولسوالۍ کې ۲۵ کلي د دولت له وسله‌والو مخالفانو تصفیه شوي دي.

په بغلان کې د ازادي رادیو خبریال وايي چې طالبانو څو ورځې وړاندې پر دې ولسوالۍ له څو خواوو حملې پیل کړې وې.

وسله‌والو طالبانو په دې اړه څه نه‌دي ویلي.

'طالبانو د ارزګان د دهراوود ولسوالۍ بازار او امنیه قومانداني نیولي'

د افغانستان په عمومي نقشه کې ارزګان ولایت

ځیني راپورونه وايي چې وسله‌والو طالبانو د ارزګان ولایت د دهراوود ولسوالۍ بازار او امنیه قومانداني نیولي دي.

پر دې ولسوالۍ له تېرو څو ورځو راهیسې د طالبانو حملې روانې دي.

په ولسي جرګه کې د ارزګان د خلکو یوه استازي بسم‌الله جان محمد او د دهراوود ځینو اوسېدونکو نن ازادي راډیو ته وویل چې طالبان د دهراوود بازار ته داخل شوي او امنیه قومانداني یې نیولې ده.

بسم‌الله جان محمد وايي چې اوس د ولسوالۍ په بازار کې جګړه روانه ده.

پرون د ارزګان چارواکو ادعا کړې وه چې دې ولسوالۍ ته کمکي ځواک استول شوی دی.

د افغانانو په مشرۍ له سولې بهیر د هند او د منځنۍ اسیا هېوادونو ملاتړ

قطر کې د افغانستان دولت او طالبانو ترمنځ د سولې خبرو پرانیست غونډه

د هند او د منځنۍ اسیا هېوادونو د بهرنیو چارو وزیرانو په ګډه غونډه کې په افغانستان کې پر داسې سولې ټینګار وشو چې واک‌یې د افغانانو وي.

په دې غونډه کې چې د چهارشنبې په ورځ انلاین ترسره شوه، اصلي اجنډا یې د هند او د منځنۍ اسیا د هېوادونو ترمنځ د سوداګرۍ پراختیا وه.

د افغانستان د بهرنیو چارو سرپرست وزیر محمد حنیف اتمر د مېلمه په توګه په دې غونډه کې برخه واخیسته.

د هند، ترکمنستان، ازبکستان، تاجکستان، قرغزستان او قزاقستان د بهرنیو چارو وزیرانو تر غونډې وروسته په ګډ بیان کې وویل چې دوی په افغانستان کې د سولې د داسې بهیر ملاتړ کوي چې مشري یې د افغانانو وي، مالکیت‌یې د افغانانو وي او واک‌یې هم له افغانانو سره وي.

نور راوښيه

XS
SM
MD
LG