د لاسرسۍ وړ لېنکونه

تازه خبر
سه شنبه ۸ تله ۱۳۹۹ کابل ۰۶:۵۱

خبرونه

چین کې د افغان سوداګرو د ستونزو په هواري د بهرنیو چارو وزارت ټينګار

په چین کې د افغان سوداګرو ستونزو ته څېړنه

د افغانستان د بهرنیو چارو وزارت په چین کې د افغان سوداګرو د ستونزو په هواري ټينګار وکړ.

د بهرنیو چارو وزارت ویاند ګران هېواد نن ازادي راډيو ته وویل چې دغه ناسته نن د بهرنیو چارو وزارت د اقتصادي همکاریو مرستیال میرویس ناب او په کابل کې د چین سفیر وانګ‌ ترمنځ وشوه.

نوموړي وویل چې په دغه ناسته کې د چین او افغانستان د اقتصادي همکاریو او سوداګرۍ په پراختیا او پیاوړتیا او د سوداګریزو ستونزو په هواري بحث شوی دی.

په همدې حال کې د سوداګرۍ او پانګونې خونې مرستیال یونس مومند چې په دغه ناسته کې یې حضور درلود ازادي راډيو ته وویل چې د کرونا ویروس تر خپرېدو وروسته سوداګر په چین کې د ویزو ستونزه لري.

په دغه ناسته کې چین ته د پیسو په لېږلو کې ستونزې او صادراتو او وارداتو کې د یو شمېر ستونزو په هواري ټينګار شوی دی.

د ورځې تازه خبرونه دلته ولولئ

عبدالله عبدالله: هیله لرم د قطر مذاکرات پایله ورکړي

عبدالله عبدالله د پاکستان د مشرانو جرګې رئیس صادق سنجنراني سره د لیدنې پرمهال

د افغانستان د ملي مصالحې عالي شورا مشر د پاکستان مشرانو جرګې له مشر سره په کتنه کې وویل، تمه لري چې په قطر کې روانې مذاکرې یوه پایله ورکړي او په افغانستان کې روانه جګړه پای ته ورسېږي.

عبدالله عبدالله چې پرون په درې ورځني سفر پاکستان ته لاړ نن له صدراعظم عمران خان او د مشرانو جرګې له مشر صادق سنجنراني سره وکتل.

ښاغلي عبدالله تر دې مخکې په اسلام اباد کې د پاکستان د سټراټېژیکو مطالعاتو مرکز ته په وینا کې وویل: "موږ په خپل هېواد کې د تروریزم موجودیت نه غواړو، نورو اشخاصو ته هم اجازه نه ورکوو چې له دې خاورې نورو هېوادونو ته ګواښ پېښ کړي، اوسنۍ مذاکرې تر ټولو غوره هیله ده، چې له زغم څخه په استفاده د جګړې د ختمېدو سبب شي."

د ملي مصالحې عالي شورا مشر دا څرګندونې په داسې حال کې کوي، چې د ملګرو ملتونو امنیت شورا څو میاشتې مخکې په یوه راپور کې وویل، تر ۶۰۰۰ زیات پاکستاني جنګیالي او په القاعده پورې تړلي څوسوه وسله وال په افغانستان کې فعال دي.

د 'ای پي ایل' سیالیو په لړ کې نن ډیلي او حیدراباد سره لوبه کوي

په سنرایزرز حیدراباد ټیم کې دوه افغان لوبغاړي راشد خان او محمد نبي هم شامل دي. 

د هندوستان د کرکټ غوره لیګ یا 'ای پي ایل' سیالیو په لړ کې نن د ډیلي کاپیټلز او سنرایزرز حیدراباد ټیمونه په خپلو کې سیالي لري.

دواړه ټیمونه به د کابل پر وخت د ماښام شپږنیمې بجې د ابوظبۍ د کرکټ په میدان کې سره مخامخ شي.

په سنرایزرز حیدراباد ټیم کې دوه افغان لوبغاړي راشد خان او محمد نبي هم شامل دي.

په پرونۍ مسابقه کې چې د رویال چلنجرز بنګلور او ممبۍ انډینز ترمنځ وه، مسابقه چې په شلو اوورونو کې مساوي شوه سوپر اوور ته ووتله، خو وروسته په اضافي اوور کې رویال چلنجرز ټیم وتوانېد سیالي وګټي.

ډایکنډي کې د سړک غاړې ماین چاودنه کې ۱۴ تنه ملکیان وژل شوي

ارشیف

د ډایکنډي د والي دفتر وايي د سړک غاړې ماین په چاودنه کې ۱۴ تنه ملکیان وژل شوي دي.

د ډایکنډي د والي ویاند نصر اله غوري ازادۍ راډیو ته وویل، چاودنه نن سهار هغه وخت وشوه، چې په کجران ولسوالۍ کې یو مسافر-وړونکی موټر پر ښخ کړي ماین وربرابر شو.

هغه زیاته کړه: "په پېښه کې له بده مرغه ۷ ښځې، ۵ ماشومان او د چلوونکي په ګډون ۲ سړي وژل شوي دي."

د والي ویاند وايي په پېښه کې چې د طالبانو تر ولکې لاندې سیمه کې شوې، درې کسان ټپیان شوي دي.

د پېښې مسئولیت کومې ډلې نه دی منلی.

د بیلاروس د کړکېچ اواري لپاره د فرانسې هڅې

د فرانسې ولسمشر ایمانویل مکرون

د فرانسې ولسمشر ژمنه وکړه، چې اروپا به په بیلاروس کې د روان کړکېچ د اواري لپاره په منځګړیتوب کې همکاري وکړي.

ایمانویل مکرون دا خبره په لیتوانیا کې د بیلاروس د اپوزیسیون له مشرې سویتلانا څیخانوفسکایا سره تر کتنې وروسته وکړه.

د بیلاروس د اپوزیسیون مشرې وویل، د فرانسې ولسمشر په بیلاروس کې د روان کړکېچ د حل لپاره له خپلې وسې سره د همکارۍ ژمنه ورسره وکړه.

بلخوا د لیتوانیا ولسمشر ګیتاناس ناوسیدا چې د خپل فرانسوي سیال تر څنګ و، په ویلنیوس کې خبریالانو ته په خبرو کې وویل، د ولسمشرۍ تېرې ټاکنې، چې په نتیجه کې یې الکساندر لوکاشینکا بریالی اعلان شوی، عادلانه نه وې.

هغه زیاتوي: "الکساندر لوکاشینکو ټاکنې نه دي ګټلي، دا ټاکنې غیرعادلانه وې او لاسوهنې په کې شوي، تر هغو چې په دغه هېواد کې تازه ټاکنې شوې نه وي، موږ لوکاشینکا د مشروع مشر په توګه نه شو منلی."

که څه هم لوکاشینکا ځان د اګسټ د نهمې د ولسمشرۍ ټاکنو ګټونکی بولي، خو اپوزیسیون چې له هغې راهیسې اعتراضونه کوي، وايي په ټاکنو کې درغلي شوې او ګټونکې څیخانوفسکایا ده.

پولنډ له خپلې خاورې ۵ تاجکستانيان وایستل

شک کېږي چې دغو کسانو د پولنډ او اوکراین وګړي په پولنډ کې د تروریستي اعمالو لپاره ګمارل. 

د پولنډ چارواکو د تاجکستان ۵ وګړي له اسلامي دولت ډلې یا داعش تروریستي ډلې سره د اړیکو په شک له خپلې خاورې وایستل.

شک کېږي چې دغو کسانو د پولنډ او اوکراین وګړي په پولنډ کې د تروریستي اعمالو لپاره ګمارل.

پولنډ راډیو پرون راپور ورکړ، د تاجکستان د دغو وګړو له ډلې څلور یې په مې میاشت کې نیول شوي وو او پنځم چې په ډسېمبر میاشت کې له پولنډه تښتېدلی و، چې وروسته د ټروریزم ضد نړیوالو ادارو په مرسته ونیول شو.

د پولنډ د یوې امنیتي ادارې په وینا دغه پنځم مشکوک کس سوریې ته سفر کاوه او غوښتل یې د داعش له تروریستي ډلې سره ملګری او په القاعده پورې له یوه تروریستي سازمان سره نږدې تماسونه ټینګ کړي.

د تاجکستان دغه پنځه وګړي پولنډ او د شنګهن حوزې نورو غړو هېوادونو ته له ننوتلو منع شوي دي.

د نګورنو قره‌باغ​​​​​​​ لانجمني سیمې پر جګړه درېیمې ورځې ته وغځېده

د اذرباییجان دفاع وزارت وايي، د ارمنستان پوځ پر داش کیسان سیمه د توپونو ډزې کړي، خو ارمنستان دا تورونه ناسم بللي دي. 

د ارمنستان او اذرباییجان د ځواکونو ترمنځ د نګورنو قره‌باغ لانجمني سیمې پر سر وسله واله شخړه نن درېیمې ورځې ته وغځېده.

په داسې حال کې چې په نړیواله کچه د دې جګړې د سمدستي بندېدو غوښتنه شوې، دواړه لوري یو او بل جګړې ته په لمن وهلو تورنوي.

په دې جګړه کې له دواړو لوریو د لسګونو کسانو د وژل کېدو راپورونه ورکړل شوي دي.

بلخوا د امریکا د بهرنیو چارو وزیر مایک پامپیو چې په یونان کې له خپل سیال سره تر کتنې وروسته، په یوه کنفرانس کې د ناګورنو قره باغ د جګړې په اړه وویل: "د یونان د بهرنیو چارو وزیر او ما د نګورنو قره‌باغ پر شخړې خبرې وکړې، اړتیا ده، چې دواړه لوري دغه تاوتریخوالی ودروي او څومره ژر چې ممکنه وي واقعي مذاکرو ته د ستنېدو لپاره د مینسک ډلې له مشترکینو سره له نږدې کار وکړي."

د اذرباییجان دفاع وزارت وايي، د ارمنستان پوځ پر داش کیسان سیمه د توپونو ډزې کړي، خو ارمنستان دا تورونه ناسم بللي دي.

بلخوا د ارمنستان دفاع وزارت وايي، وسله واله جګړه په تېزۍ سره روانه ده.

په پام کې ده د ملګرو ملتونو امنیت شورا نن ناوخته پر دې جګړې د بحث لپاره بېړنۍ غونډه راوبولي.

عبدالله: هېچا ته د تروریزم په هدف له خپلې خاورې د ګټنې اجازه نه ورکوو

د ملي مصالحې عالي شورا مشر عبدالله عبدالله

د ملي مصالحې عالي شورا مشر وايي، افغانستان هېچا ته د تروریزم په هدف له خپلې خاورې د استفادې یا ګټنې اجازه نه ورکوي.

عبدالله عبدالله نن په اسلام اباد کې د پاکستان د سټراټېژیکو مطالعاتو مرکز ته په وینا کې وویل: "موږ په خپل هېواد کې د تروریزم موجودیت نه غواړو، نورو اشخاصو ته هم اجازه نه ورکوو چې له دې خاورې نورو هېوادونو ته ګواښ پېښ کړي، اوسنۍ مذاکرې تر ټولو غوره هیله ده، چې له زغم څخه په استفاده د جګړې د ختمېدو سبب شي."

عبدالله عبدالله چې پرون پاکستان ته لاړ نن او سبا هم د پاکستان له عالي رتبه چارواکو سره خبرې کوي.

د ملي مصالحې عالي شورا مشر دا څرګندونې په داسې حال کې کوي، چې د ملګرو ملتونو امنیت شورا څو میاشتې مخکې په یوه راپور کې وویل، تر ۶۰۰۰ زیات پاکستاني جنګیالي او په القاعده پورې تړلي څوسوه وسله‌وال په افغانستان کې فعال دي.

ارزګان چارواکي: ګیزاب او خاص ارزګان کې ۱۸ وسله وال طالبان وژل شوي

د ارزګان نقشه

په ارزګان ولایت کې د ملي اردو یو ویاند وايي، په هوايي بریدونو کې د دولت ۱۸ مخالف وسله‌وال وژل شوي دي.

په دغه ولایت کې د ملي اردو د څلورمې پلې لوا ویاند جګړن اقا محمد صافي ازادۍ راډیو ته وویل: "ځینو وسله‌والو غوښتل تېره شپه په ګیزاب او خاص ارزګان ولسوالیو کې د امنیتي ځواکونو پر پوستو بریدونه وکړي، چې هوايي ځواک په نښه کړل"

هغه زیاته کړه: "دښمن ته ۲۳ نفره تلفات واوښتل، چې له دې جملې ۱۷ نفره یې په ساحه کې مړه پراته وو او ۵ نفره شدید ټپیان لري."

ویل شوي، وسله‌والو خپل یو مړی له ځانونو سره وړی دی.

ښاغلی صافی وايي په ځوابي عملیاتو کې د وسله‌والو ځینې مرکزونه او پوځي تجهیزات هم ویجاړ کړای شوي دي.

وسله‌والو طالبانو تر اوسه په دې اړه څه نه‌دي ویلي.

بامیان کې د کچالو او پیازو ۱۶ سړې خونې ګټې اخیستنې ته وسپارل شوې

د بامیان ولایت نقشه

په بامیان و لایت کې د کچالو او پیازو ۱۶ صفر انرژۍ سړې خونې ګټې اخیستنې ته وسپارل شوې.

د افغانستان د کرنې او مالدارۍ وزارت ویاند اکبر رستمي نن ازادي راډیو ته وویل، چې دغه خونې د بامیان په کهمرد ولسوالۍ کې د کرنیز محصولاتو د مدیریت پروژې پر مټ د نږدې اته میلیونه افغانیو په لګښت جوړې شوې دي.

هغه زیاته کړه: "په بامیان ولایت کې د کچالو او پیازو د ساتنې ۱۶ صفر انرژۍ سړې خونې ګټې اخیستنې ته وسپارل شوې، ټاکل شوې چې په راتلونکې یوه میاشتې کې به په دغه ولایت کې ۱۳۹ نورې سړې خونې هم ګټې اخیستنې ته وسپارل شي، چې هره خونه کې به ۱۲ ټنه کچالو ساتلو ظرفیت لري."

د ښاغلي رستمي په خبره، روان کال په بامیانو ولایت کې د کچالوو درې لکه اتیا زره ټنه حاصلات تر لاسه شوي دي.

یاد وزارت په پلان کې لري، چې په بامیان، میدان وردګ، غور، کابل، بادغیس او یو شمېر نورو هغه ولایتونو کې چې کچالو په کې زیات کرل کېږي شااوخوا ۲۵۰۰ سړې خونې جوړې کړي.

ولسمشر غني د افغانستان د خونو فدراسیون پرانیست

افغان ولسمشر محمد اشرف غني

جمهور رئیس محمد اشرف غني د افغانستان د خونو فدراسیون رسماً پرانیست.

له ارګه په خپره شوې خبر پاڼه کې راغلي، ښاغلي غني په دې پرانیست غونډه کې وویل، چې افغانستان د خونو فدارسیون په پرانیستلو سره د اقتصاد یوه واحده ژبه او ادرس پیدا کړ.

د افغانستان د خونو فدراسیون عمومي رئیس محمد اسماعیل غضنفر وویل، خصوصي سکټور له پاشلتیا تېر شوی او اوس د خونو فدراسیون په جوړېدو سره یې د افغانستان د هوساینې لپاره تر یوه چتر لاندې استوار ګامونه واخیستل.

د خونو فدارسیون کې د کرنې او مالدارۍ تولیداتو، د ښځو د سوداګرۍ او صنایعو، د دوکاندارنو او کسبګرو، د پانګونې او سوداګرۍ، د کانونو او صنایعو او په افغانستان کې د نړیوالې سوداګرۍ خونې غړیتوب لري.

د اقتصادي فعالیتونو انسجام، د کار ایجاد او د بې وزلۍ راکمول، د متشبثینو او سوداګرو ښځو پیاوړتیا، د پانګونې جلبول، پر ځان د اتکا تمرکز، د مسلکي او فني زده کړو برابرول، د سوداګریزو شخړو حلول، د باور د فضا پیاوړي کول، د کورنیو تولیداتو وده او د خصوصي سکټور، دولت او نړیوالو شریکانو ترمنځ د متقابلې همکارۍ هڅې د دغه فدراسیون د جوړولو موخه یاده شوې.

ټرمپ او جوبایډن نن په یوه مناظره کې ګډون کوي

ولسمشر ډونالد ټرمپ او د ډیموکرات ګوند کاندید جوبایډن

په پام کې ده چې د امریکا له انتخاباتو پنځه اوونۍ مخکې د ولسمشرۍ دوه کاندیدان جمهوري غوښتونکی ولسمشر ډونالد ټرمپ او د ډیموکرات ګوند کاندید جوبایډن نن د سپټمبر په ۲۹مه په یوه مناظره کې ګډون وکړي.

دا مناظره داسې مهال جوړېږي چې نیویارک ټایمز ورځپاڼې په یوه تحقیقاتي راپور کې د ولسمشر ټرمپ د مالیو له سوابقو پرده پورته کړې او تمه ده چې د دې یو نیم ساعته مناظرې بحثونه هم تر ډېره پر همدې موضوع متمرکز وي.

په راپور کې ویل شوي چې ټرمپ په تېرو ۱۷ کلونو کې یا هېڅ مالیه نه‌ده ورکړې او که‌یې ورکړې هم ډېره کمه وه.

ښاغلي ټرمپ د نیویارک ټایمز راپور جعلي خبر بللی او پرون‌یې پر ټویټر ولیکل چې ده څو میلیونه ډالر مالیه ورکړې، خو زیاتوي چې دی هم د نورو وګړو په څېر د مالیې د کرېډېټ او تخفیف مستحق دی.

پر دې سربېره بایډن په پام کې لري چې د کرونا ویروس د مخنیوي لپاره د ولسمشر ټرمپ پر پلانونو او نورو پالېسیو هم انتقادونه وکړي.

'د افغانستان-خېبر پښتونخوا ټولې لارې به د اوونۍ څلور ورځې پرانیستل شي'

ارشیف

پاکستاني چارواکو اعلان کړی چې په خېبر پښتونخوا کې به له افغانستان سره ټولې لارې د اوونۍ څلور ورځې پرانیزي.

د پاکستان د کورنيو چارو وزارت د دوشنبې په ورځ (د سپټمبر په ۲۸مه) ويلي چې د شنبې، سې شنبې، چهارشنبې او پنجشنبې په ورځو به دا لارې د پلي تګ راتګ لپاره پرانیستې وي.

ازادي راډيو ته په رسېدلي دغه بيان کې ويل شوي چې د تورخم لار به يوازې د هغو افغانانو لپاره پرانیستې وي چې پاسپورټ او ویزه ولري.

دا نه‌دي ويل شوي چې دا لارې به څه وخت خلاصې شي.

د افغانستان او پاکستان ترمنځ خلک د تورخم ترڅنګ د غلام خان، انګور اډې، خرلاڅو او مومندو پر لارو تګ راتګ کوي.

دا پرېکړه وروسته له هغه شوې چې څو موده مخکې پاکستان د کرونا ویروس د مخنیوي په هدف له افغانستان سره لارې تړلې وې.

د کوسوو د استخباراتي ادارې پخوانی مشر هاګ کې محکمې ته وړاندې شو

د کوسوو بیرغ

د کوسوو د استخباراتي ادارې پخوانی مشر په هاګ کې د جنګي جرایمو په تور محکمې ته وړاندې شو.

صالح مصطفی د دوشنبې په ورځ (د سپټمبر په ۲۸مه) د استېناف محکمې ته له مراجعې ډډه وکړه.

ده وویل چې د استېناف تر مراجعې مخکې به له خپل مدافع وکیل سره مشوره وکړي.

دی ۳۰ ورځې لري چې د استېناف محکمې ته مراجعه وکړي.

مصطفی د تېرې پنجشنبې په ورځ (د سپټمبر په ۲۴مه) نېټه د کوسووو په پلازمېنه پریشتینیه کې په خپل کور کې ونیول شو.

دی لومړی الباني نژاده دی چې د ۱۹۹۰مې لسیزې د جګړې په تړاو د جنګي جرایمو په تور نیول کېږي.

د کوسوو سپېشلېسټ چېمبرز په نوم په هاګ کې محکمه د کوسوو د ازادۍ ځواک د هغو غړو پر وړاندې تورونه څېړي چې په ۱۹۸۸ او ۹۹ کلونو کې له صربیا څخه د خپلواکۍ د جګړې پر مهال په جنګي او بشریت ضد په جرایمو تورن دي.

دا محکمه د کوسوو د قانون له مخې پر مخ ځي، خو د شاهدانو د خوندیتوب په خاطر په هالند کې فعالیت کوي.

امانوئل مکرون د بلاروس رژيم د مخالفانو له مشرې سره ویني

د فرانسې ولسمشر امانوئل مکرون

ټاکل شوې ده د فرانسې ولسمشر امانوئل مکرون د بلاروس رژيم د مخالفانو له مشرې سویتلانا تيخانوفسکایا سره په لتوانیا کې وویني.

تيخانوفسکایا ادعا کوي چې دې په بلاروس کې د اګسټ د نهمې ولسمشریز انتخابات ګټلي او له ډېرې مودې واکمن الکساندر لوکاشینکا ته‌یې ماتې ورکړې.

دا وروسته له هغه لتوانیا ته لاړه چې لوکاشینکا د لاریون کوونکو ځپنه پیل کړه. دی دا خبره ردوي چې انتخابات‌یې بایللي دي.

لوکاشینکا په پټه د سپټمبر په ۲۳مه نېټه د لوړې مراسم ترسره کړل او په نتيجه کې يې پر کور او پر نړیواله کچه غصه راوپاروله.

لوېدیځ هېوادونه لوکاشینکا د بلاروس د مشروع ولسمشر په توګه په رسمیت نه‌پېژني او له ده‌یې غوښتي چې په سوله‌ییزه توګه واک انتقال کړي.

له ۵۱ ورځو راهيسې لاریون کوونکي د بلاروس لارو کوڅو ته راوځي او له لوکاشینکا غواړي چې له واکه لیرې شي.

تيخانوفسکایا د خپل سړي پر ځای د ولسمشرۍ په انتخاباتو کې کاندیده شوه، ځکه هغه پولیسو تر انتخاباتو مخکې نیولی وو.

دې ویلي چې د واک ترلاسه کولو وروسته به نوي انتخابات وکړي.

ټرمپ اداره ښايي په عراق کې د امریکا سفارت وتړي

په بغداد کې د امریکا سفارت

که د عراق حکومت د امریکا سفارت امنیت ټینګ نه‌کړي، د ولسمشر ډونالد ټرمپ اداره ښايي په عراق کې امریکايي سفارت وتړي.

د امریکايي خبري اژانسونو د راپور پر اساس، د امریکا د بهرنیو چارو وزیر مایک پومپیو د عراق له صدراعظم مصطفی الکاظمي سره د شنبې په ورځ په ټیلیفوني خبرو کې دا موضوع مطرح کړې ده.

امریکا په دې اړه رسمي اعلان نه‌دی کړی.

امریکا د ایران پر ملاتړ لرونکو ملېشو تور پورې کړی چې په عراق کې د امریکا پر سفارت راکټي حملې کوي او له کاظمي يې غوښتي چې د هغوی مخه ونیسي.

د امریکا په مشرۍ نظامي ائتلاف له بغداده په عراق او سوریه کې د داعش سخت دریځې ډلې پر وړاندې له ۲۰۱۴م کال راهیسې جګړه کوي.

وروسته له هغه چې امریکا په عراق کې د ملېشه ځواکونو پر مرکز هوايي حملې وکړې، د ایران په ملاتړ لاریون کوونکي د ۲۰۲۰ د نوي کال په ورځ په بغداد کې د امریکا سفارت ته ننوتل.

امریکا د عراق پر امنیتي ځواکونو تور پورې کړ چې لاریون کوونکو ته‌یې تر امنیتي چک پوستو د تېرېدو اجازه ورکړې وه.

نور راوښيه

XS
SM
MD
LG