د لاسرسۍ وړ لېنکونه

تازه خبر
پنجشنبه ۲۰ زمری ۱۴۰۱ کابل ۱۲:۰۶

خبرونه

اروپايي ټولنه او کاناډا د تاوتریخوالی زیاتېدل د افغان سولې په زیان بولي

ارشیف

په افغانستان کې د اروپايي ټولنې مأموریت او د کاناډا سفارت، په افغانستان کې د تاوتریخوالي زیاتېدل د سولې د پروسې په زیان وبلل.

دوی په یوه ګډ بیان کې چې پرون ناوخته خپور کړی ویلي، د افغانستان شخړه له پوځي لارې نه‌شي حلېدای او د تاوتریخوالي نه‌منونکی لوړ حد، د سولې له با مفهومه پروسې او د ملګرو ملتونو د منشور له اصولو سره په ټکر کې دی.

په افغانستان کې د وسله‌والو طالبانو له‌خوا د تاوتریخوالي پر زیاتولو افغان حکومت، امریکايي چارواکو او نورو سازمانونو هم انتقاد کړی دی.

د افغانستان د دفاع سرپرست وزیر اسدالله خالد پرون په لغمان کې وویل، د سولې په روانو حساسو شرایطو کې نه‌یوازې دا چې جګړه کمه شوې، بلکې نوره هم زیاته شوې ده.

د فبرورۍ د ۲۹مې د هغې موافقې له مخې چې د امریکا او طالبانو ترمنځ په دوحه کې لاسلیک شوه، طالبانو په افغانستان کې د تاوتریخوالي کمولو ژمنه کړې وه.

د ورځې تازه خبرونه دلته ولولئ

چارواکي: د اوکراين په ختيځ کې سخته جګړه روانه ده

د اوکراين د جګړې تازه انځور

په داسې حال کې چې روسیې د اوکراین په دونباس کې د ټولو صنعتي سیمو د نیولو لپاره پوځي هڅې ګړندۍ کړي، چارواکو نن سهار وویل چې د اوکراین په ختیځ کې د پیسکي ښار په شاوخوا سخته جګړه روانه ده.

په دونیڅک کې د مسکو ملاتړې ادارې یوه چارواکي وویل چې پیسکي چې د دونیڅک د مرکز په شمال لویدیځ لس کیلومترۍ کې د جګړې لومړۍ کرښه کې پروت دی، د روسیې او بیلتونپالو ځواکونو پرې ولکه ټینګه کړې.

خو اوکرایني چارواکو دغه ادعا رد کړې او ویلي يې دي چې دې ښار کې سخته جګړه روانه ده.

د رویټرز د راپور له مخې مسکو پر دونباس سیمې چې دونیڅک او لوهانسک په‌کې شامل دي، وروسته له هغې ډېر تمرکز کړی چې په فبرورۍ کې پر اوکراین د یرغل په لومړیو ورځو کې د پلازمېنې کییف په نیولو کې پاتې راغی.

اشرف غني: زما له وتلو مخکې د جمهوري نظام ستنې د ړنګېدو په حال کې وې

پخوانی ولسمشر

د افغانستان پخوانی ولسمشر اشرف غني وایي، مخکې له دې چې له کابله ووځي او طالبان کابل ته ننوځي، د جمهوري نظام ستنې د ده په وینا د یو شمېر لورو له خوا چې پردې نظام یې معامله کړې وه، د نړېدو په حال کې وې.

ښاغلي غني دغه څرګندونې له اې بي ان افغان خپروندې شبکې سره په یوه نوې مرکه کې کړي دي.

ښاغلي غني د افغانستان د سولې لپاره د امریکا د پخواني ځانګړي استازي زلمي خلیلزاد په ګډون د یو شمېر وتلو افغان څېرو نومونه اخیستي او هغوی یې تورن کړي چې د جمهوري نظام د کمزوري کولو لپاره یې کار کاوه.

اشرف غني په دې مرکه کې د وسله والو طالبانو په وړاندې جګړه کې د افغانستان د وسله والو ځواکونو د روحیې کمزورتیا د جمهوري نظام د ړنګېدو یو بل اساسي عامل بللی دی.

هغه په دې مرکه کې دا هم ویلي چې دی د افغانستان د اساسي قانون له مخې تر اوسه قانوني ولسمشر دی او واک به هغه چاته رسماً وسپاري چې ولس یې غوره کوي.

د افغانستان پخوانی ولسمشر دغه څرګندونې داسې مهال کوي چې د جمهوري نظام د ړنګېدو او واک ته بیا د طالبانو د رسېدو کال په پوره کېدو دی.

د تېر کال د اګست په پنځلسمه طالبانو کابل ونیوه او جمهوري نظام سقوط وکړ.

جو بايډن د اوړي رخصتۍ تېرولو لپاره کارولينا ته تللی

د امریکا ولسمشر جوبایډن

د امریکا ولسمشر جو بایډن پرون جنوبي کارولینا ته ورسېد چې د اوړي رخصتۍ له خپلې کورنۍ سره تېره کړي.

اسوشیتید پریس خبري اژانس ویلي، سپینې ماڼۍ د بایډن د اوړي د رخصتیو د مهالوېش په اړه نور جزیات نه دي ورکړي.

تېر کال د بایډن د اوړي رخصتي د کورونا وبا او له افغانستانه د دوی د ټولو ځواکونو د راوتلو لپاره ګډه وډه شوې وه.

جو بايډن چې له تېرو څو ورځو راهيسې کورونا هم و، تازه يې د کورونا ټسټ منفي راغلی دی.

امريکا د سپاه پاسدارن يو غړی د جان بولټن د وژلو پر توطيې تورن کړی

متحده ایالتونو د ملي امنیت پخوانی سلاکار جان بولټن

د امریکا عدلیې وزارت ویلي، د ایران د سپا پاسداران انقلاب یو غړی د متحده ایالتونو د ملي امنیت د پخواني سلاکار جان بولټن د وژلو په توطې تورن شوی دی.

دغه وزارت په یوه خبرپاڼه کې ویلي، شهرام پور صفي چې په مهدي رضایي مشهور و، د سپاه پاسداران په استازیتوب په امریکا کې خلک د وژنو لپاره استخدامول.

دغه ایرانی وګړی تورن شوی چې غوښتل یې په واشنګټن یا مریلنډ کې د ښاغلي بولټن د وژنې په بدل کې خلکو ته درې لکه ډالره ورکړي.

ویل شوي چې شهرام پور صفي په غالب ګمان دا کار د دې لپاره کاوه چې د ایران د سپاه پاسداران د قدس ډلې د قومندان قاسم سلیماني د وژنې غچ واخلي.

۳۰۰ افغانان له پاکستان اسپانيا ته ولېږدول شول

ارشيف

د هغو افغانانو الوتکه چې افغانستان کې یې له اسپانوي ځواکونو سره کار کړی و، پرون له اسلام اباده د مادرېد خواته روانه شوه.

فرانس پریس اژانس ویلي، دغې الوتکه کې درې سوه کسان سپاره و چې د اسپانیا د ماموریت کارکوونکي او د کورنۍ غړي یې په‌کې شامل دي.

دا خبر د اسپانیا بهرنیو چارو وزارت په یوه خبرپاڼه کې ورکړی دی.

دغو افغانانو په افغانستان کې د ناټو په چوکاټ کې د اسپانیا له ځواکونو او یا سفارت سره کار کړی چې اوس یې د فرانس پریس په وینا ژوند له خطر سره مخامخ و.

د يادونې ده چې په بېلابېلو هېوادونو کې زرګونه هغه افغانان لا هم بهر ته د تللو انتظار کوي چې له بهرنيانو سره کار کړی دی.

د افغانستان او ايرلنډ کرېکټ لوبډلې نن دويمه شل اوريزه لوبه کوي

افغان کرېکټ ملي لوبډله

ټاکل شوې د افغانستان او ایرلنډ د کرېکټ ټیمونه نن خپله دویمه شل اوریزه لوبه ترسره کړي.

د کرېکټ د انلاین معلوماتو د ویبپاڼې له مخې دا لوبه د کابل په وخت ۷ بجې د بلفاست په سټورمونت (Stormont) سټدیوم کې ترسره کېږي.

د دغې لوبلړۍ لومړنۍ لوبه وړمه ورځ په لږ توپیر ایرلند وګټله.

په دغې سیالۍ کې ټولټال ۵ شل اوریزې لوبې پلان شوي دي چې پر خپل وخت به ترسره شي.

د افغان کرېکټ بورډ مسؤلينو وړاندې ويلي وو، افغان لوبډله ايرلنډ سره لوبو ته پوره چمتووالی لري.

د طالبانو اقتصادي کمېسيون د بې کيفيته تېلو د واردولو د مخنيوي غوښتنه کړې

د تېلو ذخيرې

د طالبانو د حکومت اقتصادي کمېسیون افغانستان ته د بې کیفیته تېلو د وارداتو د مخنیوي غوښتنه کړې ده.

دغه کمېسیون په خپله پرونۍ غونډه کې چې د ملا عبدالغني برادر په مشرۍ جوړه شوې وه، نه دي ویلي چې د بې کیفیته تېلو شتون څومره لویه ستونزه ده.

تر دې وړاندې عامو افغانانو د تېلو د ټیټ کیفیت او بې سارې لوړې بیې په اړه ازادي راډیو ته شکایتونه کړي دي.

د طالبانو د حکومت د اقتصادي کمېسیون په دې غونډه کې له افغانستانه بهر ته د زړو اوسپنو د لېږد پر بندیز او ټاپي پروژې هم بحثونه شوي دي.

د طالبانو مشر تازه یو ۱۳ماده یي فرمان صادر کړ

د طالبانو مشر ملاهبت الله اخوندزاده

د طالبانو مشر ملاهبت الله اخوندزاده په افغانستان کې د تېرو شلو کلونو په جګړو کې د خپلو نادرکه شویو غړیو او نورو کسانو په اړه یو دیارلس ماده یې فرمان صادر کړی.

د دغه فرمان له مخې چې متن یې د طالبانو د حکومت ویاند ذبیح الله مجاهد په خپله ټوېټرپاڼه خپور کړی تر ډېره د د ورثه و ترمنځ د دغو نادرکه شویو کسانو تر شاه د پاتې شویو جایدادونو د ترکه کېدو پر څرنګوالي او د هغو د کونډو پر مدني وضعیت څرخي.

د فرمان له مخې حنیفي فقه حکم کوي، هغه کسان چې په جنګونو یا هغو ځایونو کې ورک شوي چې د مرګ احتمال یې ډېر زیات دی او ډېر وخت هم په تېر شوی وي نو هغه مړ حسابېږي.

د دغه فرمان په یوه برخه کې دغه راز ویل شوي چې د محمې ترحکم وروسته به د شهیدانو جایدادونه او ملکیتونو د شریعت د احکامو له مخې د دوی پر ورثو ویشل کېږي.

د طالبانو مشر د تېرو جګړو په ترڅ کې د ورکو شویو کسانو په اړه دغه فرمان داسې مهال صادروي چې تراوسه په دې هېواد کې د ورکو شویو کسانو دقیقه شمېره نه ده معلومه خو ویل کېږي په زرګونو کسان د تېرو جګړو په ترڅ کې تري تم شوی دي.

د روسي ځواکونو په تازه بریدونو کې ۲۴ اوکراینیانو ته مرګژوبله اوښتې

پرنیکوپول کې د روسي توغندي له امله د اوښتو زیانونو انځور

د اوکراین د مرکزي دنیپرو پتروسک د سیمې والي وایي، پرنیکوپول او د مارهانیڅ پر ښارونو د روسیې د تېرې شپې په توغندویي بریدونو کې دیارلس ولسي وګړي وژل شوي او یولس نور ټپیان شوي چې د پنځو وضعیت یې نازک دی.

والینټن ریزنیچونکو وویل، دوه ټپیان د ژغورنې د هڅو سره سره د مارهانیڅ په روغتون کې مړه شول.

هغه ویلي چې ډېر جسدونه د نړېدلو ودانیو تر خاورو لاندې دي او را ایستل یې ډېر ګران کار دی.

روسیې د ملګرو ملتونو د امنیت شورا غونډې جوړېدل غوښتي

د ملګرو ملتونو د امنیت شورا د غونډې یو انځور

په ملګرو ملتونو کې د روسیې استازی وایي، مسکو سبا پنجشنبې د ملګرو ملتونو د امنیت شورا له لوري د یوې غونډې د رابللو غوښتنه کړې چې د اوکراین د زاپوریژیا د اټومي بټۍ په اړه چې روسیې پر اوکراین د پنځه میاشتي یرغل په لومړیو کې نیولې، خبرې وکړي.

په ملګرو ملتونو کې د روسیې د دایمي استازولۍ لومړي مرستیال دیمیتري پولیانسکي داخبره نن تایید کړه او ویې ویل چې روسیې غوښتنه کړې چې د ملګرو ملتونو د اټومي انرژۍ د ادارې مشر رافایل ګروسي د دې غونډې ګډونوالو ته د دغې بټۍ د وضعیت په اړه معلومات ورکړي.

په اوکراین کې له جګړې سره د دغې اټومي بټۍ د خوندیتوب په اړه په دې وروستیو کې د نړیوالو اندېښنې زیاتې شوي دي.

امریکا د ماین پاکۍ لپاره له اوکراین سره ۸۹ میلیون ډالره مرسته کوي

اوکراین کې له جګړې وروسته د سیمې یو انځور

متحدوایالتونو ویلي، له اوکراین سره به د ۸۹ میلیون ډالرو مرسته وکړي څو د روسیې له خوا په دې هېواد کې ښخ شوي ماینونه لیرې کړي.

دا پیسې د ماین پاکۍ د سلو ډلو د فعالیت د لګښتونو، د اړتیاوړ تجهیزاتو د پېرلو او د کسانو د روزنې لپاره په پام کې نیول شوي.

د دې ډلو دنده به د یوه کال لپاره د ماینونو او ناچاودو مهماتو ایستل وي.

د امریکا د بهرنیوچارو وزارت پرون په یوه بیان کې وویل چې د روسیې له بې دلیله یرغل وروسته د اوکراین د خاورې لویه برخه په ماینونو او ناچاودو مهماتو پوښل شوې ده.

اخوا د اوکراین په ختیځه دونېڅک سیمه کې چې له روسیې سره د جګړې په لومړۍ کرښه کې پرته ده پرون یوځل بیا د درنو جګړو راپورونه ورکړل شول.

روسیې په دې سیمه کې د عملیاتو نوې لړۍ پیل کړې چې هدف یې په دونباس سیمه کې د ولکې پراخول دي.

د اوکراین د پوځ ستر درستیز پرون اعلان وکړ چې د روسيې پوځ پر دونېڅک سیمې له څو خواوو د برید هڅه وکړه.

اوکرایني چارواکو ویلي دي چې د دوی ځواکونه په دې سیمو کې کلک مقاومت کوي او خپل سنګرونه یې ساتلي دي.

روسیې د فبرورۍ په ۲۴مه پر اوکراین یرغل وکړ چې په نتیجه کې یې دې هېواد ته د سرو مال ډې تاوانونه رسېدلي دي.

امریکايي پولیسو یو افغان د څلورو کسانو د وژنې په تورن نیولی

ارشیف: د نیو مکسیکو پولیس

یو افغان وګړی پرون په امریکا کې د څلورو نورو مسلمانانو د قتل د مهم تورن په توګه ونیول شو.

د نیو مکسیکو په البوکِرک ښار کې پولیسو له څو ورځنیو پلټنو وروسته د محمد سعید په نوم ۵۱ کلن افغان د څلورو افغان او پاکستاني وګړو د قتل په تور ونیوه.

په دې ډله کې یو تن په تېره نومبر میاشت کې او درې نور په تېرو څو اونیو کې وژل شوي وو.

پولیسو له لومړنیو څېړنو وروسته ویلي چې ښايي قاتل به له دې کسانو سره شخصي دښمني لرله.

د اوکراین په دونېڅک کې درنه جګړه شوې

دونېڅک کې د جګړې له لومړۍ کرښې یو انځور

د اوکراین په ختیځه دونېڅک سیمه کې چې له روسیې سره د جګړې په لومړۍ کرښه کې پرته ده پرون یوځل بیا د درنو جګړو راپورونه ورکړل شول.

روسیې په دې سیمه کې د عملیاتو نوې لړۍ پیل کړې چې هدف یې په دونباس سیمه کې د ولکې پراخول دي.

د اوکراین د پوځ ستر درستیز پرون اعلان وکړ چې د روسيې پوځ پر دونېڅک سیمې له څو خواوو د برید هڅه وکړه.

اوکرایني چارواکو ویلي دي چې د دوی ځواکونه په دې سیمو کې کلک مقاومت کوي او خپل سنګرونه یې ساتلي دي.

افغانستان ته ستنېدونکو کډوالو ته د کار زمینه برابرېږي

ارشیف

د مهاجرت نړیوال سازمان وایي، په افغانستان کې د محلي کوچنیو کاروبارونو د ملاتړ له لارې هغو افغانانو ته د کار زمینه برابروي چې بېرته دې هېواد ته ستنېږي.

دغه سازمان په خپله ټوېټرپاڼه کې د رضا په نوم د یوه افغان ځوان له تصویر سره یوځای کښلي چې نوموړي هېواد ته له بېرته ستنېدو وروسته خپل ژوند ته د سمون ورکولو په برخه کې ستونزه درلوده خو د نوي کسب په زده کولو سره یې د ځان لپاره کار پیدا کړ.

رضا ویلي چې په ۲۰۱۶ کال ایران ته تللی و او له دوو کالو کډوالۍ وروسته چې له ډېرو ستونزو سره مخ و، بېرته افغانستان ته راستون شوی دی.

د مهاجرت نړیوال سازمان او د ملګرو ملتونو د کډوالو عالي کمېشنرۍ په داسې حال کې افغانستان ته له بېرته ستنېدونکو سره په ټولنه کې د بېرته جذبېدو په برخه کې ځینې مرستې کوي چې له دې هېواده د افغانانو د وتلو لړۍ روانه ده او هره ورځ په زرګونو کسان ګاونډیو هېوادونو په تېره ایران او پاکستان ته د وتلو تکل کوي.

د افغانستان زلزله ځپلو سیمو ماشومانو لپاره د زده کړو امکانات برابر شوي

د زلزلې له امله پکتیکا کې د یوه نړېدلي کور انځور

د ملګرو ملتونو د ماشومانو ملاتړې اداره یونېسف وايي چې د افغانستان په هغو سیمو کې یې سلګونو ماشومانو ته د زده کړې امکانات برابر کړي چې وروستۍ زلزلې اغېزمن کړي دي.

یونېسف پرون په یوه ټوېټ کې ویلي چې په ځپل سیمو کې یې نوي ۱۴۰ ټولنیز درسي صنفونه جوړ کړي چې په کې ډېرو نجونو ته لومړنۍ زده کړې ورکول کېږي.

یونېسف دغه راز په زلزله ځپلو سیمو کې د کولرا یا نس ناستې ناروغۍ د زیاتېدو په وړاندې هم خبرداری ورکړی دی.

په پکتیکا او خوست کې د جون د ۲۲ مرګونې زلزلې په نتیجه کې چارواکو د له زرو زیاتو کسانو د مړه کېدو او زرګونو نورو د ټپي کېدو خبر ورکړی و.

نور راوښيه

XS
SM
MD
LG