د لاسرسۍ وړ لېنکونه

تازه خبر
چهارشنبه ۳۰ تله ۱۳۹۹ کابل ۰۲:۵۷

خبرونه

د بیروت په نړېدلو ودانیو کې ژوندي کسان نه دي موندل شوي

په بیروت کې یوه میاشت پخوا د اګست په ۴مه زوروره چاودنه وشوه چې ۱۹۰ تنه په کې ووژل شول او ۶ زره نور ژوبل شول.

هغه ژغورونکي چې له درو ورځو راهیسې د بیروت په نړېدلو ودانیو کې په دې هیله کیندنې کوي چې ګوندې څوک ژوندی ومومي، وايي چې د هېڅ ژوندي پاتې کس نښې یې نه دي موندلي.

په بیروت کې یوه میاشت پخوا د اګست په ۴مه زوروره چاودنه وشوه چې ۱۹۰ تنه په کې ووژل شول او ۶ زره نور ژوبل شول.

نژدې ۵۰ تنه ژغورونکو او رضاکارانو وروسته له دې چې د څرک لګولو الو یا سینسورونو د سا نښې وموندلې د ویجاړو شویو ودانیو په کنډوالو کې کار پیل کړ خو اوس وايي چې په تېرو درو ورځو کې یې د ژوندي پاتې شوي انسان نښه ونه مونده.

د ورځې تازه خبرونه دلته ولولئ

'د تخار روغتون ته د څه باندې ۳۰ امنیتي پرسونل مړي وروړل شوي'

ارشیف

د تخار د عامې روغتیا ریاست وایي، د څه باندې دېرشو امنیتي او دفاعي پرسونل مړي روغتون ته وروړل شوي دي.

د روغتیا رییس سید عبدالله قیوم حیرت ازادي راډیو ته وویل، دغه ځواکونه تېره شپه له طالبانو سره جګړه کې وژل شوي دي.

هغه زیاته کړه: "د تخار له ځانګړې قطعې لس جسدونه او له ۹۹۹مې قطعې هم لس جسدونه را وړل شوي دي، د تخار ۱۷ پولیس هم وژل شوي چې د ۱۲ هغو جسدونه راوړل شوي دي."

حیرت وایي، په وژل شویو کې د تخار د امنیه قومندانۍ د امنیت امر راز محمد دور اندېش هم شامل دی.

له دې وړاندې د تخار امنیتي چارواکو د ښاغلي دور اندېش او د هغه د ساتونکو وژل تایید کړي دي.

دوی ویلي، طالبانو ته هم جګړه کې درنه مرګ ژوبله اوښتې، خو طالبانو لا څه نه دي ویلي.

هلمند چارواکي: ناوې کې ۳۵ طالبان وژل شوي

امنیتي ادارو د دغو عملیاتو په اړه خبرپاڼې خپرې کړي او ویل شوي چې دغلته هوایي ځواک هم کارېدلی دی. 

چارواکي په هلمند کې د ۳۵ طالبانو د وژلو خبره کوي، دغه ادعا لا طالبانو رد یا تایید کړې نه ده.

دغه طالبان په ناوې ولسوالۍ کې د دوو جلا عملیاتو پایله کې وژل شوي دي، هغه ولسوالۍ چې وروستیو کې طالبانو پرې حمله کړې وه.

دفاع وزارت او ملي امنیت ریاست دواړو د دغو عملیاتو په اړه خبرپاڼې خپرې کړي او ویل شوي چې دغلته هوایي ځواک هم کارېدلی دی.

طالبانو ویلي، د هلمند د مرکز په ګډون یې بېلابېلو ځایونو کې وروستۍ حملې د هغو سیمو د بېرته نیولو لپاره دي چې د دوی په ټکو حکومتي ځواکونو ترې نیولې دي.

قرغیزستان کې د بیاځلي پارلماني ټاکنو لپاره نوې نېټه وټاکل شوه

سدیر جپاروف

د قرغیزستان د ټاکنو کمېسیون د پارلماني ټاکنو لپاره د ډسمبر شلمه نېټه وټاکله.

دا اقدام له هغه وروسته کېږي چې دغه هېواد کې د اکتوبر د څلورمې پارلماني ټاکنو وروسته اعتراضونو د قرغیزستان حکومت ړنګ کړ.

د قرغیزستان ولسمشر سورونبای جاني بیکوف د اعتراض کوونکو له غوښتنو وروسته له دندې استعفا وکړه.

له دې استعفا وروسته سدیر جپاروف د لنډمهالي صدر اعظم په توګه وټاکل شو.

د قرغیزستان د اساسي قانون له مخې، جپاروف نه شي کولای ځان ټاکنو ته نوماند کړي.

ناسا: یوې سپوږمکۍد بینو په نوم د اسماني ډبرې سطحه لمس کړې

د بینو په نوم دغه اسماني ډبره له ځمکې ۳۳۰ میلیونه کیلو متره واټن لري. 

د امریکا د فضایي څېړنو اداره (ناسا) وایي، یوې سپوږمکۍ یې د بینو په نوم د اسماني ډبرې سطحه لمس کړې ده.

دغه ماموریت چې څو کاله وخت یې ونیوه، په ترڅ کې یې اوزیریس-ریکس سپوږمکۍ وکولای شوای د دغې ډبرې د تېږو او خاورو نمونې راټولې کړي.

د بینو په نوم دغه اسماني ډبره له ځمکې ۳۳۰ میلیونه کیلو متره واټن لري.

دغې ډبره کې د جاذبې لږ قوه شته، خو سپوږمکۍ پرې نه ده کېناستلې او د ځینو وسیلو له لارې یې ترې نمونې راټولې کړي دي.

د تخار د امنیت امر راز محمد دوراندېش د طالبانو په برید کې ووژل شو

د تخار ولایت د امنیت امر راز محمد دوراندېش

د تخار امنیتي چارواکو تأیید کړه چې د دغه ولایت د امنیت امر راز محمد دوراندېش د طالبانو په برید کې وژل شوی دی.

د تخار د امنیه قوماندانۍ ویاند خلیل اسیر له رسنیو سره په خبرو کې یوازې د راز محمد دوراندېش وژل کېدل تأیید کړي او نور یې جزئیات نه‌دي شریک کړي.

د تخار یو شمېر اوسېدونکو ازادي راډیو ته ویلي چې بېګا د بهارک ولسوالۍ په سپين جومات کلي کې افغان امنیتي ځواکونو او طالبانو نښته کړې او په راز محمد دوراندېش سربېره‌یې یو شمېر نور افغان پولیس هم وژلي دي.

دوی ویلي چې په نښتو کې د پولیسو زرې موټر او رنجرې سوځول شوي او یو شمېر د طالبانو لاس ته لوېدلي.

چارواکو د خلکو د دغو څرګندونو په اړه څه نه‌دي ویلي.

طالبانو هم تر اوسه کومه تبصره نه‌ده کړې.

باجوه: په کراچۍکې پر پوليسو د فشار راوستلو پېښه دې وڅېړل شي

جنرال قمر جاوېد

د پاکستان د پوځ مشر په کراچۍ کې د پاکستان مسلم ليګ ن د يوه مشر محمد صفدر د نيولو لپاره پر پوليسو د فشار راوستلو د پېښې د پلټنو امر کړی دی.

محمد صفدر د نوازشریف زوم دی.

د پوځ مطبوعاتي څانګې پرون په یوه بیان کې د صفدر د نیولو پېښه نه ده یاده کړې خو ویلي یې دي چې د پوځ مشر جنرال قمر جاوېد باجوه د کراچۍ عمومي قومندان ته امر کړی چې د کراچۍ د حالاتو پلټنې دې وکړي.

باجوه غوښتي چې حقایق معلوم او ژر تر ‏ژره ده ته راپور ورکړل شي.

د سیند صوبې د پولیسو مشر مشتاق مهر بیا د جنرال باجوه تر امر وروسته د پوليسو د لوړپوړو چارواکو رخصتۍ د ۱۰ ورځو لپاره ځنډولي دي.

د سيند پوليسو پر ټويټر په خپاره کړي بيان کې ويلي چې د ملي ګټو او د پلټنو تر نتايجو راتلو پورې يې رخصتۍ ځنډولي دي.

د پاکستان پيپلز ګوند مشر بلاول بټو زرداري تېر ماښام په کراچۍ کې د يوې خبرې غونډې پر مهال د پاکستان د پوځ او استخباراتي ادارې پر مشرانو غږ وکړ چې د پوليسو د ځورونې او پر هغوی د فشار راوستلو په اړه دې د خپلې ادارې پلټنې وکړي.

نوموړي زياته کړه ټول پوليس پوښتنه کوي چې هغه څوک و چې سهار وختي يې له دوو بجو وروسته د سیند د پولیسو مشر کور راګېر کړی و او هغه دوه کسان څوک وو چې د پولیسو د مشر کور ته ورغلي وو او سهار څلور بجې یې د پولیسو مشر چېرته وړی و؟

د مسلم ليګ ن د رهبر نواز شريف زوم محمد صفدر د اکتوبر پر ۱۹مه سهار وختي د جناح د مزار (د تقدس سرغړونې) په تور د کراچۍ په يو هوټل کې له خپلې خونې نیول شوی و چې بيا وروسته په همغه ورځ په ضمانت خوشې کړل شو.

پوليس وايي، پر هغوی فشار راوستل شو چې د صفدر پر ضد مقدمه درج کړي.

زابل کې د ښځو په وړاندې د تاوتریخوالي کمېدو په اړه غونډه وشوه

افغان مېرمنې

په زابل کې په یوه غونډه کې د ښځو په وړاندې د تاوتریخوالي د کمېدو او د هغوی د نورو ستونزو د هواري پر لارو چارو خبرې وشوې.

د زابل د ولایت له مطبوعاتي دفتره په خپره شوې خبرپاڼه کې ویل شوي چې په دې غونډه کې چې مشري یې والي محمد نبي احمدزي کوله او د ښځو په وړاندې د تاوتریخوالي د کمېسیون ټولو غړو ګډون کړی و، د مېرمنو پر وړاندې د تاوتریخوالي پر کمښت، د دوی پر اقتصادي، تعلیمي، روغتیایي، کلتوري او یو شمېر نورو برخو کې پر شته ستونزو باندې خبرې وشوې او په اړوند یې لازم تصمیمونه ونیول شول.

د خبرپاڼې له مخې ښاغلي احمدزي د اړوندو دولتي ادارو استازو ته لارښوونه وکړه چې مېرمنو ته دې د کاري فرصتونو په پیدا کولو کې خپل نهایي کوشش وکړي او په خپلو اعلان شويو بستونو کې دې لومړیتوب لوستو او په کار پوه مېرمنو ته ورکړي.

خوست کې د کرونا ویروس مخنیوي لپاره د عامه پوهاوي کمپاین پیل شو

د کرونا د مخنیوي لپاره دوا پاشي

د خوست روغتیایي کارکوونکو د کرونا ویروس د نوې څپې د مخنیوي لپاره د عامه پوهاوي یو کمپاین پیل کړی او له خلکو غواړي چې روغتیایي سپارښتنې جدي په پام کې ونیسي.

د دغه کمپاین یوه مسؤل ډاکټر عبدالواحد نیازي ازادي راډیو ته وویل، د هوا په سړېدو سره د کرونا ویروس د خپرېدو خطر زیات دی او د مخنیوي تر ټولو غوره لاره‌یې دا ده چې خلک باید د نورو سپارښتونو ترڅنګ لازم واټن په پام کې ونیسي، لاسونه تل ومینځي او له ماسک څخه استفاده وکړي.

هغه زیاته کړه: "که چېرته‌یې د مخنیوي تدابیر په سمه توګه عملي نه‌شي، امکان لري دا څپه به شدیده وي او امکان لري چې تلفات به‌یې هم زیات وي."

د روغتیایي چارواکو په وینا په خوست کې تر اوسه د کرونا ۴۳۲ مثبتې پېښې ثبت شوې او له امله‌یې هم ۳۸ تنه مړه شوي دي.

د رسمي شمېرو له مخې تر اوسه په ټول افغانستان کې پر کرونا له ۴۰ زرو ډېر کسان اخته شوي او له امله‌یې هم یو نیم زر کسان مړه شوي دي.

نن نوماند وزیران او دوه رئیسان ولسي جرګې ته ورپېژندل کېږي

د افغانستان ولسي جرګه

ټاکل شوې نن ټول نوماند وزیران او د دوو ادارو رئیسان د باور رایې اخیستو لپاره ولسي جرګې ته وروپېژندل شي.

د ولسمشر مرستیال ویاند دوا خان مینه‌‌پال ازادي راډیو ته وویل، ولسمشر اشرف غني به د کابینې ټول ۲۶ غړي او د دوو ادارو رئیسان دې جرګې ته وروپېژني.

اشرف غني د مارچ په نهمه د ولسمشر په توګه د لوړې په مراسمو کې ژمنه کړې وه چې په دوو اوونیو کې به خپله کابینه ولسي جرګې ته د باور رایې اخیستو لپاره وروپېژني، خو له هغه وخته څه باندې اووه میاشتې تېرې شوې دي.

د ولسي جرګې منشي اسدالله شهباز ازادي راډیو ته وویل، د جرګې پنځه کمېسیونونه به د دغو نوماندانو اسناد څېړي او وروسته به‌یې اداري پلاوي ته سپاري. په ولسي جرګه کې نوماند وزیرانو ته د باور رایو پخوانیو بهیرونو ته په پام داسې نه‌ښکاري چې دغه پروسه به له ستونزو خالي وي.

د فرانسوي او عراقي چاراکو له ترهګرۍ سره د مبارزې پر اهمیت خبرې کړي

د عکس ښي لور ته د عراق صدراعظم مصطفی کاظمي او چپ لور ته د فرانسې ولسمشر ایمانویل مکرون

د فرانسې ولسمشر ایمانویل مکرون او د عراق صدراعظم مصطفی کاظمي د ترهګرۍ په وړاندې د مبارزې پر اهمیت خبرې وکړې.

د مکرون د دفتر له خوا په خپره شوې خبرپاڼه کې ویل شوي چې دواړو مشرانو د اکتوبر په نولسمه په پاریس سره وکتل.

مکرون تېره میاشت له عراق څخه د کتنې په مهال د دې هېواد د خپلواکۍ ملاتړ کړی او ویلي یې و چې د اسلامي دولت ډلې وسله وال او د عراق په چارو کې د بهرنیانو لاسوهنه هغه اساسي ستونزې دي چې بغداد ورسره مخامخ دی.

دغه راز ویل شوي چې دواړو مشرانو د یوه فرانسوي شرکت د هغې طرحې ستاینه وکړه چې په بغداد کې د مترو د جوړولو لپاره یې وړاندې کړې ده.

کاظمي چې د روان کال په مې میاشت کې د صدراعظم په توګه دنده پیل کړې، حکومت یې ژمنه کړې چې هغه وسله والو ډلې به چې د عراق د بې ثباته کولو هڅې کوي، وځپي.

تیخانوسکایا: د قانون تنفیذ افسران دې د لوکاشینکا پر ضد اعتراضونه وکړي

د بیلاروس د اپوزیسیون مشره سویتلانا تیخانوسکایا

د بیلاروس د اپوزیسیون یوې مشرې سویتلانا تیخانوسکایا د دې هېواد د قانون د تنفیذ له افسرانو غوښتي چې د الکساندر لوکا شینکا پرضد له اعتراض کونکو سره یوځای شي.

د لویدیځ دولتونه لوکاشینکا د یوه مشروع ولسمشر په توګه په رسمیت نه پېژني.

تیخانوسکایا پرون په یوه بیان کې وویل چې د اعتراض کونکو د ځپلو لپاره د پولیسو د قومندانانو او د قانون د تنفیذ د نورو ادارو امر غیرقانوني دی.

لوکاشینکا پرون ظاهراً بیا اعتراض کونکو ته خبرداری ورکړ.

هغه زیاته کړه: "موږ خپل تکتیکونه بدل کړي، موږ آرام اقدام کوو او ټول به پیدا کړو، پرمختللي امکانات موږ ته د دې کار زمینه برابروي، موږ له مخکې دا کارکوو او هر یو به د خپلو اعمالو نتیجه وګوري."

تیخانوسکایا یوه اونۍ مخکې لوکاشینکا ته د استعفا لپاره د اکتوبر تر ۲۵مې پورې د خبرداري وروستۍ مهلت ورکړی و.

هغې ویلي و که لوکاشینکا له قدرته لاس وانخلي، روان اعتراضونه اواعتصابونه به ټول بیلاروس ته وغځېږي.

لوکاشنیکا خپل ځان د اګسټ د نهمې د ولسمشرۍ د ټاکنو سترګټونکی بولي خو سیاسي مخالفان یې دغه ټاکنې له درغلۍ ډکې بولي.

د بلغاریا ولسمشر د ایستونیا رسمي سفر نیمګړی پرېښود

د بلغاریا ولسمشر رومین رادیف

د بلغاریا ولسمشر رومین رادیف چې ایستونیا ته په یوه رسمي سفر تللی پرون یې وروسته له هغې دغه سفر نیمګړی پرېښود او بېرته صوفیې ته ستون شو چې معلومه شوه نوموړی د کرونا ویروس له خطر سره مخامخ شوی.

نوموړی به په خپل کور کې قرنطین وي.

د بلغاریا د روغتیا وزیر وویل، د بلغاریا له یوه پوځي چارواکي سره چې ولسمشر د اکتوبر په ۱۶مه کتلي و، د کرونا ویروس آزموینه یې مثبته وه.

د هغه په وینا د بلغاریا ولسمشر به هم د دې هېواد د روغتیایي اصولو له مخې قرنطین کېږي.

د رسمي شمېرو له مخې د هغو کسانو شمېر چې په اروپا کې د کویډ۱۹ ناروغۍ له امله مړه شوي، له ۲۵۰ زرو اوښتی دی.

د اوکراین ولسمشر: نړۍ دې کریمیا نه هېروي

ولادیمیر زلینسکي پارلمان ته د وینا پرمهال

د اوکراین ولسمشر نن ویل، هغه کسان چې روسیې ته یې اجازه ورکړه چې په غیرقانوني ډول کریمیا د خپلې خاورې برخه کړي، باید مسوول وګڼل شي.

ولادیمیر زلینسکي نن د خپل هېواد پارلمان ته په خپله کلنۍ وینا کې وویل: "تر هغو چې کریمیا اشغال وي له اوکراینیانو او د کریمیا له تاتارانو سره به په منظم ډول زیاتی کېږي، نړۍ باید کریمیا هېره نه کړي."

کریمیا ټاپوزمه چې د اوکراین خاوره ده په دوه زره څوارلسم کال کې روسیې له خپلې خاورې سره یوځای کړه.

ټرمپ د امریکا د عفوني او حساسیت ناروغیو د مرکز پر رییس نیوکه وکړه

د عکس ښي لور ته فاوچي او شاته ډونالډ ټرمپ

د امریکا د متحد ایالتونو ولسمشر ډونالډ ټرمپ د دغه هېواد د عفوني او حساسیت ناروغیو د مرکز پر رییس انټوني فاوچي نیوکه وکړه او ویې ویل، فاوچي او یو شمېر نور متخصصینو چې کله له کرونا ویروس سره د مبارزې په اړه سلامشوره ورکړې ده، تېروتنې یې کړي دي.

ولسمشر ټرمپ بیا وویل، امریکایان د فاوچي او د ده په څېر د یو شمېر نورو ساده کسانو له دې خبرو چې په دې کار کې یې تېروتنه کړې ده، ستړې شوې دي.

ښاغلي ټرمپ دا خبرې پرون وروسته تر دې وکړې چې ډاکتر فاوچي وویل، پرته له څه شکه چې ډونالډ ټرمپ تر لویو غونډو وروسته چې لږ کسانو ماسک اغوستی و او له یوه بله یې واټن نه و مراعات کړی په کرونا ویروس اخته شو.

میدان وردګ چارواکي: جلریز کې چاودنو ۵ تنه وژلي 

ارشیف

د میدان وردګو په جلریز ولسوالۍ کې نن سهار دوو چاودنو لږ تر لږه ۵ تنه وژلي دي.

د میدان وردک د والي ویاند محب اله شریفزوی ازادي راډیو ته وویل: "د جلریز ولسوالي په کوټه عشرو سیمه کې پر یوه تونس او یوه سراچه موتر چاودنې شوې دي چې ۵ تنه شهیدان شوي، ۹ ټپيان چې پنځه یې ښځې څلور یې ماشومان دي."

ټپیان رووغتونونو ته انتقال شوې دي.

د دې چاودنو مسوولیت چا په غاړه نه دی اخیستی.

نور راوښيه

XS
SM
MD
LG