د لاسرسۍ وړ لېنکونه

تازه خبر
شنبه ۵ تله ۱۳۹۹ کابل ۱۲:۴۸

خبرونه

کندز، خوست او بغلان کې تر ۵۰ ليټره ډېر شراب او نور نشه يي مواد د خرڅولو پر مهال نیول شوي

Drugs, Opium, Heroin, Hashish

په درېيو ولايتونو کې تر پنځوس ليټره ډېر شراب او نور نشه يي مواد د خرڅولو پر مهال ونيول شول.

د کندز ولایت امنیه قومندان هجرت الله اکبري ازادۍ راډیو ته وویل، د سنبلې د میاشتې پر (۱۱) نېټه د کندز پولیسو بغلان ولایت ته د څلورو کیلوګرامو هیرویینو د قاچاقو مخه ونیوله.

هغه زیاته کړه، دا کسان په دوو جلا جلا پېښو کې پولیسو په دې تور نیولي چې د کندز ښار په اړونده سیمو کې یې نشه يي مواد قاچاق کول او نشه يي ګولۍ یې خرڅولې.

دوی اوس له پولیسو سره بنديان دي.

په دوهمه پېښه کې د خوست ولایت پولیسو (۲۴) کیلوګرامه چرس هغه مهال ونیول چې له دوه منده ولسوالۍ څخه یې د دې ولایت مرکز ته قاچاق کول.

په درېیمه پېښه کې د بغلان ولایت پولیسو (۲۴۰) لېټره شراب ونیول چې په پام کې وه له دوشي ولسوالۍ څخه یې پلخمري ښار ته قاچاق کړي.

پولیسو د دې درېيو پېښو په تړاو شپږ قاچاق کوونکي هم نیولي دي.

د ورځې تازه خبرونه دلته ولولئ

چارواکي: فیض آباد کې  ۹ وسله والو طالبانو ته مرګ ژوبله اوښتې

ارشیف

چارواکي وايي، د بدخشان په فیض آباد ښار کې ۴ وسله وال طالبان وژل شوي او ۵ نور ټپیان دي.

د بدخشان د امنیه قومندانۍ ویاند ثناالله روحاني نن آزادي راډیو ته وویل چې دا پېښه تېره شپه د طالبانو تر برید وروسته وشوه.

هغه زیاته کړه: " د دولت وسله والو مخالفینو تېره شپه د دوآبه په یفتل سیمه کې د ملي پاڅون کوونکو پر پوستو ډله ییز بریدونه وکړل چې د افغان ځواکونو له سخت مقاومت سره مخامخ شول، دغې نښتې تر درېیو بجو دوام وکړ، طالبانو بېرته شاتګ وکړ."

ښاغلی روحاني زیاتوي چې په دې نښتو کې د قومندان غازي په نوم د سیمه ییزو پولیسو یو قومندان هم وژل شوی او یو بل ملګری یې ټپي شوی دی.

وسله والو طالبانو تر اوسه د دې پېښې په اړه څه نه دې ویلي.

افغان چارواکي: ټول هېواد کې لسګونه پراختیايي پروژې پلي کېږي

ارشیف

د افغانستان د کلیو او پراختیا وزارت وايي، په دغه هېواد کې ۲۵۹ پراختیايي پروژې پلي کوي.

د دغو پروژو تړون نن له یو شمېر خصوصي شرکتونو سره لاسلیک شو.

د افغانستان د کلیو او پراختیا وزارت ویاند فریدون اژند وايي، چې د دغو پروژو ټولیز لګښت له دوو میلیاردو افغانیو اوړي او په لومړي ځل کوچیان هم ورنه برخمن شوي.

د دغه وزارت د اعلامیې پر بنسټ، په یادو پروژو کې د څښاک د پاکو اوبو، سړکونو، استنادي او محافظتي دېوالونه او د اوبو رسولو د کانالونه جوړول شامل دي.

په اعلامیه کې راغلي، له نویو پروژو به په لرې پرتو سیمو کې ۲ میلیون کسان ګټه واخلي، او له یو نیم میلیون زیاتې کاري ورځې به هم رامنځته کړي.

اسټرالیايي کمپنۍ د افغانستان کانونو راایستنې برخه کې پانګه اچونه کوي

ارشیف

د افغانستان د کانونو او پټرولیم وزارت وايي، اسټرالیا فورټسکیو میټل کمپنۍ په افغانستان کې د سروزور، لیتیم او اوسپنې د کانونو د راایستنې په برخه کې پانګونې ته لېوالتیا ښودلې.

د دغه وزارت ویاند عبدالقدیر مطفي نن ازادي راډيو ته وویل، چې د دغې کمپنۍ او د کانونو وزارت د تخنیکي ټیمونو ترمنځ د چارو د ښې همغږۍ او تخننیکي معلوماتو شریکولو لومړنۍ ناسته د پنجشنبې په ورځ وشوه.

مطفي زیاته کړه: "د تفاهم لیک پر بنسټ اسټرالیا فورتسکیو میټل ګروپ کمپنۍ، چې یو شمېر ملیارډران په کې راټول شوي لېوالتیا ښودلې، چې په افغانستان د سره زرو، لیتیم او اوسپنه د کانونو د استخراج په برخه کې پانګونه وکړي."

د ښاغلي مطفي په خبره د افغان حکومت او فورتسکیو میټل کمپنۍ ترمنځ د لاسلیک شوي تفاهم لیک پربنسټ به یاده کمپنۍ په بېلابېلو برخو کې له پانګونې سربېره د تخنیکي ظرفیتونو په لوړلو کې هم له افغانستان سره مرسته کوي.

د افغانستان په بامیانو، پکتیکا، بدخشان، یو شمېر ولایتونو کې د سرو زرو، اوسپنې او مسو پراخې کانانونو موجود دي.

عمران خان: د هند ملت‌پال حکومت د مسلمانانو پر وړاندې د تبعیض ملاتړ کوي

عمران خان

د پاکستان صدراعظم عمران خان وايي په هند کې د هندوانو ملت‌پال حکومت د مسلمانانو پر وړاندې د کرکې پارولو او تبعیض ملاتړ کوي.

عمران خان پرون جمعه د ملګرو ملتونو عمومي اسامبلې ته په وینا کې چې له مخکې ثبت شوې وه وویل په هند کې له اسلام څخه د وېرې رامنځ‌ته کول واکمني کوي چې د ده په وینا په دې هېواد کې یې د نږدې ۲۰۰ میلیونه مسلمانانو ژوند له ګواښ سره مخامخ کړی دی.

عمران خان وویل، د هند حکومت باور لري چې هند یوازې د هندوانو لپاره دی او نور خلک‌یې د انډول حق لرونکي وګړي نه‌دي.

پاکستاني مشرانو پخوا تر دې هم پر کشمیر چې ډېری وګړي یې مسلمانان دي د ولکې د پراخولو لپاره د هند پر هڅو انتقاد کړی دی.

ناوالني: ژوند مې هغه پیلوټ او صحي پرسونل ژغورلی چې سمدستي مرسته‌یې وکړه

الکسي ناوالني

د روسیې د اپوزېسیون مشر الکسي ناوالني وايي، ژوند یې هغه پیلوټ او صحي پرسونل ژغورلی دی چې له ده سره‌یې سمدستي روغتیايي مرسته وکړه.

ناوالني پر خپل انسټاګرام لیکلي، له ناروغۍ وروسته پیلوټ، الوتکه په چټکۍ سره کېنوله او روغتيايي کارکوونکي سمدستي وپوهېدل چې دی مسموم شوی او ده ته‌یې د مسمومیت ضد درمل ورکړل.

د روسیې د اپوزېسیون ۴۴ کلن مشر په الوتکه کې له سایبریا څخه مسکو ته روان و چې ناڅاپه ناروغه شو او الوتکې په اومسک ښار کې بېړنۍ ناسته وکړه.

هغه وروسته برلین ته ولېږدول شو او نږدې دوه اوونۍ یې په بې‌سده حالت کې په روغتون کې تېرې کړې.

جرمني متخصصانو ویلي دي چې ناوالني په نوویچوک ډوله کیمیاوي موادو چې په پخواني شوروي اتحاد کې جوړېدل مسموم شوی. ناوالني چې د کرملېن له سرسختو منتقدانو څخه دی اوس‌مهال په جرمني کې دی او روغتیايي وضعیت‌یې ډاډمن بلل شوی.

ډاکتران وايي که د نوموړي وضعیت د اوس په شان په چټکۍ سره ښه شي، نو د ناروغۍ ټولې نښې به‌یې له‌منځه ولاړې شي.

اوکراین کې د یوې پوځي الوتکې نسکورېدو لږترلږه ۲۲ کسان ووژل

د اوکراین د هوايي چلند اداره وايي، الوتکې ۲۸ سپرلۍ لرلې، خو تر اوسه ۲۲ مړي او دوه ټپي کسان موندل شوي دي.

په اوکراین کې د یوې پوځي الوتکې د نسکورېدو په پېښه کې لږترلږه ۲۲ کسان مړه شوي دي.

دا انتونوف ۲۶ ډوله الوتکه پرون د سپټمبر په ۲۵مه نېټه د اوکراین په خارکوف سیمه کې نسکوره شوه.

د اوکراین د هوايي چلند اداره وايي، الوتکې ۲۸ سپرلۍ لرلې، خو تر اوسه ۲۲ مړي او دوه ټپي کسان موندل شوي دي.

دې ادارې ویلي چې د څلورو نورو کسانو د موندلو هڅې هم روانې دي.

د اوکراین د کورنیو چارو وزارت وايي چې د ژغورنې ډلې د الوتکې له نسکورېدو سمدستي وروسته سیمې ته ورسېدلې او عملیات‌یې پیل کړل.

عبدالله: طالبان دې د سولې خبرو پر مهال اوربند وکړي

د فغانستان د ملي مصالحې عالي شورا مشر عبدالله عبدالله

د افغانستان د ملي مصالحې عالي شورا له طالبانو غواړي چې د سولې خبرو پر مهال اوربند وکړي.

نن په قطر کې د افغان دولت او طالبانو د پلاوو ترمنځ د خبرو دوه اوونۍ پوره شوې، خو دواړه لوري تر اوسه د خبرو پر کړنلاره موافقې ته نه‌دي رسېدلي.

د ملي مصالحې عالي شورا ویاند فریدون خوځون له دوحې څخه ازادي راډیو ته وویل چې د جګړو دوام خلک اندېښمن کړي دي.

هغه زیاته کړه: "زموږ تمه له طالبانو دا ده چې جګړه بنده شي او د سولې مذاکرات پر مخ ولاړ شي ځکه وروستیو جګړو او تلفاتو د افغانانو اندېښنې راپارولې دي."

په پام کې ده د ملي مصالحې عالي شورا مشر عبدالله عبدالله د دوشنبې په ورځ اسلام‌اباد ته ولاړ شي او له پاکستاني چارواکو سره د بین‌الافغاني خبرو په اړه بحث وکړي.

د مصالحې عالي شورا ویاند ښاغلی خوځون وايي، د سولې په روانو هڅو کې د پاکستان ونډه مهمه ده.

د تخار پوليسو تر څلوېښتو لېټرو ډېرو کېمياوي موادو د قاچاقو مخه ونيوله

ارشیف

د تخار ولايت پوليسو تر څلوېښتو لېټرو ډېرو کېمياوي موادو د قاچاقو مخه ونيوله.

د تخار د امنيې قوماندان سيد معراج الدين سادات وايي چې، د (اسيټيک آنهایډرايډ) په نوم تر ۴۲ لېټرو ډېر کېمياوي مواد چې په پام کې وه د موټر په وسيله له کندز ولايت څخه تخار ولايت ته قاچاق شي، د تخار پولیسو ونيول.

د يادونې وړ ده چې د (اسيټيک آنهایډرايډ) په نوم کېمياوي مواد له بهر څخه افغانستان ته راوړل کېږي او د نشه يي موادو په جوړولو کې کار ځنې اخيستل کېږي.

د هرات پولیسو ۱۱ تنه د نشه يي موادو د قاچاقو او خرڅولو پر مهال نیولي

ارشیف

د هرات پولیسو يوولس تنه د نشه يي موادو د قاچاقو او خرڅولو پر مهال ونيول.

د هرات ولايت د امنيې قوماندانۍ وياند عبدالاحد ولیزاده ازادۍ راډيو ته وويل، له نشه يي موادو سره د مبارزې ځانګړو پولیسو په هرات ښار، انجيل او ګذرې ولسواليو کې عمليات وکړل چې په نتيجه کې يې يوولس تنه د نشه يي موادو د قاچاقو او خرڅولو پر مهال ونيول.

له دې يوولسو نفرو سره ۱۷ کيلوګرامه هيرويين، ۳۵ کيلوګرامه چرس او څه اندازه ښیښه هم نيول شوې ده.

دا تورن کسان تر نيول کېدو وروسته له نشه يي موادو سره د مبارزې عدلي او قضايي مرکز ته استول شوي دي.

چارواکي: کابل کې تر لسو زرو ډېرې نشه يي ګولۍ او شراب ونيول شول

ارشیف

په کابل ولايت کې تر لسو زرو ډېرې نشه يي ګولۍ او شراب ونيول شول.

د ټابليټ کا په نوم اوولس زره او ۲۵۵ نشه يي ګولۍ چې په پام کې وه د موټر په وسيله له ختيځو ولايتونو څخه کابل ته قاچاق شي، د پلچرخي په سيمه کې د موټرو د تلاشۍ پر مهال ونيول شوې.

د يادونې وړ ده چې د دې نشه يي ګوليو په تور دوه نفره هم نيول شوي دي.

د کابل د امنيې قوماندانۍ وياند فردوس فرامرز رسنیو ته وويل، له نشه يي موادو سره د مبارزې ځانګړو پولیسو د کابل ښار په لومړۍ، لسمه او يوولسمه حوزه کې عمليات کړي چې په نتيجه کې يې په مجموعي ډول د ۱۳۷ بوتلو شرابو تر څنګ، تر څلورو کيلوګرامو ډېر بېلابېل نشه يي مواد او تر۳۲ زرو ډېر ډالر او درې لکه افغانۍ هم نيولي دي.

د قاچاقو د دې پېښو په تړاو څلور تنه هم نيول شوي دي.

د هند تر واک لاندې کشمیر کې یو نامتو مدافع وکیل وژل شوی

پولیسو نن وویل، پر بابر قادري پرون ماښام دوو نا پېژنده وسله والو ډزې وکړې چې په اړه یې پلټنې پيل شوي دي.

د هند تر واک لاندې کشمیر کې یو نامتو مدافع وکیل ووژل شو.

پولیسو نن وویل، پر بابر قادري پرون ماښام دوو نا پېژنده وسله والو ډزې وکړې چې په اړه یې پلټنې پيل شوي دي.

د قادري خپلوانو ویلي، بریدکوونکي د موکل په نوم د ده کور ته ورغلي او کله چې هغه له دروازې راوځي، ډزې پرې کوي.

بابر قادري د کشمیریانو د حقونو یو ښکاره ملاتړی و او تل یې د دغې سیمې د خپلواکۍ غوښتنه کوله.

نوموړی په دې اړه بحثونو کې کله نا کله د هند په ټلویزیوني بحثونو کې را څرګندېده.

د کشمیر په جګړه کې لسګونه زره ملکیان، اورپکي او دولتي ځواکونه وژل شوي دي.

'د ډاکتر نجیب الله د وژل کېدو د ۲۴ تلین پلان شوې یاد غونډه لغوه شوه'

پخوانی ولسمشر نجیب الله

د پخواني ولسمشر نجیب الله لور ومنله چې د پلار د وژل کېدو د څلورویشتم تلین پلان شوې یاد غونډه یې لغوه شوې ده.

هیلې نجیب الله پر خپله ټویټرپاڼه دغه خبر ورکړی، خو دا یې نه دي ویلي چې د څه د لایلو له مخې غونډه لغوه شوې.

ټاکل شوې وه دغه غونډه په کابل کې د لویې جرګې په تالار کې د نجیب الله د ګوند د غړو او یوشمېر خواخوږو له خوا جوړه شي.

پرون یو شمېر مذهبي او جهادي ګوندونو له هغې ډلې د حزب اسلامي مشر ګلبدین حکمتیار له دغې غونډې سره مخالفت وښوده.

نجیب الله د ۱۳۷۵ کال د تلې په پنځمه نیټه کابل ته د طالبانو له راتګ سره سم ووژل شو.

د شمالي کوریا مشر د سویلي کوریا د یوه چارواکي پر وژلو بښنه وغوښته

د شمالي کوریا مشر کیم جونګ اون

د شمالي کوریا مشر کیم جونګ اون د سویلي کوریا د یوه پوځي چارواکي پر وژلو بښنه غوښتې ده.

د سویلي کوریا د سمندرونو او کب پالنې د وزارت دغه ۴۷ کلن کارکوونکی د دواړو کوریاوو لانجمن سمندري بندر ته نژدې وژل شوی او بیا د کرونا ویروس د خپرېدو له وېرې سوځول شوی دی.

سیول د شمالي کوریا دغه کار غندلی او ( بې رحمه عمل) یې بللی دی.

سویلي کوریا وایي، د شمالي کوریا مشر پردې ناببرې او خواشینونکې پېښې خفګان څرګند کړی.

د سویلي کوریا دغه پوځي چارواکی د دواړو کوریاګانو ګډې پولې ته په لس کیلو متري واټن کې پر ګزمې بوخت و چې لادرکه شو.

ایران د افغانستان لویدیځو ولایتونو ته د برښنا پر لېږد کار کوي

د افغانستان د بهرنیو چارو سرپرست وزیر محمد حنیف اتمر له ایراني پلاوي سره ولیدل.

ایراني چارواکو ژمنه کړې چې زرنج او هرات ښارونو ته به د برښنا پر لېږد او دغلته د بادي برښنا پر تولید کار کوي.

د افغانستان د بهرنیو چارو وزارت وایي، دغه خبره کابل ته د ایران راغلي فني او تخنیکي پلاوي، چې مشري یې د انرژۍ وزرات مرستیال همایون حایري کوله، کړې ده.

دغه پلاوي د بهرنیو چارو له سرپرست وزیر محمد حنیف اتمر سره د لیدو پر مهال ویلي، د ټرانزیټ، سوداګرۍ او برښنا په برخو کې به خپلې همکارۍ پياوړې کړي.

ایران او افغانستان خپلو کې د هر اړخیزو همکاریو یو جامع سند هم لاسلیکوي چې د طرحې په بشپړولو یې کار روان دی.

کله چې وروستیو کې په ایران کې له افغان کډوالو سره د تاوتریخوالي څو پیښې وشوې، دواړو هېوادونو وپتیله چې د دغسې پېښو د تکرار د مخنیوي او د افغان کډوالو د حقونو د خوندیتوب لپاره به یو سند لاسلیکوي.

'قرغزستان کې روغتیایي کارکوونکي په زور ډېر کار ته مجبور شوي'

ارشیف

د بښنې نړیوال سازمان وایي، قرغزستان کې د کرونا وبا پر مهال روغتیایي کارکوونکي په زور ډېر کار ته مجبور شوي دي.

دغه سازمان نن په دې اړه یو راپور خپور کړ او وې ویل، ډاکترانو ته د ډېر کار له کبله نه یوازې دا چې اضافي معاش نه ورکول کېده، بلکې پیسې یې کمې شوې هم دي.

غیر رسمي سرچینې وایي چې قرغستان کې د مارچ له نیمایي د جولای میاشتې تر وروستیو پورې کرونا ۴۰ روغتایي کارکوونکي مړه کړي دي.

د مرکزي اسیا لپاره د بښنې نړیوال سازمان څیړونکي هیدر مکګیل ویلي: "دا ویرونکې ده چې د کار په بدل کې د روغتیایي کارکوونکو بشري حقونه پام کې نه نیول کېدل، پیسې نه ورکول کېدې او مجبورېدل چې پټه خوله پاته شي."

نور راوښيه

XS
SM
MD
LG