د لاسرسۍ وړ لېنکونه

تازه خبر
جمعه ۲۰ چنګاښ ۱۳۹۹ کابل ۰۰:۴۳

افغانستان

سټولټبنرګ: د افغان ځواکونو پیاوړتیا د ناټو لویه لاسته راوړنه ده

ارشیف: د پوځي تمرینونو پرمهال د افغان پولیس

د ناټو عمومي منشي وايي، په افغانستان کې په تېرو ۲۰ کلونو کې تر ټولو لویه لاسته راوړنه د افغان امنیتي ځواکونو پياوړي کول وو.

ینس سټولټنبرګ د دوشنبې په ورځ د (ناټو ۲۰۳۰) په نوم په یوه انلاین غونډه کې وویل چې اوس‌مهال افغان امنیتي ځواکونه له ترورېزم سره د مبارزې وړتیا لري.

ده وویل: "موږ شااوخوا له ۲۰ کلونو راهیسې په افغانستان کې یو او په تېرو کلونو کې مو ډېر کارونه کړي چې له هغه څخه یو د افغان امنیتي ځواکونو ظرفیت لوړول دی چې دوی په خپل هېواد کې ثبات ټينګ کړي."

د ناټو له‌خوا د افغان امنیتي ځواکونو د ملاتړ پر ټينګار سربېره لوېديځې رسنۍ راپور ورکوي چې د افغان ملکیانو تلفات د امریکا او طالبانو ترمنځ د موافقې تر لاسلیک وروسته زیات شوي دي.

د روان کال په فبرورۍ میاشت کې د امریکا او طالبانو ترمنځ د موافقې تر لاسلیک وروسته طالبانو پر امریکايي ځواکونو خپلې حملې ودرولې، خو ویې‌ویل چې د افغان ځواکونو پر ضد به حملو ته دوام ورکړي.

د ورځې تازه خبرونه دلته ولولئ

طالبانو د نږدې ۶۰۰ بندیانو یو بدیل لېست افغان حکومت ته سپارلی

طالبان

طالبانو د نږدې ۶۰۰ هغو بندیانو یو بدیل لېست افغان حکومت ته سپارلی چې په خوشې کولو باندې یې لانجې روانې وې.

یوې معتبره حکومتي سرچینې دغه خبره نن ازادي راډیو ته وکړه.

حکومت څه باندې څلور زره طالب بندیان تر اوسه خوشې کړي، خو د راپورونو په اساس د طالبانو له‌خوا په مخکېني سپارل شوي لېست کې نږدې ۶۰۰ داسې کسان شامل و چې حکومت‌یې له خوشې کولو سره نه‌و جوړ.

د طالبانو او امریکا د فبرورۍ ۲۹مې د موافقې له مخې افغان دولت تر پنځه زره طالب بندیان او طالبان‌یې په بدل کې زر حکومتي بندیان خوشې کوي.

د طالبانو د سیاسي دفتر ویاند سهیل شاهین نن ازادي راډیو ته په یوه لنډکي پیغام کې وویل چې تر اوسه د طالبانو د بندیانو کمېسیون افغان حکومت ته د نوي لېست د سپارلو مسئله نه‌ه تأیید کړې، نو بناً د ده په خبره دا موضوع حقیقت نه‌لري.

عبدالله عبدالله د ځینو نوماند وزیرانو لېست ولسمشر غني ته وسپاره

ولسمشر غني او عبدالله عبدالله

د افغانستان د ملي مصالحې عالي شورا مشر عبدالله عبدالله ته یوې نږدې سرچینې ازادي راډیو ته تأیید کړه چې ښاغلي عبدالله د خپلې برخې د نوماند وزیرانو لېست بشپړ او تېره ورځ ولسمشر غني ته سپارلی دی.

دغه سرچینه وايي چې د ښاغلي عبدالله په لېست کې؛

۱- مسعود اندرابي - کورنیو چارو وزارت
۲- فضل احمد معنوي - عدلیې وزارت
۳- انوارالحق احدي - کرنې وزارت
۴- نور رحمان اخلاقي - کډوالو وزارت
۵- محب‌الله صمیم - د قومونو او قبایلو وزارت
۶- مصطفی مستور - سولې وزارت
۷- معصومه خاوري - مخابراتو وزارت
۸- نثار احمد غوریاني- سوداګرۍ وزارت
۹- سعادت منصور نادري - اقتصاد وزارت
۱۰- بشیر احمد ته‌ینج - کار او ټولنیزو چارو وزارت
۱۱- کنشکا ترکستاني - لوړو زده‌کړو وزارت
۱۲- عباس بصیر - ټرانسپورت وزارت
۱۳- نجیب آقا فهیم - د شهیدانو او معلولینوړ په چارو کې د دولت وزارت
۱۳- عزیزالله آرینفر - اداري اصلاحاتو ریاست

شامل دي.

ښاغلی عبدالله له ولسمشر غني سره د سیاسي هوکړې پر بنسټ توافق کړی و چې د کابینې ځیني نوماند وزیران او ځیني نور چارواکي به دی ګماري.

د افغانستان ولسي جرګې تل په کابینه کې پر سرپرستۍ او د باور رایې اخیستو لپاره دغې جرګې ته د نوماند وزیرانو پر نه‌معرفي کېدو انتقاد کړی دی.

تخار کې د 'کووېډ-۱۹' ناروغانو لپاره سل بستریز روغتون جوړ شو

ارشیف، انځور تزئیني بڼه لري.

په تخار کې د 'کووېډ-۱۹' ناروغۍ سل بستره روغتون د ناروغانو لپاره چمتو شو.

پر دې روغتون چې پرون په مرکز تالقان کې پرانیستل شو، تر ۱۴ میلیونه ډېرې افغانۍ لګېدلې دي.

د افغانستان عامې روغتیا وزارت پرون وویل چې په تېرو ۲۴ ساعتونو کې ۲۱۰ تنه په کرونا ویروس اخته شوي چې له دې سره پر دې ناروغۍ د ټولو اخته کسانو شمېره نږدې ۳۳ زره ۶۰۰ ته ورسېده.

امریکا په افغانستان کې له بې‌وزلو سره ۴۹ میلیونه ډالره مرسته وکړه

ارشیف، د مرستې په تمه یو شمېر بې‌وزله خلک

د امریکا نړیوالې پراختیایي ادارې (یو.اېس.اېډ) په افغانستان کې له بې‌وزلو سره د خوراکي موادو لپاره د ۴۹ میلیونه ډالرو مرسته اعلان کړه.

دا مرسته به د ملګرو ملتونو د خوړو نړیوال پروګرام (ډبلیو.اېف.پي) تر اړمنو کسانو ورسوي.

د افغانستان لپاره د (ډبلیو.اېف.پي) مرستیال مشر رابرټ کاسکا وایي، دا مرستې یې په داسې وخت کې ترلاسه کړې دي چې له اټکل سره سم نږدې څلور میلیونه افغانان د خوراکي موادو له سخت کمبود سره مخامخ دي.

د خوراکي موادو دا مرسته به له نږدې یو میلیون هغو بې‌وزلو سره وشي چې جګړو ځپلي دي یا یې د طبیعي افتونو له امله اقتصاد خراب شوی دی.

اتل قول اردو: کندهار کې ۷ تنه طالبان وژل شوي

ارشیف

د کندهار امنیتي چارواکي په معروف ولسوالۍ کې د اووه طالبانو د وژلو ادعا کوي.

په کندهار کې د ۲۰۵ اتل قول اردو قوماندانۍ مرستیال ویاند صادق عیسي ازادي راډیو ته پرون وویل چې طالبانو تر غرمې مخکې غوښتل چې د معروف ولسوالۍ پر امنیتي پوستو بریدونه وکړي، خو مخکې تر دې چې برید وکړي هوایي ځواکونو حمله پرې وکړه.

نوموړي زیاته کړه: "اووه تنه ترهګر ووژل شول او درې تنه‌یې ټپيان شول. په وژل شویو کې د فرید په نوم د ترهګرو یو قوماندان هم شامل دی."

ښاغلي عیسی زیاته کړه چې د طالبانو یو شمېر وسلې او مهمات هم د دې هوایي برید له امله له‌منځه تللي دي.

طالبانو د دې پېښې په تړاو څه نه‌دي ویلي.

افغان حکومت: سلګونه خطرناک طالب بندیان نه خوشې کوو

د خوشې شویو طالبانو انځور

افغان چارواکي وايي چې دوی به سلګونو هغه طالبان چې ډېر خطرناک ګڼل کېږي، نه راخوشې کوي.

دا خبره د افغانستان د ملي امنیت شورا ویاند جاوېد فیصل فرانسې خبري اژانس ته کړې ده.

ده ویلي چې طالبانو غوښتنه کړې چې شپږ سوه طالب زندانیان راخوشې شي خو پر دغو کسانو د جنايي جرمونو جدي قضيې دي.

یوه بل چارواکي د نوم نه ښودلو په شرط ویلي چې په دغو کې قاتلان، غله او سلګونو بهرني جګړه ماران شامل دي.

خو طالبانو پر حکومت تور پوري کړی چې د دغو بندیانو پر وړاندې يې جعلي قضیې جوړې کړي دي.

تر دې مخکې د عدلي او قضايي ارګانونو یوې باخبره سرچینې ازادي راډیو ته د سلو طالب زندانیانو یو فهرست سپارلی وو چې په وینا یې په دې نوملړ کې ۸۱ داسې کسان دي چې د طالبانو د ډلې غړیتوب نه لري او په جنايي جرمونو محکوم شوي دي.

د امریکا او طالبانو تر منځ د فبرورۍ میاشتې د موافقې له مخې د بین الافغاني خبرو تر پیل مخکې به افغان حکومت ۵ زره طالب زندانیان او طالبان به د افغان حکومت زر بندیان راخوشې کوي.

افغان حکومت وايي تر اوسه یې له خپلو زندانونو د طالبانو ۳۹۹۵ بندیان راخوشې کړي دي او د طالبانو په وینا دوی تر اوسه له خپلو زندانونو ۶۵۱ بندیان راخوشې کړي دي.

غني د کاپیسا ولایت د وضعیت ارزولو په هدف محمودراقي ته رسېدلی

محمداشرف غني

افغان ولسمشر د کاپیسا ولایت د وضعیت ارزولو په خاطر د دې ولایت مرکز محمودراقي ښار ته تللی دی.

د جمهوري ریاست ارګ د اعلامیې له مخې، محمد اشرف غني له ملکي او نظامي مسئولینو سره د خلکو په یوه پراخه غونډه کې خبرې کوي چې پکې قومي مشرانو، متنفزین، عالمان، ښځې او ځوانان ګډون کوي.

ولسمشر به همداراز د هغوی وړانديزونه واوري.

کاپیسا ولایت ته د ولسمشر غني سفر په داسې حال کې دی چې د دې ولایت په ولسوالیو کې د ناامنیو زیاتېدو راپورونه ورکړل شوي دي.

ولایتي شورا: پکتیکا کې ۵ ولسوالۍ د وسله‌والو طالبانو لاس کې دي

پکتیکا

د پکتیکا د ولایتي شورا یو شمېر غړي او اوسېدونکي وایي چې د دې ولایت پنځه ولسوالۍ په بشپړ ډول د وسله‌والو طالبانو په لاس کې دي او په یو څو نورو ولسوالیو کې بیا نیم دولت او نیم وسله‌وال طالبان فعالیت لري.

د پکتیکا د ولایتي شورا غړی افسر خان سلیمان‌خېل وایي چې د دې ولایت پنځه ولسوالۍ په بشپړه توګه له وسله‌والو طالبانو سره دي.

نوموړی وایي، د امنیتي ځواکونو ترمنځ نا همغږي او فساد د دې لامل شوی چې یادې ولسوالۍ تر اوسه د حکومت تر کنټرول لاندې رانه‌شي.

د ولایتي شورا دغه غړی وایي چې د یادو ولسوالیو ولسوالان له ګاونډیو ولسوالیو او یا هم له مرکز ښرنې خپلې چارې مخکې بیایي، هغه څه چې د یو شمېر دغو ولسوالیو د نقل مکان خبره د پکتیکا ولایتي اداره هم تأییدوي.

د پکتیکا ولایت ۱۸ رسمي او څلور غیر رسمي ولسوالۍ لري.

د پکتیکا والي مجیب‌الرحمن څمکنی وایي، د ګوشتې په سیمه کې لویه لاره چې په مسیر یې د دې ولایت درې ولسوالۍ پرتې دي، له تېرو ۱۸ کالونو راهیسې د وسله‌والو طالبانو له‌خوا بنده شوې ده او دې ولسوالیو ته د هوا له لارې اکمالات ترسره کېږي.

د پکتیکا یو شمېر ولسوالیو د امنیت په اړه د ولایتي شورا او خلکو اندېښنې په داسې مهال راپورته کېږي چې دې ولایت ته غځېدلې لویې لارې له تېرو شااوخوا ۱۰ کالونو راهیسې ناامنه دي او د عمومي لارو په یو شمېر برخو کې وسله‌وال طالبان چک پاینټونه اچوي او تلاشۍ کوي.

ارزګان کې پر ۸۰۰ مالدارو کورنیو د لبنیاتو پروسس دستګاوې وېشل شوي

ارشیف

د ارزګان د کرنې، اوبو لګولو او مالدارۍ ریاست وایي چې د مالدارۍ د پراختیا او له مالدارانو سره د اقتصادي مرستې په هدف د دې ولایت پر ۸۰۰ مالدارو کورنیو د لبنیاتو د پروسس لمریزې دستګاوې وېشل شوې دي.

د ارزګان د کرنې، اوبو لګولو او مالدارۍ رئیس انجنیر احمد شاه خیري ازادي راډیو ته وویل چې د دې ولایت پر ۸۰۰ مالدارو کورنیو د لبنیاتو د پروسس د لمریزو دستګاو د وېش ټولیز لګښت ۱۰ میلیونه او ۳۲۰ زره افغانۍ دی چې د هندوستان هېواد د "HICPD" مؤسسې په مالي همکارۍ پر مالدارو کورنیو وېشل شوي دي.

د ارزګان د کرنې رئیس زیاته کړه چې تر دې وروسته به له یادو مرستو څخه برخه‌من شوي مالداران د خپل مالدارۍ محصولات په پاک او صفا ډول پروسس کوي او بازار ته به‌یې په ښه کیفیت وړاندې کړي.

هغه دغه‌راز وویل چې د دې ولایت په مرکز او ولسوالیو کې د لبنیاتو ټولنې هم جوړې شوې دي چې د لبنیاتو د پروسس او بازار موندنې په برخه کې ډېر اغېزناک تمام شوي دي.

دوي وایي، د لبنیاتو پروسس او د مالدارو کورنیو اقتصادي ودې ته د کرنې وزارت پاملرنه تر پخوا زیاته شوې ده.

دغه وزارت د لبنیاتو د پراختیا د پروژو په لاره اچولو سره زرګونه کلیوالي کورنۍ د دغو پروژو تر چتر لاندې راوستي دي.

د دغو پروژو اصلي موخه د شېدې د تولیداتو زیاتوالی د لبني موادو پروسس او دغو موادو ته د کوپراټیفونو او ټولنو له لارې مارکېټ پیدا کول دي.

په کور دننه د لبني موادو د پراختیا په پار د کرنې وزارت له‌خوا ګڼې پروژې پلي شوي او په دې برخه کې ډېرې هلې ځلې شوې دي.

په اقینې او تورغنډۍ بندرونو کې ضد عفوني دستګاوې جوړېږي

ارشیف

د افغانستان د اوسپنې پټلۍ اداره وايي، د کرونا ویروس د خپرېدو د مخنیوي لپاره د افغانستان په سوداګریزو مالونو لګول شوي بندیزونه به ډېر ژر حل شي.

د دغې ادارې رئیس عبدالباري صدیقي نن ازادي راډیو ته وویل چې دوی به ډېر ژر دوه هغه دستګاوې ګټې اخیستنې ته وسپاري کوم چې وارداتي او صادراتي توکي ضد عفوني کوي.

نوموړي وویل، دغه دستګاوې په اقینې او تورغنډۍ بندرونو کې جوړېږي او دغه‌راز ټولې هغه لارۍ او کاروانونه چې له دې بندرونو څخه تېرېږي درمل پرې شیندي.

د سوداګرۍ او پانګونې خونې مرستیال یونس مومند هم له دې اقدام څخه هرکلی کوي.

نوموړي له ازادي راډیو سره په خبرو کې وویل چې دغه دستکاوې به د سوداګرو ستونزې هوارې کړي.

دا په داسې حال کې ده چې په افغانستان کې د کرونا ویروس له خپرېدو او کمو امکاناتو له امله افغاني محصولات بهر ته نه‌لېږدول کېدل.

کندهار کې یوې موټر بم چاودنې ۳ پولیس وژلي او ۱۴ تنه نور ټپيان کړي

د کندهار ولایت نقشه

د کندهار په شاه ولیکوټ ولسوالۍ کې نن سهار په موټر بم چاودنه کې درې پولیس وژل شوي او ۱۴ ملکي او نظامي کسان ټپيان شوي دي.

د کندهار د والي ویاند احمد بهیر احمدي وايي: "له چاودېدونکو موادو بار موټر سهار وختي د شاه ولیکوټ امنیه قوماندانۍ مخې ته چاودنه کړې."

احمد بهیر احمدي وویل چې د ملي اردو د انټرنشنل په نوم لوی اکمالاتي موټر کې چاودېدونکي مواد ځای پر ځای شوي و.

د دې حملې مسؤلیت طالبانو اخیستی دی. قاري محمد یوسف احمدي چې ځان د وسله‌والو طالبانو ویاند معرفي کوي، ادعا کړې چې په دې پېښه کې تر ۲۰ زیاتو پولیسو ته مرګ‌ژوبله اوښتې ده.

افغانستان سبا د سیمه‌ییزې او نړیوالې اجماع د پياوړتیا کنفرانس کوربه دی

ارشیف، د سیمه‌ییزې او نړیوالې اجماع د پياوړتیا د دوشنبې غونډه

ټاکل شوې ده افغانستان سبا (د پنجشنبې په ورځ د جولای په نهمه نېټه) د سولې په اړه د سیمه‌ییزې او نړیوالې اجماع د پياوړتیا په نوم د وېډیو کنفرانس کوربه وي.

په دې کنفرانس کې به د ولسمشر محمد اشرف غني ترڅنګ د ناټو، ملګرو ملتونو، اروپايي ټولنې او امریکا چارواکي ګډون وکړي.

د افغانستان د بهرنیو چارو ویاند ګران هېواد په دې اړه رسنیو ته داسې وویل: "افغانستان روانه اوونۍ د سولې او اقتصادي پراختیا اړوند درې مهم کنفرانسونه لري چې له دې ډلې یو یې د دوشنبې په ورځ د جولای په شپږمه نېټه د 'افغانستان د سولې لپاره د سمیه‌ییزې اجماع د پیاوړتیا کنفرانس' تر عنوان لاندې پای ته ورسېد."

د افغانستان د بهرنیو چارو وزارت وايي، په دې کنفرانس کې د ګاونډیو او سیمې ۲۰ هېوادونو او دوو سازمانونو ګډون کړی وو.

د دې ترڅنګ افغانستان له چین او پاکستان سره د ستراتېژیک دیالوګ تر نوم لاندې درې کنفرانسونه کړي. د افغانستان د بهرنیو چارو وزارت وايي، په دغو غونډو کې پر امنیتي، سیاسي او اقتصادي همکاریو هر اړخیز بحث وشو.

ننګرهار چارواکي: یو تن د تښتوونکو له منګلو ازاد شو

د تښتوونکو له منګولو ازاد شوی عبدالرحمن

په ننګرهار کې یو تن د تښتوونکو له منګولو ازاد او خپلې کورنۍ ته وسپارل شو.

د ننګرهار چارواکي وایي، د ملي امنیت ځواکونو نن سې شنبه یو تن چې عبدالرحمن نومېږي او د ننګرهار د نازیان ولسوالۍ د ولسوال زوی او نېږدې ۲۱ ورځې وړاندې د جلال اباد ښار د شپږمې ناحې په مربوطاتو کې تښتول شوی و، د تښتوونکو له منګولو ازاد او نن خپلې کورنۍ ته وسپارل شو.

د ننګرهار والي شاه محمود میاخېل نن په دې اړه په یوه کنفرانس کې وویل، عبدالرحمن ۲۱ ورځې د تښتوونکو په قضه کې و او د شېخ مصري په سیمه ساتل کېده، د کورنۍ نه یې د خوشې کېدو په بدل کې دوه نیم سوه زره امریکایي ډالر غوښتل چې د ملي امنیت ځواکونو له خوا روغ رمټ ازاد او په تور یې ۵ تنه ونیول شول.

نیول شوي کسان د ملي امنیت په قبضه کې تر څېړنو لاندې دي.

د تښتول شوي عبدالرحمن کورنۍ وایي، تښتوونکو ورته ګواښ کړی و چې که دوه نیم سوه زره امریکایي ډالر ورنه کړل شي، نو عبدالرحمن او د کورنۍ نور غړي به یې ووژني.

ملي امنیت: د داعش ډلې ۲ ځانمرګي بریدګر نیول شوي

ارشیف

د ملي امنیت عمومي ریاست وايي، د اسلامي دولت ډلې یا داعش د خراسان څانګې ۲ ځانمرګي بریدګر نیول شوي دي.

دغه ریاست نن رسنیو ته په یوه لېږلې اعلامیه کې ویلي، چې دغه کسان چې غوښتل یې په کابل کې پر روغتیایي مرکزونو او رسنیو حملې وکړي، د پېچلو عملیاتو په لړ کې نیول شوي دي.

د دغو مشکوکو کسانو نومونه لطف اله او احمدالله ښوول شوي، چې وايي د کابل د شکردرې ولسوالۍ اوسېدونکي دي.

چارواکي: پکتیا کې ماین چاودنې د ملي اردو ۲ سرتېري وژلي

ارشیف

د پکتیا په احمدخېلو ولسوالۍ کې نن د ماینونو دوو چاودنو د ملي اردو ۲ سرتېري وژلي او درې نور ټپیان کړي دي.

په پکتیا کې د ۲۰۳ تندر قول اردو ویاند ایمل مومند ازادۍ راډیو ته د دغو دوو پېښو په اړه وویل: "په یوه چاودنه کې چې د احمد خېلو ولسوالۍ د ترکاڼي په سیمه کې د ملي اردو پر رېنجر شوې، یو کس پکې ټپي شوی، خو د دې ولسوالۍ د کلکین خولې په سیمه کې بیا د ملي اردو پر ګزمې د ماین چاودنې له امله دوه سرتېري شهیدان شوي او دوه نور ټپیان شوي دي."

په سیمه کې یوې امنیتي سرچینې بیا د نوم او غږ نه خپرولو په شرط ازادي راډیو ته ویلي، چې په دغو دواړو پېښو کې د ملي اردو ۵ تنه سرتېري وژل شوي او یو ټپي شوی دی.

که څه هم د پکتیا امنیتي چارواکي وايي، دغه ماینونه وسله والو طالبانو ځای پر ځای کړی و، خو وسله والو طالبانو تر اوسه په دې اړه رسنیو ته څه نه دي ویلي.

نور راوښيه

XS
SM
MD
LG