د لاسرسۍ وړ لېنکونه

تازه خبر
دوشنبه ۱۱ وری ۱۳۹۹ کابل ۰۳:۲۶

خبرونه

د روسیې ټولو سیمه‌ییزو پارلمانونو د اساسي قانون تعدیلات تصویب کړل

د روسیې پارلمان (دوما)

ریا خبري اژانس راپور ورکړی چې د روسیې د پارلمان یوه مخکښ استازي تأیید کړې چې د روسیې ټولو ۸۵ سیمو په اساسي قانون کې تعدیلات تصویب کړل.

دغه تعدیلات ولسمشر ولادیمیر پوتین ته دا امکان برابروي چې د ۱۶ نورو کلونو لپاره پر قدرت پاتې شي.

د ولادیمیر پوتین د ولسمشرۍ دوهمه پرله‌پسې شپږ کلنه دوره په ۲۰۲۴م کال کې پای ته رسېږي.

ریا خبري اژانس د مشرانو جرګې د اساسي قانون د کمېټې د مشر اندري کلیشاس وینا رااخیستې چې نن جمعه‌یې ویلي دي: "د روسیې مشرانو جرګې یا د فدراسیون شورا په ټولو ۸۵ سیمه‌ییزو پارلمانونو کې د رأی اچونې نتیجه ترلاسه کړې چې د ټولو رایو نتیجه مثبته ده."

د دې نوې لایحې له مخې چې په اساسي قانون کې تعدیلات هم په‌کې شامل دي، د ولسمشر پوتین د ولسمشرۍ تېرې دورې نه‌حسابېږي.

د ورځې تازه خبرونه دلته ولولئ

ایران کې د کرونا ویروس له کبله د مړو شمېر ۲۷۵۷ ته ورسېد

په ایران کې د یاد ویروس د مثبتو پېښو رسمي شمېره هم ۴۱۴۹۵ تنو ته لوړه شوې ده.

په ایران کې د کرونا ویروس له کبله په تېرو ۲۴ ساعتونوکې ۱۱۷ کسان مړه شوي دي.

په دې سره په دې هیواد کې د کرونا ویروس له کبله د مړو شمېر ۲۷۵۷ تنو ته ورسېد.

د ایران د روغتیا وزارت ویاند کیانوش جهانپور نن د مارچ دیرشمه د ایران دولتي ټلویزیون ته وکړه.

د جهانپور په خبره په ایران کې د یاد ویروس د مثبتو پېښو رسمي شمېره هم ۴۱۴۹۵ تنو ته لوړه شوې ده.

ښاغلي جهانپور وایې په تیرو ۲ ساعتونو کې په دې هیواد کې ۳۱۸۶ نوي پیښي ثبت شوي دي.

نوموړي له ایرانیانو یو ځل بیا وغوښتل کې په کورونو کې پاتې شي.

ایران د نړۍ له هغو هیوادونو کې چې کرونا ویروس سخت ځپلی دی.

ازبکستان د هوایي ډګرونو فعالیتونه ځنډولي

دا محدودیت هم د هوایي ډګرونو د بند پاتې کېدو تر مودې پوري په پام کې نیول شوی دی.

ازبکستان د دې هېواد د ټولو هوایي ډګرونو فعالیتونه وځنډول څو د کرونا ویروس د خپریدو د مخنیوي سره مرسته وشي.

د ازبکستان د بهرنیو چارو وزارت په یوې اعلامیې کې ویلي چې ټول هوایي ډګرونه دې سر له نن څخه د اپریل تر ۲۰ پوري خپل فعالیتونه ودروي.

د دې هېواد یوه حکومتي کمېسیون له وړاندې د ازبکستان د ښارونو او ښارګوټو ترمنځ د وسایطو پر تګ راتګ محدودیت لګولی.

دا محدودیت هم د هوایي ډګرونو د بند پاتې کېدو تر مودې پوري په پام کې نیول شوی دی.

د ازبکستان د روغتیا چارواکو په خبره په دې هېواد کې په کرونا ویروس د اخته کسانو شمېر ۱۴۵ تنو ته رسېدلی چې ۲ تنه په کې مړه شوي.

د دې په ګاونډي قرغزستان کې د کورنیو چارو وزارت نن د مارچ دیرشمه ویلي چې پولیسو ۱۰۸۷ کسان د ګرځبندیز د سرغړوني له کبله نیولي دي.

په دې هېواد کې پنځه ورځې وړاندې اعلان وشو چې د شپې له اتو بجو د سهار تر ۷ ټول افراد او نقیله وسایط له ګرځېدو منع دي.

په قرغزستان کې د کرونا ویروس ۸۴ پېښې ثبت شوي دي.

په قزاقستان کې نن دوشنبه د مارچ دیرشمه د کرونا ویروس لس نوي پېښې ثبت شوي چې د دې ویروس د ناروغان شمېر ورسره ۲۹۴ ته ورسېد.

یو تن یې له دې ویروسه مړ شوی دی.

د منځنۍ آسیا په دوو نورو هېوادونو تاجکستان او ترکمنستان کې تر اوسه د کرونا ویروس کومه پېښه رسماً نه ده ثبت شوې.

چارواکي: هلمند، زابل او بادغیس کې امنیتي ځواکونو ته مرګ ژوبله اوښتې

ارشیف

د افغانستان په یو شمېر ولایتونو کې د طالبانو په بریدونو کې افغان امنیتي ځواکونو ته مرګ ژوبله اوښتې ده .

د زابل د والي ویاند ګل اسلام سیال آزادي راډیو ته وویل چې تېره شپه په ارغنداب ولسوالۍ کې وسله والو طالبانو د امنیتي ځواکونو پر پوستو بریدونه کړي چې شپږ افغان سرتېري په کې وژل شوي دي.

هغه زیاته کړه: "دا چې زموږ امنیتي ځواکونه په فعال دفاعي حالت کې وو د وسله والو طالبانو دا لوی برید یې په شا وتمباوه او په متقابله جګړه کې یې طالبانو ته درنه مرګ ژوبله واړوله، له بده مرغه په دې جګړه کې ۶ افغان امنیتي سرتېري وژل شوي دي."

ښاغلي سیال د طالبانو د تلفاتو دقیق شمېر یاد نکړ.

بلخوا د هلمند د والي ویاند عمر ځواک نن آزادي راډیو ته ویلي چې تېره شپه د کجکي ولسوالۍ په مربوطاتو کې د وسله والو طالبانو په بریدونو کې دوه افغان سرتېري وژل شوي او دوه نور ټپیان دي.

د بادغیس د والي ویاند نجم الدین برهاني هم آزادي راډیو ته د امنیتي ځواکونو پر یوې پوستې د طالبانو د برید خبره کړې ده.

د ښاغلي برهاني په خبره دا برید د بادغیس ولایت د مقر ولسوالۍ په مربوطاتو کې شوی چې د ده په خبره یو پولیس افسر په کې وژل شوی او ۲ نور سرتېري ټپیان دي.

دغه چارواکي طالبانو ته هم د مرګ ژوبلې د اړولو ادعا کوي.

طالبانو تراوسه په دې اړه څه نه دي ویلي.

کورنیو چارو وزارت: هرات کې ۴۰۰۰ کیلوګرامه چاودېدونکي مواد کشف شوي

ارشیف

د افغانستان د کورنیو چارو وزارت وایي په هرات ولایت کې ۴۰۰۰ کیلوګرامه چاودېدونکي مواد کشف شوي دي.

د دغه وزارت په یوې خبرپآڼه کې راغلي چې دا امونیم نایتریت په یوه باروړونکي موټر کې ځای پرځای شوي و.

د غه موټر د غوریان ولسوالۍ په مربوطاتو کې د پولیسو لاس ته لویدلی، خو د کورنیو چارو وزارت په خبرپاڼه کې یې د وخت په اړه څه نه دي ویلي.

د دغه وزارت چارواکي وایې د دې موادو په کشفولو سره په هرات ولایت کې د لسګونو ترهګریزو پېښو مخه ونیول شوه .

د کورنیو چارو وزارت په وینا له امونیم ناتریت څخه د ډیری وسله والې ډلې په ځانګړي ډول طالبان د سړک غاړي ماینونو په جوړلو او نورو تخریبي فعالیتونو کې کار اخلي.

د افغانستان د انځرو حاصلات به ۴۲ زره مټریک ټنو ته زیات شي

ارشیف

د افغانستان د کرنې او مالدارۍ وزارت د انځرو د پروسس او بسته‌بندۍ طرحه وروستۍ کړه.

د دغه وزارت ویاند اکبر رستمي نن ازادي راډیو ته وویل، دغه طرحه به سږ کال عملي شي چې د دې طرحې پر بنسټ به د انځرو حاصلات له ۲۵ زره مټریک ټنو ۴۲ زره مټریک ټنو ته زیات شي.

دغه وزارت وایي، دوی په پام کې لري چې په مرکز او ولایتونو کې د تازه او وچو انځرو د پروسس مرکزونه جوړ کړي او همدارنګه په راتلونکو پنځو کلونو کې به څه باندې ۳۲۵۰ هکټاره ځمکه کې د انځرو باغونه جوړ شي.

انځر د افغانستان له مهمو صادراتو یادېږي چې د کرنې او مالدارۍ وزارت په وینا افغانستان ته لسګونه میلیونه ډالر عواید لري.

افغانستان تېر کال څه باندې ۷۰ میلیونه ډالرو په ارزښت د انځرو صادرات لرل.

اوس‌مهال د هېواد په ۱۶ ولایتونو کې انځر تولیدېږي چې ډېر یې په لوېدیځو ولایتونو کې دي.

پکتیا د درېیو اوونیو لپاره قرنطین شو

د ګردېز ښاریان بیا وایي چې لا هم ښار ته له ولسوالیو او نورو ولایتونو څخه خلک ازاد تګ راتګ کوي.

د پکتیا سیمه‌ییز چارواکي وایي، په دغه ولایت کې یې د درېیو اوونیو لپاره د قرنطین موده اعلان کړې.

د دغه ولایت والي شمیم خان کټوازی وایي، له نن وروسته به په ښار کې د خوراکي توکو، درملتونونو، صرافیو، نانوایي او بانکونو پرته ټولې هټۍ تر دوهم امر پورې تړلې وي.

د ګردېز ښاریان بیا وایي چې لا هم ښار ته له ولسوالیو او نورو ولایتونو څخه خلک ازاد تګ راتګ کوي چې په وینا یې که‌یې مخه ونه‌نیول شي، شاید د ویروس د انتقال سبب وګرځي.

خو ښاغلی کټوازی وایي چې ښار ته داخلېدونکي موټر به هم محدود کړي.

له بلې‌خوا د پکتیا پوهنتون د طب پوهنځي مسؤلینو خپل محصلانو ته د انلاین زده‌کړو سیستم رامنځته کړی چې په وینا یې له نیمایي زیات محصلان ترې په عادي ډول خپل تحصیل ته ادامه ورکوي.

د طب پوهنځي رئیس ډاکتر محمد شریف فورقاني ازادي راډیو ته وویل: "یوازې د طب پوهنځي مسؤلینو نه، بلکې د پکتیا د پوهنې ریاست مسؤلین وایي، د پکتیا له ملي ټلوېزیون او سیمه‌ییزو راډیوګانو له لارې خپلو زده‌کوونکو ته تدریس بهیر پیلوي."

که څه هم په پکتیا کې د کرونا کومه مثبته پېښه نه‌ده ثبت شوې، خو په افغانستان کې په کرونا د اخته کسانو شمېره ۱۴۱ کسانو ته ورسېده چې له ډلې یې ۴ کسانو خپل ژوند هم له لاسه ورکړی او پنځه تنه نور بیا له دې ناروغۍ بېرته روغ شوي دي.

'سوداګریزو بندیزونو سوداګرو ته میلیونونه ډالر زیان اړولی'

کابل ولایت کې د کرونا ویروس د خپرېدو له امله پر ګرځېدو محدودیت.

د افغانستان د سوداګرۍ او صنعت خونه وايي، په هېواد کې د سوداګریزو بندیزونو له امله سوداګرو ته میلیونونه ډالر زیانونه اوښتي دي.

د دې خونې د مدیره پلاوي غړي خان جان الکوزي د دوشنبې په ورځ ازادي راډیو ته وویل چې سوداګر یوازې د پاکستان په سرحد کې هره ورځ څه باندې یو میلیون ډالر ټکس ورکوي.

د نوموړي په باور، له یوې میاشتي راهیسې د هېواد په صادراتو کې بې‌ساری کمښت راغلی.

دا په داسې حال کې ده چې له تېرې یوې میاشتې راهیسې د پاکستان له لوري د کرونا ویروس د خپرېدو د مخنیوي په هدف د سپین بولدک لاره د سوداګرو له لوري تړل شوې ده.

همدارنګه د تورخم لار چې د ۱۴ ورځو لپاره بنده شوې وه پاکستان تېره ورځ دغه موده د ۱۴ نورو ورځو لپاره هم تمدید کړه.

د افغانستان د سوداګرۍ او پانګونې خونې په وینا که څه هم له یو شمېر نورو هېوادونو واردات ترسره کېږې، خو د صادراتو په برخه کې ډېر محدودیتونه لګول شوي او ان له یو شمېر هېوادونو سره صادرات درول شوي دي.

ائتلافي ځواکونو په عراق کې 'کې-۱' اډه خوشې کړه

عراق د متحده ایالاتو سرتیري د تاجي په اډه کې ګرځي

د امریکا په مشرۍ ائتلافي ځواکونه یکشنبه د عراق په شمال کې له هغې پوځي اډې ووتل چې تېر ډسمبر د ایران له‌خوا په راکټونو ویشتل شوې وه.

ایران دا بریدونه د امریکا په لاس د دغه هېواد د یوه لوړپوړي پوځي جنرال قاسم سلیماني د وژلو په غبرګون کړي و.

د امریکا په مشرۍ ائتلاف په یوه اعلامیه کې ویلي چې په کرکوک شمالي ولایت کې (کې-۱) اډه خوشې کوي.

د دې پوځي اډې پوځي وسایل چې ارزښت‌یې یو میلیون ډالرو ته رسېږي عراقي پوځیانو ته منتقل شوي.

په دې پوځي اډې د ۲۰۱۹ کال په ډسمبر کې د ایران په راکټي بریدونو کې یو امریکایي قراردادي چې د داعش پر ضد یې عراقي پوځیان روزل، وژل شوی و.

پاکستان کې پر کرونا ویروس د اخته کسانو شمېر له ۱۵۰۰ واوښت

پاکستان

په پاکستان کې په کرونا ویروس د اخته خلکو شمېر له یو نیم زرو واوښت.

د پاکستان د روغتیا وزیر ظفر میرزا یکشنبه وویل چې شنبه او یکشنبه‌یې ۱۲۱ تازه پېښې ثبت کړې دي.

د هغه په خبره په پاکستان کې د کرونا ویروس ۷۰ فیصده مثبتې پېښې د هغو کسانو دي چې له ایرانه دغه هېواد ته ورستانه شوي دي.

په پاکستان کې تر دې دمه د کرونا ویروس له لاسه ۱۴ کسان مړه شوي دي.

د دغه هېواد په لویو او وړو ښارونو کې ګرځ‌بندیز وضع شوی دی.

د پاکستان د روغتیا وزارت وايي شاوخوا ۱۳۰۰۰ مشکوکې پېښې هم شته چې له ډلې یې اته زره کسان په قرنطین کې دي.

ایران په ګڼ‌مېشتو محبسونو کې د بندیانو د خلاصون موده غځوي

ارشیف

ایراني چارواکي وایي د دغه هېواد په ګڼ‌مېشتو محبسونو کې د کرونا ویروس د مخنیوي لپاره د بندیانو د خلاصون موده نوره هم غځوي.

د چارواکو په خبره په غځېدلې موده کې ټول‌ټال ۱۵ زره بندیان موقتاً ازادېږي چې ورسره به د ازادو شویو بندیانو شمېر یو لکو ته ورسېږي.

د ایران د قضائیه قوې ویاند غلام حسین اسماعیلي پرون دولتي ټلوېزیون ته وویل چې بندیان به د اپرېل تر ۱۹مې په موقته توګه خوشې شي.

د ایران د روغتیا وزارت ویاند کیانوش جهانپور پرون په یوه خبري کنفرانس کې د تازه مړو شویو شمېر اعلان کړ.

هغه زیاته کړه: "متأسفانه، موږ په تېرو ۲۴ ساعتونو کې ۱۲۳ نور کسان هم په روغتونونو کې له لاسه ورکړل."

ایران په نړۍ کې د کرونا ویروس له لاسه په ۱۰ ډېرو ځپل شویو هېوادونو کې دی.

د (کوویډ-۱۹) یا کرونا ویروس له لاسه د مړو شویو ۲۶۴۰ کسانو په لحاظ ایران په څلورم مقام او په ویروس د اخته څه باندې ۳۸ زرو له پلوه ایران په ټوله نړۍ کې په اووم مقام ولاړ دی.

شنونکي وايي په ایران کې په دې ویروس د اخته او د مړو شمېر تر دې ډېر لوړ دی ځکه چارواکي حقایق پټوي.

افغانستان کې کرونا ویروس؛ ۱۴۵ مثبتې پېښې ثبت شوې

د ایران څخه راغلي افغان کډوال

په افغانستان کې د کرونا ویروس مثبتې پېښې ۱۴۵ ته ورسېدې.

د هرات د عامې روغتیا رئیس ډاکتر عبدالحکیم تمنا یکشنبه ناوخته ازادي راډيو ته وویل چې ۲۲ کسان یکشنبه په هرات کې په کرونا ویروس اخته شوي دي.

په (کوویډ-۱۹) یا کرونا ویروس د اخته ۱۴۵ کسانو له ډلې تر اوسه ۴ تنه مړه شوي چې درې یې په هرات او یو یې په بلخ کې دی.

د کرونا ویروس له امله د افغانستان پلازمېنه کابل، هرات، ننګرهار او ځینې نور لوی ښارونه قرنطین شوي دي.

له افغانستانه بهر هم د کرونا ویروس له امله یو افغان د ايټالیا په تورین ښار کې شنبه ماښام مړ شوی دی.

دا خبره په ایټالیا کې د افغانانو د ټولنې مشر اختیارګل مشرقیوال یکشنبه ماښام ازادي راډیو ته تأیید کړه او ويې‌ویل چې دوه نور افغانان هلته په کرونا اخته شوي.

هغه زیاته کړه: "په ایټالیا کې ۲۰ زره افغانان اوسېږي. له دې ډلې زموږ یو افغان ورور په تورین ښار کې وفات شوی او دوه نور افغانان په کرونا اخته شوي چې یو یې بېرته ښه شوی هم دی."

ښاغلي مشرقیوال وویل چې د وفات شوي افغان جنازه په تورین ښار کې خاورو ته سپارل کېږي او نور افغانان هم په بشپړه توګه قرنطین دي.

له کرونا اغېزمنو سره د مرستې لپاره د ځینو مخکښو ورزشکارانو تابیا

ارشیف، یو شمېر افغان بې‌وزله کسان

د افغانستان یو شمېر مخکښو ورزشکارانو د کرونا ویروس له امله د اغېزمنو شویو خلکو سره د مرستو لپاره تابیا ښودلې ده.

له دې ډلې د افغانستان د کرکټ د ملي تیم لوبغاړو راشد خان، افتاب علم او نجیب‌الله ځدراڼ په خپلو فېس‌بوک پاڼو لیکلي چې تر خپلې وسې به له اړمنو افغانانو سره مرستې کوي.

راشد خان په خپله ټویټر پاڼه په یوه جلا پیغام کې ویلي چې د شاهد افریدي له خیریه بنسټ سره هم مرسته کوي او له خلکو غواړي چې کورونو کې پاتې شي.

راشد خان زیاته کړې: "لکه څنګه چې هر یو پوهېږو کرونا ډېر په خپرېدو دی. یوازنۍ لار چې له کرونا په امن پاتې شو دا دی چې خوندي پاتې شو، کور کې پاتې شو له عامه ځایونو ځانونه ګوښه کړو. همدایې یوازنۍ لار ده چې له دې ویروس ځانونه خوندي کړو."

اخوا د رزمي لوبو اتلانو عبدالسمیع فیضي، احمد ولي هوتک او باز محمد مبارز هم اعلان کړی چې له اړمنو خلکو سره‌یې د یو شمېر خوراکي توکو مرسته کړې او دا لړۍ به همداسې جاري ساتي.

د افغان حکومت د سولې ابتدايي تماس ګروپ او طالبانو بیاځلي خبرې

د سولې د ابتدايي تماس ګروپ

د افغانستان د ملي امنیت شورا وایي چې یکشنبه ناوخته د سولې د ابتدايي تماس ګروپ یو وار بیا د طالبانو له استازو سره خبرې کړې دي.

د امنیت شورا په ټویټونو کې راغلي چې د دوی ناسته د وېډیو کنفرانس له لارې وه او د طالبانو له‌خوا هم د سیاسي کمېسیون او هم د بندیانو د چارو د کمېسیون غړي موجود وو.

د افغانستان د ملي امنیت شورا زیاتوي چې طالبان به د سره صلیب نړیوالې کمېټې په مرسته خپله تخنیکي ډله کابل ته استوي او افغان حکومت به‌یې په بګرام کې کوربه وي څو د بندیانو د خلاصون په چارو کار وکړي.

له دې مخکې هم د مارچ په ۲۵ او ۲۲ د افغانستان د حکومت د سولې د ابتدایي تماس ډلې او د طالبانو استازو د وېډیو کنفرانس له لارې خبرې کړې دي.

د امنیت شورا په پرونیو ټويټونو کې راغلي چې دواړو لورو موافقه وکړه چې کابل ته د طالبانو د تخنیکي ټیم په رسېدو سره به نورې خبرې له نږدې وکړي.

د طالبانو د سیاسي دفتر ویاند سهیل شاهین بېګا ازادي راډیو ته په یوه پیغام کې وویل چې ښايي کابل ته د دوی د تلونکي پلاوي شمېر کم او په دوو راتلونکو ورځو کې د سره صلیب نړیوالې کمېټې یا «ای سي ار سي» په الوتکه کې کابل ته ولاړ شی.

طالبان وايي چې افغان حکومت دې تر بین‌الافغاني خبرو مخکې د دوی تر پنځه زره بندیان خوشې کړي او خپل تخنیکي ټیم کابل ته استوي څو دا بندیان له نږدې وګوري.

خوست کې د کرونا ویروس ۲ مشکوکې پيښې ثبت شوې

ارشیف

د خوست روغتیايي مسوولین وايي، چې په لومړي ځل په دې ولایت کې د کرونا ویروس ۲ مشکوکې پېښې ثبت شوې.

دوی یاد مالومات د یکشنبې ورځې مازدیګر رسنیو سره په یوه خبره ناستې کې شریک کړل.

د خوست د عامې روغتیا رئیس ډاکټر حبیب شاه انصاري وویل، دا کسان په اصل کې د لوګر اوسېدونکي دي خو کورونه يې خوست کې دي.

دی زیاتويو مشکوک کسان له ایرانه راستانه شوي، څو ورځې د هرات ښارپه هوټلونو کې پاتې شوي او له بستر کیدو یوه ورځ مخکې خوست ته راغلي دي.

ده وویل، دا مشکوک کسان يې د کرونا ویروس د پېښو لپاره په ځانګړي شوي کادري روغتون کې بستر کړي دي.

د خوست د عامې روغتیا رئیس وویل، هغه ټول کسان به قرنطین شي، چې دې کسانو سره په تماس کې شوي دي.

ښاغلی انصاري زیاتوي: "په خوست ولایت کې بدبختانه موږ ۲شکمنې پېښې لرو، چې دا کسان په کادري روغتون کې زموږ سره بستر شوي دي، زموږ د مسوول کس لخوا يې نمونه اخیستل شوې، مرکز ته لېږل شوي او خدای دې وکړي چې دا پېښې منفي شي، دا کسان د لوګر ولایت دی، له ایران څخه راغلي وو، له هغې وروسته په هرات کې تم شوي او په تعقیب يې خوست ته راغلي، دوی به خامخا دوستانو سره تماس شوی وي، تاریخچه يې اخلو، هغه کسان چې دوی سره تماس کې شوي دي، هغوی موږ قرنطینوو."

د عامې روغتیا وزرات د وروستیو ۷ نویو مثبتو پېښو په ګډون په دې هېواد کې د کرونا ویروس د مثبتو پېښو شمېر ۱۱۳ ښيي.

تر اوسه ۳ کسان په افغانستان کې د کوېډ- ۱۹ناروغۍله کبله مړه شوي دي.

روحاني: ایران کې ښايي د ژوند نوې طریقه ډېر وخت دوام وکړي

حسن روحاني

ولسمشر حسن روحاني وايي چې د کرونا ویروس د خپرېدو له کبله په ایران کې د ژوند نوې طریقه ښايي ډېر وخت دوام وکړي.

ولسمشر روحاني نن یکشنبې د کابینې په غونډه کې وویل، ایرانیان باید تر هغه مهاله د ژوند له دې نوې طریقې سره عادت وکړي چې د کویډ- ۱۹ ناروغۍ لپاره واکسین یا علاج موندل کېږي، په داسې حال کې چې دا کار تر اوسه نه دی شوی.

ښاغلی روحاني دا څرګندونې داسې مهال کوي چې د ایران د روغتیا د وزیر سلاکار علي رضا وهابزاده نن پر ټویټر په یوه بیان کې وویل چې په دې هېواد کې په کویډ- ۱۹ ناروغۍ د اخته کېدو له کبله د مړو شمېره ۲۶۴۰ ته او په کرونا ویروس د اخته کسانو ټول شمېر ۳۸۳۰۹ ته لوړه شوې ده.

نور راوښيه

XS
SM
MD
LG