د لاسرسۍ وړ لېنکونه

تازه خبر
یکشنبه ۴ کب ۱۳۹۸ کابل ۰۳:۴۸

افغانستان

چارواکي: هرات کې د ځانګړې قطعې قومندان په تېروتنه وژل شوی

ارشیف

د هرات د پولیسو د ځانګړې عملیاتي قطعې قومندان څارمن احمدشاه جلالي پرون د فبرورۍ په ۷مه ، ووژل شو.

د هرات د والي ویاند، جېلاني فرهاد ازادي راډیو ته وویل چې پر څارمن احمدشاه جلالي پرون ماښام،د امنیتي تلاشي له یوې پوستې د تېرېدو په وخت کې په تېروتنه کې ډز شوی دی.

جېلاني فرهاد وايي، د هرات والي دا پېښه غندلې او په دې اړه د څېړنې لپاره یې یو پلاوی ګومارلی دی.

د هرات د والي ویاند وویل چې د پولیسو دا قومندان په شخصي موټر کې سپرو و او د هرات ښار د دولسمې ناحیې د نو اباد په سیمه کې وژل شوی دی.

د ورځې تازه خبرونه دلته ولولئ

چارواکي: هرات کې د کرونا ويروس ۳ مشکوکې پېښې تائيد شوې

هغه ٣٦ کسان چې په وروستيو کې د ايران له قُم ښار څخه افغانستان ته راستانه شوي وو، د دوو اوونيو لپاره قرنطين شوي دي.

په هرات ولايت کې په کرونا ويروس د ۳ کسانو د اخته مشکوکې پېښې تائيد شوې دي.

د هرات د حوزوي روغتون د انتاني ناروغيو د څانګې مشر محمد ابراهيم بسيم نن ازادۍ راډيو ته وويل، دغه کسان په وروستيو کې له ايرانه راستانه شوي دي.

ښاغلي بسيم زياته کړه، دغه درې کسان د تشخيص لپاره کابل ته لېږل شوي، خو د معاينې نتايج يې لا معلوم نه دي.

بلخوا د هرات په اسلام کلا بندر کې د صحي مرکز مسوول نور احمد محمدي ويلي، هغه ٣٦ کسان چې په وروستيو کې د ايران له قُم ښار څخه راستانه شوي وو، د دوو اوونيو لپاره قرنطين شوي دي.

د ايران په قم ښار کې د کرونا ويروس د خپرېدو پېښې تر نورو سيمو زياتې وي.

کرونا ویروس لومړی ځل د چین په ووهان ښار کې پیدا او په بیا د هغه هېواد نورو ښارونو او یو شمېر هېوادونو ته خپور شو.

د افغنستان د عامې روغتیا وزارت ویاند وحیدالله مایار تېره ورځ له ازادي راډيو سره په خبرو کې ويلي و چې د عامې روغتیا وزیر په دې اړه له بېلابېلو ارګانونو سره بیړنۍ غونډه کړې او روغتیايي ټيمونو ته یې دنده سپارلې چې جدې څارنه وکړي.

روغتیا پالان وايي،حکومت باید د نورو تدابیرو ترڅنګ د سرحد تړل هم د یو ممکنه اقدام په سترګه وګوري.

افغان حکومت تر دې مخکي اعلان کړی و چې د چین له ووهان ایالته افغان محصلین پلازمېنې کابل ته رالېږدوي.

خو د افغانستان د عامې روغتیا وزارت تېره ورځ ویلي چې، دوی په ایران کې د کرونا ویروس د پېښو له ثبتېدو وروسته یو ځل بیا په دې اړه غور کوي، څو دغه محصلین په خوندي ډول انتقال شي.

د راپورنو پر بنسټ ویل شوي چې تر اوسه له دېرشو په ډېرو هېوادونو کې خلک په دې ویروس اخته شوي دي.

د سولې ولسي حرکت د تاوتريخوالي کمولو د اوونۍ هرکلى وکړ

د سولې ولسي حرکت انځور

د سولې ولسي حرکت په بېلابېلو ولايتونو کې د تاوتريخوالي کمولو د اوونۍ هرکلى وکړ.

دغه حرکت وايي ملاتړو يې په هرات، هلمند، کندهار، زابل، غزني، میدان وردګ، کابل، بغلان، کندز، پکتیا، پکتیکا، ننګرهار او خوست ولایتونو کې لاريونونه کړي دي.

د سولې ولسي حرکت وياند بسم الله وطندوست نن په دې اړه رسنيو ته په يوه ويډيويي پيغام کې وويل: "د لاريونونو پر مهال يې د جګړې پر ښکېلو اړخونو غږ وکړ، چې په جديت دغه پروسه وساتي، دغه راز يې د جګړې پر ښکېلو اړخونو غږ وکړو چې وخت يې راغلى دوى د تاوتريخوالي کموالى په دايمي اوربند واړوي."

د سولې ولسي حرکت وايي دوى د لاريون پر مهال له ولسونو هم غوښتنه وکړه، چې دوى هم د جګړې پر ښکېلو اړخونو فشار راولي، څو د تاوتريخوالي کمېدل په دايمي اوربند واړوي.

د امریکا او وسلوالو طالبانو د پرېکړې پر اساس، له تېرې شنبې د راتلونکې شنبې تر ورځې باید تاوتریخوالی تر ډېره حده کم شي.

د تاوتریخوالي د کمېدو یوه اوونۍ د وسله والو طالبانو لپاره جدي ازموینه بلل شوې، چې ثابته کړي د سولې او خبرو لپاره حقیقي ژمنتیا لري.

د امریکا د بهرنیو چارو وزیر مایک پامپیو تېره اوونۍ وویل که د تاوتریخوالي د کمولو پرېکړه په مناسب ډول عملي شوه، د فبرورۍ په ۲۹مه به امریکا له طالبانو سره د سولې هوکړه لاسلیک کړي.

ارګ: په نږدې ورځو کې د ولسمشر غني د لوړې مراسم ترسره کېږي

افغان ولسمشر محمد اشرف غني

تمه کېږي، په څو ورځو کې محمد اشرف غني د افغانستان د ولسمشر په توګه د وفادارۍ لوړه وکړي.

د ولسمشرۍ ماڼۍ مرستيال وياند دوا خان مينه پال نن ازادۍ راډيو ته وويل ځانګړى کمېسيون به د دغو مراسمو د وخت او ځاى په اړه پرېکړه وکړي.

هغه زیاته کړه: "په نږدې ورځو کې د لوړې مراسم ترسره کېږي، د نېټې په اړه به يې کمېسيون خپله رسمي اعلان وکړي، دوى نن جلسه درلوده او د نېټې او ګډونوالو په اړه به يې له تاسو سره وروسته جزئيات شريک شي."

د افغانستان د ټاکنو خپلواک کمېسيون تېره سې شنبه د سلواغې ٢٩مه اعلان وکړ، چې د دولت جوړونکې ډلې مشر محمد اشرف غني د ٥٠ اعشاريه ٦٤ فيصده رايو په خپلولو سره د ولسمشرۍ د تېرو ټاکنو ګټونکى دى.

د کمېسيون په حواله، د ثبات او همپالنې د ډلې مشر عبدالله عبدالله د ٣٩ اعشاريه ٥٢ فيصده رايو په ګټلو سره په دوهم کتار کې راغلى دى.

خو عبدالله عبدالله د انتخاباتو نتيجه نه ده منلې او ويلي يې دي، چې يو ټولشموله حکومت به جوړوي.

هلمند کې د جوارو حاصلاتو کې ۱۶.۵ سلنه زیاتوالی راغلی

د هلمند جوار په هېواد کې د ننه پراخ بازار لري.

د هلمند د کرنې، اوبولګولو او مالدارۍ ریاست چارواکي وایي، د تېرکال په پرتله د دې ولایت د جوارو په حاصلاتو کې ۱۶.۵ سلنه زیاتوالی راغلی دی.

د هلمند د کرنې، اوبولګولو او مالدارۍ رییس زلمي الکو نن ازادي راډيو ته وویل، سږ کال د دې ولایت په ۳۸ زره هکټاره ځمکه کې جوار کرل شوې وه، چې ۱۹۰ زره ټنه حاصل ورڅخه ترلاسه شوی دی.

خو نوموړي وویل، چې تېر کال د 180 زره ټنو شاوخوا حاصلات درلودل.

د ښاغلي الکو په خبره د روان کال د حاصلاتو د زیاتېدو لاملونه پریمانه اوبه، د اصلاح شوي تخمونو وېش، د جوارو کرکېلې ته د بزګرانو لېوالتیا او په دې برخه کې د بزګرانو روزل دي.

د هلمند جوار په هېواد کې د ننه پراخ بازار لري.

مسوولین وايي، له هلمند څخه هره ورځ له ۵۰۰ تر ۹۰۰ مټریک ټنه جوار کابل، لوګر، غزني، کندهار، مقر، شاجوی، بولدک، او ننګرهار ته صادرېږي، چې په یادو ولایتونو او سیمو کې پروسس او د نباتي غوړيو د جوړولو ترڅنګ تر حیواني خوراکي پورې په بېلابېلو برخو کې کارول کېږي.

د تاوتریخوالي کمښت پانګې اچونې ته هیلې زیاتې کړي

ارشیف- کابل کې د اوسپې د ویلي کولو فابریکه

د افغانستان د سوداګرۍ او پانګونې خونې چارواکي وايي، د تاوتریخوالي د راکمېدو په اعلان سره د سوداګرو له لوري پانګونې ته هیلې زیاتې شوې دي.

د دې خونې ویاند جان اقا نوید نن ازادي راډيو ته وویل، د تاوتریخوالي کمښت به د افغانستان پر اقتصاد مثبت اغېز ولري.

هغه زیاتوي: “له نیکه مرغه د نسبي اوربند په ټینګښت سره دا مهال د سوداګرو لېوالتیا زیاته شوې او غواړي چې په افغانستان کې پاتي شي او پانګونه وکړي، هیله مند یو چې دغه اوربند دایمي شي.”

دا په داسې حال کې ده چې تر دې وړاندې یو شمېر سوداګر اړ شوي وو چې د نا امنیو او هدفي وژنو له امله خپلې پانګې له هېواد نه بهر انتقال کړي.

خوست کې د ښې حکومتولۍ د مرکز پرانېسته

د خوست والي سره له خپلو همکارانو د ښې حکومتولۍ مرکز پرانېستلو پرمهال.

د خوست چارواکي وايي، تر دې وروسته خلک اړ نه دي، چې د خپلو کارونو د خلاصولو لپاره په ساعتونو او ورځو ورځو په تمه پاتې شي.

دوی زیاتوي، اوس ټول مراجعین یو ځانګړي ادرس ته خپلې عریضې ورکوي او په څو دقیقو کې تر یو چتر لاندې د دې عریضو اداري پروسیجر بشپړیږي او بېرته ورسپارل کېږي.

په خوست کې د ښې حکومتولۍ د خدمتونو مرکز د ولایت مقام په یو لوی سالون کې جوړ شوی او د ولایت مقام ټول مامورین او مسوولین په کې د یو چتر لاندې کار کوي.

د دې سالون د سټیج لپاره جوړ شوي ځای کې د خوست والي او د هغه د مرستیال مېزونه ايښي دي.

په لاندې برخه کې د ولایت مقام د څلورو ریاستونو دفتر ریاست، مالي او اداري ریاست، د بشري سرچینو او سکټوري ریاستونو مسوولینو او مامورینو ته په ترتیب سره مېزونه او چوکۍ کېښودل شوي دي.

خوست والي محمد حلیم فدايي د یاد مرکز د پرانیستې پر مهال مشال راډیو ته وویل، پخوا دوی د تشکیل کمښت لاره، خو د دې پروګرام په پلي کېدو سره یو شمېر مامورین له شته تشکیله ډېر شوي دي.

هغه وویل: "په خوست کې د لومړي ځل لپاره د ښې حکومتوالۍ د خدمتونو مرکز تر یو چتر لاندې پرانيستلو او د دې اساسي هدف دادی، چې ولس ته شفاف، چټک، پر وخت، ځواب ویونکي، خدمات وړاندې کړي او د خلکو عریضو ته په ورځو او ساعتونو انتظار ختم او د دوی ستونز نهایت له لسو نه تر شلو دقیقو پورې حل شي."

د خوست چارواکي وايي، په دې ولایت کې به ډېر ژر د اسان خدمت مرکز هم پرانيستل شي، چې هغه به هم تر یو چتر لاندې د کمپیوټري تذکرې، پاسپورټ او د ګاډو جواز سیر او لیسنس په ګډون خپلو مشتریانو ته په چټک ډول بيلابيل ټولیز خدمتونه وړاندې کوي.

دوی وايي، اوس چې کمپیوټري پاسپورټ په اخيستلو تر یوې میاشتې وخت تيريږي، د دې مرکز په پرانیستې سره به مشتریان په دریو ورځو کې خپل پاسپورټونه ترلاسه کوي.

پکتیا کې د تاوتریخوالي کمښت له اوونۍ ملاتړ وشو

دوی وایي سولې ته تر بل هر وخت ښه فرصت رامنځته شوی او دواړه لوري باید له دې فرصته سمه ګټه پورته کړي.

د پکتیا په مرکز ګردېز کې د دې ولایت ګڼ شمېر اوسېدونکو د یوه سوله ییز لاریون پر مهال د تاوتریخوالي د کمښت اوونۍ څخه هرکلی وکړ او د جګړې له ښکېلوو خواو یې وغوښتل، چې یاده موده وغځوي او د دایمي اوربند او بین افغاني سولې لپاره هڅې وکړي.

د پکتیا د مرکز ګردېز په مرکزي چوک کې د تاوتریخوالي د کمېدو د اوونۍ څخه د هرکلي په موخه ددې ولایت اوسېدونکو لاریون ترسره کړ.

دوی وایي سولې ته تر بل هر وخت ښه فرصت رامنځته شوی او دواړه لوري باید له دې فرصته سمه ګټه پورته کړي.

د لاریون یو تن ګډونوال وویل: "واجب ده په نن شرایطو کې چې دا په دایمي اوربند باندې بدل شي او موږ او تاسې ټول په یوه غږ باید دا اواز اوچت کړو، چې اوربند غواړو، سوله غواړو او امن دې دایمي شي."

په پکتیا کې د تاوتریخوالي د کمښت له اوونۍ په داسې حال کې هرکلی کېږي، چې وسله والو طالبانو تېره شپه د دې ولایت په ځاځي اریوب ولسوالۍ کې د پولیسو پر یوه پوسته برید وکړ، چې شاوخوا یو نیم ساعت یې دوام وکړ.

د پکتیا د ولایت مقام ویاند عبدالله حسرت ازادي راډیو ته وویل، چې په دې برید کې یو تن وسله وال طالب وژل شوی.

که څه هم د پکتیا امنیتي چارواکي وایي، د ولسمشر له هدایت سره سم یې دفاعي حالت غوره کړی، خو د وسله والو طالبانو ویاند ذبیح الله مجاهد رسنیو ته بیا په لېږل شوې خبرپاڼه کې ویلي، چې د هوکړې د لاسلیک لپاره د مناسبې فضا د برابرولو په هدف دوی په افغان او بهرنیو امنیتي مرکزونو بریدونه نه کوي.

خو وایي، که بیا هم د دوی له لوري برید کېږي، نو دا باید سرغړونه ونه بلل شي او په وینا یې دا عام اوربند نه دی.

د تاوتریخوالي د کمښت دا اوونۍ چې له تېرې شپې پیل شوه د روانې فبروري میاشتې تر ۲۹ مې به دوام وکړي.

د جګړې د ښکېلوو خواوو دغه ګام نه یوازې په پکتیا بلکې، په پکتیکا لوګر او خوست کې هم د خلکو له تودهر کلي سره مخ شو.

خوست کې د ولسمشرۍ ټاکنو د پایلو له اعلانه هرکلی شوی

ولسي خلکو له غونډې وروسته سوله ییز لاریون کې پر عبدالله غږ وکړ چې د سولې او امنیت د ټینګښت لپاره له اشرف غني سره همکاري وکړي.

په خوست کې یو شمېر خلکو په ولسي غونډه کې جمهوري ریاست ته پر ټولو کاندیدانو غږ وکړ چې د ټاکنو د خپلواک کمېسیون له خوا اعلان شوې پایلې ومني او د سولې د ټینګولو لپاره کار وکړي.

د افغانستان د ټاکنو خپلواک کمېسیون د تېرې سه شنبې په ورځ اعلان وکړ چې انتخابات محمد اشرف غني په ۵۰ اعشاریه ۶۴ فیصده رایو ګټلي دي.

خو د هغه یو شمېر رقیبو کاندیدانو د کمېسیون د پرېکړې له منلو ډډه کړې ده.

په ټاکنو کې د اشرف غني لوي سیال عبدالله عبدالله ځان بریالی اعلان کړ او ویې ویل چې خپل حکومت به جوړ کړي.

په خوست کې پرونۍ ولسي غونډه چې وروسته یې ګډونوالو سوله ییز لاریون هم وکړ پر عبدالله عبدالله غږ وکړ چې د سولې او امنیت د ټینګښت لپاره له اشرف غني سره همکاري وکړي.

د لاریون یوه ګډونوال او مدني فعال نظیر روښان د ازادي راډیو خبریال ته وویل: "هغه کاندیدان چې د ولسمشر په وړاندې ولاړ و، باید د زغم فرهنګ پر ځان عملي کړي، ولسمشر ته دي مبارکي ورکړي او د اپوزېسیون په توګه دي په راتلونکې کې بیا ځان کاندید کړي.

د افغانستان په ځینو ولایتونو کې تېره اوونۍ یو شمېر خلکو د عبدالله عبدالله د انتخاباتي ډلې په پلوي هم سوله‌یېز لاریونونه وکړل.

د سیمه‌یېزو ارګانونو اداره: د سرپل والي خپل کار ته دوام ورکوي

د ولسمشر غني له لوري ټاکل شوی والي عبدالقادر اشنا

د افغانستان د سیمه‌یېزو ارګانونو خپلواکه اداره وايي چې په سرپل کې د جمهور رئيس محمد اشرف غني په حکم ټاکل شوی والي پر خپله چوکۍ ناست دی او د خبرو له لارې د ستونزو د حل هڅې کوي.

د دې ادارې ویاند سید شاه سقیم پرون د فبرورۍ په ۲۲مه، ازادي راډیوته وویل چې د سرپل والي خپل کار کوي او هلته د پېښو شوو ستونزو د حل لپاره له ولسونو سره په خبرو بوخت دی.

د عبدالله عبدالله په مشرۍ انتخاباتي ډلې، ثبات او همپالنې ویاند پرون ازادي راډیو ته وویل چې سرپل ته یې نوی والي ټاکلی او په یو شمېر نورو ولایتونو کې هم د ورته اقدام پلان لري.

خو د سیمه‌ېیزو ارګانونو دخپلواکې ادارې ویاند سید شاه سقیم وویل: "دا یوازې د یوې ډلې کار نه دی، د کوېټې شورا هم د افغانستان د بېلابېلو ولایتونو لپاره والیان لري، هغوي ټاکلي او ګمارلي دي، دا خبره هېڅ ارزښت نه لري دا کار یوازې ځیني کسانو د خپلو محرومیتونو د پټولو او ارمانونو د پورته کولو لپاره کړی دی."

په کابل کې د ملګرو ملتونو د سازمان د ځانګړي استازي دفتر یوناما هم په یوه اعلامیه کې ویلي چې په زور د حکومتي چارواکو ځاي پر ځاي کول د جدي اندېښنې وړ خبره ده.

په بیان کې لیکل شوي چې په داسې وخت کې چې د تاوتریخوالي د کمېدو پرېکړه عملي کېږي او خلک تمه لري چې بین الافغاني خبرو ته به لاره خلاصه شي، په زور یا له بلې غیر قانوني لارې د حکومتي چارواکو ځاي پر ځاي کول د سولې لپاره د خلکو هېلې شنډولای شي.

یوناما ویلي چې پر ټولو خواوو غږ کوي چې له زغمه کار واخلي، د اساسي قانون اصول مراعت کړي او خپل شکایتونه دخبرو له لارې حل کړي.

خلیلزاد په جوزجان کې له دوستم سره لیدلي

ارشیف

د افغانستان د سولې لپاره د امریکا د حکومت ځانګړی استازی زلمی خلیل‌زاد پرون د فبرورۍ په ۲۲مه، جوزجان ته تللی دی.

د ازادي راډیو د خبریال په وینا خلیل‌زاد په جوزجان کې د افغانستان د ولسمشر له لومړي مرستیال عبدالرشید دوستم سره لیده کاته کړي خو جزئیات یې نه دي خپاره شوي.

د افغانستان د ټاکنو خپلواک کمېسیون د تېرې سې شنبې په ورځ د ټاکنو پایلې اعلان کړې او محمد اشرف غني یې د جمهوري ریاست د دویمې دورې ګټونکی وباله.

خو عبدالرشید دوستم د هغو سیاستوالو په ډله کې ودرېد چې د کمېسیون د پرېکړې مخالفت یې کړی دی.

د افغانستان د سولې لپاره د امریکا د حکومت ځانګړی استازی له هغه راهیسې د اشرف غني له مخالفو سیاسي کړیو او څېرو سره په لیدنو او کتنو بوخت دی.

خلیل‌زاد تر دې وړاندې د افغانستان له پخواني ولسمشر حامد کرزي او د ملي یووالي حکومت له اجرائیه رئیس عبدالله عبدالله سره کتلي دي.

طالبان: دا یو عام اوربند نه دی

ارشیف

وروسته له هغې چې د تاوتریخوالي د کمولو د اونۍ د پیل وروسته هم له ځینو ولایتونو څخه د وسله والو طالبانو د بریدونو راپورونه ورکړل شول، طالب ویاند ذبیح الله مجاهد رسنیو ته په یو استولي پیغام ټینګار کړی چې دا یو عام اوربند نه دی.

نوموړې ویلي: ”د توافقنامې د لاسلیک لپاره د مناسبې فضاء په برابرولو کې د ټولو ولایاتو مرکزونه د قول اردوګانو، فرقو، غونډونو او بهرنیوقواو مرکزونه شامل دي.“

د نوموړې په وینا له دې اخوا د دوی د وسله والو هر ډز او برید باید له شوې هوکړې سرغړاوی ونه بلل شي.

د بلخ په زارع د پکتیا په ځاځي اریوب او د ارزګان په چینارتو ولسوالۍ کې تېره شپه له ۱۲ بجو وروسته بریدونه او جګړې شوې چې په ارزګان کې د ځايي چارواکو په وینا دوه افغان پولیس وژل شوي دي.

د کورنیو چارو وزارت مرستیالې ویاندې مروې امینې نن له غرمې مخکې ازادي راډیو ته وویل چې د تاوتریخوالي د کمولو هوکړه تر ډیره عملي شوې او د کوم لوی سرغړاوي راپور یې نه دی ترلاسه کړی.

یوناما د ثبات او همپالنې ټیم له لوري د چارواکو ادلون بدلون سره مخالفت څرګند کړ

ارشیف

په افغانستان کې د ملګرو ملتونو مرستندویه ماموریت یا یوناما پر هغو پېښو سخته اندېښنه ښودلې چې دې سازمان د حکومتي چارواکو ادلون بدلون بللې دی.

یوناما نن په یوې اعلامیې کې ویلي، له زورواکۍ یا نورو غیرې قانوني لارو کار اخیستل، هغه هم په داسې حال کې چې د تاوتریخوالي د کمېدو هڅې روانې دي، د سولې لپاره د افغانانو هیله له خطر سره مخ کولی شي.

یوناما په دې خبرپاڼه کې پر ټولو لورو غږ کړی چې له زغم کار واخلي، اختلاف د خبرو له لارې حل کړي او د اساسي قانون نظم ته درناوی وکړي.

بل خوا په افغانستان کې د ناټو د ملکي استازي دفتر پر خپل ټویټر ویلي: ”دا ددې وخت دی چې د افغانستان سیاسي مشران خپلو کې سره د سولې د پروسې د ملاتړ لپاره یوځای شي.“

کابل کې د ناټو د ملکي استازي نیکولاس کی په حواله په دې ټویټ کې ویل شوي چې دا مهال ” ارمۍ، ډیالوګ او جوړجاړي ته اړتیا ده – نه یو اړخیزو اقداماتو ته.“

د ناټو د ملکي استازي په وینا د سولې لپاره اوسنۍ فرصت باید له لاسه ونه وځي.

یوناما او کابل کې د ناټو ملکي استازی دا څرګندونې وروسته له هغې کوي چې د شنبې په ورځ د پنجشیر والي د عبدالله عبدالله د افغانستان منتخب ولسمشر وباله او د هغه ملاتړ یې اعلان کړ.

په سیمه کې د ازادي راډیو خبریال وايي، د پنجشیر ځايي چارواکو ددې ولایت د غونډو په تالار کې د ولسمشر اشرف غني عکس ښکته او پر ځای یې د عبدالله عکس پورته کړ.

همدارنګه داسې راپورونه هم خپاره شوي چې د ثبات او همپالنې د ټیم ملاتړو د سرپل لپاره هم له خپل لورې نوی والي معرفي کړی دی.

د عبدالله عبدالله په مشرۍ د ثبات او همپالنې ټیم د انتخاباتو د خپلواک کمېسیون له خوا د ولسمشرۍ د انتخاباتو هغه وروستي نتایج نه دي منلي، چې اشرف غني یې ګټونکی اعلان کړی او د خپل حکومت د جوړیدو اعلان یې کړې.

دې ډلې همدارنګه مخکې ویلي وو چې یو شمیر ولایتونو ته به نوي والیان معرفي کړي.

پنجشیر والي د عبدالله عبدلله له دریځه ملاتړ وکړ

د افغانستان په نقشه کې د پنجشیر ولایت

د پنجشیر والي په یوه غونډه کې د عبدالله په مشرۍ د حکومت د جوړېدو ملاتړ وکړ.

د دې ولایت د غونډو په تالار کې راټولو شویو کسانو ته کمال الدین نظامي وویل، عبدالله د ولسمشرۍ په انتخاباتو کې د پنجشیر د خلکو په ۱۰۰ کې ۹۰ رایې ګټلي، او له همدې کبله یې پریکړه وکړه چې د نوموړې په مشرتابه د اعلان شوي حکومت ملاتړ وکړي.

په دې غونډه د پنجشیر ولایت د غونډو له تالار څخه د ولسمشر اشرف غني وروستي تصویر هم لرې او پر ځای یې د عبدالله عبدالله تصویر د منتخب ولسمشر په توګه وځړول شو.

دا په داسې حال کې ده چې نن په پروان ولایت کې هم د ثبات او همپالنې د ټیم سلګونو پلویانو د هغه څه خوښي ولمانځله چې دوی په انتخاباتو کې د عبدالله عبدالله بریالیتوب باله او ویې ویل چې ډیر زر به دې ولایت ته د ښاغلي عبدالله په مشرۍ د جوړیدونکي حکومت له خوا والي معرفي کړي.

د ښاغلي عبدالله په ملاتړ دا غونډې په داسې حال کې کېږي چې د انتخاباتو خپلواک کمېسیون د ولسمشرۍ د انتخاباتو وروستۍ پایلې اعلان کړې چې په کې ولسمشر اشرف غني د انتخاباتو ګټونکی اعلان شوی.

د عبدالله په مشرۍ انتخاباتي ډلې دا پایلې رد کړي.

خو په بلخ او هرات کې بیا د ولسمشرۍ ټاکنو د پایلو له اعلانه هرکلی شوی او د کمېسیون له لوري د بریالي اعلان شوي شخص ولسمشر غني ملاتړ کوي.

بلخ او هرات کې خلکو د ټاکنو پایلو له اعلانه هرکلی وکړ

په دې غونډو کې لسګونو ښځو هم ګډون کړی و

په بلخ او هرات ولایتونو کې سلګونو خلکو په جلا جلا غونډو کې د انتخاباتو د خپلواک کمېسیون له خوا د ولسمشرۍ د انتخاباتو د وروستیو پایلو د اعلان هرکلی وکړ.

په مزار شریف ښار کې د ازادي راډیو خبریال وايي، دغلته روضې ته څېرمه سلګونه کسان راټول شوي وو، او ویل یې انتخاباتو له لارې د رامنځته شوې سیاسي مشرتابه ملاتړ کوي.

بله خوا په هرات ولایت کې د ازادي راډیو خبریال وايي، دغلته د اصلاح غوښتونکو د ټولنیز سازمان له خوا د سلګونو خلکو په یوه جوړه شوې غونډه کې برخه والو د انتخاباتو د وروستیو پایلو د اعلان هرکلی او د ولسمشر غني د بریا ملاتړ وکړ.

دوی همدارنګه د ولسمشرۍ د څوکۍ له کاندیدانو یې وغوښتل چې د انتخاباتو وروستۍ پایلې ومني او یو بل کړکیچ ته د هېواد د تلو مخه ونیسي.

تر دې دوه ورځې مخکې په هرات کې د ولسمشرۍ د څوکۍ د بل کاندید عبدالله عبدالله پلویانو د څو دقیقو لپاره د نوموړي عکس د هرات د سیمه‌ییزې ادارې په ودانۍ وځړاوه او هغه یې منتخب ولسمشر یاد کړ.

هرات کې د کاراتې سیالیو پنځم پړاو پای ته رسېدلی

ارشیف

د کاراته کیوکوشین سیالیو پنځم پړاو پای ته ورسېد.

د هرات ولایت د بدني روزنې د ریاست فني او مسلکي مدیر ضیاالحق ضیا ازادي راډيو ته وویل په دې سیالیو کې له د کیوکوشین، تاتاکای او سوکیوکوشین سبکونو له ۲۰ کلپونو ۲۴۶ لوبغاړو ګډون کړی وه.

د ښاغلي ضیا په خبره، د دغو سیالیو د جوړول موخه د کاراتې د ازادو سبکونو د همغږۍ او په ۱۳۹۹ کال کې په ملي کچه د لوبو لپاره چمتولی دی.

ښاغلی ضیا وایي په دغو سیالیو کې چې د څلور عمري کټګوریو ۱۰ کلنو، ۱۵ کلنو، ۱۸ کلنو او د ۲۲ کلنو کسانو تر منځ وشوې د ۶۶ غوره لوبغاړو ته جامونه، مډالونه او ستاینلیکونه ورکړل شول.

نور راوښيه

XS
SM
MD
LG