د لاسرسۍ وړ لېنکونه

تازه خبر
جمعه ۴ سلواغه ۱۳۹۸ کابل ۰۹:۳۰

د زهرو کاروان

بغلان ولایت کې نږدې اتیا کیلو ګرامه نشه يي مواد ونیول شول

د بغلان ولایت د امنیه قومندانۍ ویاند احمد جاوید بشارت ازادۍ راډیو ته وویل، پولیسو ۷۹ کیلوګرامه نشه يي مواد په داسې حال کې ونیول چې قاچاق کوونکو په یوه موټر کې د مرکزي بغلان له ولسوالۍ څخه کابل ته قاچاق کول.

د نشه يي موادو د قاچاقو په تور موټر چلوونکی او یو بل تن نیول شوي دي.

د ورځې تازه خبرونه دلته ولولئ

ننګرهار کې څه د پاسه ۲۰۰ کیلوګرامه بېلابېل نشه يي مواد نیول شوي

ارشیف

د ننګرهار ولایت پولیسو څه د پاسه دوه سوه کیلوګرامه بېلا بېل نشه يي مواد ونیول.

د کورنیو چارو وزارت له نشه يي موادو سره د مبارزې معینیت ویاند اسدالله یادګاري ازادۍ راډیو ته وویل، په لومړۍ پېښه کې پولیسو د جلال اباد ښار به اوومه ناحیه کې (۲۰۰) کیلو ګرامه چرس او (۱۵) لېټره کېمیاوي مواد ونیول چې په یوه موټر کې پټ کړای شوي و.

هغه زیاتوي، په دوهمه پېښه کې پولیسو د غني خیلو ولسوالۍ پر لاره په یوه موټر کې (۲۰) کیلوګرامه چرس، درې کیلوګرامه تاریاک او (۸۰) ګرامه د نشې ګولۍ ونیولې.

د دې موادو د قاچاقو په تور پنځه کسان هم نیول شوي دي.

نیمروز کې څه د پاسه سل کیلوګرامه نشه يي مواد نیول شوي

ارشیف

په نیمروز ولایت کې څه د پاسه سل کیلوګرامه نشه يي مواد ونیول شول.

د نیمروز ولایت امنیه قومندان الله داد فدايي ازادۍ راډیو ته وویل، د جدي د میاشتې په (۲۴) نېټه له نشه يي موادو سره د مبارزې پولیسو په کنګ ولسوالۍ کې (۹۲) کیلوګرامه تاریاک او (۴۶) کیلوګرامه ښیښه ونیوه.

د دې موادو د قاچاقو په تور یو تن هم نیول شوی، چې غوښتل یې دا مواد په یوه موټر کې د افغانستان سرحدي سیمې ته انتقال کړي.

خوست کې یو کس د ۴۰ کیلوګرامه نشه يي موادو د قاچاقو پر مهال نیول شوی

ارشیف

په خوست ولایت کې یو تن د څه د پاسه څلوېښت کیلوګرامه نشه يي موادو د قاچاقو پر مهال ونیول شو.

د خوست ولایت د امنیه قومندانۍ په خبرپاڼه کې راغلي چې، د جدي د میاشتې په (۲۵) نېټه پولیسو په ګربز ولسوالۍ کې (۴۴) کیلوګرامه چرس هغه مهال ونیول چې په یوه موټر کې پټ کړای شوي او په پام کې وه چې له یوه ګاونډي ولایت څخه یې خوست ته قاچاق کړي.

له نیول شوي موټر چلوونکی سره (۱۸) زره پاکستانۍ کلداري او (۱۹) زره افغانۍ هم نیول شوې دي.

د ننګرهار ولایت پولیسو نږدې ۵۰۰ کیلوګرامه نشه يي مواد ونیول

د کورنیو چارو وزارت له نشه يي موادو سره د مبارزې معینیت ویاند اسدالله یادګاري ازادۍ راډیو ته وویل، د ننګرهار ولایت پولیسو په سپین غر ولسوالۍ کې ۴۸۰ کیلوګرامه د بنګو دانې او ۱۱ کیلوګرامه چرس نیولي چې د استوګنې په یوه کور کې پټ کړای شوي ول.

د دې موادو د ساتنې او تولید په تور د کور مالک هم نیول شوی دی.

بدخشان کې څه د پاسه زر کیلوګرامه نشه يي مواد وسوځول شول

د بدخشان ولایت امنیه قومندان اسدالله محمدي ازادۍ راډیو ته وویل: دولتي ځواکونو د ۱۳۹۸ شمسي کال له پیل څخه تر اوسه پورې څه د پاسه شپېته عملیات کړي چې په نتیجه کې یې څه د پاسه اته زره کیلوګرامه هیرویین، تاریاک، چرس او کیمیاوي مواد نیول شوي دي.

پولیسو له نیول شویو موادو څخه څه د پاسه زر کیلوګرامه نشه يي مواد سوځولي دي.

"په ۱۳۹۸ شمسي کال کې په مجموع کې ۶۴ عملیاتونه شوي چې په نتیجه کې یې اته زره او ۴۱۹ کیلوګرامه بېلا بېل نشه يي مواد نیول شوي، چې له دې موادو څخه یو زر ۳۱۳ کیلوګرامه یې پولیسو سوځولي او پاتې نورو سندونه هم د څېړنې په حال کې دي."

د یادونې وړ ده چې د دې موادو د قاچاقو په تور ۸۷ تورن کسان عدلي او قضايي ادارو ته معرفي شوي دي.

د بلخ ولایت پولیسو لسګونه کیلوګرامه نشه يي مواد نیولي دي

د بلخ د امنیه قومندانۍ ویاند عادل شاه عادل ازادۍ راډیو ته وویل، له نشه يي موادو سره د مبارزې پولیسو د دې ولایت په چمتال ولسوالۍ کې د استوګنې په یوه کور کې سل کیلوګرامه چرس ونیول.

د دې موادو د ساتنې په تور دوه کسان هم نیول شوي دي.

د نیمروز پولیسو ۵۰ کیلوګرامه تریاک او ښیښه ونیول

د نیمروز امنیه قومندان الله داد فدايي رسنیو ته وویل: له نشه يي موادو سره د مبارزې پولیسو د جدي د میاشتې په لسمه نېټه د زرنج ښار په څلورمه ناحیه کې ۱۶ کیلوګرامه ښیښه او ۳۴ کیلوګرامه تاریاک نیولي چې په یوه موټر کې دې ښار ته قاچاق کیدل.

موټر چلوونکي د پېښې له ځایه تښتېدلی دی.

ننګرهار کې دولتي ځواکونو ۲۰۰۰ ټنه چرس نیولي او سوځولي

په ننګرهار ولایت کې د افغانستان حکومتي ځواکونو په څو بېلا بېلو عملیاتو کې څه د پاسه دوه زره ټنه نشه يي مواد نیولي دي.

د کورنیو چارو وزارت په خبرپاڼه کې راغلي چې په لومړیو عملیاتو کې له نشه يي موادو سره د مبارزې ځانګړو پولیسو په خوګیاڼو ولسوالۍ کې ۲۰۰۰ ټنه چرس له نیولو وروسته سوځولي دي.

له نشه يي موادو سره د مبارزې پولیسو په دریو نورو عملیاتو کې په جلال اباد ښار او اچین او غني خیلو ولسواليو کې په مجموعي ډول یو زرو ۷۹۱ کیلوګرامه چرس نیولي دي.

سمنګان کې یو کس ۲۰۰ کیلوګرامه نشه يي موادو سره ونیول شو

په سمنګان ولایت کې یو تن له څه دپاسه دوه سوه کیلوګرامه نشه يي موادو سره نیول شوی دی.

د سمنګان د امنیه قومندانۍ په خبرپاڼه کې راغلي چې د دې ولایت پولیسو ۱۶۰ کیلو ګرامه تاریاک او ۱۱۵ کیلوګرامه چرس هغه مهال ونیول چې په یوه موټر کې پټ کړای شوي او په پام کې وه چې د ایبک ښار ته یې قاچاق کړي.

د دې موادو د قاچاقو په تور موټر چلوونکی هم نیول شوی دی.

هرات کې څه د پاسه شل کیلوګرامه نشه يي مواد ونیول شول

د هرات ولایت د امنیه قومندانۍ په خبرپاڼه کې راغلي چې د دې ولایت پولیسو په هرات ښار کې د عملیاتو په نتیجه کې ۲۱ کیلوګرامه نشه يي مواد نیولي چې له یوې ولسوالۍ څخه د هرات ښار ته یې قاچاق کول او پر پرچون خرڅوونکو باندې یې خرڅول.

د دې موادو د قاچاقو په تور دوه قاچاق کوونکی هم نیول شوي دي.

په یوه بله پېښه کې د هرات پولیسو د نشه يي موادو څلور پرچون خرڅوونکي نیولي چې نشه يي مواد یې پر معتادینو باندې خرڅول.

پولیسو په لسو ولایتونو کې د نشه يي توکو ۹۰ پلورونکي نیولي

له نشه يي موادو سره د مبارزې پولیسو په لسو ولایتونو کې عملیات کړي چې په نتیجه کې یې د نشه يي موادو څه د پاسه ۹۰ قاچاق کوونکی او پرچون خرڅوونکی نیولي دي.

د کورنیو چارو وزارت له نشه يي موادو سره د مبارزې معینیت ویاند اسدالله یادګاري ازادۍ راډیو ته وویل، د دې عملیاتو په نتیجه کې د نشه يی مواد ترڅنګ د نشه يي موادو د تولید کارخانې هم ویجاړي کړل شوې دي.

"له نشه يي موادو سره د مبارزې پولیسو په تېره یوه اوونۍ کې ۷۵ عملیات کړي چې په نتیجه کې یې اووه ټنه نشه يي مواد نیول شوي دي. د دې موادو په تور يې ۹۲ کسان نیولي او د نشه يي موادو لابراتوارونه یې هم له منځه وړي دي."

پولیسو په نیمروز کې څه د پاسه دوه سوه کیلوګرامه نشه يي مواد ونیول

د نیمروز د امنیه قومندانۍ ویاند الله داد فدايي د جدي د میاشتې پر څلورمه نېټه ازادۍ راډیو ته وویل چې پولیسو د ځانګړو عملیاتو په نتیجه کې د دې ولایت په مرکز کې ۸۸ کیلوګرامه چرس، ۸۵ کیلوګرامه تاریاک او ۲۴ کیلوګرامه کیمیاوي مواد ونیول چې یوه موټرسایکل کې د زرنج ښار ته قاچاق کېدل.

د یادونې وړ ده چې په زرنج ښار کې د نشه يي موادو یو خرڅوونکی له لسو کیلوګرامو نشه يي موادو سره نیول شوی دی.

د پکتیا پولیسو لسګونه کیلوګرامه نشه يي مواد ونیول

د پکتیا ولایت امنیه قومندان جانباز رسنیو ته وويل چې د جدي د میاشتې پر څلورمه نېټه یې په میرزکه ولسوالۍ کې ۸۰۰ کیلوګرامه چرس ونیول.

د دې موادو د ساتنې په تور یو تن هم نیول شوی دی.

په غزني ولایت کې ۱۲۰ ټنه نشه يي مواد ونیول شول

د کورنیو چارو وزارت په خبرپاڼه کې راغلي چې له نشه يي موادو سره د مبارزې د ځانګړې قطعې پولیسو د هوايي ځواکونو په مرسته د غزني ولایت په ده یک ولسوالۍ کې د نشه يي موادو پر یوه ذخیره باندې د عملیاتو په نتیجه کې ۱۲۰ ټنه چرس تر نیولو وروسته وسوځول.

په دې عملیاتو کې د نشه يي موادو اووه کارخانې هم ویجاړې شوي دي.

نور راوښيه

XS
SM
MD
LG