د لاسرسۍ وړ لېنکونه

تازه خبر
چهارشنبه ۲ سلواغه ۱۳۹۸ کابل ۰۹:۰۴

افغانستان

د حزب اسلامي ۵۰ مشرانو له حکمتیار څخه لار جلا کړه

د سولې د عالي شورا غړی او د حزب اسلامي مطرح غړی قاضي محمد امین وقاد.

راپورونه وایې یو شمېر افغان سیاسي او جهادي څېرو د ګلبدین حکمتیار په مشرۍ د حزب اسلامي څخه د بېلېدو پریکړه کړې ده.

قاضي محمد امین وقاد چې د سولې د عالي شورا غړی دی او د حزب اسلامي له مطرحو مشرانو څخه شمېرل کېده وایي دی هم یو له هغو شاوخوا پنځوسو کسانو څخه دی چې دا پریکړه یې کړې ده.

ښاغلي وقاد تیره شپه له آزادي راډیو سره په خبرو کې د دې نوي جریان د پیلیدو خبره تایید کړه.

هغه زیاته کړه: "د پنځوسو په حدودو کې افغانستان شموله کسان دي چې حزبي سوابق لري، په جهاد کې پاته شوي، سولې ته یې کار کړی، په خپلو سیمو کې مطرح او د خلکو ملاتړ لري، دوی له ډیر انتظار وروسته چې بې برخلیک پاته شوي و او د حکمتیار سره یې اړیکې نه وې، دروازې ورباندي بندې وې، بلاخره مو پریکړه وکړه چې د فعلا لپاره د اتحاد شوراهای حزب اسلامي ترنامه لاندې یو مؤقت جریان پیل کړو."

ښاغلي وقاد زیاته کړه چې د دې موقت جریان د کړنلارې او مشرتابه په اړه یې پلاوی ټاکلی او راتلونکې اونۍ به یې اعلان کړې.

نوموړي دا د کوم شخص پر وړاندې منفي حرکت نه بلکې یو داسې پروګرام وباله چې د ده په خبره په افغانستان کې د خپلو خدماتو او فعالیتونو، له ملت سره د خواخوږۍ ښودلو او فرصت لاسته راوړنې لپاره یو ادرس ولري.

په هغه لست کې چې د ځینو خبریالانو لخوا خپور شوی د یو شمېر کسانو نومونه هم شته چې دا مهال د دولت برحاله غړي دي.

د ګلبدین حکمتیار په مشرۍ اسلامي ګوند تراوسه په دې اړه تبصره نه ده کړې.

د ورځې تازه خبرونه دلته ولولئ

د بشري حقونو کمېسیون: شینډنډ کې د ناټو برید ۱۵ ملکیان وژلي وو

ارشیف

د افغانستان د بشري حقونو خپلواک کمېسیون ویلي چې د هرات په شینډنډ ولسوالۍ کې د ناټو په مشرۍ د غوڅ ملاتړ مأموریت د ځواکونو په هوايي حمله کې ۱۵ ملکي وګړي وژل شوي او زخمیان شوي ول چې درې کوچنیان او درې ښځې هم په‌کې وو.

حمله د جنورۍ په اتمه، د شینډنډ ولسوالۍ په پایکش سیمه کې د وسله‌والو طالبانو پر یوه پناه ځاي شوې وه.

د افغانستان د بشري حقونو خپلواک کمېسون په افغانستان کې پر حکومت او بهرنیو ځواکونو غږ کړی چې په پوځي عملیاتو کې د ملکي وګړو مصونیت ته پام وکړي.

په افغانستان کې د ناټو د غوڅ ملاتړ مأموریت تر اوسه په دې اړه غبرګون نه‌دی څرګند کړی.

په هرات کې سیمه‌ییزو چارواکو دوه اوونۍ وړاندې تأیید کړې وه چې په شینډنډ کې د بې‌پيلوټه الوتکې په برید کې د وسله‌والو طالبانو یو مشر ننګیالی وژل شوی و.

د منځنۍ اسیا د فوټسال په سیالیو کې د افغان ښځینه لوبډلې ګډون

د افغانستان د فوټسال ښځینه لوبډله

د افغانستان د فوټسال ښځینه ۱۹ کلنه لوبډله د منځنۍ اسیا د فوټسال د ۱۹ کلنو د ښځینه لوبډلو په سیالیو کې، د ګډون په هدف سبا د تاجکستان پلازمېنې دوشنبې ښار ته ځي.

د افغانستان د فوټبال فدراسیون د خپرونو مرستیال شمس امیني نن ازادي راډيو ته وویل چې د دوی تمرینات نن پای ته ورسېدل.

دا لومړی ځل دی چې د افغانستان د فوټسال د ۱۹ کلنو ښځينه لوبډله بهرنیو سیالیو ته ځي.

دغه سیالۍ د روانې جنورۍ میاشتې په ۲۴مه نېټه پیلېږي او د همدې میاشتې تر ۲۹مې نېټې پورې دوام کوي.

د افغانستان د فوټبال فدراسیون د معلوماتو له مخې، په دغه سیالیو کې د افغانستان په ګډون د ایران، ترکمنستان، ازبکستان، قرغزستان او کوربه هېواد تاجکستان لوبډلې ګډون لري.

سبا افغان کرکټ ۱۹ کلنو لوبډله له اماراتو سره سیالي کوي

د افغانستان د ۱۹ کلنو کرکټ ملي لوبډله

ټاکل شوې چې سبا "چهارشنبه" د افغانستان د کرکټ ۱۹ کلنه لوبډله له متحده عربي اماراتو سره په سوېلي افریقا کې د لوبې ډګر ته ووځي.

د افغانستان کرکټ بورډ ویاند فرید هوتک وایي، افغان کرکټ لوبډله یادې لوبې لپاره بشپړ چمتووالی لري او هېله‌من دي چې دغه لوبه هم وګټي.

ښاغلي هوتک زیاته کړه: "ټاکل شوې ده چې د افغانستان د کرکټ ۱۹ کلنه لوبډله په نړیوال جام کې خپله دوهمه لوبه په ډې ګروپ کې د متحده عربي اماراتو په وړاندې پیل کړي."

دغه لوبه به د کابل پر وخت ۱۲ بجې او ۳۰ دقیقې پیل شي.

افغانستان تر دې وړاندې کوربه هېواد سوېلې افریقا ته ماتې ورکړې وه.

افغانستان به د جمعې په ورځ د کاناډا له کرکټ لوبډلې سره سیالي ولري.

د ټاکنیزو شکایتونو کمېسیون شکایتونو ته د رسېدنې پړاو پیل کړ

د ټاکنیزو شکایتونو کمېسیون غړي

د ټاکنیزو شکایتونو کمېسیون وايي نن سه شنبه په رسمي ډول د استېناف غوښتنې شکایتونو ته د رسېدنې پړاو پیل شو.

د ټاکنیزو شکایتونو کمېسیون وايي چې د استېناف غوښتنې لپاره د شکایتونو د ثبت پړاو تېره ورځ بشپړ شوی او په دغه مرحله کې ۶۲۹۲ شکایتونه ثبت شوي دي.

د دغه کمېسیون رئیسې زهره بیان شینوارې د سې شنبې په ورځ «۱۳۹۸ کال د سلواغې ۰۱» په کابل کې خبریالانو ته وویل چې نن په رسمي توګه شکایتونو ته د رسېدنې پړاو پیل شو چې دا بهیر به ۱۵ ورځې دوام وکړي.

شینوارې زیاته کړه: "د شکایتونو د ثبت له مرحلې وروسته د شکایتونو کمېسیون په مرکزي دفتر کې شکایتونو ته د رسېدنې د طرزالعمل له مخې چې په هغه کې تصنیف، څېړنه، تحلیل، تدقیق، ابلاغ او تطبیق پړاوونه شامل دي زموږ د تخنیکي ټیم له لوري یې کار پیل شوی چې اوس د پروسس په حال کې دي."

د ټانیزو شکایتونو کمېسیون وايي، په پروان، میدان وردګو، تخار او جوزجان ولایتونو کې د استېناف غوښتنې لپاره هېڅ شکایت نه‌دی ثبت شوی.

د دغه کمېسیون چارواکي زیاتوي چې ډېری ثبت شوي شکایتونه په ترتیب د "ثبات او هم‌پالنې"، د "دولت جوړوونکي" او د "سولې او اسلامي عدالت" ټاکنیزو ټیمونو له لوري ثبت شوي.

د شکایتونو کمېسیون له دې وړاندې په مرکز او ولایتونو کې شااوخوا ۱۶۵۰۰ زره ټاکنیز شکایتونه څېړلي و چې د پرېکړې له مخې یې ۴۷ محلونه باطل اعلان شوي او ۵۳۷۸ محلونه بیا شمېرنې ته تللي دي.

د افغانستان د ازادو او عادلانه ټاکنو بنسټ اجرائیوي رئیس یوسف رشید وویل: "د شکایتونو مرکزي کمېسیون او د شکایاتو ولایتي دفترونه دې په دغه څېړنه کې سره همغږي شي او دوی دې په دې اړه یوه واحده پرېکړه وکړي، څو قضیه په متعادل ډول سره حل او فصل شي."

د افغانستان د ولسمشرۍ ټاکنې د میزان یا تلې میاشتې په شپږمه وشوې، خو تر اوسه‌یې یوازې لومړنۍ پایله اعلان شوې ده.

د ټاکنیزو شکایتونو کمېسیون له‌‌خوا د استېناف غوښتنې شکایتونو ته له رسېدنې او د پرېکړې تر اعلان وروسته به، د ولسمشرۍ ټاکنو وروستۍ پایله اعلان شي.

د افغانستان د روڼتیا څار بنسټ: د ملي بودجې طرحه نیمکړې ده

د افغانستان د روڼتیا څار بنسټ د دغه څېړنیز راپور د خپرولو پر مهال.

د افغانستان د روڼتیا څار بنسټ په یوه څېړنیز راپور کې د دې هېواد د ۱۳۹۹ لمریز کال د ملي بودجې طرحه نیمکړې وبلله.

په داسې حال کې چې په پام کې ده ولسي جرګه سبا د ۱۳۹۹ کال د ملي بودجې طرحه رأی‌ګیرۍ ته وړاندې کړي، د افغانستان د روڼتیا څار بنسټ وايي، دغه طرحه بشپړه نه‌ده او بیا کتنه غواړي.

د دغه بنسټ د اړیکو او عدالت غوښتنې د څانګې مسؤل محمد ناصر تیموري وايي، د ملي بودجې د طرحې په ترتیبولو کې له خلکو، مدني بنسټونو او متخصصینو سره مشوره شوې ده.

ښاغلي تیموري د سې شنبې په ورځ «۱۳۹۸ د سلواغې ۰۱» د ملي بودجې د طرحې په اړه د خپلو موندنو د راپور د خپرولو پر مهال وویل، د ملي بودجې ډېره برخه امنیتي سکټور ته ځانګړي کول او په‌کې احتیاطي کوډونه، د یادې بودجې د طرحې جدي ستونزې دي.

هغه زیاته کړه: "د افغانستان له حکومت نه مو غوښتنه دا ده چې د دفاعي او امنیتي بودجې کمولو ته پام وکړي او په دې اړه دې بحثونه پیل کړي. همدارنګه احتیاطي کوډونو ته دې هم جدي بیا کتنه وشي چې ملي بودجه په ښه توګه ترتیب شي."

د افغانستان د روڼتیا څار بنسټ ټینګار کوي چې د ۱۳۹۹ لمریز کال د بودجې طرحه په ټوله کې نیمګړتیاوې لري او ولسي جرګه‌یې باید له تصویبولو دمخه بیا وویني.

دا په داسې حال کې ده چې د افغانستان د مالیې وزارت د مسؤلینو په خبره، په پام کې ده ولسي جرګه پر دغې بودجې تر یو میاشتنیو بحثونو وروسته د چهارشنبې په ورځ په عمومي ناسته کې رأی‌ګیري وکړي.

د افغانستان د ۱۳۹۹ کال ملي بودجه ۴۲۸ میلیارده افغانۍ ده چې ۲۸۹ یې عادي او ۱۳۹ میلیارده‌یې پراختیايي بودجه ده.

د افغانستان د مالیې وزارت ټینګار کوي چې اوس هم د هېواد ۵۰ سلنه بودجه له بهرنیو مرستو تمویلېږي.

د سوداګرۍ او پانګونې خونه: د ګازو بیې راټیټې شوي

ارشیف

د سوداګرۍ او پانګونې خونه وايي، د روانې اوونۍ له پیله د ګازو بیو کې د پام وړ کموالی راغلی.

د دې خونې ویاند جان اقا نوید نن ازادي راډيو ته وویل، اوس‌مهال په عمده ډول د یو کیلو ګازو بیه په ۵۲ او په پرچون ډول بیا ۶۰ افغانۍ ده.

نوموړي وویل چې کابل ته په لاره د ګازو د ټانکرونو په رارسېدو سره به د ګازو په بیو کې نور هم د پام وړ کموالی هم راشي.

خو یو شمېر کابل ښاریان شکایت کوي چې لا هم یو کیلو ګاز له ۸۰ تر ۱۱۰ افغانیو پېري او په بازار کې د ګازو بیې نه‌کنټرولېږي.

چارواکي: د ټاپي پروژې عملي چارې روان میلادي کال پیلېږي

ارشیف

د افغانستان د مالیې وزارت وايي، ټاکل شوې چې د ټاپي پروژې عملي چارې د ۲۰۲۰ میلادي کال په لومړیو میاشتو کې له هرات ولایت څخه پیل شي.

د دغه وزارت ویاند شمروز خان مسجدي نن ازادي راډيو ته وویل چې د ټاپي پروژې د ځمکو د استملاک قانون مسوده هم چمتو شوې ده.

هغه زیاته کړه: "د دغې پروژې عملي کار به د هرات نه د ۲۰۲۰ کال په لومړیو او یا وروستۍ ربعه کې پیل شي، دا د افغانستان لپاره یو مهم خبر دی، د افغانستان دولت هم خپل چمتووالی نیسي چې څنګه خپل کارونه پیل کړي."

ښاغلی مسجدي دا هم وايي چې د مالیې وزارت سرپرست وزیر محمد همایون قیومي د ټاپي ګازو نل‌لیکې پروژې له اجرائیوي رئیس محمد مراد امانوف سره په کتنه کې ویلي چې د ځمکو استملاک مدیریت د قانون مسوده چمتو شوې او عدلیې وزارت ته لېږل شوې ده چې ژر به د تصویب لپاره پارلمان ته ولېږل شي.

د ده په خبره په دغه کتنه کې ټینګار شوی چې د افغانستان حکومت دې مخکې له مخکې د ټاپي پروژې له ګازو څخه د ګټې اخیستنې منظم پلانونه او کړنلارې چمتو کړي.

د یادونې وړ ده چې د افغانستان له لارې پاکستان او هندوستان ته د ترکمنستان د طبیعې ګازو د لېږد نل‌لیکه ټوله کې ۱۸۱۴ کیلو متره ده چې ۸۱۶ کیلو متره‌یې د هرات، فراه، نیمروز، هلمند او کندهار ولایتونو څخه تېرېږي.

ولسمشر غني سویس کې د سولې او اقتصادي پرمختګ په اړه خبرې کوي

افغان ولسمشر محمد اشرف غني سویس ته د سفر پر مهال

ټاکل شوې چې افغان ولسمشر اشرف غني د سویس په داووس ښار کې د ځینو هېوادونو له مشرانو سره د افغانستان د سولې د هڅو او د هېواد د اقتصادي پرمختګ په اړه خبرې وکړي.

ولسمشر غني په نړیواله اقتصادي مجمع کې د ګډون په مقصد نن د سویس د داووس ښار پر لور وخوځېد.

د ارګ په خبرپاڼه کې چې نن خپره شوه د ولسمشر د ویاند صدیق صدیقي له قوله ویل شوي دي چې وايي، ولسمشر غني به په دې غونډه کې پر ګډون سربېره د یو شمېر هېوادونو له مشرانو او چارواکو سره لیده کاته وکړي.

قطر کې طالب مرکچي پلاوي له خلیل‌زاد او سکاټ مېلر سره لیدلي

ارشیف

طالب مرکچیانو قطر کې له ډاکتر زلمي خلیل‌زاد او په افغانستان کې د نړیوالو ځواکونو له قوماندان سکاټ مېلر سره لیدلي دي.

د طالبانو یو ویاند وايي د دې ډلې مرکچیانو تېر ماښام د افغانستان د سولې لپاره د امریکا د بهرنیو چارو وزارت له ځانګړي استازي زلمي خلیل‌زاد او په افغانستان کې د دېره نړیوالو ځواکونو له قوماندان جنرال سکاټ مېلر سره په کتنه کې د سولې د موافقې د راتلونکو اقداماتو په اړه خبرې وکړې.

په قطر کې د طالبانو د سیاسي دفتر ویاند سهیل شاهین تېره شپه پر ټویټر په یوه بیان کې لیکلي چې د طالبانو په مرکچي پلاوي کې د قطر د دفتر مشر ملا عبدالغني برادر، شېر محمد عباس ستانکزی او مولوی امیر خان متقي شامل و.

بیان زیاتوي چې دا خبرې به نن سه شنبې هم دوام وکړي.

د خلیل‌زاد دفتر او په افغانستان کې د ناټو په مشرۍ د غوڅ ملاتړ مأموریت قوماندانۍ تر اوسه په دې اړه څه نه‌دي ویلي.

شاهین د شنبې په ورځ پاکستانۍ ورځپاڼې ډان ته ویلي و، طالبان هیله‌من دي چې له امریکا سره موافقه به د روانې جنوري میاشتې تر پایه لاسلیک شي.

افغان حکومت له موافقې مخکې پر اوربند ټینګار کوي او وايي دایمي سولې ته د رسېدو یوازنۍ لاره اوربند ده.

د افغان سینما پېژندل شوی لوبغاړی جوانشېر حیدري ومړ

جوانشېر حیدري څو هنري فلمونه جوړ کړي او په دې وروستیو کې یې د افغانستان د سینماګرانو د ټولنې مشر په توګه دنده ترسره کوله.

د افغانستان د سینماګرانو د ټولنې مشر او د سینما پېژندل شوی لوبغاړی جوانشېر حیدري نن په حق ورسېد.

د افغانستان د اطلاعاتو او فرهنګ وزارت وايي چې حیدري د زړه د حملې له کبله د ۶۸ کلونو په عمر ساه ورکړه.

د دې وزارت ویاند صابر مومند له ازادي راډیو سره په خبرو کې وویل چې د حیدري ځای به د افغانستان په هنري کورنۍ کې تش پاتې وي.

هغه زیاته کړه: "د اطلاعاتو او فرهنګ وزارت د جوانشېر حیدري مړینه د هېواد په فرهنګي او سینمايي بهیر کې لویه ضایعه ګڼي، حیدري د دې ترڅنګ چې د افغانستان په سینما کې ونډه لرله د هېواد په روان فرهنګي بهیر کې په بېلابېلو برخو کې هم فعاله ونډه درلوده."

حیدري هنري فعالیت په ۱۳۵۰ لسیزه کې له راډیو افغانستان څخه پیل کړ او وروسته‌یې په ملي ټلوېزیون او افغان فلم کې دنده لرله.

هغه څو هنري فلمونه هم جوړ کړي دي او په دې وروستیو کې یې د افغانستان د سینماګرانو د ټولنې مشر په توګه دنده ترسره کوله.

ایران ته په جاسوسۍ تورن افغان جرمني کې محکمې ته حاضر شو

د جرمني ملي بیرغ

یو افغان ترجمان چې د جرمني له پوځ سره‌یې کار کاوه، پرون ایران ته د جاسوسۍ په تور د جرمني په یوه محکمه کې حاضر شو.

"عبدال س" چې ۵۱ کاله عمر لري، د دوشنبې په ورځ د خیانت او د دولتي اسرارو څخه د سرغړاوي په ۱۸ مواردو تورن شو.

دا کس د ۲۰۱۹ میلادي کال په جنورۍ میاشت کې له خپلې ۴۰ کلنې مېرمنې "اسیه س" سره یوځای نیول شوی وو.

"عبدال س" تورن دی چې د ۶۰ زرو یورو په بدل کې یې د چاودېدنکو موادو په شمول، د جرمني د پوځ اسرار د ایران له استخباراتو سره شریک کړي دي.

که نوموړی مجرم وبلل شي، په ۱۵ کاله زندان محکومېږي. د "عبدال س" پر مېرمن که جرم ثابت شي، ښايي د ۱۱ کلونو په مخه زندان ته واستول شي.

تر اوسه پورې دې ښځې او خاوند د هغو تورونو په اړه چې پرې لګېدلي څه نه‌دي ویلي.

ولسمشر غني کابل کې د یوې کورنۍ د وژونکو د پیدا کولو امر کړی

وړمه ورځ کابل کې د یوې کورنۍ څلور غړي د ناپېژانده کسانو له‌خوا ووژل شول.

ولسمشر محمد اشرف غني، د کورنیو چارو وزارت او ملي امنیت ریاست ته امر کړی چې کابل کې د وژل شویو درېیو ماشومانو او یوې مور د قتل عاملان پیدا کړي.

دا څلور تنه د یکشنبې په شپه ناوخته د جنګلک په سیمه کې ناڅرګندو کسانو د تېشې په ګوزارونو وژلي دي.

د ارګ د یوې خبرپاڼې په بنسټ ولسمشر غني پرون دوشنبه ماښام وویل چې د دې پېښې عاملان باید عدلي او قضايي بنسټونو ته وسپارل شي.

ښاغلي غني ویرجنې کورنۍ ته د بېړنیو مرستو د رسولو امر هم کړی. د دې څلورو تنو مړي چې په‌کې دوه واړه هلکان، یوه ماشومه نجلۍ او مور یې شامل وو، د دوشنبې په ورځ خاورو ته وسپارل شول.

تر اوسه د دې پېښې په تړاو څوک نه‌دي نیول شوي، خو کابل ښار په وروستیو کې د زیاتو جنايي پېښو شاهد دی او تر دې مخکې ډېر کله د داسې پېښو عاملان یا نه‌دي نیول شوي او یا د محکمو له‌خوا خوشې شوي دي.

پولیس وايي، د وروستۍ پېښې د عاملانو لټون‌یې پیل کړی دی.

لوګر کې د سړې هوا له امله پنځه کسان مړه شوي

ارشیف

په داسې حال کې چې د کابل په شمول د افغانستان په بېلابېلو سیمو کې د نورو واورو او بارانونو د ورښت وړاندوینه شوې، چارواکي وايي په لوګر کې سړې هوا د پنځو کسانو ژوند اخیستی.

د لوګر د والي ویاند دیدار احمد لونګ وايي چې د مرکز اړوند د کډوالو په کمپ کې د بېلابېلو کورنیو څخه دوو ماشومانو، یوې مېرمنې او دوه سړیو ساه ورکړې.

د ښاغلي لونګ په وینا که څه هم لومړني معلومات ښيي چې دا کسان به سړې هوا وژلي وي، خو ولایتي ادارې یو هیئت ټاکلی څو د دې مړینو دقیق علت معلوم کړي. د نوموړي په وینا له زیانمنو کورنیو سره د مرستو لپاره سیمې ته یو هیئت هم استول شوی دی.

طبیعي پېښو ته د رسېدو په چارو کې د دولت وزارت ویاند احمد تمیم عظیمي د دوشنبې د ورځې په ماښام ازادي راډیو ته وویل چې د لوګر د پېښې په اړه دوی ته راپور نه‌دی رسېدلی. نوموړي همدارنګه په راتلونکو ورځو کې د نور ورښتونو خبرداری ورکړ.

ښاغلی عظیمي زیاتوي: "لارې په بشپړه توګه پرانیستې دي. دا مهال هېڅ لویه لاره تړلې نه‌ده. البته تازه په کابل کې د واورې ورېدل پیل شوي. د اوونۍ په بهیر کې به په مرکزي، جنوب او جنوب لوېدیځو ولایتونو کې د ورښتونو شاهدان یوو."

ښاغلي عظیمي همدارنګه د وروستیو واورو، سړې هوا او بارانونو له کبله په افغانستان کې د وژل شویو کسانو شمېر ۴۱ تنه یاد کړ.

'کابل کې به د ګازو د پلورلو دولتي شرکتونه زیات شي'

آرشیف

د افغانستان د نفتو او ګازو اداره وايي، د ګازو د خصوصي پلورونکو د بیو د لوړولو د مخنیوي لپاره یې تصمیم نیولی چې له یوې میاشتې نه په لږه موده کې په کابل کې د ګازو د پلورلو دولتي شرکتونه زیات کړي.

د دغې ادارې مسؤلین د ګازو په پلورلو کې، سوداګر په بې انصافۍ تورنوي او خبرداری ورکوي چې وروسته له دې به د ګازو د هغو دکانونو په تړلو له پولیسو او څارنوالۍ نه مرسته وغواړي چې په لوړه بیه یې پلوري.

د دغې ادارې د عامه اړیکو مدیر معراج الدین ازادي راډیو ته وویل، د ګازو د پلورلو کوم دکانونه چې د ګازو د لوړو بیو له امله تړل شوي وو، بېرته ېې فعالیت پیل کړی دی.

هغه زیاتوي: "موږ دا ځل مکلف یو چې ګرځنده ټیمونه مو له پولیسو او څارنوالۍ نه مرسته وغواړي ځکه کله چې مو یو دکان تړلی، بېرته یې فعالیت پیل کړی دی، زموږ سوداګر دروغ وايي، نه سخته لاره او نه هم بله بهانه لرو چې سوداګر پرې ګاز راوړي، ګاز باید په پخوانۍ بیه ( ۵۲) افغانیو وپلورل شي."

دا شکایتونه په داسې حال کې کېږي چې د سوداګرۍ او صنایعو خونې د یوې اعلامیې په خپرولو سره ویلي، سوداګرو ژمنه کړې چې د ګازو په بیو کې به کمی راشي.

بلخ کې د کونځلو حاصلات ۴۶ سلنه زیات شوي

سږ کال بلخ کې په څلور زره او ۷۰۰ هکټاره ځمکه کې کونځلې کرل شوې وې چې ۲۴۳ ټنه حاصل‌یې ورکړی.

په بلخ کې د کونځلو حاصلات ۴۶ سلنه زیات شوي دي.

د بلخ د کرنې ریاست امر ذبیح‌الله زوبین وايي، په روان کال کې په څلور زره او ۷۰۰ هکټاره ځمکه کې کونځلې کرل شوې وې چې درې زره او ۲۴۳ ټنه حاصل‌یې ورکړ.

نوموړي وویل چې د کرنې وزارت له لوري بزګرو ته د روزنیزو پروګرامونو پلي کول، له موسمې ناروغیو سره مبارزه او وروستي ورښتونه لامل شوي چې په دغه ولایت کې د کونځلو حاصلات زیات شي.

نور راوښيه

XS
SM
MD
LG