د لاسرسۍ وړ لېنکونه

تازه خبر
یکشنبه ۲۴ لیندۍ ۱۳۹۸ کابل ۱۱:۳۸

د ۱۳۹۸ کال انتخابات

د عبدالله عبدالله په مشرۍ د ثبات او همپالنې ټاکنیز ټیم نن کابل کې لاریون کوي

د ثبات او همپالنې ټیم لاریون د هغه څه د مخنیوي لپاره کېږي چې دوی یې په انتخاباتو کې تقلب بولي.

د عبدالله عبدالله په مشرۍ د ثبات او همپالنې ټاکنیز ټیم نن په کابل کې لاریون کوي. دا ډله وايي، لاریون د هغه څه د مخنیوي لپاره کېږي چې دوی یې په انتخاباتو کې تقلب بولي.

د دې انتخاباتي ډلې لومړي مرستیال عنایت الله بابر فرهمند پرون په کابل کې په یوه خبري غونډه کې هیله څرګنده کړه چې نننۍ ورځ به تاریخ جوړوونکې وي.

ښاغلي فرهمند وویل: "سبا یکشنبې به تاریخي نه بلکې تاریخ جوړوونکې ورځ وي. که د دې تاریخ پیل له کابل ښار څخه ونه شي، نو ډاډه اوسئ چې د افغانستان خلک به بیا ښه ورځ ونه ویني."

په همدې حال کې د کابل د ګارنیزیون قومانداني په یوه خبرپاڼه کې ویلي دي چې د دې لاریون لپاره د حضوري چمن ساحه ټاکل شوې ده.

ګارنیزیون له لاریون کوونکو غوښتي چې په نورو ځایونو کې دې مظاهرې نه کوي او د پلازمېنې اوسېدونکو ته دې ستونزې نه جوړوي.

د کابل ګارنیزیون قوماندانۍ دا هم ویلي چې معترضان د وسلو د ګرځولو اجازه نه لري.

د ثبات او همپالنې ډله وايي، د انتخاباتو خپلواک کمیسیون باید هغه شاوخوا ۳۰۰ زره رایې چې دوی یې تقلبي بولي، له سیسټم څخه وباسي خو د انتخاباتو خپلواک کمیسیون وايي چې د قانون پر خلاف کار یې نه دی کړی.

د ورځې تازه خبرونه دلته ولولئ

بلخ کې د عبدالله عبدالله پلوي مظاهره کوونکو د ټاکنیز روڼوالي غوښتنه وکړه

په دې مظاهره کې د اجراییه ریاست دویم مرستیال محمد محقق چې د ثبات او همپالنې د انتخاباتي ټیم غړی دی برخه درلوده.

د عبدالله عبدالله په مشرۍ د ثبات او همپالنې انتخاباتي ډلې پلویانو نن په مزار شریف ښار کې لاریون وکړ او د ولسمشرۍ د ترسره شویو انتخاباتو د نتایجو په اعلان کې یې د شفافیت غوښتنه وکړه.

لاریونوالو چې د ولسمشرۍ د کاندید عبدالله عبدالله عکسونه یې لېږدول، د انتخاباتو له کمیسونه غوښتنه کوله چې د درغلیو مخه دې ونیسي. په سیمه کې د ازادۍ راډیو خبریال وايي، لاریونوالو نن د څو ساعتونو لپاره د بلخ د پوهنتون په وړاندې سړک د ترافیکو پر مخ تړلی وو.

په دې مظاهره کې د اجراییه ریاست دویم مرستیال محمد محقق چې د ثبات او همپالنې د انتخاباتي ټیم غړی دی برخه درلوده.

ښاغلي محقق لاریونوالو ته په وینا کې له نړیوالې ټولنې وغوښتل چې د انتخاباتو په پروسه کې دې د شفافیت ملاتړ وکړي. نوموړي له انتخاباتي کمیسونونو هم غوښتنه وکړه چې پاکې او ناپاکې رایې دې سره بېلې کړي.

د ثبات او هم پالنې ټیم د انتخاباتو کمیسیون تورنوي چې هڅه کوي شا او خوا درې سوه زره هغه رایې چې دا ټیم یې تقلبي او ناسمې رایې بولي د پاکو رایو په توګه وشمیري. خو د انتخاباتو خپلواک کمیسیون په دې اداره کې د درغلیو او شفافیت د نشتوالي تورونه ردوي او وايي، دا رایې تر هغې چې څیړل شوې نه وي په یو مخ نه شې باطلولی.

په مزار شریف کې وروستی لاریون داسې مهال کیږي چې تېره شپه ښاغلي عبدالله له خپلو پلویانو وغوښتل څو په هغو اوو ولایتونو کې د رایو بیا شمېرلو اجازه ورکړي چې ددې ډلې د ملاتړو له خوا په کې د انتخاباتو سیمه ییز دفترونه تړل شوي دي.

هرات کې د ټاکنیزو شکایتونو ولایتي دفتر کې یو کارکوونکی وژل شوی

د هرات سیمه ییز چارواکي وايي، د انتخاباتي شکایتونو ولایتي دفتر مالي معتمد لطف الله حلیمي نن سهار د خپل کار په دفتر کې په ډزو وژل شوی دی.

ددغه دفتر کمیشنر ګل محمد طارق ازادي راډیو ته وویل، حلیمي د کلاشینکوف په ډزو وژل شوی دی.

د هرات د مرکزي روغتون سرطبیب محمد عارف جلالي ازادي راډیو ته وویل چې د وژل شوي کارمند جسد د دوی روغتون ته وروړل شوی دی.

د هرات د والي ویاند جیلاني فرهاد ازادي راډیو ته ویلي تر اوسه د حلیمي د قتل علت او انګېزه روښانه نه ده.

تراوسه چا د هغه د وژلو مسولیت نه دی منلی. د انتخاباتو ولایتي دفترونه په کلکو امنیتي تدابیرو ساتل کیږي او دا نه ده معلومه چې بریدګر څنګه له وسلې سره د شکایاتو کمیسون دفتر نه ننوتی دی.

زلمی خلیلزاد د افغانستان د سولې په تړاو خبرو لپاره اسلام اباد ته تللی

د افغانستان د سولې لپاره د امریکا ځانګړی استازی زلمی خلیلزاد اسلام اباد ته تللی او د پاکستان د بهرنیو چارو له وزیر شاه محمود قریشي سره یې د افغانستان د سولې پر هڅو خبرې کړې دي.

د پاکستان د بهرنیو چارو وزارت د خبرپاڼې له مخې ښاغلي قریشي ویلي چې پاکستان به د افغانستان د سولې هڅو تسهیل ته دوام ورکړي.

خلیلزاد وروسته له هغه اسلام اباد ته سفر کوي چې تېره ورځ امریکايي استازو په قطر کې له طالبانو سره خبرې د لنډې مودې لپاره ودرولې.

دا خبرې وروسته له هغه ودرېدې چې طالبانو په بګرام کې د طالبانو پر پوځي اډې برید وکړ.

د ټاکنو کمېسیون نن پرېکړه کوي چې قسمي یا لومړنۍ پایلې اعلان کړي

سرچینې چې د موضوع د حساسیت له کبله نه‌غواړي نوم‌یې واخیستل شي ازادي راډیو ته وویل، دغه کمېسیون د وخت او د پایلو د ډول په اړه نن بحث کوي.

د ټاکنو خپلواک کمېسیون یوې سرچینې ازادي راډیو ته وویل، د ټاکنو د لومړنیو یا هم قسمي پایلو د اعلان لپاره ټول چمتووالی نیول شوی دی.

سرچینې چې د موضوع د حساسیت له کبله نه‌غواړي نوم‌یې واخیستل شي ازادي راډیو ته وویل، دغه کمېسیون د وخت او د پایلو د ډول په اړه نن بحث کوي.

بل‌خوا بیا د ټاکنو خپلواک کمېسیون یو ویاند میرزا محمد حق‌پرست وايي، کمېسیون د پایلو اعلان ته بشپړ چمتو دی، خو په دې اړه د کمېسیون رهبرۍ رسما پرېکړه نه‌ده کړې او په دې اړه غونډه روانه ده.

د ټاکنو خپلواک کمېسیون داسې مهال د ولسمشرۍ ټاکنو د لومړنۍ پایلو اعلان ته چمتووالی ښيي چې د هېواد لومړۍ مېرمن رولا غني وايي، کمېسیون باید نور جرأت وکړي او پایلې اعلان کړي.

مېرمن غني له افغانانو مننه وکړه چې د ټاکنو د پایلو اعلان ته‌یې ډېر صبر وکړ

په ورته وخت کې پر ټاکنو د څار بنسټونه وايي، افغانان د معتبرو رأیو پر بنسټ د ولسمشرۍ ټاکنو د پایلو اعلان غواړي.

د ازادو او عادلانه ټاکنو بنسټ مشر یوسف رشید د پنج‌شنبې په ورځ یوه خبري غونډه کې د ټاکنو خپلواک کمېسیون له‌خوا د ولسمشرۍ ټاکنو د پایلو په نه‌اعلان نیوکه وکړه او زیاته‌یې کړه، کمېسیون د دې پروسې په مدیریت کې پاتې راغلی.

ښاغلی رشید وايي: "د ټاکنو بهیر ډېر اوږد شو، له بده مرغه تر اوسه لومړنۍ پایلې نه‌دي اعلان شوي او کمېسیون هم تر اوسه په دې نه‌پوهېږي چې لومړنۍ که قسمي پایلې اعلان کړي. دا د دې بهیر لپاره په حقوقي او تخنیکي لحاظ لویه ضربه ده، دوام‌یې په ګټه نه‌دی او خلک هم ترې نور ستړي شوي دي."​

ښاغلي رشید همدا ډول د ټاکنیزو شکایتونو کمېسیون تر پوښتنې لاندې راوست چې خپل قانوني چارې یې له یاده ویستي او یوازې د څارونکو په توګه عمل کوي.

خو د ټاکنیزو شکایتونو کمېسیون بیا دا تور نه‌مني او وايي، ټول کارونه‌یې د قانون پر بنسټ مخته روان دي.

د افغانستان د ولسمشرۍ ټاکنې د میزان یا تلې میاشتې په شپږمه وشوې، خو کمېسیون سره له دې چې دوه ځله‌یې د لومړنۍ پایلو د اعلان ژمنه کړې، تر اوسه نه‌دی توانېدلی په دې برخه کې عملي ګام پورته کړي.

'د ټاکنو کمېسیون دارلانشا د لومړنیو پایلو راپور د کمېشنرانو بورډ ته سپارلی'

عبدالله عبدالله او یو شمېر نور نوماندان د لومړنیو پایلو د اعلانېدو مخالف دي او وايي لومړی باید پاکې او ناپاکې رأیې سره بېلې شي.

د افغانستان د ټاکنو کمېسیون یوه ویاند میرزا محمد حق پرست وايي، ددغه کمېسیون دارلانشا د ولسمشرۍ ټاکنو د لومړنیو پایلو راپور د کمېشنرانو بورډ ته سپارلی دی.

ښاغلي حق پرست ازادي راډیو ته وویل، کمېشنران ددغه راپور په ارزولو لګیا دي.

هغه زیاته کړه: "په راپور باندې د کمېسیون رهبري کار کوي خبرې ورباندې روانې دي. که چېرې ستره ستونزه په راپور کې نه وه، د نن ورځې تر ماښامه به د کمېسیون رهبري د پایلو د اعلان په اړه پرېکړه کوي."

خو د ټاکنو کمېسیون غړی مولانا محمد عبدالله بیا وايي، د ۲۴ زرو محلونو قسمي پایلې به ډېر ژر اعلان شي.

د ټاکنود قانون په اساس، کله چې د رأی اچونې له مرکزونو د ټاکنو کمېسیون ته معلومات ورسېږي، مخکې له دې چې په اړه یې شکایتونو وڅېړل شي، کمېسیون کولای شي د ولایتونو په کچه قسمي پایلې اعلان کړي.

لومړنۍ پایلې بیا د قسمي پایلو له جمع بندۍ او د ټولو رایو تر شمېرل کېدو وروسته د ټاکل شوي مهال وېش له مخې اعلانېږي.

په ورته وخت کې د عبدالله عبدالله په مشرۍ د ثبات او همپالنې ټاکنیز ټیم خبرداری ورکوي، که چېرې کمېسیون د دوی غوښتنی په پام کې ونه نیسي او لومړنۍ پایلې اعلان کړي، پر وړاندې به یې بې تفاوته پاتې نه شي. خو په دې اړه یې نور جزئیات نه دي ورکړي.

د ولسمشرۍ د کاندیدانو شورا هم د ټاکنو کمېسیون له خوا د هرډول پایلو د اعلان مخالفت کړی. خو دغه کمېسیون ویلي د قانون له مخې پایلې اعلانوي او که څوک شکایت لري د ټاکنیزو شکایتونو کمېسیون ته دې مراجعه وکړي.

د ټاکنو کمېسیون د پاتې ۷ ولایتونو د رأیو بیاشمېرنې په اړه وروستۍ پرېکړه نه ده کړې

د افغانستان د ټاکنو خپلواک کمېسیون لا هم په هغه اووه ولایتونو کې د رایو دبیا شمېرنې او څېړنې په اړه وروستۍ پرېکړه نه ده کړې چې د یو شمېر ټاکنیزو ټیمونو د پلویانو په لوري په کې د کمیسیون دروازې تړل شوي دي.

د ټاکنو خپلواک کمېسیون رئیسې حوا علم نورستانۍ د پنج‌شنبې په ورځ په یوه خبري غونډه کې وویل، له معترضو نوماندانو سره ددوی ډېر ناستې وشوې، خو یوې پایلې ته ونه رسېدل.

خودا چې په سرپل، بغلان، بدخشان، تخار، فاریاب، پنجشېر او جوزجان ولایتونو کې د ثبات او همپالني انتخاباتي ټیم په ګډون لا هم د معترضو نوماندانو د پلویانو له‌خوا د رایو د بیا شمېرنې او څېړنې اجازه نه ده ورکړل شوې، بالاخره د ولسمشرۍ ټاکنو د لومړنۍ پایلو د اعلان برخلیک څه ډول کېږي؟

د ټاکنو خپلواک کمېسیون کمېشنر محمد حنیف دانشیار وايي، دوی به په دې اړه د قانون پر بنسټ پرېکړه وکړي.

"که خدای مه کړه بیا هم په دې ولایتونو موږ ته د بیا شمېرنې او څېړنې اجازه را نه کړل شي، کمېسیون به یې د قانون په رڼا په اړه پرېکړه وکړي، خو تر اوسه په دې اړه تازه پرېکړه نه ده شوې. "

د افغانستان د انتخاباتو قانون د ۴مې مادې د ۱۹ جز له مخې، د ټاکنو لومړنۍ پایلې هغه مهال اعلانېږي چې د ټولو ولایتونو پایلې په کې شاملې وي.

تمه ده نن ننګرهار او کندهار کې د رأیو بیاشمېرنه او تفتیش پای ته ورسېږي

د ټاکنو کمېسیون د معلوماتو له مخې، تر اوسه په ۲۵ ولایتونو کې د رأیو بیا شمېرنه پای ته رسېدلې ده.

د افغانستان د ټاکنو کمېسیون چارواکي وايي، تمه کېږي چې نن سه شنبه (قوس ۵مه) په ختیځ ولایت ننګرهار او جنوبي ولایت کندهار کې د رأیو د بیا شمېرنې او تفتیش پروسه بشپړه شي.

د دغه کمېسیون یوه ویاند عبدالعزیز ابراهیمی ازادي راډیو ته وویل، تر اوسه په ۲۵ ولایتونو کې د رأیو بیا شمېرنه پای ته رسېدلې ده.

ابراهیمي هیله وښوده چې د ثبات او هم‌پالنې انتخاباتي ټیم اجازه ورکړي چې په اوو پاتې ولایتونو کې هم د رأیو بیا شمېرنه وشي.

ښاغلی ابراهیمي زیاتوي: "د ابتدايي پایلې اعلان په ټول افغانستان په خاصه توګه په اوو ولایتونو کې د رأیو د بیا شمېرنې په بشپړېدو پورې تړاو لري. موږ هیله‌مند یوو چې ژر دا کار وکړو او لومړنۍ پایله اعلان کړو ځکه افغانان د نتیجې په انتظار دي."

د اجرائیه رئیس عبدالله عبدالله په مشرۍ د ثبات او هم‌پالنې انتخاباتي ټیم په پنجشېر، فاریاب، جوزجان، سرپل، بغلان، تخار او بدخشان کې د رأیو د بیاشمېرنې مخه نیولې ده.

د دغه ټیم او ځینو نورو کاندیدانو اعتراض دا دی چې د ټاکنو کمېسیون پرته له دې چې پاکې او ناپاکې رأیې سره بېلې کړي او د هر محل د رأیو شمېر اعلان کړي، دغه پروسه پیل کړې ده.

اخوا په افغانستان کې د ملګرو ملتونو د سرمنشي ځانګړي استازي تدامیچي یاماموتو پرون له ښاغلي عبدالله سره کتلي او په ټویټر باندې یې لیکلي چې عبدالله عبدالله‌یې وهڅاوه چې د انتخاباتي ادارو له چارواکو سره کار وکړي څو پروسه مخته لاړه شي او باوري او پر وخت نتیجه ورکړي.

د افغانستان د جمهوري ریاست انتخابات د میزان په شپږمه وشول او دوه ځله‌یې د لومړنۍ پایلې اعلان ځنډېدلی دی.

ټاکنو کمېسيون د ١١٧٩ محلونو رايې باطلې کړې

د افغانستان د ټاکنو خپلواک کمېسیون وايي، د ۱۱۷۹ محلونو رایې یې باطلې کړي دي.

کمېسیون دا رایې وروسته له دې باطلې کړې چې د یو شمېر مرکزونو رایې یې بیا وشمېرلې.

د ټاکنو خپلواک کمېسیون يوه وياند ذبيح سادات نن ازادۍ راډيو ته وويل: "​تر دې دمه له هغو ولايتونو چې معلومات راغلي، په ټوله کې د ١١٧٩ محلونو تفتيش او بررسي شوې وه، چې د ټاکنو خپلواک کميسيون د پرېکړې پر اساس يې رايې باطلې اعلان شوې دي."​

ټاکل شوې وه چې په نژدې دوه نیم زره محلونو کې رایې بیا وشمېرل شي ،خو د عبدالله عبدالله د انتخاباتي ټیم ثبات او همپالنې د مخالفت له کبله په اوو ولایتونو کې دا کار تر اوسه نه دی شوی.

د ټاکنو خپلواک کمېسیون وايي، چې په ۳۲ ولایتونو کې رایې بیاشمېرل شوي او نتیجې یې کابل ته انتقال شوي دي.

د ثبات او همپالنې پلویانو فاریاب کې د رایو بیا شمیرنې مخه ونیوله

ارشیف

د ثبات او همپالنې د انتخاباتي ټيم پلویانو نن په فاریاب ولایت کې د رایو د بیا شمیرنې د بهیر مخه ونیوله.

د ټاکنو د خپلواک کمېسیون ولایتي رئیس محمد بشیر حسام نن آزادۍ راډیو ته وویل ټاکل شوې وه چې دا بهیر سهار مهال پیل شي خو د عبدالله عبدالله په مشرۍ د ثبات او همپالنې د ټیم د پلویانو د اعتراض له کبله وځنډېد:

هغه زیاته کړه: "د ثبات او همپالنې ناظران رانغلل، هغوی د تحصن خېمه وهلې او راغونډ شوي، مونږ موضوع له مرکز سره شریکه کړه او هغوی راته وویل چې د تشدد د مخنیوي لپاره دا بهیر بند کړئ."

په همدې حال کې د ټاکنو د خپلواک کمېسیون نن په یوه خبرپاڼه کې اعلان وکړ چې په کابل، کندهار، هرات، لوګر، هلمند، پکتیا، پکتیکا، خوست، نورستان، فراه، کندز، دایکندي، زابل او غور ولایتونو کې د رایو د بیا شمېرنې او تفتیش ځنډېدلی بهیر بیا پیل شوی خو په خبرپاڼه کې د فاریاب د پېښې یادونه نه ده شوې.

د رایو د بیا شمیرنې بهیر تېره اوونۍ د ثبات او همپالنې په ګډون د څو ټاکنیزو ډلو د مخالفت له کبله وځنډېد.

د ټاکنو د خپلواک کمېسیون مشرې پرون په کابل کې خبریالانو ته وویل چې دا پرېکړه یې له ټولو ټاکنیزو ډلو سره د موافقې پر اساس کړې ده.

"د لومړنیو پایلو په اعلان کې ځنډ د ټاکنو کمېسیون نیمګړتیا نه‌ده"

د ټاکنو کمېسیون یوه ویاند ذبیح الله سادات

د افغانستان د انتخاباتو خپلواک کمېسیون د ولسمشرۍ انتخاباتو د لومړنیو پایلو د ځنډ پړه د یو شمېر نوماندانو، له کمېسیون سره پر همکارو کمپنیو او ځینو نورو بنسټونو اچوي.

د دغه کمېسیون یوه ویاند ذبیح‌الله سادات نن (عقرب ۲۳مه) ازادي راډیو ته وویل: "د خلکو اندېښنې پر ځای دي او حق لري چې انتقاد وکړي، خو بل اړخ ته که وګورئ، موږ په دې انتخاباتو کې ټکنالوژي وکاروله د دې لپاره اړونده کمپنۍ معرفي شوې وه. که هغه کمپنۍ خپل مسؤلیتونه پر وخت نه‌شي ترسره کولای، یا هم د کاندیدانو له لوري پوره همکاري نه‌کېږي او د پروسې پر وړاندې خنډ جوړېږي؛ نو دا د کمېسیون نیمګړتیا نه، بلکې د هغو نهادونو نیمګړتیا ده چې په لوی لاس غواړي دا پروسه نوره هم وځنډېږي."

یو شمېر کابل ښاریانو اندېښنه وښوده چې د انتخاباتو کمېسیون ورځ تر بلې د پایلو ځنډولو سره د خلکو باور زیانمنوي.

دا دوهم ځل دی چې د ولسمشرۍ انتخاباتو د لومړنیو پایلو اعلان ځنډېږي .

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

دغه کمېسیون پرون ناوخته وویل چې د تخنیکي ستونزو او نورو مسایلو له کبله نه‌شي کولای پر ټاکلي وخت دا پایلې اعلان کړي.

د ولسمشرۍ ټاکنو د لومړنیو پایلو د ځنډ په اړه نن د ټاکنو کمېسیون معلومات ورکوي

په پام کې وه دغه پایلې د میزان په ۲۷ اعلان شي، خو د تخنیکي ستونزو له امله د عقرب ۲۳مې ته وځنډېدې.

د افغانستان د ټاکنو خپلواک کمېسیون به نن د نومبر په ۱۴مه، د جمهوري ریاست د ټاکنو د ابتدايي پایلو په اعلان کې د بیا ځنډ په اړه معلومات وړاندې کړي.

د دغو ټاکنو لومړنۍ پایلې باید نن اعلان شوې وی، خو د ټاکنو خپلواک کمېسیون پرون اعلان وکړ چې د ابتدایي پایلو اعلان‌یې ځنډولی دی.

د دغه کمېسون یوه ویاند عبدالعزیز ابراهیمي پرون رسنیو ته وویل، د تخنیکي ستونزو او نورو مسئلو له امله دا کار له ټاکلي مهالوېش سره سم نه‌شي کېدلائ.

دا دوهم وار دی چې د میزان ۶مې ولسمشرۍ انتخاباتو لومړنۍ پایلې ځنډېږي.

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

د ټاکنو کمېسون مسئولینو ژمنه کړې چې نن (عقرب ۲۳مه) به د دې ځنډ په اړه جزئیات له خبریالانو سره شریک کړي.

د انتخاباتو خپلواک کمېسیون: د رأیو بیاشمېرنه ودرول شوه

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

د افغانستان د انتخاباتو خپلواک کمېسیون وايي، د ولسمشریزو انتخاباتو د رأیو د بیاشمېرنې او تفتیش بهیر ودرول شو.

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

ښاغلی ابراهیمي زیاتوي چې دغه بهیر د کمېسیون تر راتلونکي هدایت درېدلی، د هغو محلونو د تفتیش او بیاشمېرنې بهیر چې د رأیو صندوقونه‌یې پرانیستي دي او د تفتیش او څېړنې لاندې دي، له دغه امر مستثنی دی.

د انتخاباتي شکایتونو کمېسیون هم د دغه بهیر له درېدو هرکلی کوي.

د دغه کمېسیون کمېشنر او ویاند محمد قاسم الیاسي ازادي راډیو ته وویل، د ولسمشرۍ انتخاباتو د رأیو د تفتیش او بیاشمېرنې بهیر باید له یو یا دوو ورځو زیات وخت ونه‌نیسي.

د ټاکنو کمېسیون د ولسمشرۍ ټاکنو لومړنیو پایلو د ممکنه ځنډ خبر ورکړ

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

د افغانستان د ټاکنو خپلواک کمېسيون ​وايي فکر نه‌کوي چې وکړاى شي د ټاکنو لومړۍ نتيجې د لړم/ عقرب پر ٢٣مه اعلان کړي.

د دغه کمېسيون يوه وياند ذبيح سادات تېره شپه ازادي راډيو ته وويل، د ځينو ستونزو له کبله ښايي دغه اعلان وځنډېږي.

سادات زیاته کړه: "ستونزمنه به وي که موږ د ولسمشرۍ ټاکنو لومړنۍ نتيجه پر ٢٣مه نېټه اعلان کړو، خو کمېسيون بيا هم خپله نهايي هڅه کوي، څرنګه چې په ځينو ولايتونو کې مزاحمتونه ايجاد شول، اوس به دغه اعلان موږ ته ستونزمن وي."

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

کمېسيون وايي، د ځينو کانديدانو ډلو په څو ولايتونو کې د رأيو د بياشمېرنې او تفتيش د پروسې پر وړاندې خنډونه جوړ کړي دي.

د ټاکنو خپلواک کمېسيون وايي، په ٤ ولايتونو کې د رأيو د بياشمېرنې او تفتيش پروسه ختمه شوې ده، خو په ٩ ولايتونو کې دغه پروسه پيل شوې نه‌ده.

په پام کې ده له اتو زرو د ډېرو صندوقونو رأیې له سره وشمېرل شي، ترڅو هغه رأیې ترې بېلې شي چې د رأی ورکوونکو بایومټریک معلومات‌یې نه‌دي ثبت شوي.

ټاکنو کمېسیون: د رأیو تفتیش او بیا شمېرنې وروسته لومړنۍ پایلې اعلانېږي

سادات وايي، نهایي کوښښ دا دی څو په هغه نېټه چې د عقرب ۲۳ ده، د ولسمشرۍ د ټاکنو لومړنۍ پایلې اعلان شي.

د افغانستان د ټاکنو خپلواک کمېسیون وايي، د رأیې ورکولو د څه باندې اتو زرو محلونو د رایو د بیا شمېرنې او تفتیش پروسه روانه ده او هڅه کوي چې د ټاکلي مهالویش سره سم د ولسمشرۍ د ټاکنو لومړنۍ نتیجه اعلان کړي.

د ټاکنو د خپلواک کمېسیون یوه ویاند ذبیح سادات دغه څرګندونې تېر ماښام وروسته له هغې ازادي راډیو ته وکړې چې د ولسمشرۍ یوه کاندید او اجرائیه ریس عبدالله عبدالله کابل کې د لویې جرګې په کیږدۍ کې خپلو پلویانو ته په وینا کې د دغو محلونو د رأیو د بیا شمېرنې او تفتیش پر وړاندې خپل مخالفت څرګند کړ او له دې کمېسیونه یې وغوښتل چې دغه بهیر سمدستي ودروي.

خو سادات وویل، دغه پرېکړه د دې کمېسیون د رهبرۍ په اکثریت شوې او له ټولو کاندیدانو غواړي څو په دې بهیر کې له کمېسیون سره همکاري وکړي.

ښاغلي سادات د یو شمېر لورو هغو اندېښنو ته په پام سره چې ښایي د ولسمشرۍ د انتخاباتو د لومړنیو پایلو نتیجه بیا وځنډیږي وویل، کمېسیون تر ډېره هڅه کوي چې په ټاکلي وخت دغه نتیجه اعلان کړي.

سادات زیاته کړه: "زموږ نهایي کوښښ همدا دی چې په هغه نېټه چې د عقرب ۲۳ ده، د ولسمشرۍ د انتخاباتو ابتدایي پایلې اعلان کړو خو مونږه مشروطې بللې وې چې د درملوګ کمپنۍ پر خپل وخت معلومات د رأیې ورکونکو راکړي، د کاندیدانو ناظرین همکاري وکړي په پروسه کې، ځینې نور شرطونه هم وو چې د هغو پر اساس موږ کولی شول، اما درملوګ په پنځه ورځني ځنډ د رأیې ورکوونکو معلومات مونږ ته راکړي خو اوس هم موږ نهایي کوښښ کوو څو وتوانېږو د عقرب په ۲۳ د ولسشمرۍ د ټاکنو ابتدایي پایلي اعلان کړوو."

د افغانستان د ولسمشرۍ انتخابات چې په څو ځلې په ځنډ د میزان د میاشتې په ۶ نېټه ترسره شوې، په پام کې ده لومړنۍ نتیجه یې د راتلونکې پنجشنبې په ورځ چې د عقرب ۲۳ ده اعلان او وروستۍ نتیجه یې د قوس په ۱۵ اعلان شي.

نور راوښيه

XS
SM
MD
LG