د لاسرسۍ وړ لېنکونه

تازه خبر
چهارشنبه ۲۰ وری ۱۳۹۹ کابل ۰۷:۰۳

نړۍ

پاکستان کې د لوی درستیز د کاري مودې غځېدو په اړه بحث کېږي

د پاکستان د پوځ لوی درستیز جنرال قمر جاوېد باجوه

د پاکستان سترې محکمې د حکومت هغه پریکړه ځنډولې چې په‌کې یې د پوځ د لوی درستیز جنرال قمر جاوېد باجوه د کار دوره غځولې ده.

د پاکستان د لوی څارنوال دفتر وايي، د سترې محکمې له‌خوا د باجوه د دورې غځول تر نن (چهارشنبې) پورې ځنډول شوې څو د دې اقدام په وړاندې اعتراض واوري.

جنرال باجوه د پخواني صدراعظم نواز شریف له‌خوا د ۲۰۱۶ م کال په نومبر کې د پاکستاني پوځ د لوی درستیز په توګه ټاکل شوی و، د نوموړي درې کلنه دوره د نومبر میاشتې په ۲۹مه نېټه پای ته رسېږي.

خو په اګسټ میاشت کې د نواز شریف ځای ناستي عمران خان د پاکستان د پوځ د لوی درستیز په توګه د باجوه دوره درې کاله نوره هم وغځوله او د دې دلیل‌یې (سیمه‌ییز امنیتي وضعیت) وښوده.

د پاکستان قاضي‌القضات سعید کوسه د سې شنبې په ورځ د دې قضیې د اورېدو پر مهال د باجوه د دورې د غځولو په اړه د حکومت په پرېکړه کې شتو نیمګړتیاوو ته ګوته ونیوله او پوښتنه‌یې راپورته کړه چې ایا د پوځ د لوی درستیز د کاري مودې غځول قانوني دي او کنه.

کوسه د پوځ او حکومت استازو ته ویلي چې نن (چهارشنبه) محکمې ته ورشي او د دې اقدام تر شا په دلایلو په جزئیاتو بحث وکړي.

د ورځې تازه خبرونه دلته ولولئ

د ازادي راډیو قرغزستان څانګې د امریکا د تحقیقي راپورونو جایزه ګټلې

د ازادې اروپا/ ازادي راډيو

د ازادې اروپا/ ازادي راډيو د قرغزستان څانګې ازاتیک راډیو د قرغزستان له یوې بلې وېب‌پاڼې سره په ګډه د امریکا د تحقیقي راپورونو یوه جایزه ګټلې ده.

دا جایزه دې ادارو ته د سازمان شویو جرمونو او فساد په اړه د راپورونو د لړۍ په خاطر ورکړل شوې ده.

په امریکا کې مېشت د تحقیقي خبریالانو او اېډېټرانو ادارې ای ار اي دوشنبه خبریالان ستایلي په داسې یوه هېواد کې چې خلک نه‌غواړي د فساد او جرمونو په اړه راپورونه جوړ شي د راپورونو لړۍ جوړه کړه او خلک‌یې له حقایقو خبر کړل.

د ازادې اروپا/ ازادي راډیو د منځنۍ اسیا څانګې اکثر خبریالان وخت ناوخته په خپلو هېوادونو کې د دولت له‌خوا له محدودیتونو سره مخ کېږي او ان کله تحقیقات هم ترې شوي.

د امریکا-طالبانو تړون کې د افغان ښځو د حقونو نه‌یادونې په اړه اندېښنه

ارشیف، د امریکا او طالبانو ترمنځ تړون

د امریکا د استازو جرګې د څار او سمون کمېټې مشرې کارولین بي. مالوني ویلي له دې ډېره اندېښمنه ده چې د ولسمشر ډونالد ټرمپ د ادارې او طالبانو ترمنځ د سولې په تړون کې د افغان ښځو او نجونو د حقونو د خوندیتوب لپاره یوه کلمه هم نه‌ده راغلې.

د اغلې مالوني په حواله دا بیان پرون شپه د امریکا د استازو جرګې په وېب‌پاڼه خپور شوی.

جمهوري غوښتونکې استازې کارولین زیاته کړې چې د طالبانو په رژیم کې ښځې او نجونې سخت تر فشار لاندې وې او په ټولنه کې هېڅ رول نه‌و ورکړل شوی.

د امریکا د استازو جرګې د څار او سمون کمېټې له غړو سره دوشنبه ناوخته د افغانستان د بیارغونې لپاره د امریکا د مرستو سرمفتش جان سوپکو او همکارانو یې د وېډیو کنفرانس له لارې خبرې کړې دي.

د امریکا استازو جرګې په اعلامیه کې د ښاغلي سوپکو د پرونیو خبرو یوه برخه ذکر شوې چې هغه ویلي دا لا معلومه نه‌ده چې امریکا له افغانستانه د خپلو پوځیانو تر ایستلو وروسته د افغان ښځو او نجونو د حقونو ملاتړ ته څنګه دوام ورکولای شي.

تر دې مخکې هم د امریکا او طالبانو ترمنځ د سولې د تړون په باب د افغانستان د ښځو د حقونو فعالانو اندېښنه ښودلې وه.

دا تړون د فبرورۍ په ۲۹مه دا مریکا او طالبانو ترمنځ د قطر په پلازمېنه دوحه کې لاسلیک شو چې ډېر تمرکز یې له افغانستانه د امریکایي او ټولو بهرنیو ځواکونو په وتلو، له ترهګرو سره د طالبانو د اړیکو په پرې کولو او د افغانستان له حکومت سره په خبرو او سولې دی.

یونېسف: د ښوونځیو تړلو سوېلي اسیا کې میلیونونه ماشومان اغېزمن کړي

ارشیف

یونېسف وايي د 'کوویډ-۱۹' یا کرونا ویروس له امله په سوېلي اسیا کې له ۴۳۰ میلیونو زیات ماشومان د ښوونځیو د تړلو له امله اغېزمن شوي دي.

دې ادارې نن سې شنبه په یوه اعلامیه کې ویلي چې که زیانمنو ماشومانو او ستونزمنو لارو لرونکو ځايونو لپاره د ښوونځيو د تړلو په وخت کې د زده‌کړې بل بديل برابر نه‌شي او له خپلو درسونو څخه وروسته پاتې شي، ښايي هېڅکله به هم بېرته ښوونځي ته لاړ نه‌شي.­

د نړۍ اکثرو پرمختللو هېوادونو کې د کرونا ویروس د وېرې د خپرېدو په خاطر ښوونځي او پوهنتونونه تړلي دي، خو زده‌کوونکو ته په انلاین بڼه درسونه ورکول کېږي.

د ماشومانو لپاره د ملګرو ملتونو وجهي صندوق یونېسف ویلي سوېلي اسیا د انټرنټي محدودیتونو په خاطر د انلاین زده‌کړو په لحاظ له ډېرو ننګونو سره مخ ده او په‌کار ده چې د ټلوېزیون، راډیو او نورو بدیلو لارو په اړه فکر وشي.

د افغانستان د پوهنې وزارت او خصوصي تعلیمي مؤسسو د انلاین، راډیو او ټلوېزیون له لارې د ښوونځیو د درسونو د وړاندې کولو ژمنه کړې ده.

فرانسه: ایران دې د اټومي تړون پر اساس خپلو مکلفیتونو ته درناوی وکړي

د فرانسې ولسمشر ایمانویل مکرون

په داسې حال کې چې د نړۍ پام کرونا ویروس ته اوښتی، ایران دې خپلو هغو مکلفیتونو ته درناوی وکړي، چې په اټومي تړون کې ورته ټاکل شوي دي.

دا خبره د فرانسې ولسمشر ایمانویل مکرون پرون د ایران له ولسمشر حسن روحاني سره په ټېلېفوني مکالمه کې کړې ده.

مکرون زیاته کړې، د کرونا ویروس پر وړاندې د مبارزې لپاره دې نړیواله ټولنه همغږې شي.

د فرانسې د حکومت د اعلامیې په حواله، مکرون هیله ښوولې چې ایران داسې تازه اقدامات ونه کړي، چې له اټومي تړون سره په ټکر کې وي او د سیمه ییز کړکېچ په کمولو کې برخه واخلي.

بلخوا د حسن روحاني دفتر وايي، هغه د کرونا ویروس په وړاندې د مبارزې لپاره د نړیوالې همغږۍ غوښتنه کړې ده.

د بشري حقونو د څار ادارې پرون دوشنبه د امریکا له متحدو ایالتونو غوښتنه وکړه، چې پر ایران لګول شوي اقتصادي بندیزونه کم کړي.

د امریکا ولسمشر ډونالډ ټرمپ له ایران سره د بشري مرستو وړاندیز کړی، خو ایراني چارواکو رد کړی دی.

تاجکستان کې د روغتیايي کارکوونکو په شمول ۱۳ تنه قرنطین شوي

ارشیف

تاجکستاني چارواکو د دې هېواد په شمال کې د یو کس له مړینې وروسته د روغتیايي کارکوونکو په شمول ۱۳ کسان قرنطین کړي.

د چارواکو په وینا دا کس سینه‌بغل ته ورته ناروغۍ له کبله مړ شوی دی.

روغتیايي چارواکو ویلي، د جابر رسولوف په روغتون کې د مشر ډاکتر په شمول د دې قرنطین شوې ډلې د کرونا ویروس د معایناتو نتایج منفي وو.

د مړ شوي کس خپلوانو ویلي چې هغه ګاونډي قرغزستان ته د واده لپاره تر سفر وروسته ناروغ شو.

د تاجکستان د سغد ولایت په جابر رسولوف روغتون کې وروستي وضعیت د منځنۍ اسیا په دې بې‌وزله هېواد کې د کرونا ناروغۍ په اړه اندېښنې زیاتې کړي.

د تاجکستان حکومت ویلي تر اوسه په دې هېواد کې په کرونا ویروس د اخته کېدو هېڅ پېښه نه‌ده ثبت شوې.

تېره اوونۍ د روغتیا نړیوال سازمان لپاره د دې هېواد استازي هم د دې ادعا پلوي وکړه.

د تاجکستان روغتیايي سیستم کمزوری او له مالي ستونزو سره مخ دی.

همدارنګه د تاجکستان په شااوخوا کې داسې هېوادونه پراته دي چېرې چې د کرونا ویروس پېښې په‌کې ثبت شوي او په زیاتېدو دي.

د ترکمنستان ختیځ کې د بانکي ماشینونو څخه استفاده محدوده شوې

تېرو دوو ورځو کې د پیسو بانکي ماشینونو مشتریانو ته د نقدي پیسو ورکړه تر ۱۰۰ مناتو "د ترکمنستان پولي واحد" محدود کړې.

د ترکمنستان په ختیځ درغن اتا سیمه کې چارواکو د افرادو لپاره د 'ATM' يا د بانکي ماشینونو څخه د نقدو پیسو ایستل نور هم محدود کړي دي.

د چارواکو دې اقدام ته د انرژۍ په دې بډایه هېواد کې د نقدو پیسو د کمۍ د یوې بلې نښې په سترګه کتل کېږي.

د دوشنبې په ورځ د درغن اتا له مرکز څخه د ازادي راډیو خبریال په یو راپور کې وویل چې تېرو دوو ورځو کې د پیسو بانکي ماشینونو مشتریانو ته د نقدي پیسو ورکړه تر ۱۰۰ مناتو "د ترکمنستان پولي واحد" محدود کړې.

له ۱۰۰ مناتو څخه په رسمي نرخ ۳۰ ډالر او د تور بازار په نرخ ۵ امریکايي ډالر جوړېږي.

دا له هغې وروسته چې په ۲۰۱۸ میلادي کال ترکمن چارواکو په دې هېواد کې له بانکونو څخه د نقدو پیسو په را ایستلو د محددویتونو لګول پیل کړي، د پیسو تر ټول کمه اندازه ده چې ترکمنستان کې یې وګړي له خپلو بانکي حسابونو د اتومات ماشینونو له لارې ایستلی شي.

د ۲۰۱۸ میلادي کال په فبرورۍ کې د یو کس لپاره په ورځنۍ توګه د نقدو پیسو د ایستلو اندازه ۱۰۰۰ مناته ټاکل شوې وه.

په نومبر کې دا اندازه ۸۰۰ ته راکمه شوه.

تېره میاشت د پیسو ځیني اتومات بانکي ماشینونو خلکو ته د پیسو ورکول په ورځني ډول تر ۲۰۰ مناتو محدود کړل.

امریکا د "روسیې د امپریال خوځښت" د ترورېستانو په توګه پېژندلی

د روسیې د امپریال خوځښت یو تن غړی ډېنېس ګاریوف چې په ۲۰۱۵ کال کې امریکا په تور لېست کې شامل کړی.

امریکا د "روسیې د امپریال خوځښت" په نوم د دې هېواد یوه ډېره نېشنلېسته ډله او درې مشران‌يې د ترورېستانو په توګه پېژندلي دي.

دا لومړی ځل دی چې امریکا د سپین نژادو د برتري پالنې یوه بهرنۍ ډله په دې ډل‌بندۍ کې شاملوي.

د امریکا د بهرنیو چارو وزارت د ترهګرۍ ضد چارو تنظیموونکي ناتن سېلز (Nathan Sales) د دوشنبې په ورځ دا یو "بې‌مخینې" اقدام وباله او په یو بیان کې یې وویل: "د دې غورځنګ لاسونه د بې‌ګناه خلکو په وینو سره دي."

دا غورځنګ خپله ځان "د روسیې اورتودکس ملي-هېواد پال او سلطنت پلوی سازمان" بولي.

دا ګروپ همدارنګه غواړي چې روسیه دې د یو توکميز دولت په توګه اعلان شي چې په‌کې د دوی په وینا د روسي وګړو درې څانګې روسان، اوکراینیان او بلاروسان شامل وي.

دا غورځنک په سینت پټرسبورګ، مسکو او نیژني نوبوګورډ کې څانګې لري، همدارنګه د امپریال لښکر په نوم نظامي برخه هم لري چې په‌کې د لاس په لاس جګړې، رزمي هنرونو او تاکتیکونو روزنه ورکول کېږي.

د امریکا له‌خوا د ترورېستانو په لېست کې د دې ډلې شاملول لومړی ځل دی چې له امریکا بهر د سپین نژادو د برتري پالنې یوه ډله په دې لېست کې شاملېږي.

پر دې ډلې سربېره د دې ګروپ درې مشران په انفرادي ډول په تور لېست کې شامل شوي دي.

په کرونا ویروس اخته د بريتانيا صدراعظم روغتیايي وضعیت خراب دی

د بریتانیا صدراعظم بورېس جانسون

د بریتانیا صدراعظم بورېس جانسون وروسته له هغې چې روغتیايي وضیعت‌یې خراب شو د جدي روغتیايي څارنې برخې ته انتقال شو.

د ښاغلي جانسون دفتر وايي، په کرونا ویروس د بورېس جانسون د اخته کېدو راهيسې د نوموړي روغتیايي وضعیت د خرابېدو خواته روان دی.

بورېس جانسون چې ۵۵ کلن دی، د یکشنبې په ورځ د لندن په سینټ توماس روغتون کې بستر شو.

نوموړي ۱۰ ورځې په کور کې تېرې کړې، خو د روغتیايي وضعیت له خرابېدو وروسته روغتون ته یوړل شو.

بورېس جانسون د بریتانیا د صدراعظم په توګه د ناروغۍ پر مهال خپل ځیني واکونه د بریتانیا د بهرنیو چارو وزیر ډومینیک راب ته ورکړي دي.

د امریکا پوځ له تړون د سرغړونې په اړه د طالبانو ادعا رد کړه

ارشیف،

د امریکا پوځ له طالبانو سره په قطر کې د تړون د سرغړونې په اړه د وسله‌والو طالبانو ادعا رد کړې ده.

دغه تړون د فبرورۍ پر ۲۹مه په دوحه کې لاسلیک شو.

د دغه پوځ ویاند ډګروال ساني لګټ د اپرېل پر ۵مه په ټویټر لیکلي چې په افغانستان کې امریکایي ځواکونو له طالبانو سره تړون مراعات کړی او په دې اړه شوې ادعاوي یې بې‌اساسه بللې دي.

نوموړي دا هم لیکلي چې دا وسله‌واله ډله یعنې طالبان باید تاوتریخوالی کم کړي او خبرداری یې ورکړی چې د قطر د موافقې سره سم دوی به د افغانستان امنیتي ځواکونو دفاع ته دوام ورکړي که چېرې د طالبانو له لوري برید ورباندې وشي.

تر دې وړاندې وسله‌والو طالبانو په یوې اعلامیه کې ادعا کړې وه چې افغان او امریکایي ځواکونه په هغو سیمو کې چې جګړه‌ییزې نه‌دي هوایي بریدونه کوي او په ملکي سیمو کې عملیات ترسره کوي.

طالبانو ویلي وو چې امریکا په دې کار سره د دوحې له تړون څخه سرغړونه کوي.

دوی افغان حکومت هم تورن کړی چې د ۵۰۰۰ طالب بندیانو په خوشې کولو کې یې ځنډ راوستی.

دا هغه اقدام دی چې په بدل کې به‌یې زر افغان امنیتي ځواکونه چې له طالبانو سره بندي دي، خوشې کېږي او وروسته به بین‌الافغاني خبري پیلېږي.

افغان حکومت په تازه راپور کې د دوشنبې په ورځ وویل چې وسله‌وال طالبان د دې ډلې د هغو ۱۵ قوماندانانو خوشې کېدل غواړي چې په لویو بریدونو او بشر ضد جنایتونو کې ښکېل بلل شوي.

افغان چارواکي وایي دا غوښتنه د منلو نه‌ده.

کوېټه کې پولیسو لسګونه ډاکتران او روغتیايي کارکوونکي نیولي

کوېټه کې د پولیسو له لوري نیول شوي ډاکتران او روغتیايي کارکوونکي

د پاکستان پولیسو په کوېټه ښار کې لسګونه هغه ډاکتران او روغتیايي کارکوونکي نیولي چې د کرونا ویروس سره د مبارزې لپاره‌یې د لازمو طبي وسایلو د کموالي له کبله اعتراضونه کول.

د کوېټې ملکي روغتون یا «Quetta Civil Hospital» او د بولان روغتیایي کالج روغتیایي پرسونل نن د اپرېل ۶مه د ایالتي حکومتوالۍ پر لور روان ول چې پولیسو ونیول.

عیني شاهدان وایي د پولیسو د عملیاتو پر مهال‌یې وهل ټکول لیدلي دي.

دغو اعتراض کوونکو وویل چې د دوی ۱۲ ملګري په داسې حال کې چې د کرونا ناروغانو په درملنه بوخت ول، په خپله په دې ویروس اخته شول.

دوی ټینګار کاوه چې هغه مهال به بېرته کار ته راورګرځي چې حکومت دوی ته د خوندیتوب لازم وسایل برابر کړي.

د بلوچستان ایالت حکومت چې کوټه‌یې مرکز دی وایي د دې ایالت روغتونونه د کرونا ویروس سره د مبارزې په برخه کې په ټولو اړینو موادو او وسایلو سمبال دي.

پاکستاني چارواکو په دې هېواد کې د کرونا ویروس د ۳۴۶۹ مثبتو پېښو راپور ورکړی چې ۵۰ تنه مړه شوي هم په‌کې شاملېږي.

بشر حقونو څار سازمان: امریکا دې د ایران پر اقتصاد بندیزونه راکم کړي

د بشر حقونو څار نړیوال سازمان یا هیومن رایتس واچ

د بشر حقونو څار نړیوال سازمان یا هیومن رایتس واچ پر امریکا غږ کړی چې د ایران پر اقتصاد بندیزونه راکم کړي او دغه هېواد ته له مجازاتو معاف موادو د لېږد جواز وغځوي څو ډاډمنه کړي چې ایران د روانې وبا سره د مبارزې پر مهال د بشري مرستو څخه برخه‌من کېږي.

دا غوښتنه نن د اپرېل شپږمه داسې مهال شوې چې په خپله تهران او هم یو شمېر نورو هېوادونو هم وړاندې ورته غوښتنې کړې وې.

د ا مریکا ولسمشر وړاندې ایران ته د بشري مرستو د ورکولو وړاندیز کړی وو، خو ایراني چارواکو هغه وړاندیز رد کړ او ویې‌ویل که واشنګټن د مرستې نیت لري، نو پر ایران دې بندیزونه لیرې کړي.

ایران له هغو هېوادونو دی چې کرونا ویروس ډېر ځپلی، د رسمي شمېرو له مخې په ایران کې تر ۶۰ زره ډېر کسان په دې ویروس اخته شوي او څه باندې ۳۷۰۰ له همدې کبله مړه شوي دي.

یو شمېر متخصصین او منتقدین ګمان کوي چې ښایي شمېرې تر دې ډېرې وي.

ایټالیا او اسپانیا کې د کرونا ویروس مثبتې پېښې کمې شوي

ایټالیا او اسپانیا کې دوه لکه او ۶۰ زره کسان کرونا پر ویروس اخته شوي او د مړو شمېر له ۲۸ زرو اوښتی.

ایټالیا او اسپانیا چې د کرونا له لاسه ډېر خلک په‌کې مړه شوي د مثبتو پېښو په شمېر کې د یوه اندازه کموالي خبره کړې، خو امریکا بیا د یوې سختې اوونۍ خبرداری ورکړی.

په امریکا کې په کرونا ویروس د اخته خلکو شمېر له درې لکه او ۳۱ زرو اوښتی او د مړو شمېر نهه نیمو زرو ته پورته شوی دی.

د امریکا ولسمشر ډونالد ټرمپ ویلي چې له بده بخته به د مړو شمېر لا پسې زیات شي.

ایټالیا او اسپانیا چې په ټوله نړۍ کې یې د کرونا ویروس له لاسه زیات خلک مړه شوي ویلي چې په دې یو دوه وروستیو ورځو کې یې مثبتې پېښې راکمې شوې دي.

دې دواړو هېوادونو کې دوه لکه او ۶۰ زره کسان کرونا نیولي، خو د مړو شمېر یې له ۲۸ زرو اوښتی دی.

په ټوله نړۍ کې د کرونا ویروس د مثبتو پېښو شمېر د جانز هاپکنز پوهنتون په اساس له ۱۲نیمو لکو اوښتی او ۶۸۵۰۰ کسان‌یې مړه کړي.

پاکستان د تبلیغیانو د اجماع ۲۰ زره ګډون کوونکي قرنطین کړي

اوه زره کسان په لاهور، تر اته زره تبلیغیان په سند او پاتې ۵۳۰۰ نور تبلیغیان په خېبر پښتونخوا کې قرنطین شوي.

پاکستاني چارواکي وايي هغه ۲۰ زره کسان‌یې قرنطین کړي چې د مارچ له ۱۰مې تر ۱۲مې د تبلیغیانو په اجماع یا غونډه کې برخه اخیستې وه.

چارواکي وايي په لسګونه زره نورو هغو کسانو پسې ګرځي چې د کرونا ویروس له ګواښ سره سره په لاهور کې دې تبلیغي اجماع ته ورغلي و.

د خېبر پښتونخوا د اعلی وزیر سلاکار او ویاند اجمل وزیر ویلي چې یو شمېر معاینه شویو کسانو کې د کرونا ویروس موجود دی.

ښاغلي وزیر ویلي اووه زره کسان په لاهور، تر اته زره تبلیغیان په سند او پاتې ۵۳۰۰ نور تبلیغیان په خېبر پښتونخوا کې قرنطین شوي.

په لاهور کې د تبلیغي اجماع جوړوونکو ویلي چې څه باندې یو لک کسان دې اجماع ته ورغلي و.

چارواکو ویلي غواړي د دې مراسمو ګډونوال معاینه او قرنطین کړي.

روحاني: راتلونکې اوونۍ ایران کې واړه او کم‌خطره کارونه بیاپیلېږي

د ایران ولسمشر حسن روحاني

د ایران ولسمشر حسن روحاني اعلان وکړ چې له راتلونکې شنبې یعنې د حمل یا وري له ۲۳مې واړه او کم‌خطره کارونه بېرته پیل شي.

روحاني پرون داسې وخت دا اعلان وکړ چې ایران لا هم د کرونا ویروس له لاسه یو له ډېرو زیانمنېدونکو هېوادونو دی.

هغه زیاته کړه: "د اقتصادي خدمتونو او کارونو لپاره مو پرېکړه وکړه او وړاندیز تصویب شو چې د حمل/ وري له ۲۳مې د هېواد په ولایتونو کې کم‌خطره متوسط او واړه کارونه بیا پيل شي، خو له خطر ډک کارونه د حمل تر پایه ممنوع دي څو یې په اړه پرېکړه وشي."

د ورلډومېټرز وېب‌پاڼې او جانز هاپکنز پوهنتون د شمېرو له مخې په ایران کې تر اوسه پورې څه باندې ۵۸ زره کسان کرونا ویروس نیولي او له ډلې یې لږ تر لږه ۳۶۰۰ کسان مړه شوي دي.

لوېديځ هېوادونه شک څرګندوي چې د ایران په څېر هېوادونه چې ازادې رسنۍ نه‌لري او شمېرې د حکومت له‌خوا پټېږي دا به په کرونا ویروس د اخته او مړو حقیقي شمېرې نه‌وي.

اوکراین کې د اور لګېدنې هېڅ‌راز نښې نښانې نه‌دي پاتې

ارشیف، انځور تزئیني بڼه لري.

اوکرایني چارواکي وايي د چیرنوبل د اټمي بټۍ د شاوخوا په ممنوعه سیمه کې د اور لګېدنې هېڅ‌راز نښې نښانې نه‌دي پاتې.

پرون ۱۳۰ تنه د اطفائیې مأمورین چې درې الوتکې او ۲۱ ځانګړي وسایط ورسره وو، د اور وژنې د مأموریت لپاره دې سیمې ته استول شوي وو.

د اوکراین د بېړنیو خدماتو دولتي ادارې نن سهار وویل چې په سیمه کې د اور کچه اوس عادي ده.

د پخواني شوروي اتحاد پر مهال د چیرنوبل اټومي بټۍ کې په ۱۹۸۶ کال کې یوه خطرناکه چاودنه وشوه چې اټمي تشعشعات‌یې هوا ته اوچت او د اروپا په ډېر شمېر هېوادونو کې خپاره شول.

نور راوښيه

XS
SM
MD
LG