د روسیې په منځګړیتوب د سوریې د شمال ختیځ په کرد مېشتو سیمو کې د ترکیې او کرد جنګیالیو ترمنځ اوربند د نږدې یوې اونۍ لپاره تمدید شو.
پرون داسې راپورونه خپاره شوي وو چې ښایي نن ترکیه د سوریې دننه پر کردانو پراخې حملې وکړي.
د روسیې ولسمشر ولادیمیر پوتین وایي، د ترکیې له ولسمشر رجب طیب اردوغان سره یې مهمه موافقه کړې ده چې له مخې به یې د سوریې په شمال ختیځه سیمه کې پوځي ګزمې پیل کړي.
دا موافقه پرون د تورې بحیرې په سوچي استراحت ځای کې د دواړو مشرانو د کتنې پرمهال وشوه.
ښاغلي پوتین وویل: "سوریه باید د بهرنیو غیرقانوني وسله والو له موجودیته ازاده شي."
د روسيي او ترکیي چارواکو ویلي چې د امریکا په منځګړیتوب د سوریې دننه د کردانو په سیمه کې پنځه ورځنی اوربند چې پرون ناوخته پای ته ورسید، د نږدې یوې اونۍ لپاره تمدید شوی دی.
د روسیې او ترکیې د مشرانو غونډې په سوچي کې پنځه ساعته دوام وکړ. تر لیدنې کتنې وروسته د روسیې د بهرنیو چارو وزیر سرګي لاوروف رسنیو ته د شوې موافقې په اړه وویل:
"د روسیې او سوریې پوځي واحدونه به د کردي وسله والو وتلو ته زمینه برابروي او د دوی وسلې باید د سوریې او ترکیې له ګډې پولې د سوریې دننه دیرش کیلومتره لرې وي. دا هڅې باید د چهارشنبه د شپې له دولس بجو وروسته په یوسل او پنځوس ساعتونو کې بشپړې شي."
د ماسکو او انقرې د موافقې له مخې، سر له سبا د روسیې او سوریې سرتیرې له ترکیې سره د پولې امنیت د سوریې لور ته ساتي او ترکي ځواکونه به خپل لور ته د روسانو په همغږۍ امنیت تامینوي.
د روسیې د بهرنیو چارو وزیر وایي، تمه ده چې د (وای پي جي) په نوم د سوریې کردي وسله وال د منبج او تل رفعت له ښارونو هم ووځي.
انقره له کردانو غواړي چې د دیرش کیلومترو په عرض سیمه له ترکیې سره د پولې په اوږدو تخلیه کړي.
