د افغانستان د انتخاباتو خپلواک کمېسیون مشره وايي چې لاهم هڅه کېږي چې د ولسمشرۍ د انتخاباتو لومړني نتایج د تلې په ۲۷ مه نېټه اعلان شي.
له دې مخکې په ځینو راپورونو کې ویل شوي وو چې د انتخاباتو د لومړنیو نتایجو اعلان ښايي وځنډېږي.
د ولسمشرۍ انتخابات د تلې په اوومه ترسره شول او ۱۳ کاندیدانو سیالي پکې وکړه.
احمدتکل د انتخاباتو د خپلواک کمېسیون له مشرې حوا علم نورستانۍ سره مرکه کړې او په سر کې یې ترې پوښتلي دي چې د انتخاباتو د لومړنیو نتایجو اعلان ته څومره وخت پاتې دی؟