د لاسرسۍ وړ لېنکونه

تازه خبر
دوشنبه ۲۸ سلواغه ۱۳۹۸ کابل ۰۴:۲۳

افغانستان

ولسمشر غني په هلمند کې وروستي پوځي عملیات ستایلي

د افغانستان جمهور رئیس محمد اشرف غني

د افغانستان جمهور رئیس په هلمند کې د وروستیو پوځي عملیات چې د القاعده شبکې یو بهرنی مشر په کې وژل شوی دی، ستایلي دي.

د افغانستان د ملي امنیت ادارې د اکټوبر په اتمه تأیید کړه چې د اسیا د جنوب لپاره د القاعده شبکې قوماندان عاصم عمر د هلمند په موسی کلا ولسوالۍ کې وژل شوی دی.

ولسمشر غني پرون د اکټوبر په نهمه په ارګ کې غونډې ته ویلي چې په افغانستان کې په پوځي عملیاتو کې د القاعده شبکې د نامتو قوماندانانو وژل کېدل ثابتوي چې القاعده په دې هېواد کې فعاله ده.

د ارګ په خبرپاڼه کې د ولسمشر غني په حواله لیکل شوي چې له دې انکار نه شي کېدی چې وسله وال طالبان له القاعده شبکې سره ارتباط لري.

د ورځې تازه خبرونه دلته ولولئ

د ملي اردو یوې پوځي الوتکې په نیمروز کې بېړنۍ ناسته کړې

د کندز نقشه

د افغانستان دفاع وزارت وایي چې د ملي اردو یوې پوځي الوتکې په نیمروز ولایت کې بېړنۍ ناسته کړې.

د دغه وزارت مطبوعاتي دفتر ویلي چې دا 'MD530' بېړنۍ ناسته نن له غرمې مخکې په خاشرود ولسوالۍ کې د تخنیکي ستونزې له کبله شوې.

د دغه دفتر په خبرپاڼه کې راغلي، پېښه کې یوازې پیلوټ سرسري ټپي شوی دی او دوی دغه پېښه څېړي.

ګوترش: د افغانستان د سولې لپاره فرصت باید له لاسه ورنه‌کړو

د ملګرو ملتونو عمومي منشي انتونیو ګوترش په پاکستان کې د افغان کډوالو په اړه جوړې شوې غونډې ته د وینا پر مهال.

د ملګرو ملتونو عمومي منشي ټینګار کوي چې د افغانستان د سولې لپاره رامنځته شوی فرصت باید له لاسه ونه‌وځي.

انتونيو ګوترش په پاکستان کې د افغان کډوالو په اړه جوړې شوې غونډې ته په وینا کې وویل نړیواله ټولنه، ګاونډیان او خپله افغان چارواکي باید له زړه کار وکړي چې سوله ټینګه شي.

هغه زیاته کړه: "د سولې اوسنی فرصت له لاسه نه‌شو ورکولی، موږ دا حق هم نه‌لرو چې دا موقع له لاسه ورکړو، که دا هدف ترلاسه نه‌شي، هېڅ افغان به موږ ونه‌بخښي. په اصل کې مهمه دا ده چې ټول افغان مشران او نړیواله ټولنه د امکان تر کچې کار وکړي چې سوله په واقعیت بدله کړي."

ګوترش په نړیوالو غږ وکړ چې افغانستان کې له سولې وروسته پانګونه وکړي چې پرمختګ او د کډوالو بېرته ستنېدو ته زمینه برابره شي.

نوموړي د افغان کډوالو د کوربه‌توب په برخه کې د پاکستان (مهرباني) وستایله او ویې‌ویل چې دغه هېواد افغان کډوالو ته خپلې پولې او ان د کورونو دروازې پرانیستې دي.

عبدالله: د طالبانو او امریکا ترمنځ د سولې هوکره لاسلیک ته چمتو ده

د افغان حکومت اجرائیه مشر عبدالله عبدالله

د افغان حکومت اجرائیه مشر عبدالله عبدالله وایي د طالبانو او امریکا ترمنځ د سولې هوکړه ورستۍ شوې او لاسلیک ته چمتو ده.

ښاغلي عبدالله نن د وزیرانو شورا په غونډه کې وویل د هوکړې لاسلیک په دې پورې تړلی چې په ۷ ورځو کې طالبان تاوتریخوالی کموي او که نه؟

هغه زیاته کړه: "افغانستان کې د سولې لپاره مثبت ګامونه اوچت شوي د امریکا او طالبانو ترمنځ هوکړه وروستۍ شوې ده، د هوکړې لاسلیک په دې پورې مشروط دی چې طالبان ۷ ورځو کې تاوتریخوالی کموي او که نه؟ د تاوتریخوالي داسې کمښت چې اوربند او بین‌الافغاني خبرو او تل‌پاتې سولې ته لاره هواره کړي."

که څه هم ولسمشرۍ ماڼۍ پخوا ویلي و چې د طالبانو له‌خوا د تاوتریخوالي کمول دوی ته معنی نه‌لري، خو اوس ښاغلی عبدالله وایي، دوی د تاوتریخوالي له کموالي هرکلی کوي او ګټور ګام‌یې بولي.

لوېدیځو رسنیو راپور ورکړی چې د طالبانو او امریکا ترمنځ د تاوتریخوالي د عملي کولو هوکړه سر له نن نه د عملي کېدو په حال کې ده.

دفاع وزارت: د کندز په شوره‌خاک سیمه د طالبانو برید په شا وتمبول شو

ارشیف، کندز کې د افغان ځواکونو پوځي عملیات

د افغانستان دفاع وزارت وایي چې د کندز ښار په یوه څنډه (شوره‌خاک) سیمه‌یې د طالبانو برید په شا تمبولی دی.

د دغه وزارت خبرپاڼه وایي له برید سره هم‌مهاله سیمې ته تازه دمه ځواکونه ورسېدل چې هوایي ملاتړ هم ورسره و.

په خبرپاڼه کې راغلي چې برید کې د ملي اردو پنځه سرتېري وژل شوي او درې نور ټپيان دي او د دوی په خبره طالبانو ته هم درنه مرګ ژوبله اوښتې.

د کندز د ولایتي شورا مرستیال صفي‌الله امیري بیا ازادي راډیو ته ویلي چې دې برید کې د ملي اردو ۱۵ سرتېري وژل شوي دي.

د طالبانو ویاند ذبیح‌الله مجاهد برید کې خپلو ملګرو ته د اوښتې مرګ‌ژوبلې په اړه څه نه‌دي ویلي، خو ادعا یې کړې چې ۱۹ سرتېري یې وژلي دي.

روان کال افغانستان کې له ۳۵۰ زیاتې شنې خونې جوړې شوي

ارشیف، په افغانستان کې ځینې شنې خونې، انځور تزئیني بڼه لري.

د افغانستان د کرنې او مالدارۍ وزارت وایي په روان کال کې له ۳۵۰ زیاتې وړې او غټې شنې خونې جوړې شوې دي.

د دغه وزارت ویاند اکبر رستمي وویل چې دا وړې او غټې شنې خونې د هېواد په مرکز او ولایتونو کې جوړې شوې دي.

د نوموړي په خبره، دا شنې خونې د کورنیو د اقتصادي پیاوړتیا او د کال په بېلابېلو موسمونو کې د بزګرو او برخه‌منو لپاره‌یې د خوراکي تنوع لپاره جوړې شوي چې په‌کې ډول ډول ترکارۍ کرل شوې دي.

دغه وزارت وایي چې د سترو او وړو شنو خونو جوړول په ځانګړې توګه په غیر کرنیز موسم کې د اړتیاوو د رفع کولو ترڅنګ د تولید او عرضې د زیاتېدو لامل هم ګرځېدلي دي.

د انتخاباتو خپلواک کمېسیون د رایو د یوې برخې بیاشمېرنه پیل کړې

ارشیف، د رایو شمېرنه

د افغانستان د انتخاباتو خپلواک کمېسیون وايي د ټاکنیزو شکایتونو کمېسیون پرېکړې تطبیقوي او د رایو د یوې برخې بیا شمېرنه‌یې پیل کړې ده.

د دغه کمېسیون ویاند ذبیح سادات وروسته له هغه یکشنبه ماښام دا خبرې ازادي راډیو ته وکړې چې د اجرائیه رئیس عبدالله عبدالله په مشرۍ د 'ثبات او هم‌پالنې' ټیم ویلي د ټاکنیزو شکایتونو کمېسیون د پرېکړو له نهايي کېدو پرته د رایو بیا شمېرل ورته د منلو وړ نه‌دی.

خو سادات وایي د رایو شمېرل روان دي.

هغه زیاته کړه: "د انتخاباتو خپلواک کمېسیون رسماً له هغوی (د ثبات او هم‌پالنې ټیم) غوښتي چې خپل څارونکي راواستوي څو له دې پروسې څارنه وکړي. دا چې هغوی څارونکي نه‌را استوي او همکاري نه‌کوي کمېسیون د ټاکنېزو شکایتونو د کمېسیون د پرېکړو د تطبیق لپاره مکلفه ګرځول شوی او دا پروسه روانه ده."

یکشنبه د 'ثبات او هم‌پالنې' ټیم یوه مخکښ غړي فضل احمد معنوي خبري کنفرانس کې ویلي چې د ټاکنیزو شکایتونو د کمېسیون د پرېکړو له نهايي کېدو پرته دوی ته د انتخاباتو د کمېسیون له‌خوا د رایو بیا شمېرنه د منلو نه‌ده.

د افغانستان ولسمشرۍ ټاکنې د میزان په ۶مه شوي، خو لا یې وروستۍ پایله نه‌ده معلومه.

په لومړنۍ اعلان شوې پایله کې اوسنی ولسمشر محمد اشرف غني مخکښ دی او عبدالله عبدالله دوهم مقام لري.

انتونیو ګوتریش د افغان کډوالو د کوربه‌توب لپاره پاکستان وستایه

د ملګرو ملتونو سازمان سرمنشي انتونیو ګوتریش

د ملګرو ملتونو سازمان سرمنشي انتونیو ګوتریش د میلیونونو افغان کډوالو د کوربه‌توب په خاطر پاکستان وستایه.

ګوتریش یکشنبه پاکستان ته ورسېد څو د کډوالو په برخه کې په یوه نړیوال کنفرانس کې ګډون وکړي.

هغه زیاته کړه: "د پاکستان خلکو د میلیونونه افغانانو کوربه‌توب کړی دی له هغوی سره‌یې ټول امکانات شریک کړي دي."

ګوتریش افغانستان ته له پاکستانه د افغان کډوالو په داوطلبانه ستنېدو ټينګار وکړ او د نړۍ په هېوادونو یې غږ وکړ چې له پاکستان سره په دې برخه کې مرسته وکړي او کډوالۍ لکه څنګه چې پاکستان مدیریت کړې، اداره کړي.

پاکستان کې نن دوشنبه د افغان کډوالو د کوربه‌توب د ۴۰ کاله د پوره کېدو په مناسبت نړیوال کنفرانس دایرېږي.

د ملګرو ملتونو سرمنشي انتونیو ګوتریش، د کډوالو په چارو کې د ملګرو ملتونو عالي کمېشنر فلیپو ګراندي او د افغانستان په شمول د نړۍ د څو هېوادونو چارواکي دغه کنفرانس ته ورغلي دي.

په پاکستان کې ۲ نیم میلیونه راجستر او غیر راجستر افغان کډوال اوسېږي.

قریشي: پاکستان د افغان سولې لپاره ښه اسانچاري کړې

د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر شاه محمود قریشي وايي هېواد یې د افغان سولې لپاره ښه اسانچاري کړې او پاکستان ته اوس د دې مسئلې د حل د برخې په توګه کتل کېږي.

هغه دا خبره پرون په اسلام‌اباد کې د ملګرو ملتونو له سرمنشي انتونیو ګوتریش سره په ګډ خبري کنفرانس کې وکړه.

هغه زیاته کړه: "موږ د سولې په پروسه کې کومې هڅې چې پاکستان د اسانچارۍ لپاره وکړې په هغو مو بحث وکړ او دوی یې هم تأییدوي. موږ نن د حل د برخې په توګه کتل کېږو یو وخت چې پاکستان ته د ستونزې د برخې په توګه کتل کېدل."

قریشي داسې وخت پاکستان د افغان سولې د پروسې ښه اسانچاری یادوي چې افغان حکومت‌یې لاهم له بشپړې همکارۍ ډاډه نه‌دی.

د افغانستان جمهور رئیس اشرف غني وړمه ورځ د مونیخ امنیتي کنفرانس ته ویلي چې "پرېکړه لاهم پاکستان ته پاتې ده، افغانستان صادقانه بحث غواړي چې دوه اړخه لري، یو د طالبانو د پناه‌ځایونو بندول او دوهم د سیمه‌ییز امنیت لپاره د ګډ تفاهم جوړول."

نورستانۍ: تر اوسه مو ټولې کړنې قانوني دي

د ټاکنو خپلواک کمېسیون مشره حوا علم نورستانۍ

د افغانستان ټاکنو خپلواک کمېسیون د ولسمشرۍ په ټاکنو کې له ښکیلو اړخونو وغوښتل چې د یو شمېر محلونو د رایو د بیا شمېرنې په برخه کې ورسره همکاري وکړي.

د دې کمېسیون مشرې حوا علم نورستانۍ د یک شنبې په ورځ له رسنیو سره په خبرو کې وویل چې د افغانستان خلک د دې ټاکنو وروستۍ پایله غواړي.

هغې زیاته کړه: "زموږ غوښتنه له هغو ډلو څخه چې په دې پروسه کې ښکېل دي دا ده چې د افغانستان د ټاکنو خپلواک کمېسیون په کړنو باور ولري، زه چې همدا اوس له تاسو سره خبرې کوم تر دا مهاله موږ داسې یو غیر قانوني کار نه دی کړی چې هغه د ټاکنیزو قوانینو خلاف وي، موږ له ټولو خواو غواړو چې له موږ سره ملتیا وکړي او له دې وړاندې نور په تمه نشو پاتې کیدای ددې لپاره چې موږ خپله زیان وینو."

خود ډاکټر عبدالله په مشرۍ د ثبات او همپالنۍ ټاکنیز ټیم د یوشمېر محلونو د رایو د بیا شمېر د تحریم ګواښ وکړ.

د دغې ټاکنیزې ډلې یو تن غړي فضل احمد معنوي چې د یک شنبې په ورځ یې په کابل کې د یوې خبري ناستې په ترڅ کې خبرې کولې وویل: "موږ له دې بهیر سره تر دې ځای ملتیا وکړه، که قانون پلې شي او د حق غږ واوریدل شي موږ یې مل یو ددې پروسې، که قانون عملي نشي بیا موږ له دې پروسې وځو بیا دې دغه پایلې واخلي په خلکو دې ومني له هغې وروسته چې څه پېښیږي د هغوي مسولیت دی."

د ۳۰۰ زره جنجالي رایو د یوې برخې د تفتیش بهیر بالاخره له درې ورځې ځنډ وروسته نن یکشنبې بیا ځلې پیل شو.

دغه بهیر، د تېرې اوونۍ د پنجشنبې په ورځ له هغې وروسته کله چې د ټاکنیزو شکایتونو د څېړنې کمېسیون څارونکو غونډه پرېښوده ودرول شو.

د سولې په تړاو د پکتیاوالو غوښتنې

په دې غونډه کې یو شمېر میرمنو ، ځوانانو، دیني او سپین ږېرو په یوه غږ د جګړې د ختمیدو، اوربند او د سولې د هوکړې د ژر لاسلیک غوښتنه وکړه.

د پکتیا اوسیدونکي او مدني فعالانو نن د یوې غونډې پر مهال د چې د سولې او اوربند څخه د ملاتړ په موخه جوړه شوې وه، وویل، چې د سولې په روانو خبرو کې دې د افغانانو کمه ونډه دې زیاته او د سولې د توافق لیک پر مهال دې له نړیوالې ټولنې او په افغانستان د ننه له ټولو ډلو او سیاسیي ګوندونو کلک تضمین واخېستل شي، چې بیا به د قدرت او نورو اهدافو لپاره جنګ او تاوتریخوالی نه کوي.

په دې غونډه کې یو شمېر میرمنو ، ځوانانو، دیني او سپین ږېرو په یوه غږ د جګړې د ختمیدو، اوربند او د سولې د هوکړې د ژر لاسلیک غوښتنه وکړه.

داکټر نازدانه پکتیاوال په خپلو خبرو کې وویل، چې د هغې سولې هرکلی کوي، چې د ښځو حقونه پکې ساتل شوي وي.

هغې زیاته کړه: "موږ اوربند غواړو، سوله غواړو ژر یې غواړو او دایمي اوربند غواړو، د افغانستان خلک نور له جنګ ستړي شوي دي او افغانستان خلک د ملي او د نورو هېوادونو د فیصلې په اساس تضمین شوې سوله غواړي."

د غونډې نورو برخه والو بیا له نړیوالې ټولنې وغوښتل، چې له افغانستان په مسولانه ډول ووځي او هم په هېواد د ننه له ټولو ډلو او سیاسي ګوندونو کلک تضمین واخلي، څو بیا د قدرت او نورو اهدافو لپاره جګړې او تاوتریخوالي ته مخه نه کړي.

په پکتیا کې له هغه وروسته ، چې د امرېکا د متحده ایالاتو د بهرنیو چارو وزیر د سولې په خبرو اترو کې د پام وړ پرمختګ خبره وکړه، ورسره هم مهاله د ډېرو افغانانو هیلې یوځل بیا د سولې په لور ور ماتې شوې.

ټاکنو کمېسیون په ۴ ولایتونو کې د رایو بیا تفتیش پیل کړ

ارشیف

که څه هم د ټاکنیزو ډلو له‌خوا د استېنافي شکایتونو په اړه د ټاکنیزو شکایتونو کمېسیون له پرېکړې نږدې دوه اوونۍ تېرېږي، خو اوس د ټاکنو خپلواک کمېسیون وايي، په ۴ ولایتونو کې د رایو تفتیش پیل شوی دی.

د دې کمېسیون یو ویاند ذبیح الله سادات د یکشنبې په ورځ ازادي راډیو ته وویل، سرپل، هلمند، کندهار او کابل هغه ولایتونه دي چې د رایو بیا تفتیش په کې پیل شوی دی.

هغه زیاته کړه: "موږ خپله وروستۍ هڅه کوو چې هر څومره ژر کېږي، دا بهیر پای ته ورسېږي، مګر بیا هم د ټاکنیزو شکایتونو کمېسیون، ټاکنیزو ډلو او پر ټاکنو د څار بنسټونو همکارۍ ته اړتیا ده، څو له دې پروسې څارنه وکړي. "

د ټاکنیزو شکایتونو کمېسیون نږدې اوونۍ وړاندې خپله پرېکړه د عملیاتي پلان د چمتو کولو لپاره د ټاکنو خپلواک کمېسیون ته وسپاره.

د ټاکنیزو شکایتونو کمېسیون د پرېکړې پر بنسټ، د ۱۳۷۶۳۰شکمنو رایو څخه ۱۰ سلنه او د ۱۰۲۰۱۲ له وخته د مخکې کارول شویو رایو ۱۵ سلنه په ځانګړي ډول تفتیش کېږي.

دا په داسې حال کې ده چې له دې وړاندې هم د ۳ سوه زره جنجالي رایو په اړه د ټاکنیزو ډلو او د ټاکنو خپلواک کمېسیون ترمنځ ستونزې را پورته شوي او یو شمېر ټاکنیزو ډلو د دې رایو د باطلېدو غوښتنه کړې.

بل‌خوا د دولت جوړونکي ټاکنیز ټیم یو ویاند رضوان مراد وايي، دوی د ټاکنیزو کمېسیونونو له هر ډول پرېکړې ملاتړ کوي او د دوی څارونکي عملا د رایو د بیا تفتیش بهیر څاري.

خو د ثبات او هم‌پالنې ټاکنیزې ډلې بیا دا بهیر تحریم کړی دی او ویاند یې فریدون خوځون ازادي راډیو ته وویل، دوی به د رایو د بیا تفتیش بهیر کې ګډون و نه وکړي.

ښاغلی ځوخون وايي، تر کومه چې د ټاکنیزو شکایتونو کمېسیون په ګډون ټول ښکېل لوري په دې بهیر کې ګډون و نه کړي، دوی د رایو د بیا تفتیش له بهیر څخه څارنه ونه کړي.

د ټاکنو کمېسیون د ټولو لوریو ګډون مهم ګني خو وايي، که کومه ټاکنیزه ډله په کې اشتراک و نه کړي، دا پروسه به په عادي ډول مخ‌ته ولاړه شي.

په ورته وخت کې د ټاکنیزو شکایتونو کمیسیون هم له دې بهیر څخه د څارنې خبر ورکوي.

دغه راز د افغانستان د رڼو ټاکنو بنسټ اجراییه رییس محمد نعیم ایوب‌زاده بیا وايي، د ټاکنو کمېسیون باید هر څه ژر دا بهیر بشپړ او د ولسمشرۍ ټاکنو وروستۍ پایله اعلان کړي.

افغان لوبغاړی امرالدین د قرغزستان نفتچي لوبډلې سره یو ځای شو

آرشیف

افغان لوبغاړی امرالدین شریفي د قرغزستان د نفتچي فوټبال لوبډلې سره یوځای شو.

د افغانستان د فوټبال فدراسیون مطبوعاتي مرستیال شمس امیني نن ازادي راډيو ته وویل چې دغه لوبغاړي د قرغزستان له نفتچي ټيم سره یو کلن تړون کړی.

د اسیا د مقدماتي جام په دویمه مرحله د نفتچي ټيم د چهارشنبې په ورځ د تاجکستان له خجند ټيم سره لوبېږي.

امرالدین شریفي تردې وړاندې دوه کال د قزاقستان له الي اوش لوبه وکړه.

پاکستان ته د افغانستان د ګلف ملي لوبډلې سفر

آرشیف

د افغانستان د ګلف ملي لوبډله نن پاکستان ته لاړه.

د افغانستان د المپیک ملي کمیټې مطبوعاتي غړي مجیب قاري زاده نن ازادي راډيو ته وویل، چې د ګلپ څلورکسیزه ټيم د ګلف په اماتور تورنمنټ کې د ګډون په هدف نن پاکستان ته سفر وکړ.

دغه سیالۍ د فبرورۍ په ۱۶ د پاکستان د ګلف فدراسیون په کوربه توب پیلېږي.

د ګلف فدراسیون مسوولینو د معلوماتو پربنسټ په دغو لوبو کې د افغانستان سربېره د پاکستان او د سیمې د هېوادونو نور ټيمونه هم لوبیږي.

تخار کې ۶۰۰ کورنیو سره مرسته شوې

ارشیف

د تخار ولایت سیمه ییز چارواکي وايي، د ناامنیو او جګړو له امله په زیانمنو شویو څه باندې ۶۰۰ کورنیو یې خوراکي او غیر خوراکي مرستې وېشلي دي.

په تخار کې یوشمېر کورنې شکایت کوي، په روان کال کې د جګړو له امله د دوی د استوګن کورونه تخریب شوي او اوس دومره توان نلري چې خپل وران شوي کورونه بېرته ورغوي.

د دې ولایت د خواجه غار ولسوالۍ اوسېدونکي عبدالغفور په دې اړه وايي: "له موږ سره یو اندازه د خوراکي او غیر خوراکي توکو مرسته شوي ده، خو له حکومت څخه غواړو چې له موږ سره مالیې مرسته وکړي ترڅو خپل وران شوي کورونه بېرته جوړ کړو، ځکه د جګړو له کبله زموږ کورونه په بشپړه توګه وران شوي دي."

دوی وايي، چې شوي مرستې په هیڅ ډول کافي نه دي.

بل خوا د تخار سیمه ییزو چارواکي وايي، د سروې ټېمونو د جګړو او طبیعي پېښو له امله په دغه ولایت کې څه باندې ۶۰۰ زیانمنو او اړمنو کورنیو په نښه کړي وې او پرهرې کورنې ۱۵ قلمه خوراکي او غیر خوراکي توکي وېشلې دي.

په نوموړې ولایت کې له طبیعې پېښو سره د مبارزې ادارې رئیس فرید نیکپور وايي، دوی په دې اړه هڅې پیل کړي چې د مرسته کوونکو موسساتو په همکارۍ د زیانمنو شویو خلکو کورونه بېرته ورغوي.

په روان کال کې د تالقان ښار نږدې څنډې او دغه راز د دې ولایت لس ولسوالۍ د خونړیو جګړو شاهدې وي.

د تخار د سیمه ییزو چارواکو په وینا، چې د دغو جګړو له کبله په زرګونه کورنۍ له خپلو سیمو څخه بې ځایه شوي وې او ډېرې دغه کورنۍ د امنیتي ګواښونو له کبله تراوسه پورې خپلو مېنو ته نه دې ستانه شوي.

چارواکي: سږني اورښتونه د سمسورتیا لپاره ښه زیری دی

ارشیف

د اوبو او انرژۍ وزارت وايي، د سږکال زیات اورښتونه د کال د سمسورتیا لپاره ښه زیری دی.

د افغانستان د اوبو او انرژۍ وزارت ویاند احمد سیر نیکزاد بیا یکشنبې ازادي راډیو ته وویل، چې د سږکال وروستي اورښتونه کولی شي د راتلونکي کال لومړیو کې د اوبو کچه به ټول افغانستان کې لوړه شي.

هغه زیاته کړه: "د سږکال اورښتونو ته په کتو ویلی شو چې راتلونکی کال لومړیو کې به د ځمکي لاندې او په سر د اوبو کچه لوړه شي خو تراوسه پورې نشو ویلی چې راتلونکی کال به د اوبو سطحه څومره لوړه شي."

خو دغو اورښتونو سږ کال د هېواد په یو شمېر سیمو کې درانه مالي او ځاني زیانونه هم درلودل.

نور راوښيه

XS
SM
MD
LG