د لاسرسۍ وړ لېنکونه

تازه خبر
سه شنبه ۶ غبرګولی ۱۳۹۹ کابل ۰۹:۴۲

افغانستان

په امریکا کې افغان سفیره: بریدونه د سولې د خبرو اعتبار ته زیان رسوي

په واشنګټن کې د افغانستان سفیره رویا رحماني

په واشنګټن کې د افغانستان سفیره وايي، د طالبانو خونړي بریدونه د سولې د خبرو اترو اعتبار ته زیان رسوي.

رویا رحماني د چهارشنبې په ورځ د روېټرز خبري اژانس سره په مرکه کې ویلي، د افغانستان په بېلابېلو سیمو کې د طالبانو په بریدونو کې زیاتوالی د دې سبب کېږي چې عام افغانان د امریکا او طالبانو ترمنځ د سولې پر روانو خبرو باور له لاسه ورکړي.

مېرمن رحماني زیاتوي، په داسې حال کې چې طالبان وايي د سولې له لارې د جګړې پای ته رسول غواړي، د دې درک ستونزمن دی چې بیا ولې د خلکو وژنو ته دوام ورکوي.

په واشنګټن کې افغان سفیره رویا رحماني چې په رسنیو کې کمه څرګندېږي، دا خبرې وروسته له هغې کوي چې د چهارشنبې په ورځ وسله والو طالبانو په کابل کې یو خونړی او ویجاړوونکی برید ترسره کړ چې لږترلږه ۱۴ کسان یې ووژل او له ۱۴۵ تنو زیات نور یې ټپیان کړل.

په وژل شویو او ټپیانو دواړو کې د ښځو او ماشومانو په شمول لسګونه عام وګړي شامل دي.

په واشنګټن کې افغان سفیرې د روېټرز خبري اژانس ته وړاندې ویلي، د طالبانو وروستي بریدونه د دې څرګندوی دي چې دا ډله غواړي پر داسې خونړیو بریدونو د خبرو اترو پر مېز زیات امتیازات ترلاسه کړي او یا د افغانستان پر زیاته خاوره واک ټینګ کړي.

په عین حال کې د افغانستان د سولې لپاره د واشنګټن ځانګړي استازي زلمي خلیلزاد د کابل له پرونۍ حملې وروسته پر خپل ټوېټر لیکلي، په داسې حال کې چې د سولې داسې بین الافغاني خبرو ته نږدې شوي چې د دایمي اوربند او د کړکېچ د سیاسي هواري لپاره به لاره هواره کړي، د تاوتریخوالي پر سمدلاسه کمولو باید تمرکز وشي.

د ورځې تازه خبرونه دلته ولولئ

ایران د افغانانو د ډوبېدو پېښې د څېړنې پایله افغان لوري سره شریکوي

هریرود سیند کې د دوو ډوب شویو افغانانو مړي.

ایران وایي، د ثور میاشتې د ۱۳مې نېټې د پېښې په اړه‌یې د افغانستان حکومت د اسنادو څېړنه کړې او نتیجه به‌یې له افغان لوري سره شریکه کړي.

د ایران د بهرنیو چارو وزارت د مرستیال محسن بهاروند په مشرۍ ایراني پلاوي نن دا خبره د افغانستان د بهرنیو چارو له وزیر محمد حنیف اتمر سره په کابل کې د لیدو پر مهال وکړه.

د ثور په ۱۳مه تر ۵۰ ډېر افغانان چې په غیر قانوني ډول ایران ته اوښتل له ادعا سره سم د ایران د سرحدي ځواکونو له لوري مجبوره شول چې هریرود سیند ته ځانونه واچوي.

له دې کسانو محدود شمېر وژغورل شول او د یو شمېر کډوالو مړي تر اوسه نه‌دي ترلاسه شوي.

فاریاب کې چاودنې د طالبانو د یوه قوماندان د کورنۍ ۵ غړي وژلي

د فاریاب نقشه

۲۰۹ شاهین قول اردو وایي، په فاریاب کې د ماین چاودنې د طالبانو د یوه قوماندان د کور پنځه غړي وژلي دي.

د دې قول اردو په خبرپاڼه کې چې نن خپره شوه، راغلي چې دا پېښه تېره شپه د پشتونکوټ ولسوالۍ په تیلان کلي کې د قوماندان محمد ظاهر په کور کې ماین چاودلی چې د ده مېرمن، دوه زامن او دوه لوڼې یې وژلې دي.

قوماندان محمد ظاهر له دې پېښې روغ پاتې شوی. طالبانو د دې چاودنې په اړه تر اوسه رسنیو ته څه نه‌دي ویلي.

افغانستان کې د اوربند پر تمدید د بشري حقونو کمېسیون ټینګار

ارشیف،د افغانستان حکومت او طالبانو ترمنځ په ۱۳۹۷ کال کې اوربند

د افغانستان بشري حقونو خپلواک کمېسیون مشرې په افغانستان کې د اوربند د تمدید غوښتنه وکړه.

شهرزاد اکبر نن په ټویټر کې لیکلي دي چې 'اوربند تمدید کړئ، د خلکو ژوند وژغورئ ترڅو ټول تمرکز پر سولې وشي.'

د افغانستان د بشر حقونو خپلواک کمېسیون ویاند شکرالله مشکور پرون ازادي راډیو ته د سولې د هڅو په ترڅ کې د زندانیانو د ازادۍ په اړه اندېښنه ښکاره کړه او ویې‌ویل: "د دغو بندیانو معلومات باید له ولس سره، د بشري حقونو له خپلواک کمېسیون او نورو ادارو سره شریک شي ترڅو هغه بندیان چې جنګي مجرمین دي د هغوی په برخه کې محتاطانه برخورد وشي."

د فبرورۍ د ۲۹مې نېټې د سولې له مخې چې د قطر په پلازمېنه دوحه کې د امریکا او طالبانو ترمنځ وشوه، افغان حکومت باید تر پنځه زره پورې طالبان له زندانونو ازاد کړي او طالبان نږدې زر تنه حکومتي کسان له بنده خوشې کړي.

کندهار کې ماین چاودنې د یوې کورنۍ ۴ غړي وژلي او ۲ ټپيان دي

کندهار کې ماین چاودنه کې ویجاړ شوی موټر

د کندهار په میانشین ولسوالۍ کې د ماین چاودنې د یوې کورنۍ څلور غړي ووژل.

په پېښه کې دوه نور کسان ټپیان شوي هم دي.

د کندهار د والي ویاند احمد بهیر احمدي ازادي راډیو ته وویل، دغه کسان له میانشین څخه د ارزګان مرکز ترینکوټ ته روان وو چې موټر یې د سړک غاړې پر ماین وربرابر شو.

ښاغلی احمدي زیاتوي: "په دې پېښه کې یوه مور، دوې ماشومې لوڼې او یو ماشوم زوی ورسره وو چې څلور واړه وژل شوي دي. د موټر چلوونکی او د کورنۍ سرپرست ټپیان شوي او په ټپي حالت ارزګان ته لېږدول شوي دي."

تر اوسه د دې ماین چاودنې مسؤلیت چا نه‌دی منلی.

ملکيانو ته دا مرګ‌ژوبله په داسې حال کې اوړي چې وسله‌والو طالبانو او حکومت د کوچني اختر په مناسبت درې ورځنی اوربند اعلان کړی دی.

ملي امنیت شورا: تېرو دوو ورځو کې نافذ شوی اوربند تر ډېره رعایت شوی

ارشیف، ۱۳۹۷ کال کې د افغان حکومت او طالبانو اوربند

د افغانستان ملي امنیت شورا وايي د اختر په تېرو دوو ورځو کې نافذ شوی اوربند تر ډېره رعایت شوی دی.

طالبانو او حکومت د کوچني اختر په درېیو ورځو کې د اوربند اعلان وکړ چې نن‌یې درېیمه ده.

د ملي امنیت شورا ویاند جاوېد فیصل د فرانسې خبري اژانس ته وویل، اوربند نافذ دی او د کوم تاوتریخوالي راپور نه‌دی ورکړل شوی.

خو په تېرو دوو ورځو کې د افغانستان له ځینو برخو د ناامنیو د ځینو پېښو راپورونه ورکړل شوي دي.

یوه پېښه د طالبانو د اوربند د اعلان په درشل کې د لغمان په علیشنګ ولسوالۍ کې د اختر په شپه پر یوه کور د هاوان لګېدل وو چې په پېښه کې ۴ کسان مړه او ۷ نور ملکیان ټپیان شوي وو.

د سولې ولسي حرکت د افغان حکومت او طالبانو د اوربند هرکلی وکړ

ارشیف، د سولې ولسي حرکت یو شمېر غړي

د سولې ولسي حرکت د اختر په ورځو کې د طالبانو او حکومت د درې ورځني اوربند هرکلی وکړ.

خو دغه حرکت غوښتنه لري چې د افغان-وژنې د مخنیوي لپاره دې د جګړې ښکېل اړخونه دایمي اوربند وکړي.

د سولې ولسي حرکت ویاند بسم‌الله وطندوست پرون ناوخته ازادي راډیو ته وویل: "غوښتنه مو دا ده چې دغه اوربند باید تل‌پاتی شي او پسې وغځول شي. ځکه په جګړه کې یوازې او یوازې افغانان وژل کېږي. هیله مو دا ده چې افغان مشران د خواخوږۍ له مخې د هېواد د سوکالۍ لپاره، د راتلونکي نسل د خپلواکۍ او ژغورنې لپاره سره یوځای شي. دغه اوربند په دایمي اوربند بدل کړي."

د وسله‌والو طالبانو او حکومت ترمنځ اعلان شوی درې ورځنی اوربند نن پای ته رسېږي.

دواړو لورو په ۲۰۱۸م کال کې هم د کوچني اختر پر مهال درې ورځنی اوربند کړی و چې ګڼو رهبرانو او سازمانونو یې هرکلی کړی و.

افغانستان کې د کرونا ویروس د مثبتو پېښو شمېر ۱۱،۱۷۳ ته ورسېد

ارشیف

د افغانستان عامې روغتیا وزارت وایي په تېرو ۲۴ ساعتونو کې په دې هېواد کې ۵۹۱ کسان په کرونا ویروس اخته شوي دي.

د دغه وزارت د معلوماتو له مخې په دې سره په افغانستان کې د کرونا ویروس د مثبتو پېښو شمېر ۱۱ زره او ۱۷۳ تنو ته ورسېد.

په هغه پیغام کې چې د افغانستان عامي روغتیا وزارت نن دوشنبه رسنیو ته استولی راغلي چې تېره ورځ ۱،۰۹۵ لابراتوار ټسټونه ترسره شول چې په همدې تېرو ۲۴ ساعتونو کې یو کس له 'کووېډ-۱۹' ناروغۍ څخه مړ شوی دی.

له دې ناروغۍ څخه په افغانستان کې ۲۱۹ تنه مړه شوي دي.

په داسې حال کې چې دا ویروس په چټکۍ په افغانستان کې د خورېدو په حال کې دی د عامې روغتیا وزیر فېروزالدین فېروز ټینګار کوي چې که هېوادوال د کرونا ناروغي جدي ونه‌ګڼي، انساني ناورین به رامنځته شي.

اشرف غني: پومپيو وويل چې د طالبانو د اوربند په اوږدولو به فشار راوړي

افغان ولسمشر محمد اشرف غني

افغان ولسمشر محمد اشرف غني وايي د امریکا بهرنيو چارو وزیر مايک پومپيو ورته ويلي چې د طالبانو د اوربند په اوږدولو به فشار راوړي.

ولسمشر غني نن د مې په ۲۵مه، پر ټويټر ليکلي چې پومپيو ده او د ملي پخلاینې شورا مشر ډاکتر عبدالله سره په ټيليفوني خبرو کې وويل چې امريکا به د تشدد کمولو او د بین‌الافغاني خبرو په ترسره کېدو ټينګار وکړي.

د دې دمخه د امریکا د بهرنیو چارو وزیر د افغان حکومت له‌خوا د ۲،۰۰۰ طالب بندیانو د خوشې کولو اعلان ستايلی دی.

د دغه دوه زرو بنديانو د خوشې کېدو لړۍ نن د ۱۰۰ طالبانو په خلاصولو پیل شوه.

په همدې حال کې د امریکا د ملي امنیت شورا ویلي چې د سیاسي روغې جوړې لپاره د افغانانو ترمنځ مخامخ خبرې د سولې پر لور تر ټولو غوره لاره ده.

دغې شورا پر خپله ټویټر پاڼه نن دوشنبه د بین‌الافغاني خبرو د پیلېدو په نیت د ولسمشر غني له‌خوا د طالب بندیانو د خوشې کېدو پرېکړه ستایلې ده.

تر دې مخکې افغان حکومت ۱،۰۰۰ او طالبانو نږدې ۲۵۰ بنديان خوشې کړي دي. افغان حکومت او طالبانو د اختر لومړۍ درې ورځې د مې له ۲۴مې څخه د مې تر ۲۶مې پورې اوربند اعلان کړی دی.

د امريکا او طالبانو ترمنځ د سولې په تړون کې راغلي وو چې افغان حکومت به ۵،۰۰۰ او طالبان به ۱۰۰۰ بنديان خوشې کوي. د طالبانو وياند سهیل شاهين د مې په ۲۴مه پر ټويټر د ۲،۰۰۰ نورو بنديانو خوشې کېدو هرکلی کړی او غوښتنه‌یې کړې چې د شوې موافقې ترمخه دې ټول پنځه زره بنديان خوشې شي.

جلال‌اباد کې د تېلو په یو پمپ کې اور لګېدو ۲ تنه وژلي او ۸ ټپیان دي

د ننګرهار نقشه

د جلال‌اباد ښار د څلورمې ناحیې اړوند د شیشم باغ په سیمه کې نن له غرمې وړاندې د تېلو په یوه پمپ سټېشن کې اور لګېدنې دوه تنه ووژل او اته نور ټپیان کړل.

د ننګرهار د والي ویاند عطاالله خوګیاڼي ازادي راډيو ته وویل د پېښې له ځایه د ننګرهار سیمه‌ییز روغتون ته ۱۰ ټپیان وروړل شوي وو چې په خبره یې دوو تنو یې د سختو ټپونو له امله ساه ورکړه.

ښاغلی خوګیاڼی وایي چې ټپیان په روغتون کې تر درملنې لاندې دي، خو په خبره‌یې چې وضعیت‌یې د اندېښنې وړ دی.

خوګیاڼی زیاتوي چې پېښه په یوه موټر کې د ګازو د اچولو پر مهال رامنځته شوې ده.

کورنیو چارو وزارت: خلک د اختر په ورځو کې هم بشپړ قرنطین نه‌مراعتوي

د اختر په لومړۍ ورځ د کابل یوې سیمه ولاړ امنیتي ځواکونه.

د کابل ښار یو شمېر اوسېدونکي وايي، د اختر په ورځو کې يې قرنطین مراعات کړی او خپلو خپلوانو او دوستانو ته‌یې د ټیلیفون او ټولنیزو رسنیو له لارې اختر مبارکي ویلې.

خو د افغانستان کورنیو چارو وزارت وايي، خلک لا هم په دې برخه کې مرسته نه‌کوي او قرنطین‌يې به بشپړ ډول نه‌دی مراعت کړی.

د دغه وزارت ویاند طارق ارین په دې برخه کې خلک پړ ګني او وايي: "دا یوازې د پولیسو دنده نه‌ده دا د ټولو مسؤلیت دی ځکه لا هم کرونا ویروس له‌منځه نه‌دی تللی، نو ځکه خو د کرونا ویروس د لا خپرېدو د مخنیوي په برخه کې د خلکو مرسته ډېره زیاته مهمه ده او له دې غیر که دا مسئله عادي ونیول شي، نو زه په ډاډ سره ویلی شم چې یو انساني ناورین به رامنځته شي او بیا به‌يې مسؤلیت د هغه خلکو په غاړه وي چې دا مسئله ورته عادي ښکاري."

د افغانستان د عامې روغتیا وزارت د معلوماتو مخې په تېرو ۲۴ ساعتونو کې د ۱،۰۹۵ کسانو ټسټونه شوي چې له نیمايي زیات ۵۹۱ په کرونا ویروس اخته پېژندل شوي دي.

په دې سره په ټول افغانستان کې په کرونا ویروس د اخته شویو کسانو شمېر ۱۱،۱۷۳ تنو ته ورسېد چې له دې شمېر تر اوسه ۱،۰۹۷ بېرته روغ شوي او ۲۲۰ بیا مړه شوي دي.

د افغانستان عامې روغتیا وزارت له اختر مخکې له خلکو غوښتي و چې د کرونا ویروس د لا خپرېدو د مخنیوي په هدف د اختر په ورځو کې بشپړ قرنطین په جدي ډول په پام کې ونیسي او خپلو خپلوانو او دوستانو کره له تګ ډده وکړي.

د افغانستان د کورنیو چارو وزارت هم اعلان کړی و چې په دې برخه کې جدي دي.

مسعود اندرابي: د طالبانو هر عمل ته عکس‌العمل ښیو

د افغانستان کورنیو چارو سرپرست وزیر مسعود اندرابي لوګر کې ځانګړو پولیسو ته د وینا پر مهال.

د افغانستان د کورنیو چارو سرپرست وزیر محمد مسعود اندرابي وايي که وسله‌وال مخالفین سوله غواړي افغان امنیتي ارګانونه‌یې چمتووالی لري او که د جنګ لار مخته وړي دوی یې هم په وړاندې درېږي.

هغه دا خبرې پرون په لوګر کې د ځانګړو پولیسو د قطعې له سرتېرو سره په لیدنه کې وکړې.

هغه زیاته کړه: "که دوی سوله غواړي نو موږ یې مراعات کوو او که د افغانستان د خلکو دښمنان جنګ کوي، نو موږ یې مقابله کوو او کلک ځواب ورکوو. لکه څنګه مو چې په تېرو ۱۸ کلونو په تېره بیا به په همدې وروستۍ روژه کې چې دوی خپلې حملې ډېرې کړې وې ځواب ورکړ او موږ کلکه مرګ‌ژوبله ورته واړوله. له دې وطن، خلکو او ملکي تأسیساتو موږ دفاع وکړه او ان‌شاءالله دا به ادامه کوي."

افغان حکومت وايي چې طالبانو ته د دوی د سولې او خبرو وړاندیز له کمزوري نه، بلکې له یوه پياوړي دریځه کوي او هدف‌یې یوې دایمي سولې او اوربند ته رسېدل دي.

د افغانستان د کورنیو چارو وزیر دا څرګندونې داسې وخت وکړې چې لومړی طالبانو او بیا افغان حکومت د همدې کوچني اختر په ورځو د اوربند اعلان کړی دی.

لوګر کې وسله‌والو طالبانو یو شمېر خلک وهلي او ټپیان کړي

د لوګر ولایت نقشه

د لوګر ولایت په سرخاب کې پرون وسله‌والو طالبانو یو زیات شمېر ولسي خلک وهلي چې له ډلې یې اووه کسان سخت ټپيان شوي.

سرخاب د افغانستان د جمهور رئیس محمد اشرف غني پلارنی ټاټوبی دی چې ډېره برخه‌یې د وسله‌والو طالبانو په کنټرول کې ده.

د سرخاب د کلي ځینو اوسېدونکو چې نه‌غواړي نومونه‌یې واخیستل شي ازادي راډیو ته وویل د دوی کلیوال د درې په نوم د طالبانو تر کنټرول لاندې سیمې ته ورغلي و څو له طالبانو وغواړي چې د دوی ملا امام ورخوشې کړي، خو هغوی یې ووهل او ټپیان‌یې کړل.

د طالبانو ویاند ذبیح‌الله مجاهد هم ازادي راډیو ته په یوه پيغام کې پېښه تأیید کړې، خو ویلي یې دي چې ځینو اربکیانو (محلي پولیسو) د پوستو د جوړولو هڅه کوله او د دوی تر کنټرول لاندې سیمې ته ورغلي و چې تر لنډې نښتې وروسته بېرته په شا شول.

تخار کې د ۲ قوماندانانو ټوپکوالو نښته کې ۱۰ تنه کسان وژل شوي

د تخار نقشه

د تخار سیمه‌ییز چارواکي وايي چې یکشنبه په کلفګان ولسوالۍ کې د دوو غیر مسؤله قوماندانانو ټوپکوالو نښته کړې او د یو بل لس کسان‌یې سره وژلي دي.

د تخار د والي ویاند محمد جواد هجري په دې اړه ازادي راډیو ته وویل: "د شیر علي او مهدي په نوم دوو غیر مسؤله وسله‌والو قوماندانانو سره نښته کړې. په ډزو کې د دواړو خواو ۱۰ کسان وژل شوي چې قوماندان مهدي هم په‌کې شامل دی. پنځه نور کسان ټپیان دي."

ښاغلي هجري وویل چې پولیسو ځانونه د پېښې ځای ته ورسول او نښته‌یې غلې کړه او هڅه کوي چې مجرمین ونیسي.

د دې پېښې اصلي علت لا نه‌دی په ډاګه، خو د راپورونو په اساس په شمال کې اکثر غیر مسؤل قوماندانان داسې نښتې په سیمه کې په یو بل د برترۍ او په قاچاق او غلاوو کې په نه‌جوړ راتلو سره کوي چې په‌کې تر دوی زیات ملکیانو ته تاوان اوړي.

پر بګرام هوايي اډه د توغندیو برید شوی

هغه موټر چې توغندي په کې ځای پرځای شوي وو او بګرام اډه یې هدف ګرځولې وه.

د بګرام پر هوايي اډې نن له غرمې مخکې د توغندیو برید وشو.

د راپورونو له مخې دوه بي ام یو ډوله توغندي چې په یوه موټر کې ځای پرځای شوي وو، شاوخوا یوولس بجې د بګرام پر هوايي اډې چې د نړیوالو ځواکونو لوی مرکز پکې دی، وتوغول شول.

په پروان ولایت کې د امنیتي ځواکونو د همغږۍ د مرکز قوماندان الوزي احمدي د دې خبر د تایید ترڅنګ آزادۍ راډیو ته وویل چې دا توغندني بګرام اډې ته نژدې راپرېوتي دي او تلفات نه لري.

د دې حملې مسوولیت تر اوسه کومې ډلې نه دی منلی.

چارواکي: غزني کې دوو پېښو ۷ تنو ملکیانو ته مرګ ژوبله اړولې

ارشیف

چارواکي وايي، په غزني کې دوو پېښو کې ۷ تنه ملکیانو ته مرګ ژوبله اوښتې ده.

د غزني ولایت په قره باغ ولسوالۍ کې په یو کور د هاوان د مرمۍ د لګېدو په ترڅ کې ۵ ماشومانو ته مرګ ژوبله اوښتې.

د ولایت ویاند وحیدالله جمعه زاده د یکشبې په ورځ ازادي راډیو ته وویل: "د غزني ولایت قره باغ ولسوالۍ د موشکي په سیمه کې پر یو کور د هاوان مرمۍ د لګيدو له امله یو ماشوم وژل شوی او ۴ نور ټپیان دي، په ټپیانو کې هم د دوو تنو حالت د اندېښنې وړ دی."

ښاغلي جمعه زاده زیاتوي، د غه پېښه تېره شپه ناوخته هغه مهال رامنځته شوې ده.

جمعه وویل، د دې ترڅنګ نن سهار د غزني په مقر ولسوالۍ کې د امنيتي سرتېرو په یوه هدیره کې وسله والو درې کړۍ ماینونه ځای پر ځای کړي وو چې یوه یې چاودنه کړې او دوه ملکي کسان یې ټپیان کړي دي.

د هغه په خبره، دوه نور یې د امنیتي ځواکونو له لوري شنډ شوي دي.

وسله والو طالبانو تر دې مهاله په دې اړه څه نه دي ویلي.

جمعه زاده وایي، د دغه ولایت د مقر ولسوالۍ په لړمه سیمه کې وسله والو طالبانو د دولت په اکمالاتي موټریز کاروان برید کړی، چې له کلک غبرګون سره مخ شوي.

هغه زیاتوي، په دغه برید کې کوم لوري ته زیان نه دی اوښتی.

نور راوښيه

XS
SM
MD
LG