د لاسرسۍ وړ لېنکونه

تازه خبر
شنبه ۱۰ غبرګولی ۱۳۹۹ کابل ۰۶:۵۸

نړۍ

ټرمپ د ډله‌ییزو وژنو عاملینو ته د اعدام سزا د قانون غوښتنه وکړه

د امریکا ولسمشر ډونالد ټرمپ

د امریکا ولسمشر دونالد ټرمپ وایي د عدلیې وزارت څخه د داسې قانون د وړاندې کولو غوښتنه کوي چې د لویو جرمونو او ډله‌ییزو وژنو عاملینو ته د اعدام سزا ورکړل شي.

ډونالد ټرمپ د اګسټ پر ۵مه له سپینې ماڼۍ څخه په یوې ټلوېزیوني وینا کې دا خبره وکړه.

ښاغلي ټرمپ وویل: "نن زه د عدلیې وزارت ته وایم چې داسې قانون وړاندې کړي چې له مخې یې هغه کسان چې کرکجن جرایم او ډله‌ییزې وژنې کوي، د اعدام سزا وویني او دا چې دغه سزا باید ژر تر ژره او پرته له کلونو غیر ضروري ځنډه عملي شي."

ولسمشر ټرمپ د تکزاس او اوهایو د وروستیو پېښو په غبرګون کې وویل چې په امریکا کې کرکه ځای نه‌لري.

د امریکا د تکزاس او اوهایو ایالتونو په دوو مرگونو پېښو کې لږ تر لږه ٢٩ تنه ووژل شول او ٢۴ تنه ټپیان شول.

یو بریدگر د پیښې پر وخت ووژل شو او د بلې پېښې بریدګر پولیسو ونیو.

د تکزاس څارنوال ویلي دي چې مجرم ته‌یې د مرگ سزا غوښتې ده.

د ورځې تازه خبرونه دلته ولولئ

تاجکستان کې پر یوه خبریال بریدونه شوي

عبدالله غربتي

په تاجکستان کې په یوه خبریال باندې دوه وار په وروستیو څو ورځو کې بریدونه شوي.

عبدالله غربتي د اشیا پلس په نوم یوه ازاد خبري اژانس ته کار کوي چې وروستي کارونه یې په تاجکستان کې د ځمکې د ښووېدو په پېښه باندې د راپورونو جوړول و.

عبدالله غربتي ازادي راډیو ته ویلي چې دریو کسانو نن جمعه پرې لاس پورته کړی او تورن کړی یې دی چې دی خلک پاروي.

غربتي په ختلون سیمه کې د ځمکې ښوویدو په هغې پېښه راپور جوړ کړی و چې پکې دوه کسان مړه شوي و.

دری اوونۍ مخکې هم عبدالله غربتي په پلازمینه دوشنبه کې وهل شوی و او وايي چې له بېلابېلو ځایونو ورته ګواښوونکي پیغامونه لېږل کېږي.

په تاجکستان او په ټوله منځنۍ اسیا کې خبریالان په خپلواکه توګه خبرونه او راپورونه نه شي جوړولای او تل په داسې چارو کې له خنډونو سره مخ کېږي چې په خرابه وضعه کې ان د خبریال په وهل ټکولو، شکنجې، حبس او وژلو تمامېږي.

د ازادې اروپا راډیو تاجکي سرویس څانګې خبریالان هم له ځینو کاري محدودیتونو سره مخ وي او دولت یې وخت په وخت د کار جوازونه په یوه او بله پلمه نه تمدیدوي.

د اروپايي ټولنې او منځنۍ اسیا چارواکو ترمنځ ویډیويي کنفرانس

اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

د اروپايي ټولنې چارواکو پرون د منځنۍ اسیا او افغانستان د بهرنیو چارو د وزارتونو له مرستیالانو سره په سیمه کې د کرونا ویروس د خپرېدو په وضیعت او یو لړ نورو مسئلو د ویډیويي کنفرانس له لارې خبرې کړي دي.

د افغانستان د بهرنیو چارو وزارت په یو بیان کې ویلي چې د پنجشنبې په ورځ په دې کنفرانس کې په سیمه کې د کرونا ویروس پر ضد د شریکې مبارزې او د منځنۍ اسیا هېوادونو او افغانستان سره د اروپايي ټولنې د اړیکو په لرلید تفصیلي بحث وشو.

له بلې خوا د اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

نوموړې زیاته کړې، اړتیا ده چې د سیمه ایزو او نړیوالو ننګونو او افغانستان کې د سولې په اړه ګډ کار دوام وکړي.

په دې کنفرانس کې د اروپايي ټولنې د یو شمیر لوړپوړو ډیپلوماټانو سربېره د افغانستان او منځنۍ اسیا د پنځو نورو هېوادونو د بهرنیو چارو د وزارتونو مرستیالانو برخه درلوده.

د مسکو یوې محکمې یو مخکښ ژورنالیست په بند محکوم کړی

محکمې ۳۵ کلن سیمه ییز استازی او د نووایا ګزیته ژورنالیست د اعتراضونو په اړه د روسیې له سخت قانون څخه په مکرر سرغړاوي مجرم وباله.

د مسکو یوې محکمې یو مخکښ ژورنالیست په ۱۵ ورځې بند محکوم کړ.

له بلې خوا پولیسو یو شمېر هغه کسان نېولي چې د دې ژورنالیست په ملاتړ یې اعتراض کړی و.

محکمې ۳۵ کلن سیمه ییز استازی او د نووایا ګزیته ژورنالیست د اعتراضونو په اړه د روسیې له سخت قانون څخه په مکرر سرغړاوي مجرم وباله.

د او وي ډي-انفو په نوم د یوې خپلواکې ویبپاڼې د معلوماتو پر بنسټ چې د سیاسي اعتراضونه پر مهال نیونې څاري، ۶ هغه ژورنالیستان هم نیول شوي چې د ازر سره د یو والي د ښودلو په خاطر د پولیسو د مرکزي دفتر مخې ته راټول شوي وو.

ازر د سه شنبې په ورځ د ویلادیمیر ورونڅوف څخه د ملاتړ په خاطر د یو کسیز اعتراض پر مهال نیول شوی و.

ورونڅوف د روسیې د قانون پلي کونکو ادارو د سرغړاویو د افشا هڅه کوله.

نوموړی چې د پولیسو پخوانی افسر دی، د مې د میاشتې لومړیو کې د باج اخیستلو په تور ونیول شو او وروسته پرې نور تورونه هم ولګول شول.

نوموړې پر ده لګیدلي تورونه رد کړي دي.

د بخښنې نړیوال سازمان د ازر نیونه د منتقدانو د غلي کولو یوه بزدلانه هڅه بللې ده.

د کاسوو اساسي قانون محکمې د نوي صدراعظم د ګمارلو فرمان قانوني وباله

د کورتي او ملاتړې یې د نویو پارلماني انتخاباتو غوښتنه کوي.

د کاسوو د اساسي قانون محکمې د ولسمشر هاشم تاچي هغه فرمان قانوني وباله چې د سرپرست صدراعظم البین کورتي پر ځای یې نوی صدراعظم ګمارلی دی.

تمه کېږي چې د پنجشنبې په ورځ ناوخته د محکمې دا پرېکړه به د کیڼ اړخي نیشنلیست ګوند ویتیویندوسۍ په ملاتړ مظاهرې راوپاروي.

دا ګوند تر وخت مخکې د عمومي انتخاباتو د ترسره کېدو غوښتنه کوي.

د محکمې تر پریکړې مخکې، د دې ګوند څو زره ملاتړو د پلازمېنې پریستینا په مرکزي سیمه کې په باران کې (تمریني) اعتراض جوړ کړی و او ویل یې دوی په دې اعتراض کې ځکه برخه اخیستې څو په هغه صورت کې چې د محکمې پرېکړه د دوی په خوښه نه وي لویو مظاهرو ته چمتو اوسي.

د دې لپاره چې د کرونا ویروس محدودیتونه یې مراعت کړي وي، اعتراض کونکو له یو بل د واټن ساتلو، ماسکونو او دستکشونو اغوستو اصول په پام کې نیولي وو.

تاچي د اپریل په ۳۰ مه د کاسوو د منځني ښي اړخي ډیموکرات لیګ عبدالله هوتي د کورتي پر ځای صدراعظم ونوموه.

خو د کورتي د ویتیویندوسۍ ګوند دا فرمان غیرې قانونې وباله او د اساسي قانون په محکمه کې یې ددې فرمان د ننګولو لپاره شکایت ثبت کړ.

د کورتي او ملاتړې یې د نویو پارلماني انتخاباتو غوښتنه کوي.

د بې سرحده ژورنالیستانو سازمان: پاکستان دې د وژل شوي خبریال په اړه څېړنې وکړي

ذولفقار مندراني

د بې سرحده ژورنالیستانو نړیوال سازمان د پاکستان په سند ایالت کې د یو وژل شوي ژورنالیست د قتل د قضیې د څېړنې لپاره د ځانګړې او خپلواکې ډلې د څېړنې غوښتنه کړې ده.

د کاوش او کوشش په نوم د سندي ژبې د ورځپانو د خبریال ذولفقار مندراني مړی د مې په ۲۶ مه نېټه د پاکستان د سند ایالت په دوداپور ښارګوټي کې وموندل شو چې شکنجه شوی او په سر په ‌ډزو وژل شوی و.

په همدې ورځ په نژدې ښار لړکانه کې پولیسو ددې قتل په تور د دوو کسو د نیولو اعلان وکړ او د نوموړې وژنه یې یوه ناموسي قضیه وبلله.

خو د بې سرحده ژورنالیستانو سازمان د اسیا پاسفیک د برخې مشر ډانیل باسټارډ ویلي، د ځايي پولیسو ددې ادعا په اړه چې د مندراني وژنه یې د غیرت په نوم وژنه بللېد شک ډیر دلایل شته.

د دې ژورنالیست پلار د خپل زوی د قتل په اړه له پولیسو سره شکایت درج کړې چې په کې د یو پولیس افسر په ګډون څو نور مشکوک کسان په ګوته شوې دي چې د نشه يي موادو د یو سیمه ییز قاچاقبر سره یې تړاو درلود.

د وژل شوي ژورنالیست پلار وايي، زوی د دې قاچاقبر د فعالیتونو په اړه څېړنې کولې.

د بې سرحده ژورنالیستانو د سازمان د اسیا پاسفیک د برخې مشر د پاکستان د سند ایالت له اعلی وزیر غوښتي چې ددې قضیې د څیړنې لپاره دې سېمې ته یو خپلواک څیړونکی پلاوی واستوي.

دا د روان میلادي کال د پیل راهېسې دویم ژورنالیست دی چې د پاکستان په سند ایالت کې وژل کېږي.

محمد باقر قالیباف د ایران پارلمان مشر وټاکل شو

محمد باقر قالیباف

د ایران پارلمان د تهران پخوانی ښاروال محمد باقر قالیباف د پارلمان د مشر په توګه وټاکه.

قالیباف چې د فبرورۍ پارلماني انتخاباتو کې یې تر ټولو ډېرې رایې له پلازمېنې تهران څخه ترلاسه کړې وې، یو وخت د سپاه پاسداران د هوایي ځواکونو د قوماندان په توګه هم پاتې شوی دی.

د ایران د پارلمان موقت مشر رضا تقوي نن د ښاغلي قالیباف ټاکنه داسې اعلان کړه: "محمد باقر قالیباف د ۲۳۰ رایو په اخیستلو سره د یوه کال لپاره د پارلمان د مشر په توګه وټاکل شو."

ویل کېږي نوموړی له دې کبله چې د ایران ستر مذهبي مشر ایت‌الله علي خامنه‌یي ته ډېر وفادار دی، نو دې ته لار پرانیستل شوه چې د پارلمان مشر شي.

امریکا کې د کرونا ویروس له کبله د مړو شمېر تر ۱۰۰ زرو واوښت

ارشیف

په امریکا متحده ایالاتو کې د کرونا ویروس له کبله د مړو شمېر تر ۱۰۰ زرو واوښت.

سره له دې چې په امریکا کې د کارونو د بیا پرانیستلو او لګېدلي محدودیتونو د کمېدو چارې دوام لري، خو دغه ویروس له تېرو درېیو میاشتو راهیسې دغه هېواد سخت ځپلی دی.

د جانز هاپکنز پوهنتون شمېرې ښیي چې د چهارشنبې په ورځ په امریکا کې یو میلیون او ۷۰۰ زره کسان په کرونا ویروس اخته شوي او له همدې ویروس څخه تر پرون پورې ۱۰۰ زره او ۴۷ تنه مړه شوي دي.

د رسمي شمېرو له مخې دا مهال په امریکا کې د کرونا ویروس د قربانیانو شمېر په کوریا او ویتنام کې د دې هېواد د جګړو تر تلفاتو ډېر دی.

په همدې حال کې د امریکا ولسمشر ډونالد ټرمپ چې په لومړي سر کې یې د دې ویروس شدت او اهمیت کم ښوده، اوس د محدودیتونو پر کمولو ټینګار کوي.

دا مهال د امریکا په ټولو ۵۰ ایالتونو کې په بېلابېلو سطحو محدودیتونه کم شوي او کارونه بېرته پرانیستل شوي دي.

په ټوله نړۍ کې په کرونا ویروس د اخته کسانو شمېر ۵ میلیونه او ۶۵۰ زره تنه دي همدې ویروس تر اوسه په نړۍ کې ۳۵۰ زره کسان مړه کړي دي.

پومپیو: له ایران سره د ملکي اټمي همکاریو معافیت پای ته رسېږي

د امریکا د بهرنیو چارو وزیر مایک پومپیو

د امریکا بهرنیو چارو وزیر وایي، له ایران سره د روسیې، چین او اروپایي کمپنیو د ملکي اټمي همکاریو پر سر وضع شوی معافیت پای ته رسېږي.

مایک پومپیو پرون د مې په ۲۷مه وویل، ایران د اټمي پروګرام په اړه خپلې یو شمېر ژمنې ماتې کړي، نو ځکه پرې د دې معافیت دوام توجیه کېدای نه‌شي.

دا د نړۍ له قدرتونو سره د ایران د اټمي تړون وروستۍ لاسته راوړنې دي چې د له‌منځه تلو په حال کې دي.

ښاغلي پومپیو ویلي، د ایران اټمي هڅې به پر دغه هېواد فشارونه زیات کړي او دغه رژیم به له نړیوالې ټولنې نه نور هم منزوي یا ګوښه شي.

د ایران لپاره د امریکا ځانګړي استازي براین هوک خبریالانو ته ویلي، ایراني چارواکي دوه لارې مخته لري، دوی به یا له امریکا سره خبرو ته رامخته کېږي او یا به هم د خپلې اقتصادي ماتې غم خوري.

د امریکا استازو جرګې پر چینايي چارواکو د بندیز لګولو لایحه تصویب کړه

د امریکا د استازو جرګه

د امریکا د استازو جرګې په مطلق اکثریت داسې لایحه تصویب کړه چې له ډونالد ټرمپ نه غواړي د اویغور مسلمانانو د ځپلو لپاره په چینایي چارواکو بندیزونه ولګوي.

دغه لایحه چې د همدې میاشتې په سر کې سنا هم پاس کړې، پر هغو چینایي چارواکو د بندیزونو غوښتنه کوي چې د لږکیو اویغور مسلمانانو د ځورولو تورونه پرې پورې دي.

د استازو جرګې مشرې نانسي پلوسي ویلي، د بېجنګ دا وحشیانه کړنې چې د اویغور مسلمانانو په ضد یې کوي، د ټولې نړۍ جمعي وجدان ته بې‌احترامي ده.

د امریکا د استازو جرګې دا لایحه اوس د ولسمشر ډونالد ټرمپ توشېح ته وړاندې کېږي، هغه له دې وړاندې ویلي چې پر چین د دې لپاره د بندیزونو پر لګولو غور کوي چې په هانګ کانګ کې یې د ملي امنیت اړوند خپل قانون تحمیل کړی دی.

ملګرو ملتونو او د بشري حقونو ملاتړو بنسټونو چین تورن کړی چې شااوخوا یو میلیون اویغور مسلمانان او نور لږه‌کي یې د اجباري کارونو یوه کمپ کې راټول کړي، خو چین له دوی نه د ناوړه ګټې اخیستنې تورونه رد کړي دي.

د چچنیا مشر د خپل روغتیايي وضعیت په اړه خپاره شوي راپورونه رد کړل

د چچنیا مشر رمضان قدیروف

د چچنیا مشر رمضان قدیروف وایي، صحت‌یې لکه څرنګه چې راپورونه خپاره شوي هغسې نه‌دی، بهتره دی.

قدیروف په کرونا ویروس اخته شوی دی. ده پرون په یوه مرکه کې چې په انستاګرام کې یې په ژوندۍ بڼه له خپل مرستیال احمد دوداییف سره کوله وویل چې دی بېخي ښه دی.

تر دې یوه ورځ مخکې په پلازمېنه ګروزني کې د غونډې پر مهال د قدیروف پر ښي لاس په ټلوېزیون کې د پیچکارۍ کنول ښکارېده.

تېره اوونۍ روسي رسنیو وویل چې ۴۳ کلن قدیروف مسکو ته راغلی دی او د کرونا ویروس له امله بستر شوی دی.

قدیروف ولسمشر ولادیمیر پوتین ته ډېر وفاداره دی او دی د قفقاز په شمال کې له بشري حقونو څخه په پراخو سرغړونو تورن دی.

امریکا په لیبیا کې د روسي جنګي الوتکو د موجودیت تفصیلات خپاره کړل

د روسیې جنګي الوتکې

د امریکا متحده ایالاتو پوځ نور تفصیلات د دې په اړه وړاندې کړي چې له ادعا سره سم روسیې په لیبیا کې پوځي جټ الوتکې ځای پر ځای کړې دي.

روسي چارواکي په دوامدار شکل په لیبیا کې د خپلو جنګي الوتکو او هوایي ځواکونو موجودیت ردوي.

واشنګټن وایي، مسکو جټ الوتکې د دې لپاره ځای پر ځای کړې دي چې له هغو روسي پلوو سره مرسته وکړي چې د یوه جنګسالار مرسته کوي او دا کس د لیبیا له هغه حکومت سره په جګړه دی چې نړیوالو په رسمیت پېژندلی دی.

له ادعا سره سم لیبیا ته د روسیې الوتکو له تګ سره به د لیبیا په ختیځ کې د خلیفه حفتر د ځواکونو او د حکومتي ځواکونو ترمنځ پر جګړه ډېر تأثیر پرېوځي. د لیبیا د ملي وفاق حکومت نړیوالو په رسمیت پېژندلی دی.

په دې جګړې کې ګڼ هېوادونه ښکېل شوي دي، روسیه، فرانسه، اردن او متحده عربي امارات د خلیفه حفتر ملاتړ کوي.

ترکیه چې لیبیا ته‌یې په جنورۍ میاشت کې ځواکونه او بې‌پيلوټه الوتکې واستولې د قطر او ایټالیا ترڅنګ د لیبیا د حکومت ملاتړ کوي.

ملګرو ملتونو لیبیا ته د وسلو پر لېږلو بندیز لګولی دی.

په افریقا کې د امریکایي ځواکونو مرکزي قوماندانۍ د سې شنبې په ورځ ویلي و چې روسیې جېټ الوتکې له سوریې لېږلې دي.

سپېس اېکس خصوصي کمپنۍ خپله سفینه نړیوال فضايي سټېشن ته استوي

د سپېس اېکس سفینه

سپېس اېکس لومړنۍ خصوصي کمپنۍ ده چې نن د مې ۲۷مه له انسانانو سره خپله سفینه نړیوال فضایي سټېشن ته استوي.

که دا کار بریالی شي دا به فضایي اکتشافاتو ته د خصوصي کمپنیو د لاسرسي یوه مهمه لاسته راوړنه وي.

له اوو لسیزو راهیسې دې کار ته یوازې ځواکمن هېوادونه لاسرسی لري.

د کرو ډراګن (Crew Dragon) په نوم د سپېس اېکس دا فضایي بېړۍ نن د پراګ په وخت ۰۴:۳۳ دقیقې له فلوریدا څخه فضا ته توغول کېږي.

په دې سفینه کې به د ناسا دوه ستور مزلي سپاره وي.

تمه ده دا سفینه د مې پر ۲۸مه نړیوال فضایي سټېشن ته ورسېږي او هلته به تر اګسټ میاشتې پورې پاتې شي.

ټاکل شوې د امریکا متحده ایالاتو ولسمشر ډونالد ټرمپ د دې سفینې د توغولو په مراسمو کې ګډون وکړي.

۲ روسي جنګي الوتکو مدیترانه کې د امریکا یوې الوتکې ته خنډ جوړ کړی

د امریکا او روسیې الوتکې

د امریکا متحده ایالاتو سمندري ځواکونو ویلي چې دوه روسي 'سو-۳۵' جنګي جټ الوتکو په مدیترانه سمندرګي کې د امریکا د بحري ګزمې د یوې الوتکې په وړاندې خنډ جوړاوه.

د امریکا سمندري ځواکونو ویلي چې پرونۍ پېښې ۶۵ دقیقې دوام درلود چې پر مهال‌یې دوو روسي پیلوټانو د امریکا 'پې–۸ اې' دواړو وزرو ته نږدې پرواز کاوه او د دې الوتکې د مانور وړتیا یې کمه کړې وه.

د دې ځواکونو یوې برخې چې په ایټالیا کې مېشته ده ویلي دا ډول کړنې به بالقوه هوايي شخړې زیاتې کړي.

دا درېیم وار دی چې د روسيې پیلوټان د امریکا د سمندري ځواکونو کشفي الوتکې تعقیب او جنجال ورته جوړوي.

درېیمه تېل وړونکې ایرانۍ کښتۍ ونزوئلا ته ورسېده

ونزوئلا ته رسېدلې تېل وړونکې ایرانۍ کښتۍ

د ایران درېیمه تېل وړونکې کښتۍ ونزوئلا ته ورسېده.

د کښتۍ تعقیب کوونکي معلومات د ریفینیتو اکان شرکت ټول کړي او ښيي چې د ایران په بیرغ سمباله درېیمه کښتۍ سې شنبه په ځايي وخت د ونزوئلا د ځانګړي اقتصادي زون او ځمکنیو اوبو ته ننوتله.

د روېټرز په وینا د پیټونیا تېل وړونکې کښتۍ د سې شنبې په سهار وختي د کیریبین بحیرې ته ننوتله او د نورو تېل وړونکو ټانکرونو فارچون او فوریسټ ورته لار یې تعقیب کړه.

د فارچون تېل وړونکې کښتۍ د دوشنبې په ورځ د ۴۳ میلیون بنزین بوشکو سره د ایل پالیتو بندر ته ورسېده او د ونزوئلا د تېلو د وزیر له‌خوا یې تود هرکلی وشو.

د ونزوئلا د تېلو وزیر په دغه هېواد کې د تېلو د کموالي د کړکېچ په جریان کې د ایران له دې ملاتړه مننه وکړه.

د فوریسټ تېل وړونکې کښتۍ هم د سې شنبې په ورځ د ایل پالیتو په بندر کې اړخ ولګاوه ترڅو خپل مالونه بار کړي.

د خامنه‌یي استازی خوزستان ته د ټپيانو پوښتنې ته ورغلی

د ایران ستر مذهبي مشر ایت‌الله علي خامنه‌یي

د ایران د ستر مذهبي مشر ایت‌الله علي خامنه‌یي استازی سید عبدالنبي موسوي فرد په خوزستان ولایت کې د ټپيانو پوښتنه وکړه.

خلکو په خوزستان ولایت کې د څښلو د اوبو په خاطر تېره اوونۍ اعتراض کړی وو چې ځيني يې امنیتي ځواکونو ټپيان کړل.

د ایران نیمه دولتي فارس خبري اژانس د مې په ۲۵مه نېټه یوه وېډيو خپره کړې ده چې په‌کې موسوي فرد د یوه ځوان په کور کې لیدل کېږي چې د پلاستیکي مرمۍ له کبله سخت ټپي شوی و.

په وېډيو کې موسوي فرد وايي، د معذرت غوښتلو په پار د دې کس کور ته ورغلی دی.

د دې ټپي کس عکسونه پر ټولنیزو رسنیو خپاره شوي دي.

دی د غیزانیه سیمې اوسېدونکی دی او د مې میاشتې په ۲۳مه نېټه د څښلو د اوبو د قطع کېدو په خاطر د خوزستان د والي د دفتر مخې ته په اعتراض راوتلی و.

روښانه نه‌ده چې د اعتراض کوونکو د تیت کولو په هدف د امنیتي ځواکونو په اوښلن ګاز او پلاستیکي مرمیو څومره کسان ټپيان شول.

پولیسو ادعا کړې چې اعتراض کوونکو پر افسرانو په لرګیو او ډبرو حمله وکړه.

نور راوښيه

XS
SM
MD
LG