د لاسرسۍ وړ لېنکونه

تازه خبر
یکشنبه ۱۵ چنګاښ ۱۳۹۹ کابل ۱۰:۴۰

خبرونه

چارواکي: په شمال زون کې په تصفیوي عملیاتو کې ۸۷ طالبان وژل شوي

یو تن افغان سرتېری

په شمال زون کې د ۲۰۹ شاهین قول اردو چارواکي وایي، د بلخ په څلورو ولسوالیو کې د پراخو تصفیوي عملیاتو پر مهال ۸۷ طالبان وژل شوي چې ۲۲ یې د هغوی قوماندانان وو.

د دغه قول اردو ویاند حنیف رضایي تېر ماښام ازادي راډیو ته وویل چې د شاهین ۲۰۷ په نوم دغه عملیات له تېرو لسو ورځ راهیسې په بلخ، چمتال، چهاربولک او دولت اباد ولسوالیو کې دوام لري.

ښاغلی رضایي وایي: په دوی کې د طالبانو د بېلابېلو کمېسیونونو مسؤلین شامل دي، ۷۷ نور طالبان په دې عملیاتو کې ټپیان شوي او ۷ تنه د افغان ځواکونو له خوا اسیر شوي دي.

د ښاغلي رضایي په خبره، په دغو عملیاتو کې ۷ تنه افغان امنیتي سرتېري ټپیان شوي دي.

طالبانو په دې اړه تبصره نه ده کړې.

د ورځې تازه خبرونه دلته ولولئ

روغتیا سازمان په یوه ورځ په کرونا د اخته کېدو نړیوال ریکارد ثبت کړ

د روغتیا نړیوال سازمان لوګو

د روغتیا نړیوال سازمان په یوه ورځ په کرونا ویروس د اخته کېدو یو بل نړیوال ریکارد ثبت کړ.

'ډبلیو. اچ. او' د جولای پر څلورمه راپور ورکړ چې د همدې ورځې په تېرو ۲۴ ساعتونو کې په ټوله نړۍ کې د کرونا ویروس ۲۱۲،۳۲۶ تازه پېښې ثبت شوې دي.

د راپور له مخې تر ټولو ډېر ارقام په امریکا متحده ایالاتو، برازیل او هند کې ثبت شوي دي.

د روغتیا نړیوال سازمان وایي هره ورځ شااوخوا ۵،۰۰۰ کسان له 'کووېډ-۱۹' ناروغۍ څخه مړه کېږي. د امریکا د جانز هاپکنز پوهنتون د شمېرو له مخې د کرونا وبا د پیل راهیسې په نړۍ کې څه باندې ۱۱ میلیونه کسان په یاد ویروس اخته شوي دي او ۵۲۶ زره کسان له همدې ناروغۍ مړه شوي دي.

روسیې د جولای پر څلورمه خبر ورکړ چې په تېرو ۲۴ ساعتونو کې په دې هېواد کې ۱۰ زره کسان په کرونا ویروس اخته شوي دي.

بل‌خوا بریتانیا د جولای پر څلورمه د رستورانتونو، د وېښتو جوړولو صالونونو او سینماګانو د پرانیستلو خبر ورکړ.

دا د کرونا ویروس له کبله د لګول شویو محدودیتونو د بېرته کمولو تر ټولو لوی ګام دی چې بریتانیا یې اخلي.

ریابکوف: مسکو 'جي-۷' غونډه کې د ونډې په اړه امریکا سره خبرې نه‌دي کړي

'جي-۷'

د روسیې د بهرنیو چارو وزارت وایي مسکو د 'جي-۷' هېوادونو په غونډه کې د ونډې په اړه له امریکا سره خبرې نه‌دي کړي.

د یاد وزارت مرستیال سرګي ریابکوف د جولای پر څلورمه تاس خبري اژانس ته وویل: "موږ دا ډول خبرې نه مخکې لرلې دي او نه‌یې اوس لرو."

د ریابکوف دا څرګندونې وروسته له هغه کېږي چې په روسیه کې د امریکا سفیر جان سولیفن د جولای پر درېیمه «ار.بي.سي» ټلوېزیون ته ویلي وو چې واشنګټن د روسیې د بهرنیو چارو وزارت او د 'جي-۷' له نورو غړو هېوادونو سره په خبرو بوخت دی چې ایا په دې ډله کې د روسیې لپاره د یوه مناسبه رول ځای شته که څنګه.

په دې ډله کې د روسیې د بېرته راوستلو مسئله د امریکا متحده ایالاتو ولسمشر ډونالد ټرمپ په مې میاشت کې هغه مهال مطرح کړه چې دا غونډه د کرونا ویروس د خورېدو له کبله د سپټمبر میاشتې ته وځنډول شوه.

ولسمشر ټرمپ هغه مهال وویل چې دی غواړي د استرالیا، روسیې، جنوبي کوریا او هند په ورګډولو سره د دې غوڼدې د بلونکو لېست وغځوي، خو د کاناډا او فرانسې په ګډون هېوادونو پر نظر انتقاد وکړ.

روسیه پخوا د دې ډلې غړې وه، خو په ۲۰۱۴ کال کې د کریمیا له الحاق وروسته د 'جي-۷' هېوادونو له لېسته وایستل شوه.

ټرمپ: امریکا ۴ میاشتې دمخه په ټولو برخو کې ښه وضعیت کې وو

د امریکا ولسمشر ډونالډ ټرمپ

د امریکا متحده ایالاتو ولسمشر د جولای پر څلورمه د دې هېواد د خپلواکۍ ورځې په مناسبت د مبارکۍ پیغام په ترڅ کې وویل، څلور میاشتې دمخه امریکا د نړۍ تر بل هر هېواد په ټولو برخو کې په ښه وضعیت کې وو.

ولسمشر ډونالد ټرمپ په یوه وېډیویې پیغام کې د سپینې ماڼۍ په رسمي ټویټر پاڼه کې وویل: "د خپل ستر هېواد ټولو وګړو ته د جولای څلورمه د خوښیو هیله کوم. دا یوه خاصه ورځ ده چې ډېر مسایل او تر ټولو ډېر ازادي لمانځو. موږ یو هېواد لرو چې واقعاً بېرته راګرځي. څلور میاشتې دمخه مو په ټولو برخو کې ریکارډ درلود. موږ د بې‌کارۍ تر ټولو ټیټه، د کاري بوختیاوو تر ټولو ښه سطح، او د اسهامو تر ټولو ښه بازار مو درلود. د تاریخ په اوږدو کې تر بل هر هېواد ښه وو."

ولسمشر ټرمپ زیاته کړه، دا چې د ده په وینا د چین وحشتناکې وبا امریکا په نښه کړه، خو اوس متحده ایالات د بریالیتوب په درشل کې دی.

د ورلډومېټرز سایټ د شمېرو له مخې تر پرون پورې په امریکا کې شااوخوا دوه میلیونه او ۹۰۰ زره کسان په کرونا ویروس اخته شوي او په همدې هېواد کې له کرونا ویروس څخه څه باندې ۱۳۲ زره کسان مړه شوي دي. شمېرې ښیي چې په امریکا کې یو میلیون او ۲۳۶ زره کسان له 'کووېډ-۱۹' ناروغۍ څخه بېرته جوړ شوي دي.

د بهرنیو چارو وزارت او افغان پست د قونسلۍ برخه کې تفاهم لاسلیک کړ

افغان پست

د افغانستان بهرنیو چارو وزارت او د افغان پست دولتي شرکت ترمنځ د قونسلي خدماتو د وړاندې کولو په برخه کې د اسانتیا د رامنځته کېدو لپاره یو تفاهم لاسلیک شو.

د یاد وزارت د قونسلۍ څانګې مشر عبدالملک قریشي د شنبې په ورځ د دې تفاهم د لاسلیک پر مهال وویل: "تر دې وروسته د بهرنیو چارو وزارت له‌خوا ټول تصدیق او ارزول شوي اسناد افغان پست ته سپارل کېږي. په لومړني پړاو یعنې لومړیو شپږو میاشتو کې دا اسناد د کابل او اتو ولایتونو ۱۵ پوسته‌خانو ته چې د بهرنیو چارو وزارت نمایندګۍ په‌کې شته، رسول کېږي."

د ښاغلي قریشي په خبره تر شپږو میاشتو وروسته د بهرنیو چارو وزارت اړوند اسناد د پروسس او تصدیق لپاره له ولایتونو څخه مرکز ته هم د افغان پست له لارې لېږل کېږي.

غزني کې یوې وسله‌والې نښتې یو پولیس وژلی او یو ټپي شوی

غزني

په غزني کې د یوې وسله‌والې نښتې په نتیجه کې یو پولیس وژل شوی او یو بل ټپي شو.

د غزني د والي ویاند واحدالله جمعه‌زاده پرون شنبه ازادي راډیو ته وویل: "دوه پولیس تر غرمې وروسته د غزني ښار په بزازۍ سیمه کې د نامعلومو وسله‌والو له‌خوا په بې‌غږه تفنګچې په نښه شوي دي."

د ښاغلي جمعه‌زاده په خبره د دې پېښې په تړاو یو کس نیول شوی دی او پلټنې ترې روانې دي.

د راپورونو له مخې د دې ډول وژنو لړۍ له کلونو راهیسې په غزنې کې روانه ده. د دې ولایت اوسېدونکو، حکومتي چارواکو او امنیتي کارپوهانو ازادي راډیو ته ویلي چې ډېری افغان سرتېري د خپل غفلت په نتیجه کې وژل کېږي.

د دوی په وینا ډېری افغان سرتېري د سیمې له خلکو سره د خبرو کولو او یا د ګرځنده ټیلیفونونو د کارولو پر مهال د وسله‌والو له‌خوا په نښه کېږي.

د یو بل خبر له مخې د غزني د والي ویاند واحدالله جمعه‌زاده شنبه ماښام ازادي راډیو ته وویل چې د مقر ولسوالۍ په قلعه ثمن سیمه کې د افغان ځواکونو په یوه کمین کې څلور تنه وسله‌وال مخالفین وژل شوي او دوه نور یې ټپیان شوي دي.

د ښاغلي جمعه‌زاده په خبره په دې پېښه کې افغان ځواکونو او ملکي وګړو ته زیان نه‌دی رسېدلی.

وسله‌والو طالبانو تر اوسه په دې اړه څه نه‌دي ویلي.

په افغانستان کې د جګړې ښکېلې خواوې په پرله‌پسې ډول یو بل په ملکي مرګ‌ژوبلي تورنوي.

قره‌باغ کې یوې ټرافیکي پېښې یو کس وژلی او ۶ تنه ټپیان شوي

د افغانستان عمومي نقشه کې پلازمېنه کابل

د کابل قره‌باغ ولسوالۍ په مربوطاتو کې د یوې ټرافیکي پېښې په نتیجه کې یو کس وژل شوی او شپږ نور ټپیان شول.

د کابل د قره‌باغ ولسوال محمد یعقوب حنیف ازادي راډیو ته وویل چې تېر ماښام د چنګاښ ۱۴مه قره‌باغ ولسوالۍ د بازار په سیمه کې دوه کرولا موټرو ټکر کړی دی چې یو تن وژل شوی او شپږ نور ټپیان دي.

ښاغلي حنیف د دوو ټپیانو روغتیایي وضعیت د ډاډ وړ وښود.

د ټرافیک مسؤلین وایي کوچني سړکونه او د موټر چلوونکو بې‌پروایي دا ډول پېښې رامنځته کوي.

غزني چارواکي: د وسله والو برید کې ۲ پولیسو ته مرګ ژوبله واوښته

ارشیف

په غزني کې یو پولیس وژل شو یو ټپي دی.

‎په غزني ښار کې په وسله وال برید کې یو پولیس وژل شوي او یو بل ټپي دي.

د غزني ولایت د والي ویاند واحدالله جمعه زاده د شنبې په ورځ ازادي راډیو ته وویل: "نن تر ماسپښین وروسته ۲ تنه پولیس د غزني ښار په بزازي سیمه کې وسله والو په بې غږه توپانچه ویشتلي، چې یو یې وژل شوی او بل ټپي دی."

ښاغلی جمعه زاده زیاتوي، د پېښې په تړاو یو تن نیول شوي چې تر پوښتنو ګروېږنو لاندې دی.

په غزني کې دغه لړۍ له کلونو کلونو روانه ده.

دا په داسې حال کې ده، چې ازادي راډیو د شنبې په روځ د غزني د یو شمیر اوسېدونکو، دولتي چارواکو او د امنیتي چارو د پوهانو له خولې په یو راپور کې ویلي وو چې په غزني کې ډېری وخت افغان سرتېري د خپلو بې غوریو له امله وژل کېږي.

دوی وايي، ډیری ځله یې لیدلي چې افغان سرتېري له خلکو سره په خبرو او یا هم په موبایلونو کې بوخت وي چې وسله وال یې ترور کړي.

چارواکي: هرات کې ماین چاودنې ۳ پولیس ووژل

آرشیف، هرات کې یو شمېر پولیس

په هرات کې چارواکي وایي، ۳ پولیس د سړک غاړې یوه چاودنه کې ووژل شول.

د هرات د کهسان ولسوال امین الله هفت بلا ازادي راډیو ته وویل، دغه چاودنه نن د هرات- اسلام قلعه ترمنځ لویه لاره کې د تیرپل سیمه کې شوې ده.

تراوسه چا د دغې چاودنې مسئولیت نه دی اخیستی.

په هرات کې د ازادي راډیو خبریال وایي، وروستیو کې د اسلام قلعه- هرات ترمنځ لویه لاره کې ناامنۍ زیاتې شوي دي.

هلته نن د هرات ګمرک کارکوونکو او کمېشنکارانو د ناامنیو پر وړاندې اعتراض وکړ او ویل یې، د ناامنیو له کبله دندو ته نه شي تلی.

‎د سویل لویدیځې حوزې استازي: حکومت باید زمونږ حقونه راکړي

ارشیف

د افغانستان د سویل لویدیځې حوزې یو شمېر استازي شکایت لري چې حقونه یې نه دي ورکړل شوي.

‎د هرات، غور، فراه، نیمروز او بادغیس ولایتونو یو شمېر استازو په کابل کې د پارلمان مخې ته د تحسن خیمه درولې او وایي چې حکومت یې باید حقونه ورکړي.

‎د دغو تحسن کوونکو یو استازي عبدالخالق فراهي ازادي را‌‌‌‌‌‌ډیو ته وویل چې ولسمشر غني او عبدالله عبدالله دې په حکومت کې د دغې حوزې خلکو ته ونډه ورکړي.

‎ښاغلی فراهي وایي، دوی د هېواد ۲۵ سلنه نفوس جوړوي او د ګمرکونو د عوایدو لوړه برخه راټولوي، خو په خبره یې د حکومت له پامه غورځول شوي دي.

‎د نوموړي په خبره د دغو تحسن کوونکو شمېر لسګونو ته رسېږي چې په کې د یادو ولایتونو قومي مشران، ځوانان، ولایتي شورا استازي مدني فعالان شامل دي او له حکومته غواړي چې په حکومتي او دولتي ادارو کې دې ونډه ورکړل شي.

‎بلخوا د ولسي جرګې لومړی مرستیال محمد میرزا کټوازی وایي حکومت باید په کابینه کې د افغانستان د ټولو وګړو استازي شامل کړي.

‎د کټوازي په خبره که د دغې حوزې خلکو په لاریونونو او یا نورو مدني غبرګونونو د خپل حق غوښتنې لپاره لاس پورې کوي ورسره ولاړ دي.

راپور: هند کې یوه کس تر ۱۰۰ ډېر کسان په کرونا ویروس اخته کړي

ارشیف

د فرانس پریس اژانس د راپور له مخې په هند کې یوه تن په څو ورځو کې تر سلو ډېر کسان په کرونا ویروس اخته کړې دي.

د پېښې تحقیقات روان دي.

د هند په شمال کې د بیهار په ایالت کې د یوه ځوان د واده په مراسمو کې تر ۳۰۰ ډېرو کسانو برخه واخیسته او دا ځوان ۲۶ کلن و، د کوویډ نولس ناروغۍ په څېر نښې یې لرلې او د واده په درېیمه یې ساه وخته.

واده د جون په پنځلسمه و او د بیهار په مرکز پاټنا کې د روغتیایي برخې مسئول راج کیشور چوهدري وایي، د واده او ماتم په محفلونو کې د خلکو تر ګډون وروسته یوسل او یولس کسان په کرونا ویروس اخته شوي دي او نور هغه کسان چې په دې مراسمو کې یې برخه اخیستې وه هغوی قرنطین شوې دي.

چارواکو اوس د مړه شوي زوم له کورنۍ تحقیقات پيل کړې دي.

ډاکتران نه پوهېږي چې دا دومره ډېر کسان په یوځای د مړه شوي زوم له امله په کرونا اخته شوې دي که د دوی یوځای کېدل د دې سبب شوي دی، ځکه چې کورنۍ تر مړینې وروسته دستي د دې ځوان جسد سوځولی دی، د دې ځوان خپله مېرمن په کرونا ویروس نه ده اخته شوې د کورنۍ نور غړي یې هم نه دې کرونا شوي.

چوهدري وویل، دا ځوان اینجنیر و، نوي ډيلي ته یې نژدې د ګارګون په نوم سیمه کې کار کاوه او تر خپل واده یوه اوونۍ مخکې بیهار ته راغلی و، تر واده مخکې یې لږ لږ تبه کېده او معده یې خرابه وه، نو د لنډې مودې په مخه په روغتون کې بستر شو، خو کورنۍ یې دی له روغتونه بهر کړ او د واده محفل یې ورته جوړ کړ چې درې سوه کسانو برخه په کې واخیسته.

تر واده دوه ورځې وروسته، یعني په درېیمه دی مړ شو او د ویر په مراسمو کې یې شاوخوا دوه سوه کسان راغونډ شول.

په هند کې د کرونا ویروس د خپرېدو د مخنیوي لپاره بندیزونه سست شوي دي خو حکومت ویلي دي چې د ودنو په محفلونو کې به تر پنځوسو ډېر کسان نه سره غونډېږي او د ویر په مراسمو کې به تر شلو ډېر نه سره یوځای کېږي.

سومالیا کې موټر بم چاودنې له امله ۷ کسه وژل شوي

آرشیف

چارواکي وایي، د سومالیا د پلازمېنې موګادیشو له بندره بهر نن ۷ تنه هغه مهال ووژل شول چې پولیسو د ځانمرګي برید کوونکي پر یوه موټر ډزې وکړې.

د سومالیا د اطلاعاتو وزارت ویاند اسماعیل مختار ویلي، کله چې د ځان مرګي دا موټر د پولیسو له لومړۍ تالاشۍ په بیړه تېر شو، دویمې ته په رسېدو پولیسو ډزې پرې وکړې او وچاودېد.

د راپورونو له مخې چاودنه کې ۲ پولیس او یو شمېر ملکیان هم ټپيان شوي دي.

د دغې پېښې مسئولیت تراوسه چا په غاړه نه دی اخیستی، خو هلته له دې وړاندې له القاعده شبکې سره تړلې الشباب وسله والې ډلې ورته بریدونه کړي دي.

دغه ډله څو کاله مخکې له موګادیشو وشړل شوه، خو دوی دغه ساحلي ښار کې پر هوټلونو او نورو ورته اهدافو بریدونو ته دوام ورکړی.

روانه اوونۍ د افغان سولې په اړه درې مهمې غونډې جوړېږي

د افغانستان د بهرنیو چارو وزارت

افغان دولت روانه اوونۍ د سولې په اړه د سیمه ییزې او نړیوالې اجماع د رامنځته کېدو په هدف د درې مهمو غونډو کوربه توب کوي.

لومړنۍ غونډه د شلو سیمه ییزو هېوادونو د استازو، دویمه هغه د افغانستان، پاکستان او چین درې اړخیزه غونډه او دريیمه د هغو هېوادونو غونډه ده چې تېرو دوه لسیزو کې د افغانستان په امنیتي او اقتصادي مسایلو کې ښکيل وو.

د بهرنیو چارو وزارت ویاند ګران هېواد رسنیو ته ویلي، دغه غونډې له دوشنبې ورځې پیليږي.

هغه زیاته کړه: "د سولې د بین الافغاني خبرو له پيله مخکې افغان دولت د سیمه ییزې او نړیوالې اجماع د پیاوړتیا او ګړندیتوب لپاره دا اوونۍ د درېیو سیمه ییزو، نړیوالو او درې اړخیزو غونډو کوربه توب لري، د درې واړو لویو غونډو هدف د اجماع پیاوړتیا ده چې بین الافغاني خبرې ژر پيل او مطلوبو نتایجو ته ورسېږو."

افغان دولت او طالبانو تراوسه د بین الافغاني خبرو پيل ته نېټه نه ده ټاکلې، خو ارګ ویلي، لومړنۍ ناسته به د قطر پلازمېنې دوحه کې ترسره کېږي.

افغان دولت غواړي چې له دغو خبرو مخکې د نړیوالو او سیمه ییزو شریکانو نظرونه واوري او د هغوی ملاتړ ورجلب کړي.

د غضنفر د جنازې او فاتحې مراسمو ترسره کېدو لپاره کمېسیون وټاکل شو

غضنفر د ولسمشر فوق العاده استازی و چې تېره ورځ د کویډ ۱۹ ناروغۍ له کبله مړ شو.

افغان ولسمشر د محمد یوسف غضنفر د جنازې او فاتحې د ځانګړو دولتي مراسمو ترسره کېدو ته یو کمېسیون وټاکه.

د ارګ یوه خبرپاڼه وایي چې د کمېسیون مشري د ولسمشر د دفتر رئیس محمد شاکر کارګر ته سپارل شوې.

د کمېسیون په جوړښت کې د کورنیو چارو، دفاع ،حج او اوقافو ، اطلاعاتو او فرهنګ وزاتونه او یو شمېر نورې دولتي ادارې شاملې دي.

ښاغلی غضنفر د اقتصادي او سوداګرۍ پراختیا او د بیوزلۍ کمولو په چارو کې د ولسمشر فوق العاده استازی و چې تېره ورځ د کویډ ۱۹ ناروغۍ له کبله مړ شو.

لغمان کې د ۴ میلیونه افغانیو په ارزښت د شیدو ټولولو مرکز جوړېږي

ارشیف

د لغمان په قرغیو کې ولسوالۍ کې د ۴ میلیونه افغانیو په ارزښت د شیدو ټولولو د یو ستر مرکز د جوړولو بنسټ کېښودل شوه.

د لغمان د کرنې، اوبو لګولو او مالدارۍ ریاست رئیس انجنیر محمد جمیل خوشحال نن ازادي راډیو ته وویل، چې د شیدې ټولولو دغه مرکزونه چې د کرنې وزارت له پراختیایي بودیجې څخه جوړېږي، د جوړولو لګښت یې څلور میلیونه افغانۍ ده.

نوموړي وویل، چې په قرغیو کې به د دغه مرکز د جوړولو چارې یې د روان کال تر پایه بشپړ او ګټې اخیستنې ته به وسپارل شي.

د شیدو ټولولو دغه مرکز چې د لسګونه لېټره شیدو د ټولولو وړتیا به ولري عصري خونې، د زېرمې خونه، او ګدام به هم ولري.

د یادو مرکزونو د جوړولو موخه د مالدارۍ د تولیداتو له لارې د خوړو خوندیتوب دی.

د لغمان د کرنې او مالدارۍ ریاست چارواکي وایي، چې د شیدې ټولولو یاد مرکز په مستقیمه توګه له کلیوالو مالدارانو شیدې راټولوي او د لبنیاتو د پروسس د فابریکو په واک کې یې ورکوي، چې هم د کلیوالو مالدارانو د اقتصادي ودې لامل کېږي او هم په هېواد کې د لبنیاتو د پروسس د پراختیا په برخه کې د پام وړ مرسته کوي.

د چارواکو په خبره د دغو مرکزونو جوړېدل د لبنیاتو د پراختیا او کاروبار په برخه کې یو مثبت ګام دی.

دوی زیاتوي، چې د شیدې ټولول او شیدو ته بازارموندنه کولای شي، چې د مالدارانو اقتصاد ته وده ورکړي.

افغان او پاکستاني چارواکو د واګه بندر پر ټرانزیټي ستونزو خبرې کړي

محمد یونس مهمند

د افغانستان د سوداګرۍ او پانګونې خونې چارواکو او یو شمېر سوداګرو نن سهار له پاکستاني چارواکو سره د واګه بندرله لارې هندوستان ته د صادراتي توکو د ټرانزیټ په ستونزو خبرې وکړې.

د دغې خونې لومړي مرستیال محمد یونس مهمند ازادي راډیو ته وویل چې دغه ناسته د ویډیو کنفرانس له لارې ترسره شوه.

ښاغلي مهمند وویل، په دغه ناسته کې له پاکستان سره په ټرانزیټ کې د افغان سوداګرو د ننګونو په خاص ډول د واګه بندر له مسیر څخه هندوستان ته د افغان سوداګرو د صادراتي توکو پر وړاندې شته ستونزې او ننګونې مطرح شوې او د پاکستان د حکومت له لوري یې پر حل ټینګار وشو.

نوموړي وویل چې په یاده ناسته کې د سوداګرۍ د پراختیا پر ضرورت ټینګار وشو او د پاکستان له حکومت یې وغوښتل چې سیاسي موضوعګانې باید پر سوداګرۍ او ټرانزیټ منفي اغېز ونه کړي.

د ښاغلي مومند په خبره، په یاده ناسته پاکستاني لوري ژمنه کړې چې د افغانستان د سوداګرو د صادراتو، ټرانزیټ او وارداتو ستونزې به د مشرتابه په کچه له اړوندو پاکستان چارواکو سره شریکې کړي او بشپړ ډاډ یې ورکړی چې د واګه بندر او کراچۍ بندر ټرانزیټي ستونزې به ژر تر ژر هوارې او د واګه بندر له لارې به صادراتو ته اجازه ورکړل شي.

نور راوښيه

XS
SM
MD
LG