د لاسرسي لېنکونه

تازه خبر
پنجشنبه ۲ لړم ۱۳۹۸ کابل ۰۶:۳۲

خبرونه

مسؤلین: افغان هوایي شرکتونه د اروپا له تور لېسته وتلو ته نږدې کېږي

ارشیف، په کابل کې د هوایي ډګر یو انځور

د افغانستان د ملکي هوایي چلن اداره وایي، ورځ تر بلې د اروپا له تور لېسته د افغانستان د هوایي شرکتونو راوتلو ته نږدې کېږي.

اروپایي ټولنې په ۲۰۱۰ کال کې دغو هېوادونو ته د افغانستان الوتنې بندې کړې او شرط یې کېښود چې د افغانستان د هوایي چلن د خپلواکې ادارې جوړېدل، د هوایې چلن د قوانینو جوړول، مسلکي پرسونل او د هوایي شرکتونو د خدماتو معیاري کېدل هغه شرایط دي چې اروپایي ټولني وضعه کړي او وایي چې د دې شرایطو تر پوره کېدو پورې به د افغانستان الوتنې اروپا ته پرواز نه کوي.

د افغانستان د هوایي چلن د ادارې ویاند محمد قاسم رحیمي د شنبې په ماښام ازادي راډیو ته وویل چې په دې برخو کې پرمختګونه شوي دي.

ده وویل: موږ ډېره هیله لرو چې ژر تر ژره د اروپا او افغانستان ترمنځ مستقیمې الوتنې پیل شي، یو شمېر شرطونه چې د اروپایي ټولنې له خوا ورکړل شوي وو، بشپړ شوي او ځیني نورو باندې کار روان دی، د اروپا یو پلاوی د روان کال په ډېسمبر کې افغانستان ته راځي او زموږ پرمختګونه ارزوي.

اروپایي ټولنې په ۲۰۱۰ کال کې پر افغانستان دا بندیز ولګاوه.

د ورځې تازه خبرونه دلته ولولئ

افشا شوی سند: د ولسمشرۍ ټاکنو ابتدايي پایلې د "عقرب په ۲۱مه اعلانېږي"

خو د ټاکنو کمیسیون مسئولان وايي، ددغې نېټې ټاکل یوه طرحه ده او نه شي ویلای چې دا د ټاکنو ابتدايي پایلو د اعلان دقیقه نېټه ده.

د افغانستان د ټاکنو له کمیسیون څخه افشا شوي سند له مخې چې ازادي راډیو ترلاسه کړی، ددغه کمیسیون اجرايي برخې په پام کې لري چې د ولسمشریزو ټاکنو ابتدايي پایلې د عقرب په ۲۱مه اعلان کړي.

د ټاکنو کمیسیون د دارالانشا د پلان رئیسې منعمه منصور ته په منسوب غږیز کلیپ کې هغې ویلي چې دا نېټه د ټاکنو کمیسیون د عملیاتي برخو د رئیسانو په مشوره ټاکل شوې ده.

یوې خپلواکې سرچینې ازادي راډیو ته ویلي چې ثبت شوی غږ د اغلې منعمې منصور ده.

خو د ټاکنو کمیسیون کمیشنره رحیمه ظریفي وايي، ددغې نېټې ټاکل یوه طرحه ده او نه شي ویلای چې دا د ټاکنو ابتدايي پایلو د اعلان دقیقه نېټه ده.

اغلې ظریفي زیاته کړه، د میزان شپږمې ولسمشریزو ټاکنو د ابتدايي پایلو د اعلان نېټې باندې کار روان دی.

د افغانستان د ولسمشریزو ټاکنو د مهالوېش له مخې په پام کې وه د ټاکنو پایلې د میزان په ۲۷مه اعلان شي، خو د هغه څه له امله چې تخنیکي ستونزې او په رایو کې د پراخې درغلۍ ادعاوې یادېږي، د پایلو اعلان تر نامعلومې نېټې ځنډېدلی دی.

د افغانستان د فوټسال ملي لوبډله نن له ازبکستان سره لوبېږي

د ښاغلي شاداب په خبره، د افغانستان د فوټسال ملي ټيم په دې ډله کې پر ازبکستان سربېره، نیپال او تاجکستان سره هم لوبې لري.

د افغانستان د فوټبال فدراسیون مطبوعاتي مسوول شفیع شاداب ازادي راډيو ته وویل، دغه لوبې د فوټسال نړیوال جام مقدماتي سیالیو په چوکاټ کې د اسیايي ملتونو جام سیالیو ته د لار موندنې په هدف ترسره کېږي.

هغه وویل، د افغانستان او ازبکستان لوبه د ایران په ارومیه ښار کې ترسر کېږي.

د ښاغلي شاداب په خبره، د افغانستان د فوټسال ملي ټيم په دې ډله کې پر ازبکستان سربېره، نیپال او تاجکستان سره هم لوبې لري.

د دې لوبو په پای کې له هرې ډلې څخه دوه ټیمونه د اسیا فوټسال اتلولیو ته لاره مومي چې ټاکل شوې په ۲۰۲۰ میلادي کال کې په ترکمنستان کې وشي.

هلمند کې د کوکنارو پر ځای سویابین کرل کیږي

د دغه ولایت د کرنې رئیس رفیع الله قلم نن ازادي راډيو ته وویل چې د هلمند اب هوا د سویابینو کښت ته مناسبه ده.

د دغه ولایت د کرنې رئیس رفیع الله قلم نن ازادي راډيو ته وویل چې د هلمند اب هوا د سویابینو کښت ته مناسبه ده.

نوموړي وویل، سویابین سږکال د هلمند په مرکز لښکرګاه، ناوه، نادعلي او نهرسراج ولسوالیو کې کرل شوي چې ښه حاصل ورکړی.

په هلمند کې تازه د سویابینو د راټولولو فصل پیل شوی.

د کرنې وزارت وايي، د کوکنارو پرځای د سویابینو کرکیله بزګرانو ته تر ډېره اقتصادي ګټې لري.

روسیه نن د لسګونو افریقایې مشرانو د غونډي کوربه ده

د روسیې ولسمشر ولادیمیر پوتین به د سوچي دا دوه ورځنۍ سرمشریزه له خپل مصري سیال عبدالفتاح السیسي سره په ګډه پرانیزي.

دا غونډه د روسیې په ساحلي ښار سوچي کې داسې مهال جوړیږي چې مسکو په افریقا کې د نفوذ د ډیرولو هڅه کوي.

د روسیې ولسمشر ولادیمیر پوتین به دا دوه ورځنۍ سرمشریزه د خپل مصري سیال عبدالفتاح السیسي سره په ګډه پرانیزي.

السیسي د افریقایې ټولني مشري هم کوي.

کرملین ویلي، د افریقا د ۵۴ هېوادونو او حکومتونو له مشرانو څخه ۴۳ یې په دې غونډه کې ګډون منلی دی. د کرملین په خبره ولسمشر پوتین به له دیارلسو افریقایې مشرانو سره دوه اړخیزي غونډي هم ولري.

لویدیځ هېوادونه او چین له وړاندي په افریقا کې یو ثابت ځای لري. روسیه او هند هڅه کوي چې په دې وچه کې نفوذ ولري.

د افغانستان د سولې په اړه د اروپايي ټولنې او امریکا ګډه اعلامیه

ملګرو ملتونو، اروپايي ټولنې او امریکا د افغانستان د جګړې له ټولو ښکېلو غاړو غوښتي چې د بین الافغاني خبرو د راتلونکي پړاو پر مهال دې اوربند وکړي.

د ملګرو ملتونو سازمان، اروپايي ټولنه او د امریکا په شمول یوشمېر لویدیځ هېوادونه وايي، د یوې دایمي سولې تړون ته د رسېدلو لپاره چې پرې افغانستان کې جګړې ختمه شي، ژمن پاتې دي.

د دوی ګډه اعلامیه پرون له بروکسله خپره شوه، چېرته چې د افغانستان د سولې لپاره د امریکا ځانګړي استازي زلمي خلیلزاد د بریتانیا، فرانسې، جرمني، ایټالیا او ناروې او د اروپايي ټولنې او ملګرو ملتونو له استازیو سره د افغانستان د سولې پر مسلې خبرې وکړې.

خلیلزاد د دوو ورځو لپاره بروکسل ته تللی دی.

په اعلامیه کې دا ذکر شوي چې لویدیځوال د افغانستان له حکومت، طالبانو، نورو افغان سیاستوالو او د مدني ټولنې له مشرانو سره ګډ کار ته لیواله دي، ترڅو د یوې جامع او دوامداره سولې تړون ته سره ورسیږي.

ملګرو ملتونو، اروپايي ټولنې او امریکا د افغانستان له ټولو ښکېلو غاړو غوښتي چې د بین الافغاني خبرو د راتلونکي پړاو پر مهال دې اوربند وکړي، ترڅو د افغانستان د راتلونکي لپاره د حل یوه سیاسي لاره پیدا شي.

طالبانو او نورو افغان ډلو ته ویل شوي چې پرې نږدي هېواد یې د القاعدې او نورو نړیوالو تروریستي ډلو لپاره امن ځای شي.

طالبانو ته دا هم ویل شوي چې ددغو ډلو له ملاتړ او ورسره له اړیکو لاس واخلي.

پرون د طالبانو د سیاسي دفتر ویاند سهیل شاهین ویلي چې چین به د اکتوبر په ۲۸ او نهه ویشتمه د یو لړ بین الافغاني خبرو کوربه وي.

پروان کې پولیسو څلور طالب قومندانان نیولي دي

د پروان امنیه قومندانۍ ویاند محمد محفوظ ولي زاده وايي، دوو قومندانانو د غوربند دره کې د جګړې مسئولیت درلود او دوه نور یې بغلان کې د طالبانو قومندانان دي.

د پروان امنیتي چارواکي وايي، پولیسو د طالبانو څلور قومندانان په دغه ولایت کې نیولي دي.

د پروان امنیه قومندانۍ ویاند محمد محفوظ ولي زاده نن ازادي راډیو ته وویل، د طالبانو دا قومندانان چې د ننګرهار او بغلان اصلي اوسیدونکي دي او پولیسو د کشفي او استخباراتي معلوماتو پر مټ ونیول.

ښاغلي ولي زاده زیاته کړه چې دغه څلور کسان د جبل السراج ولسوالۍ د پل متک په مربوطاتو کې داسې مهال نیول شوي چې غوښتل یې د غوربند درې ته لاړ شي.

ددوی دوو قومندانانو د غوربند دره کې د جګړې مسئولیت درلود او دوه نور یې بغلان کې د طالبانو قومندانان دي.

کندهار کې پوليسو دوه انسان تښتوونکي وسله واله نښته کې وژلي

د کندرهار د والي ویاند وايي دغو کسانو څه موده وړاندې یو ماشوم تښتولی او وژلی و.

د کندهار د پوليسو ویاند جمال ناصر بارکزي ازادي راديو ته وويل چې تېره شپه پوليسو د کندهار د پنځمې امنیتي حوزې اړوند د ښوراندام سیمه کې دوه هغه انسان تښتوونکي وژلي.

د هغه په خبره دغو کسانو څه موده وړاندې د کندهار د دوهمې حوزې له فاروقيه مدرسې څخه يو ماشوم تښتولی و او بیا یې د هغه له کورنۍ پيسې غوښتې.

بارکزی وایي دواړه انسان تښتوونکي له پوليسو سره په نښته کي وژل شوي؛ خو دغو کسان تښتولی ماشوم لا وختي وژلی و.

د پوليسو ویاند وایي د انسان تښتوونکو پر وړاندې کندهار کې د امنیتي ځواکونو هڅې چټکې شوي او وروستیو کې د ګڼو تښتونو مخه نيول شوې ده.

د افغانستان په لویو ښارونو کندهار، کابل، هرات، ننګرهار او بلخ کې تل د انسان تښتونې پېښې ترسره کیږي چې اکثر تښتول شوي کسان یا وژل کیږي یا شکنجه ورکول کیږي.

ترکیه: سوریه کې له اوسنۍ سیمې بهر د کرد جنګیالیو پرضد د عملیاتو اړتیا نشته

د ترکیې او روسیې ولسمشرانو پرون د تورې بحیرې په سوچي استراحت ځای کې د کتنې پرمهال د سوریې شمال کې د اوربند دغه موافقه وکړه.

ترکیې اعلان کړی د سوریې په شمال ختیځ کې د عملیاتو له اوسنۍ ساحې بهر د کرد جنګیالیو پر ضد د عملیاتو اړتیا نه لیدل کیږي.

د ترکیې دفاع وزارت پرون (اکټوبر ۲۲مه) په یوه اعلامیه کې ویلي چې نوي عملیات نه پیلوي ځکه امریکا متحده ایالتونو انقرې ته معلومات ورکړی چې کُرد ملیشې د سوریې د شمال له سرحدي سیمو وتلي دي.

پرون د ترکیې ولسمشر رجب طیب اردوغان او د روسیې ولسمشر ولادمیر پوتین د روسیې په ساحلي ښار سوچي کې شپږ ساعته غونډه وکړه.

په دې دوه اړخیزه غونډه کې موافقه وشوه چې د سوریې په شمال ختیځ کې ګډې ګزمې وشي او کُرد جنګیالیو ته بیا نوی ضرب الاجل ټاکلی چې له سیمې پوره ووځي.

د ناټو دفاع وزیران سبا بروکسل کې د افغانستان په اړه خبرې کوي

د ناټو غړو او ددغه سازمان ملګرو هېوادونو دفاع وزیران به د افغانستان امنیتي او دفاعي ځواکونو او هم په دغه هېواد کې د سولې له بهیر څخه د ملاتړ اعلان وکړي.

ټاکل شوې ده چې د ناټو دفاع وزیران په بلجیم کې سبا پنجشنبې د افغانستان په اړه غونډه وکړي.

د ناټو د سرمنشي مرستیال ویاند پیرز کزالي په پلازمېنه بروکسل کې ازادي راډیو ته د دې غونډې په اړه وویل: "دفاع وزیران به د افغانستان د ماموریت په برخه کې خپله ژمنه بیا وکړي، یعني هم به د پوځیانو په برخه کې او هم د هغوی د تمویل په برخه کې."

هغه وویل، هدف دا دی چې د افغانستان امنیتي او دفاعي ځواکونه لا پياوړي شي او وکولی شي چې له نړیوال تروریزم سره مبارزه وکړي ترڅو د یوې تلپاتې سولې ټینګیدو ته زمینه برابره شي.

په بروکسل کې به د سبا ورځې په غونډه کې د ناټو د غوڅ ملاتړ د ماموریت په چوکاټ کې د ښکېلو هېوادونو دفاع وزیران برخه واخلي او د افغانستان د ملي دفاع سرپرست وزیر اسد الله خالد به هم پکې ګډون وکړي.

د اروپایي ټولنې او امریکا استازو د افغانستان د سولې مساله وڅیړله

دا غونډه پرون د بلجیم په پلازمینه بروکسل کې د اروپایي ټولنې په مرکزي دفتر کې ترسره شوه.

د اروپایي ټولنې او امریکایي استازیو په غونډه کې د افغانستان د سولې مساله وڅیړل شوه.

دا غونډه پرون د بلجیم په پلازمینه بروکسل کې د اروپایي ټولنې په مرکزي دفتر کې ترسره شوه.

د افغانستان لپاره د اروپایي ټولنې ځانګړي استازي رونالډ کوبیا پر ټویټر لیکلي دي چې دا ډېره ښه غونډه وه، خو په دې برخه کې یې نور توضیحات نه دي ورکړي.

د افغانستان د سولې لپاره د امریکا د بهرنیو چارو د وزارت ځانګړی استازی زلمی خلیلزاد په بروکسل کې دی او د دوشنبې په ورځ یې د ناټو له عمومي منشي سره کتلي و.

"روسیه کې د څرځای پرسر لانجه د پنځو کسانو د وژل کېدو سبب شوې"

ارشیف

د روسیې د کورنیو چارو وزات وایي، داسې ښکارې چې د څرځای پر سر لانجه د روسیې په روستوف کې د پنځو کسانو د وژلو سبب شوې ده.

په روستوف کې د روسیې د کورنیو چارو د وزارت سیمه ییزو استازیو پرون وویل، دا پیښه د روستوف په ارلوفسکي سیمه کې چې د ماسکو د جنوب په ۱۲۰۰ کیلومترۍ کې پرته ده، رامنځته شوې ده.

د ډزو پرمهال دوه تنه نور ټپیان شوې هم دي.

"ډونالډ ټرمپ د اوکراین له ولسمشر څخه غوښتي و چې د جو بایډن په اړه څېړنه وکړي"

امریکایي ډیپلومات ویلیم ټیلر دا خبرې پرون د کانګرس د یوه درې کسیزې ډلې مخې ته وکړې.

په اوکراین کې د امریکا متحده ایالتونو د سفارت شارژدافیر وایي، ولسمشر ډونالډ ټرمپ د اوکراین له ولسمشر څخه غوښتي و چې مخکې تر دې چې له ده سره په سپینه ماڼۍ کې وګوري، د ګازو د هغې کمپنۍ په اړه دې تحقیقات وکړي چې د ده له سیاسي مخالف سره ارتباط لري.

امریکایي ډیپلومات ویلیم ټیلر دا خبرې پرون د کانګرس د یوه درې کسیزې ډلې مخې ته وکړې.

ډیموکراتان غواړي چې ولسمشر ټرمپ له کییف سره د مشروطې معاملې له امله استیضاح کړي.

ښاغلي ټرمپ د جولای په پنځه ویشتمه د اوکراین له ولسمشر زیلینسکي سره په ټیلفون خبرې کړې وې او له هغه څخه یې غوښتې و چې په اوکراین کې د جوبایډن او د هغه د زوی د شتمنیو په اړه معلومات ورکړي.

دا هغه وخت و چې ولسمشر ټرمپ له کییف سره د نژدې څلور سوه میلیونه ډالرو پوځي مرسته درولې وه.

جوبایډن د ډیموکراتانو مخکښ کاندید دی او د دوه زره شلم کال د ولسمشرۍ په انتخاباتو کې د ټرمپ مهم سیال ګڼل کیږي.

د افغانستان د فوټسال ملي لوبډله د اسیايي اتلولیو مقدماتي لوبو لپاره ایران ته لاړه

د افغانستان د فوټبال فدراسیون رسنیز مسوول شمس امیني ازادي راډیو ته وویل چې افغانستان د دغو سیالیو په لړ کې خپله لومړۍ لوبه سبا چهارشنبه د ازبکستان پر وړاندې کوي.

د افغانستان د فوټسال ملي لوبډله د اسیا د فوټسال اتلولیو په مقدماتي سیالیو کې د ګډون لپاره ایران ته رسېدلې.

د افغانستان د فوټبال فدراسیون رسنیز مسوول شمس امیني ازادي راډیو ته وویل چې افغانستان د دغو سیالیو په لړ کې خپله لومړۍ لوبه سبا چهارشنبه د ازبکستان پر وړاندې کوي.

ښاغلی امیني وايي، په دغو سیالیو کې افغانستان، له ازبکستان، تاجکستان او نیپال سره په الف ګروپ کې دی.

د افغانستان د فوټسال ملي لوبډلې دوهمه لوبه د اکتوبر په ۲۴مه د تاجکستان او د همدې میاشتې په ۲۵مه د نيپال پر وړاندې ده.

د دې سیالیو په پای کې د هر ګروپ څخه دوه مخکښې لوبډلې د ۲۰۲۰ میلادي د اسیا د فوټسال سیالیو اتلولیو لوبو ته چې په ترکمانستان کې کېږي، لار پیدا کوي.

د ترکیې په شمال کې کرد جنګیالیو ته د ترکیې ولسمشر خبرداری

د سوریې په شمال‌ختیځ کې پر کرد مېشتو سیمو د ترکیې په پوځي عملیاتو کې موقت اوربند، نن ماښام پای ته رسېږي.

د ترکیې ولسمشر رجب طیب اردوغان ویلي، که د سوریې په شمال کې کرد ملېشه د امریکا په منځګړیتوب له شوې موافقې سره سم عمل ونه‌کړي، انقره به هلته پوځي عملیات په شدت جاري وساتي.

ښاغلي اردوغان نن (اکټوبر ۲۲مه) روسیې ته تر روانېدو مخکې په انقره کې خبریالانو ته وویل، د کردانو د خلکو ژغورنې ډله (وای پي جي) باید له سیمې ووځي، ترڅو ترکیې ته زمینه برابره شي چې هلته خوندي سیمه جوړه کړي.

انقره غواړي چې د سوریې په خاوره کې خپلې پولې ته نږدې خوندي زون جوړ کړي او هغه دوه میلیونه سوریایي وګړي چې په وروستیو کلونو کې له جګړې تښتېدلي، بېرته خپل هېواد ته ستانه او هلته ځای پر ځای کړي.

اردوغان ویلي، که چېرې هغه ژمنې چې امریکا له دوی سره کړي عملي نه‌شي، نو "موږ به له هغه ځایه چې عملیات مو درولي وو، له سره پیل وکړو."

قزاقستان کې ۱۴ کسان د داعش ډلې د ملاتړ په تور محاکمه شول

له مشکوکو کسانو ۱۳ تنه‌یې نن (اکټوبر ۲۲مه) د قزاقستان په پلازمېنه نورسلطان کې تر سختو امنیتي تدابیرو لاندې د محکمې خونې ته ولېږدول شول.

د قزاقستان یوې محکمې ۱۴ قزاقستانیان چې په سوریه کې د اسلامي دولت یا داعش ډلې په ملاتړ په جګړه تورن وو، محاکمه کړل.

له مشکوکو کسانو ۱۳ تنه‌یې نن (اکټوبر ۲۲مه) د قزاقستان په پلازمېنه نورسلطان کې تر سختو امنیتي تدابیرو لاندې د محکمې خونې ته ولېږدول شول.

یو مشکوک وګړی چې زخمي و، له روغتونه د وېډیو له لارې محاکمې ته حاضر شوی و.

څارنوالانو هغوی په ترورېستي فعالیتونو کې په ونډه اخیستو، د وګړو په استخدام، د ترورېزم لپاره په تبلیغ او د جنایتونو په ترسره کولو تورن کړي دي.

د راپورونو پر اساس، د قزاقستان سلګونه اتباع سږ کال د "ژوسن" په نوم په خاصو عملیاتو کې له سوریې بېرته خپل هېواد ته ستانه کړای شول.

لغمان کې سلګونه ښوونکو کاري اعتصاب کړی

ښوونکي وايي، حکومت شپږ کاله مخکې ژمنه وکړه چې یوه-یوه نمره ځمکه به ورکړي، خو تر اوسه‌یې نه‌ده عملي کړې.

د لغمان په علینګار ولسولۍ کې نن د ښوونکو د اعتصاب دوهمه ورځ ده. له دې امله زرګونه زده‌کوونکي ښوونځي ته له تلو پاتې شوې دي.

په علینګار کې یوه ښوونکي هېواد نن (اکټوبر ۲۲مه) ازادي راډیو ته ویل: "له موږ سره حکومت شپږ کاله وشول چې د یوې-یوې نمرې ځمکې ژمنه کړې، خو تر اوسه‌یې نه‌ده عملي کړې."

په علینګار ولسوالۍ کې د ۸۰ ښوونځیو ۱۴۰۰ ښوونکي په دې اعتصاب کې ګډون لري.

خو د افغانستان د پوهنې وزارت ویاندې نوریه نزهت ویلي چې دا ستونزه به حل کړي.

اغلې نزهت ازادي راډیو ته وویل، حکومت د ځمکې پر ځای، ښوونکو ته تیار کورونه ورکوي، خو ښوونکي باید حوصله وکړي.

د جاپان نوي امپراتور ناروهیتو د واک تاج پر سر کړ

۵۹ کلن ناروهیتو ته قدرت د هغه له پلار، امپراتور اکیهیتو رسېدلی دی.

د جاپان نوي امپراتور ناروهیتو نن (اکټوبر ۲۲مه) په رسمي ډول د واک تاج پر سر کړ.

دغو ځانګړو مراسمو کې د افغانستان د ولسمشر په ګډون د ۱۷۰ هېوادونو رهبران حاضر وو.

۵۹ کلن ناروهیتو ته قدرت د هغه له پلار، امپراتور اکیهیتو رسېدلی دی.

نوموړی د جاپان لومړی امپراتور دی چې تر دوهمې نړیوالې جګړې وروسته زېږېدلی دی.

د جاپان نوي امپراتور په اکسفورډ پوهنتون کې زده‌کړې کړې دي.

د هغه مېرمن، ماساکو نومېږي، د جاپان پخوانۍ ډیپلوماته او د هاروارډ پوهنتون له زده‌کوونکو ده.

د جاپانیانو په باور، دا هېواد د نړۍ تر ټولو زړه شاهي سلسله لا هم پالي. هغوی باور لري چې د جاپان د شاهي سلسلې تاریخ ۲۶۰۰ کلونو ته رسېدلی دی او دا د خپل هېواد له فرهنګي میراثونو ګڼي.

د کاناډا پارلماني ټاکنې؛ ښايي حاکم لېبرال ګوند د پارلمان اکثریت ونه‌ګټي

۴۷ کلن جسټن ټروډو پرون مخکې له مخکې په مونټریال کې خپلو پلویانو ته د بري مبارکي ورکړه.

د کاناډا په پارلماني ټاکنو کې به اوسنی لېبرال صدراعظم جسټن ټروډو د پارلمان له ۳۳۸ څوکيو ډېرې وګټي.

د کاناډا په پارلمان کې دا ګټه به جسټن ټروډو ته وخت ورکړي چې یو حکومت جوړ کړي، خو داسې ګڼل کېږي چې لېبرالان ښايي د اکثریت په ګټلو ونه‌توانېږي. که چېرې مطلق اکثریت ونه‌ګټي، هغوی به مجبور وي چې په قدرت کې د پاتې کېدو او د قوانینو د تصویب لپاره پر نورو ګوندونو تکیه وکړي.

د کاناډا د پارلماني ټاکنو وروستۍ پایلې به نن د اکټوبر په ۲۲مه اعلان شي.

۴۷ کلن جسټن ټروډو پرون مخکې له مخکې په مونټریال کې خپلو پلویانو ته د بري مبارکي ورکړه.

د ټاکنو کمېسیون د دارالانشاء رئیس د ډېټا سنټر مهرولاک ماتېدل رد کړل

د ټاکنو کمېسیون هم پرون ناوخته په یوې اعلامیه کې د ټاکنو کمېسیون د نتایجو جمع‌بندۍ مرکز د قفل ماتېدل رد کړل او هغه‌یې د ټولنیزو رسنیو شایعات وبلل.

د افغانستان د انتخاباتو خپلواک کمېسیون د دارالانشا رئیس حبیب‌الرحمن ننګ هغه ادعاوې ردوي چې ګواکې د پولیسو ځانګړو ځواکونو د انتخاباتو کمېسیون د ډیجیټالي نتایجو د جمع‌بندۍ او ارزونې مرکز (ډیجیټال سنټر) مهرولاک مات کړی او ورننوتي دي.

ښاغلي ننګ پرون ناوخته (میزان ۲۹مه) ازادي راډیو ته وویل چې یو قفل هم نه‌دی مات شوی.

دی وايي: "بلو باکسونه او قفلونه له ټولو څارونکو سره شته، له هغوی سره هېڅ قفل نه‌دی خلاص شوی. موږ د طرزالعمل مطابق کارونه ترسره کوو. هېڅ داسې څه نه‌دي شوي چې د خلکو د تشویش سبب شي."

د عبدالله عبدالله په مشرۍ د ثبات او همپالنې انتخاباتي ټیم د دوشنبې په ورځ (میزان ۲۹مه) ادعا وکړه چې د ټاکنو کمېسیون ډیجیټال سنټر مهرولاک مات شوی.

د دغه ټیم یوه غړي علي احمد عثماني وویل، په دې کار کې د یوه ځانګړي ټاکنیز ټیم کسان هم شامل وو. ښاغلي عثماني د ټاکنو کمېسیون د امنیتي سلاکار او همداراز د دارالانشاء د مشر حبیب‌الرحمن ننګ د دندې د ځنډېدو غوښتنه وکړه.

د کورنیو چارو وزارت په ټاکنیز بهیر کې د پولیسو هر ډول مداخله رد کړې ده.

د ټاکنو کمېسیون هم پرون ناوخته په یوې اعلامیه کې د ټاکنو کمېسیون د نتایجو جمع‌بندۍ مرکز د قفل ماتېدل رد کړل او هغه‌یې د ټولنیزو رسنیو شایعات وبلل.

د دغه کمېسیون په اعلامیه کې ویل شوي چې امنیتي ساتونکي د سړې هوا له کبله د ټاکنیزو زده‌کړو ودانۍ دهلېز کې ځای پر ځای شوي او "د دې کار لپاره یوازې د ودانۍ عمومي دروازه د مسئول کس او ملي پولیسو د مسؤلینو په شتون کې پرانیستل شوې ده."

د ملګرو ملتونو امنیت شورا په ننګرهار کې وروستی برید غندلی

د ملګرو ملتونو د امنیت شورا په بیان کې د دې شورا غړو یو وار بیا پر دې ټینګار کړی چې د ترهګرۍ هر ډول او بڼه نړیوالې سولې او امنیت ته یو جدي ګواښ دی.

د ملګرو ملتو امنیت شورا د ننګرهار په هسکه مېنه کې پر یوه جومات د شوي برید په تړاو تازه بیان کې ویلي، د دا ډول ترهګریزو بریدونو له ترسره کوونکو، تنظیموونکو او تمویلوونکو سره باید حساب وشي.

د ملګرو ملتونو امنیت شورا د دوشنبې په ورځ په یوه اعلامیه کې د هسکې مېنې د جو درې په جومات کې د جمعې د ورځې برید وحشیانه او ناځوانمردانه بللی او پر ټولو هېوادونو یې ټینګار کړی چې نړیوالو قوانینو ته د خپلې ژمنتیا پر بنسټ دې، د دا ډول پېښو مخنیوي کې د افغانستان له دولت او اړوند چارواکو سره فعاله همکاري وکړي.

د ملګرو ملتونو د امنیت شورا په بیان کې د دې شورا غړو یو وار بیا پر دې ټینګار کړی چې د ترهګرۍ هر ډول او بڼه نړیوالې سولې او امنیت ته یو جدي ګواښ دی.

تر دې مخکې د ملګرو ملتونو د عمومي منشي انتونیو ګوترش په شمول د نړۍ یو شمېر نورو سیاستوالو او د بشري حقونو مدافع بنسټونو د ننګرهار وروستی خونړی برید غندلی و.

د تېرې جمعې په ورځ په دې برید کې لږ تر لږه ۷۰ تنه لمونځ کوونکي ووژل شول او تر ۶۰ زیات نور ټپیان شول.

لبنان کې اعتراضونه؛ د حکومت کابینې د اصلاحاتو یوه نوې بسته تصویب کړه

په دې تازه اقدام کې د چارواکو او د پارلمان د استازو امتیازونه کمېږي.

د لبنان کابینې د اصلاحاتو یوه بسته تصویب کړه چې په نتیجه کې یې د دغه هېواد اقتصادي بحران پای ته ورسېږي.

د لبنان صدراعظم سعد حریري د دوشنبې په ماښام (اکټوبر ۲۱مه) په یوې ټلوېزیوني وینا کې وویل، دا اصلاحات تر ۷۲ ساعته ضرب‌الاجل وروسته تصویب شول.

حریري په دې تازه اقدام کې د چارواکو او د پارلمان د استازو د امتیازونو د کمېدو خبره هم وکړه.

ده وویل: "د اوسنیو او پخوانیو ټولو استازو او وزیرانو معاشونه ۵۰ سلنه کمېږي. د بیارغونې او پراختیا د کمېټې بودجه چې په جنوب کې د بې‌ځایه شویو لپاره کار کوي، ۷۰ سلنه کمېږي."

لبنان په وروستیو څو ورځو کې د پراخو حکومت ضد مظاهرو شاهد وو چې په څو وروستیو لسیزو کې یې ساری نه‌درلود.

د دوشنبې په ورځ هم زرګونه کسان د بیروت سړکونو ته راووتل او د اصلاحاتو او دندې د موندلو لپاره‌یې د حکومت د اقداماتو غوښتنه کوله.

داسې ښکاري چې تازه اقدام یو شمېر اعتراض کوونکي قانع کړي دي.

فرانسه د سوریې شمال کې د اوربند غځېدل غواړي

د ترکیې د موافقې له مخې نن ماښام په سوریه کې د کرد ځواکونو پر وړاندې د ترکیې د عملیاتو توقف یا د اوربند وخت پای ته رسېږي.

د فرانسې ولسمشر خپل روسي سیال ته ویلي چې پاریس د سوریې په شمال‌ختیځ کې د اوربند د تمدید غوښتونکی دی.

د فرانسې ولسمشرۍ ماڼۍ ویلي، امانوئل مکرون د اکټوبر پر ۲۱مه له ولادیمیر پوتین سره ټیلیفوني خبرې وکړې او له ډیپلوماتیکو لارو یې د سوریې په شمال کې د اوربند د غځېدو او د کړکېچ د ختمېدو پر اهمیت ټینګار وکړ.

د ترکیې د موافقې له مخې نن ماښام په سوریه کې د کرد ځواکونو پر وړاندي د ترکیې د عملیاتو توقف یا د اوربند وخت پای ته رسېږي.

ترکیې خبرداری ورکړی چې د اکټوبر د ۲۲مې تر ضرب‌الاجل وروسته به، پر هر هغو کرد جنګیالیو برید وکړي چې په خوندي زون کې پاتې شوي وي.

تمه ده د روسیې او ترکیې ولسمشران ولادیمیر پوتین او رجب طیب اردوغان نن سې شنبه د روسیې په سوچي ښار کې سره وګوري.

نتانیاهو د اسرائیل د ائتلافي حکومت په جوړولو کې ناکام شو

اوس به د نتانیاهو د سیال شین او سپین ګوند مشر بیني ګانتس څخه وغوښتل شي چې نوی حکومت جوړ کړي.

د اسرائیل صدراعظم بنیامین نتانیاهو د دغه هېواد تر پارلماني انتخاباتو وروسته د ائتلافي حکومت په جوړولو کې ناکام شو.

نتانیاهو چې د ښي اړخي لیکود ګوند مشر دی ویلي چې خپلې هڅې دروي او د نوي حکومت د جوړولو واک د دغه هېواد ولسمشر رووین ریولین ته بېرته سپاري.

ریولین ویلي چې دی به اوس له بېلابېلو سیاسي ګوندونو سره سلا مشورې وکړي، ترڅو ورته ووایي چې په پام کې لري دا دنده د نتانیاهو عمده سیال او د مرکزي "شین او سپین ګوند" مشر بینې ګانتس ته وسپاري.

د اسرائیل د ولسمشر تر دې اعلان دمخه نوموړي روانه اونۍ دوه ځله له نتانیاهو او ګانتس سره ولیدل.

دواړه ګوندونه ونه‌توانېدل د تېرې میاشتې په پارلماني انتخاباتو کې لوی اکثریت وګټي.

د افغانستان ولسمشر نن له جاپاني چارواکو سره ګوري

ولسمشر اشرف غني پرون دوشنبه د جاپان پلازمېنې توکیو ته ورسېد.

د ارګ د یوې اعلامیې له مخې ولسمشر اشرف غني پرون دوشنبه د جاپان پلازمېنې توکیو ته ورسېد او ټاکل شوې نن (اکټوبر ۲۲مه) د جاپان د نوي امپراتور د تاج اېښودلو په مراسمو کې ګډون وکړي.

په اعلامیه کې په دې اړه نور جزئیات نه‌دي ورکړل شوي چې د ولسمشر غني او جاپاني چارواکو ترمنځ خبرې به پر کومو مسایلو ورټول وي.

جاپان په تېرو ۱۸ کلونو کې څه باندې یو میلیارد او ۲۰۰ میلیونه ډالر له افغانستان سره مرسته کړې ده.

توکیو دغه‌راز په ۲۰۰۲ او ۲۰۱۲ کال کې له افغانستان سره د مرستو د دوو لویو نړیوالو غونډو کوربه‌توب هم کړی دی.

"خپلمنځي اختلافاتو له امله غزني کې نهه طالبان په زهرو وژل شوي"

د غزني د والي ویاند وايي، دا دوهم ځل دی چې په غزني کې طالبان په زهرو وژل کېږي. څلور میاشتې دمخه هم په همدې اندړ ولسوالۍ کې پنځو طالبانو ته زهر ورکړل شوي وو.

د افغانستان په جنوب کې د غزني سیمه‌ییز چارواکي وایي، د اندړ ولسوالۍ په مربوطاتو کې نهه طالبان په زهرو وژل شوي دي.

د غزني د والي ویاند عارف نوري ازادي راډیو ته وویل، دغه طالبان د خپلمنځي اختلافاتو په نتیجه کې مسموم کړای شوي دي.

ښاغلي نوري زیاته کړه: "د دوی ترمنځ خپلمنځي اختلافات دي. د وسله‌والو نښتو ترڅنګ کله چې فرصت پیدا کړي، نو د یو بل په ډلو کې نفوذي کسان لري او دا افراد مسموموي. ظاهراً دغه وسله‌وال د مولوي اسماعیل د ډلې اړوند دي چې دی د کوټې شورا یو مهم غړی دی."

د ښاغلي نوري په خبره په دغه ولایت کې د مولوي اسماعیل او د طالبانو د سرې قطعې غړو ترمنځ اختلافات شته چې کله نا کله په خپلو کې فزیکي او حتی وسله‌والو شخړو ته اړ باسي.

دا دوهم ځل دی چې په غزني کې طالبان په زهرو وژل کېږي. د غزني د والي ویاند د معلوماتو له مخې شااوخوا څلور میاشتې دمخه هم په همدې اندړ ولسوالۍ طالبانو ته په اوبو کې زهر ورکړل شوي وو چې ۵ تنه‌یې مړه شول.

ښاغلي نوري وویل په وروستۍ پېښه کې چې یوه ورځ دمخه شوې، ۶ تنه طالبان ځای پر ځای مړه شوي او ۳ نورو یې په یوه سیمه‌ییز روغتون کې ساه ورکړه.

طالب ویاند ذبیح‌الله مجاهد له ازادي راډیو سره په اړیکه کې دا موضوع رد کړې او "پروپاګند" یې بللی دی.

نور راوښيه

XS
SM
MD
LG