د لاسرسۍ وړ لېنکونه

تازه خبر
پنجشنبه ۲۶ چنګاښ ۱۳۹۹ کابل ۰۶:۲۶

نړۍ

ګُرجستان کې له یوې اوونۍ راهیسې پراخې مظاهرې روانې دي

ګُرجستان کې مظاهرې

د ګُرجستان پایتخت تبلیسي د ۷مې ورځې لپاره د پرله‌پسې پراخو مظاهرو شاهد و.

اعتراض کوونکو د پولیسو پر تاوتریخوالي او د روسیې پر وړاندې د دولت په سیاست غصه دي.

له دندې څخه د ګُرجستان د بهرنیو چارو د وزیر لیرې کول او تر وخت مخکې پارلماني انتخابات ترسره کول هم د اعتراض کوونکو مهمې غوښتنې دي.

د ګُرجستان د پارلمان رئیس د اعتراضونو په هماغه پیل کې له خپلې څوکۍ استعفا کړې.

د تېرې شپې په اعتراضونو کې یو شمېر معترضینو، هغه ۱۸ کلن اعتراض کوونکي سره د یووالي په خاطر یوه سترګه تړلې وه چې د دې مظاهرو په پیل کې یې د پولیسو په مردکي یوه سترګه ړنده شوې.

دې اعتراض کوونکو د شپې په پای کې د اروپايي ټولنې ملي سرود هم وغږاوه.

اعتراض کوونکو وروسته له هغې مظاهرې پیل کړې چې د ګُرجستان په پارلمان کې د روسیې د پارلمان یو غړي ته اجازه ورکړل شوه چې د رئیس په څوکۍ کېني.

د ورځې تازه خبرونه دلته ولولئ

هند کې د کرونا ویروس د مثبتو پېښو شمېر یو میلیون ته نږدې شو

هند

په هند کې پرون چهارشنبه د کرونا ویروس ۳۲ زره او ۶۹۵ نوې پیښې ثبت شوې چې په دې سره په دې هېواد کې د دغه ویروس د مثبتو پېښو شمېر یو میلیون ته نږدې شو.

د کرونا ویروس د دغو نویو پېښو له زیاتېدو سره د هند په زیات نفوس لرونکي لوېدیځ ایالت ګوا کې چې دوه اوونۍ د سیلانیانو پر مخ پرانیستل شوی و، بېرته بندیزونه لګول شوي دي.

د هند د روغتیا وزارت پرون تأیید کړه چې په ټول هېواد کې ۹۶۸ زره او ۸۷۶ د کرونا ویروس پېښې ثبت شوي، خو دغه‌راز یې په ۲۴ ساعتونو کې له دې ویروسه د ۶۰۶ کسانو د مړه کېدو خبر هم ورکړ چې دا په یوه شپه او ورځ کې د مړینو نوی ریکارډ دی.

په دې سره په هند کې د کرونا له امله د مړو شویو کسانو شمېر نږدې ۲۵ زرو ته ورسېد.

د هند د روغتیا وزارت وایي چې له دې ویروسه د رغېدونکو کسانو شمېر ورځ تر بلې زیاتېږي.

د هند د لسګونه نورو ایالتونو په هغو سیمو کې چې د کرونا ویروس د سرایت خطر په‌کې زیات دی، بندیزونه لګول شوي او یوازې اړینو، خوراکي موادو او روغتیایي خدمتونو ته اجازه ورکړل شوې ده.

د ورلډومېټرز اینفو وېب‌پانې د شمېرو له مخې په ټوله کې نړۍ کې پر کرونا د اخته شویو کسانو شمېر نږدې ۱۳ میلیونه او ۷۰۰ زره کسانو او د مړو شویو نږدې ۵۰۰ او ۸۷ زره کسانو ته رسېدلی دی.

ترکمنستان کې د سکاروي ناروغۍ په اړه د روغتیا نړیوال سازمان اندېښنه

د روغتیا نړیوال سازمان نېښان

د روغتیا نړیوال سازمان په ترکمنستان کې د سکاروي ناروغۍ راپورونو ته اندېښنه ښکاره کړه.

ترکمنستان د منځنۍ اسیا یوازنی هېواد دی چې تر اوسه‌یې په رسمي ډول د کرونا ویروس د مثبتو پېښو خبر نه‌دی ورکړی.

په ترکمنستان کې د روغتیا نړیوال سازمان د پلاوي مشرې کاترین سمالوود د خپل ۱۰ ورځني سفر په پای کې د دغه هېواد حکومت ته وړاندیز وکړ چې د 'کووېډ-۱۹' ناروغۍ د خورېدو د مخنیوي لپاره ضروري روغتیایي خدمات ترسره کړي.

نوموړې زیاته کړه چې له دې سره ترکمنستان ته تللی پلاوی د سکاروي او سختې ساه لنډي ناروغي راپورونو ته اندېښمن دی.

کرونا ویروس ممکن د سکاروي په څېر د ناروغیو سبب شي، د همدې لپاره کاترین سمالوود د ترکمنستان حکومت ته لارښوونه کړې ده چې د کرونا ویروس د پېژندلو لپاره د ازموینو چارې پراخې کړي.

که څه هم تر اوسه د ترکمنستان حکومت د کرونا ویروس د مثبتو پېښو خبر نه‌دی ورکړی، خو د ازادې اروپا/ ازادي راډيو د خبریالانو د راپورونو له مخې د ترکمنستان ځینې سیمې قرنطین شوې دي او یو شمېر صنعتي مرکزونه بند شوي دي.

د ترکمنستان روغتیایي چارواکو د روانې اوونۍ په پيل کې له خلکو وغوښتل چې له خاورو دوړو د سږو د ساتنې لپاره له کوره بهر ماسکونه وتړي.

د ایران بوشهر بندر کې څو بېړیو اور اخیستی

بوشهر بند کې اور لګېدنه

د ایراني رسنیو په وینا پر څو بېړیو د چهارشنبې په ورځ د بوشهر په بندر کې اور ولګېد.

د دې اورلګېدنې له امله د چا د مرګ‌ژوبلې خبر نه‌دی ورکړل شوی.

د دې راپورونو له مخې لږترلږه اووه بېړۍ زیانمنې شوې دي.

په تېرو څو اوونیو کې د ایران په بېلابېلو سیمو کې پوځي او ملکي ځایونه په نښه شوي دي. د جون په وروستیو کې په پلازمېنه تهران کې یوه چاودنه په یوه پوځي مرکز کې، او بله په یوه روغتیایي مرکز کې وشوه چې دوهمې یوې یې د ۱۹ کسانو ژوند واخیست.

د جولای په دوهمه د چارواکو په وینا د نطنز په اټمي مرکز کې اور ولګېد. د ایران یوه امنیتي چارواکي بیا یوه ورځ وروسته وویل چې د دې اور لګېدو علت روښانه شوی دی، وروسته به‌یې بیا څرګند کړي.

د ایران د بهرنیو چارو وزارت مرستیال په مشرۍ یو پلاوی کابل ته راغی

د ایران د بهرنیو چارو وزارت مرستیال سید عباس عراقچي

د ایران د بهرنیو چارو وزارت مرستیال سید عباس عراقچي تېر ماښام د یوه سیاسي، امنیتي او اقتصادي پلاوي په مشرۍ کابل ته ورسېد.

څه باندې درې اوونۍ مخکې د افغانستان د بهرنیو چارو سرپرست وزیر محمد حنیف اتمر تهران ته تللی و.

د ښاغلي اتمر د سفر پر مهال دواړو لورو موافقه کړې وه چې د درېیو میاشتو په ترڅ کې به د هر اړخیزو همکاریو یو سند لاسلیک شي چې له مخې به‌یې په ایران کې ټول مېشت افغان کډوال د اوسېدو کارتونه ترلاسه کړي.

د دواړو هېوادونو ترمنځ سږکال وروسته تر هغه اړیکې یو څه ترینګلې شوې چې د غویي په ۱۲مه له ادعا سره سم د ایران سرحدي ځواکونو په لسګونو افغان کډوال مجبوره کړل چې هریرود سیند ته ځانونه واچوي.

له دې ډلې د ۱۲ تنو مړینه تأیید شوې ده. تر دې پېښې څو اوونۍ وروسته د ایران پولیسو په یزد کې د افغان کډوالو پر یوه موټر ډزې وکړې چې درې تنه په‌کې ووژل شول او اووه نور ټپیان شول.

د افغانستان د بهرنیو چارو وزارت تر اوسه د ایراني پلاوي د کابل د سفر د اجنډا په اړه څه نه‌دي ویلي.

امریکا د بهرنیو محصلانو پر ورتګ له بندیز لګولو تېر شو

د امریکا بیرغ

د امریکا متحده ایالاتو حکومت له هغه پلانه تېر شو چې غوښتل‌یې د کرونا وبا په خاطر دغه هېواد ته د بهرنیو محصلانو په ورتګ بندیز ولګوي.

حکومت مخکې ویلي و د هغو محصلانو چې درسونه انلاین شوي ویزې نه‌تمدیدوي، خو اوس دا پرېکړه بېرته اخیستل شوې.

هاروارډ پوهنتون او ماساچوسیتس ټکنالوژۍ انسټټیوټ یا 'ام.ای.ټي' د ځینو نورو علمي بنسټونو او په لږترلږه ۱۸ ایالتونو کې د استادانو د ټولنو په ملاتړ د امریکا د حکومت د کډوالۍ او ګمرک ادارې د جولای شپږمې پرېکړې پر ضد ودرېدل.

تر زیاتو هڅو وروسته بالاخره دعوه د محصلانو په ګټه تمامه شوه.

د جولای په ۱۴مه یعنې پرون قاضي الیسون باروس په یوه لنډه استماعیه غونډه کې وویل حکومت ومنله چې له خپلې پرېکړې تېر شي او بېرته مخکېني وضعیت ته ستون شي.

که د امریکا د کډوالۍ او ګمرک ادارې پرېکړه تطبیق شوې وی لکونه هغه محصلین چې په امریکا کې درس وايي له ستونزو سره مخ کېدل.

هغه چې خپلو هېوادونو ته ستانه شوي و د بېرته تګ اجازه به‌یې نه‌درلوده او کوم چې په متحده ایالاتو کې پاتې دي د ویزې د تمدید ستونزې به ورته پيدا کېدلې.

ایران کې د انټرنټ فعالیت له خنډ او ستونزو سره مخ شوی

ایران کې د انټرنټ یو کاروونکی

په ایران کې د انټرنټ فعالیت له خنډ او ستونزو سره مخ شوی دی.

دا وروسته له هغه چې د خواله رسنیو لکونه کاروونکو د ایران د حکومت هغه پرېکړه وننګوله چې غواړي د تېر لړم د پراخو مظاهرو درې ځوان ګډونوال امیر حسین مرادي، محمد رجبي او سعید تمجیدي اعدام کړي.

د ایران د قضائیه قوې ویاند غلام حسین اسمعیلي سې شنبه تأیید کړه چې په دغو درېیو کسانو باندې د اعدام حکم صادر شوی.

په دغو درېیو کسانو د قضائیه قوې له‌خوا تور پورې شوی د لړم میاشتې د مظاهرو پر مهال‌یې عامه نظم ګډوډ کړی او بهرنیو رسنیو ته‌یې وېډیوګانې استولې دي.

د قضائیه قوې د ویاند تر اعلان وروسته د بشري حقونو فعالانو او عامو خلکو په ټولنیزو شبکو په تېره بیا ټویټر کې د ایران د قضائیه قوې د دې پرېکړې سخت مخالفت وکړ.

دوی د 'اعدام نکنید' په نوم هشټګ جوړ کړ چې په همغو اولو ساعتونو کې تر یو میلیون زیاتو کسانو پرې تبصرې او لیکنې وکړې.

د ټولنیزو شبکو کاروونکي وايي چې د ایران قضائیه قوه باید د دغو درېیو ځوانانو د اعدام له پرېکړې تېر شي.

د امنسټي انټرنشنل یا د بخښنې نړیوال سازمان هم د ایران د قضائیه قوې د دې پرېکړې د سمدستي لغوه کېدو غوښتنه کړې.

دې سازمان په خپله ټویټرپاڼه لیکلي چې سعید تمجیدي، محمد رجبي او امیر حسین مرادي شکنجه شوي او په زور ترې اقرار اخیستل شوی دی.

د ایران رژيم تېر لړم میاشت په دغه هېواد کې مظاهره‌چیان وځپل چې د امریکا متحده ایالاتو د راپورونو په اساس شااوخوا یو نیم زر ایراني مظاهره‌چیان یې ووژل، زرګونه‌یې او لږترلږه اووه زره نور یې بندیان کړل.

د بلاروس ولسمشر مخکښ سیاسي مخالف انتخاباتو کې له ګډونه منع شوی

د بلاروس ولسمشر الکساندر لوکاشینکا

د بلاروس د ولسمشر مخکښ سیاسي مخالف راتلونکې میاشت په انتخاباتو کې له ګډونه منع شوی دی.

دا په داسې حال کې ده چې خلک پر ولسمشر الکساندر لوکاشینکا انتقاد کوي چې د کرونا ویروس بحران‌یې په سمه توګه نه‌دی مأموریت کړی.

د بلاروس مرکزي انتخاباتي کمېسیون د سې شنبې په ورځ (د جولای په ۱۴مه نېټه) اعلان وکړ چې د لوکاشینکا په ګډون پنځه کسان د اګسټ د نهمې په انتخاباتو کې د ګډون لپاره په رسمي توګه ثبت شوي دي. لوکاشینکا د ۱۹۹۴م کال راهیسې پر بلاروس واکمني کړې ده.

خو دې کمېسیون ویلي چې د بانک پخوانی مدیر ویکتار باباریکا چې اوس په زندان کې دی، نه‌دی ثبت شوی ځکه ده د خپل جایداد په اړه معلومات نه‌دي شریک کړي.

سلګونه کسانو د دې پرېکړې پر ضد په پلازمېنه مېنسک کې لاریون وکړ. پولیسو د ازادې اروپا/ ازادي راډيو د ځايي خبریال په ګډون ګڼ لاریون کوونکي هم ونیول.

امریکا مریخ ته یوه پرمختللې سپوږمکۍ لېږي

ارشیف

ټاکل شوې ده د امریکا د فضایي او هوايي چلند اداره ناسا په راتلونکو دوو اوونیو کې مریخ ته یوه پرمختللې سپوږمکۍ ولېږي.

د دې سپوږمکۍ مأموریت به دا وي چې له هغه ځایه د لرغوني مکروبي ژوند نښې راوړي چېرته چې درې نیم میلیارد کلونه مخکې د ډيلټا په نوم یو سیند وو.

دا سفر د جولای په ۳۰مه پیلېږي او شپږ میاشتې به دوام وکړي.

وروسته له کېناستو به دا فضایي بېړۍ د خاورو او ډبرو زېرمه کول پیل کړي.

ټاکل شوې ده په ۲۰۳۱م کال کې به د دې هر څه نمونې ځمکې ته ولېږل شي.

ساینسپوهان به په دغو نمونو کې فاسل شوي باکتریا او نور مکروبونه لټوي چې معلومه کړي چې ایا یو وخت پر دې سیاره خلکو ژوند کاوه که نه.

د ناسا کارکوونکي د کرونا ویروس د خپرېدو له کبله له میاشتو راهیسې له کورو کار کوي.

د کرونا ویروس د خپرېدو له کبله د دې مأموریت پر عملي کېدو ۲،۷ میلیونه ډالره اغېز شوی دی.

د ایران دفاع وزارت یو پخوانی کارکوونکی اعدام شو

ارشیف

د ایران قضایي اداره وایي، د دفاع وزارت هغه پخوانی کارکوونکی چې د امریکا د استخباراتو پر مرکزي ادارې (سي ای اې) د معلوماتو د پلورلو په خاطر محکوم شوی و، اعدام شوی دی.

د دغې ادارې ویاند غلام حسین اسمعیلي نن وویل چې رضا اصغري په دفاع وزارت کې د خپلې دندې په وروستي کال له 'سي ای اې' سره تماس درلود او پر دغې ادارې یې د ایران د میزائیلو د پروګرام معلومات پلورلي و.

اسمعیلي وویل چې اصغري تېره اوونۍ اعدام شو او زیاته‌یې کړه چې هغه د دفاع وزارت د هوایي چارو په ریاست کې کار کاوه او څلور کاله مخکې تقاعد شوی و.

د قضایي ادارې ویاند دغه‌راز وویل چې امریکا او اسرائیل ته د جاسوسۍ په تور په مرګ محکوم شوي بل ایراني محمد موسوي مجید باندې تر اوسه دغه سزا نه‌ده تطبیق شوې.

تېره میاشت قضایي ادارې ویلي و چې د موسوي مجید د مرګ سزا د سترې محکمې له‌خوا ځنډول شوې او ډېر ژر به پرې تطبیق شي.

پاکستان کې د پولیو واکسین کمپاین پیلېږي

پاکستان کې د پولیو واکسین کمپاین

پاکستان نن اعلان وکړ چې راتلونکې اوونۍ به د پولیو ضد واکسینونو کمپاین پیل کړي.

د ماشومانو د ګوزڼ ضد ناروغۍ دغه کمپاین څو میاشتې وروسته له هغې چې د کرونا وبا د دې هېواد پر روغتیايي سیستم ډېر فشار راوستی و، پیلېږي.

دغه کمپاین چې راتلونکې دوشنبه پیلېږي او درې ورځې به دوام کوي، په پام کې ده چې ترڅ کې یې شاوخوا اته لکه ماشومانو ته دغه واکسین ورکړل شي.

پاکستان هیله‌من و چې د پولیو ناروغي په ۲۰۱۸ کال کې له خپلې خاورې ورکه کړي. په دې کال د پولیو ۱۲ نوې پېښې شوې چې ورپسې په ۲۰۱۹ کال کې هم زیاتې شوې.

د روان کال د جنورۍ له میاشتې راهیسې په دې هېواد کې د پولیو ۵۸ نوې پېښې ثبت شوې دي.

د پولیو ډېرې پېښې هم له افغانستان سره په پوله خیبر پښتونخوا ایالت کې ثبت شوي دي.

په افغانستان کې هم چې د پولیو پېښې په وروستیو کلونو کې زیاتې شوي، په پام کې ده راتلونکې اوونۍ په یو شمېر هغو ولایتونو کې دغه کمپاین پیل شي چې د کرونا پر وبا سربېره تر اوسه د ځینو نورو عواملو له امله په‌کې د پولیو د واکسین کمپاین نه‌دی تطبیق شوی.

د افغانستان د روغتیا وزارت به دغه کمپاین د ماشومانو لپاره د ملګرو ملتونو د مرستندویه ادارې یونېسف په مرسته پر مخ وړي.

کالیفورنیا کې بیا بندیزونه لګېدلي

د کالیفورنیا د والي ګاوین نیوسام نوي بندیزونه هغه هیلې مړاوي کوي چې په امریکا کې د اقتصاد پر بیاغوړېدو پورې تړلې دي.

د امریکا کالیفورنیا ایالت د کرونا ویروس د لاخپرېدو د مخنیوي لپاره بیا بندیزونه ولګول.

د امریکا دغه تر ټولو زیات نفوس لرونکی ایالت په دې وروستیو کې د کرونا ویروس د مثبتو پېښو او پرکویډ۱۹ ناروغۍ د ډېرو کسانو د بستري کېدو شاهد و.

په متحدو ایالتونو کې د کرونا ویروس تر اوسه له ۱۳۵ زرو زیات کسان مړه کړي دي.

د کرونا وبا د امریکا په سویلي او لویدیځو ایالتونو کې چې په مې میاشت کې په کې بندیزونه لیرې شوي و، ډېره د خپرېدو په حال کې ده.

د کالیفورنیا د والي ګاوین نیوسام نوي بندیزونه هغه هیلې مړاوي کوي چې په امریکا کې د اقتصاد پر بیاغوړېدو پورې تړلې دي.

رستورانونه، بارونه، سینماګانې او موزیمونه په دې ایالت کې بند شوي دي.

په متحدو ایالتونو په وروستیو پنځو ورځو کې د ورځې په متوسط ډول د کرونا ۶۲ زره نوې پېښې ثبت شوې دي.

د وروستیو شمېرو له مخې په ټوله نړۍ کې پر کرونا ویروس د اخته شویو کسانو شمېر له ۱۳ میلیونو او ۲۴۰ زره کسانو اوښتی او د مړو شویو شمېر هم له ۵۷۵ زره کسانو اوښتی دی.

د امریکا او روسیې د بهرنیو چارو وزیرانو پر افغانستان خبرې کړي

د عکس ښي لور ته پومپیو او چپ لور ته لاروف

د امریکا د متحدو ایالتونو د بهرنیو چارو وزیر مایک پومپیو پرون له خپل روسي سیال د بهرنیو چارو له وزیر سرګې لاروف سره د افغانستان پر وضعیت خبرې وکړې.

د امریکا د بهرنیو چارو وزارت په دې اړه په خپاره کړي بیان کې د دغو خبرو په اړه نور جزئیات نه دي ورکړي خو نوموړی وروسته له هغې له لاروف سره خبرې کوي چې په افغانستان کې طالبانو ته د روسيي د پوځي استخباراتو له خوا د امریکایي سرتېرو د وژلو لپاره د انعام ورکولو پرسر په دې وروستیو اوونیو کې په متحدو ایالتونو کې بحثونه ډېر تاوده شوي دي.

د ټرمپ ادارې په دې اړه راپورونه کم اهمیته بللي او ویلي یې دي چې امریکایي استخباراتي ادارو دا نه دي تایید کړي چې روسیې دې ګنې طالبانو د امریکایي سرتېرو د وژلو په خاطر پیسې ورکړې وي.

روسیې هم دغه ادعاوې رد کړې دي.

د امریکا او روسیې د بهرنیو چارو وزیران داسې مهال د افغانستان پر وضعیت خبرې کوي چې په دې هېواد کې په دې وروستیو کې د طالبانو له خوا حملو بیا زور اخیستی.

فرانسه د روغتیايي کارکوونکو معاشونه زیاتوي

په کرونا ویروس اخته فرانسوی کس د روغتیايي کارکوونکو له لوري روغتون ته لېږدول کېږي.

د فرانسې حکومت او صنفي اتحادیو پرون دوشنبې یوه موافقه لاسلیک کړه چې له مخې یې اونیم میلیارډ ایرو روغتیایي کارکونکو ته د هغوی د تنخواو د زیاتوالي لپاره ورکول کيږي.

که څه هم د فرانسې صدراعظم اعتراف کړی چې د کرونا وبا خپرېدو ته په پام دغه اقدام یو څه په ځنډ کېږي.

کله چې کرونا په فرانسه کې اوج ته رسېدلې وه، خلکو شپه او ورځ د روغتیايي کارکونکو د کارکولو ستاینه کوله خو دغو کارکونکو ویل چې که په دې برخه کې کوټلي اقدامات ونشي دغه ستاینې به یواځې هوایي ستاینې وي.

د دغو اونیم میلیارډ ایرو څخه د نرسانو او روغتیا پالانو تنخواوې په میاشت کې ۱۸۳ ایرو زیاتېږي.

څلورنیم سوه میلیونه ایرو هم د هغو ډاکترانو د تنخواو د زیاتوالي لپاره ځانګړې شوې چې یوازې د روغتیا په عامه سکټورکې کار کوي او هدف یې دا دی چې له خصوصي کلینکونو خلک جذب کړي.

په فرانسه کې کرونا له دېرش زرو زیات کسان مړه کړې دي.

امریکا د سویلي چین د سمندرګي په اړه د چین ادعا رد کړه

د امریکا د بهرنیو چارو وزیر مایک پومپیو

متحدایالاتو د سویلي چین د سمندرګي پر ډېره برخه د چین لانجمنه ادعا رد کړې او د جنوب ختیځې آسیا د هېوادونو د دریځ ملاتړ یې کړی.

تمه ده چې دا اعلان به د واشنګټن او پېکېنګ په اړیکو کې ترینګلتیا لازیاته کړي.

د امریکا د بهرنیو چارو وزیر مایک پومپیو پرون د جولای په ۱۳مه په یو مکتوب کې په دې اړه د واشنګټن رسمي دریځ روښانه کړ، ویې ویل متحدایالات دا خبره په ډاګه کوي چې د سویلي چین پر سمندرګي د پېکېنګ د مالکیت ادعا ټوله غیرقانوني ده او چین پر دې سیمو د ولکې لپاره د زور له لارې کمپاین کوي.

پومپیو وايي، نړۍ پېکېنګ ته اجازه نه ورکوي چې دا سیمه په خپله سمندري امپراتوري بدله کړي.

چین هم د پومپیو د دریځ پر وړاندې غبرګون وښود.

په واشنګټن کې د چین سفارت په یوه خبرپاڼه کې چې پرون خپره شو وویل، امریکا په دې لانجه کې مستقیم دخالت نه لري خو بیاهم خپلو لاسوهنو ته دوام ورکوي.

بیان زیاتوي چې امریکا په سیمه کې د ثبات د ټینګښت په پلمه خپل زور ښيي، کړکېچ ته لمن وهي او پارونې کوي.

چین د دې سمندرګي په سلو کې نژدې نوي خپل ملکیت بولي خو اندونیزیا، فلیپین، ویتنام، مالیزیا، برونای او تایوان یې هم پر ځینو برخو د مالکیت ادعا لري.

لاریون کوونکو د بلغاریا د صدراعظم استعفا غوښتې

بویکو بوریسوف

د بلغاریا په پلازمېنه سوفیه کې زرګونه کسانو پرون د پنځمې پرلپسې ورځې لپاره د فساد پرضد د لاریونونو په ترڅ کې د صدراعظم بویکو بوریسوف د حکومت او د لوی څارنوال د استعفا غوښتنه وکړه.

د وارنا، بورګاس او پلوفدیف په ګډون په لږترلږه لسو نورو ښارونو کې هم د فساد پرضد لاریونونه وشول.

لاریون کوونکو په پلازمېنه سوفیه کې د جمهوري ریاست او د وزیرانو شورا مخې ته په خپله غونډه کې فساد او د چارواکو مافیا ډوله چلند وغانده.

د اپوزیسیون سوسیالیست ګوند چې د ولسمشر رومېن رادییف او لاریون کوونکي ملاتړ کوي ویلي دي چې سبا د جولای په ۱۵مه نېټه به د کابینې د سلب اعتماد لپاره اقدامات پیل کړي او په همدې ورځ به پراخ اعتراضونه هم وشي.

په بلغاریا کې دا لاریونونه وروسته له هغه پیل شوې چې د راروان ۲۰۲۱ کال د مارچ میاشتې له ټاکنو مخکې د ولسمشر رادیېف او صدراعظم بوریسوف په مشرۍ د حکومت ترمنځ سیاسي کړکېچ زیات شو.

بوریسوف چې له ۲۰۰۹ کال راهیسې بې وقفې د بلغاریا صدراعظم پاتې شوی دی، د روانې اونۍ په پیل کې وویل چې کابینه به یې استعفا ونه وکړي.

نور راوښيه

XS
SM
MD
LG