په اندونیزیا کې د اپرېل په ۱۷مه نېټه ترسره شوي ولسمشریز انتخابات لانجمن شوي دي.
اندونیزیا د نړۍ درېيمه لویه ډموکراسي بلل کېږي، دغلته د اپرېل په ۱۷مه نېټه ولسمشر جوکو ویدودو د پخواني متقاعد جنرال پرابوو سره د ولسمشرۍ په انتخاباتو کې مخامخ و.
د تېرې سې شنبې په ورځ د اندونیزیا د انتخاباتو کمېسيون اعلان وکړ چې جوکو ویدودو دا انتخابات په سلو کې د پنځه پنځوس اعشاریه پنځو رأیو په ترلاسه کولو ګټلي دي.
د نوموړي سیال پرابوو سوبیانټو ته په سلو کې څلور څلوېښت اعشاریه پنځه رأیې حساب شوې دي.
تر دې مخکې دغلته د انتخاباتو د څار ادارې ویلي وو، په انتخاباتو کې دسېستماتیکې درغلۍ اسناد او شواهد نه شته، همدارنګه خپلواکو څارونکو هم ویلي چې دا انتخاب ازاد او عادلانه وو.
خو د ماتې خوړلي کاندید پرابوو سوبیانټو یوه وکیل بمبنګ ویډجوجانټو د جمعې په ورځ د اساسي قانون محکمې ته د یوې پنډې دوسیې د سپارلو پر مهال وویل:
"هیله ده چې دا به د قانون پر حاکمیت د ولاړ یو ولسواک ملت د اثبات یوه برخه وي."
نوموړي زیاته کړې چې د اساسي قانون محکمه به د دې ټولې پروسې یوه مهمه برخه وي.
کله چې د اندونیزیا د انتخاباتو خپلواک کمېسيون په دې اوونۍ کې نتایج اعلان کړل، پرابوو سوبیانټو خپله پخوانۍ ادعا تکرار کړه چې په انتخاباتو کې د ولسمشر ویدودو په پلوۍ پراخې درغلۍ شوې دي.
له دې سره د نوموړي زرګونو پلویانو د پلازمېنې جاکارتا په لارو کوڅو کې د اننتخاباتو د نتایجو پر ضد اعتراضونه پیل کړل چې له تاو تریخوالي سره مله وو.
د جاکارتا والي او د روغتیا چارواکو ویلي چې په دې تاوتریخوالي کې د درې تنکیو ځوانانو په ګډون اته کسان وژل شوي او تر ۹۰۰ زیات نور ژوبل شوي.
ټاکل شوې ده چې د اندونیزیا د اساسي قانون محکمه به د دې قضیې د اورېدو لپاره لومړنۍ غونډه د جون په ۱۴ مه نېټه جوړه کړي.
د ماتې خوړلي کاندید پرابوو سوبیانټو مرستیال سنډیاګا اونو د جمعې په ورځ وویل، حقوقي دعوه سپارل او نورې قانونې هڅې یې د دې لپاره پیل کړې چې ډاډمنه کړي چې د انتخاباتو نتایج عادلانه او بې لاسوهنې دي.
نوموړي ادعا کړې چې پلویانو یې په خپلو سترګو لیدلي چې دا انتخابات ازاد او عادلانه نه وو.
د اندونیزیا د ملي پولیسو ویاند محمد اقبال ویلي، پولیسو سلګونه کسان په بلواګانو کې د برخې اخیستو او تاوتریخوالي ته د هڅولو په تورونو نیولي.
د نوموړي په وینا، په دوی کې دوه تنه د هغې وسله والې ډلې غړي هم دي چې له داعش سره تړاو لري.
په داسې حال کې چې د اندونیزیا د ولسمشرۍ په انتخاباتو کې ماتې خوړلي کاندید پرابوو سوبیانټو پر خپلو ملاتړو د سوله ییزو مظاهرو او مقاومت غږ کړی، ولسمشر ویدودو خبرداری ورکړی چې د بلواګرو پر ضد به سخت اقدامات وکړي.
د ویدودو مرستیال یوسف کالا د پنجشنبې په ورځ د پرابوو سوبیانټو سره کتلي دي.
د پرابوو د کمپاین ټیم دا لیدنه تأیید کړې، خو په اړه یې جزیات نه دي ورکړل شوي.
په ۲۰۱۴ میلادي کال کې هم دا دواړه سیالان د اندونیزیا د ولسمشرۍ په انتخاباتو کې له یو بل سره مخ وو، هغه مهال هم پرابوو انتخابات په همدې توپیر بایللي وو او د اساسي قانون په محکمه کې یې دعوه راپورته کړې وه چې هغه مهال یې محکمې دعوه نه وه منلې.
څارونکي باور لري چې ښايي د اندونیزیا د اساسي قانون محکمه دا ځل هم دا ادعا ونه مني.