د لاسرسۍ وړ لېنکونه

تازه خبر
دوشنبه ۱۲ غبرګولی ۱۳۹۹ کابل ۰۴:۳۱

نړۍ

د سعودي د تېلو دوه ټانکرونه په نښه شوي

سعودي عربستان وايي، د تېلو دوه ټانکرونه يې په نښه شوي دي.

رياض د ګاونډي هېواد متحده عرب اماراتو ساحل ته څېرمه دا شوې پېښه د «سبوتاژ حمله» بللې ده.

د سعودي عربستان د انرژۍ وزير خالد الفالح نن دوشنبه وويل، يوه کښتۍ يې د سعودي په خامو تېلو د بارېدو لپاره روانه وه چې حمله وشوه.

پرونۍ حمله د مرګ ژوبلې يا هم د تېلو د توئېدو سبب شوې نه‌ده، خو د دوو کښتيو بدنو ته د پام وړ زيان اوښتى دى.

تر دې مخکې د متحده عرب اماراتو د بهرنيو چارو وزارت ويلي وو، د قلمرو اوبو ته نږدې يې «د سبوتاژوونکو عملياتو» په لړ کې پر څلورو تجارتي کښتيو حمله شوې ده. په‌دې پېښه کې هم چا ته مرګ ژوبله نه وه اوښتې.

د بهرنيو چارو وزارت الفجيره بندر ته نږدې د دغه سبوتاژوونکې حملې د څرنګوالي په اړه نور جزئيات نه‌دي ورکړي. د مشکوکو حمله کوونکو هويت هم نه دى افشا شوى.

د امريکا متحدو ايالاتونو نن د هغو سبوتاژوونکو اقداماتو په اړه خبردارى خپور کړ چې له کبله يې د متحده عرب اماراتو ساحل ته څېرمه ځينې کښتۍ په نښه شوي دي.

د ورځې تازه خبرونه دلته ولولئ

د لمونځ کوونکو پرمخ عربستان او بیت المقدس کې د جوماتونو پرانیستل

په سعودي عربستان کې چې شاوخوا نهه سوه جوماتونه چې د کرونا ویروس د خپرېدو له امله له دوو میاشتو راهیسې تړل شوي و، پرون د لومړي ځل لپاره بېرته پرانستل شول.

په سعودي عربستان او بیت المقدس کې جوماتونه بیرته د لمونځ کونکو پرمخ پرانستل شول او په بریتانیا کې بیا هغو په سلګونو اعتراض کونکو چې په امریکا کې یې له مظاهرو سره خپل ملاتړڅرګنداوه، خپرې شوې د کرونا وبا ته په نه پاملرنې ټولنیز واټن مراعات نه کړ.

په سعودي عربستان کې چې شاوخوا نهه سوه جوماتونه چې د کرونا ویروس د خپرېدو له امله له دوو میاشتو راهیسې تړل شوي و، پرون د لومړي ځل لپاره بېرته پرانستل شول.

په بیت المقدس کې لوی د الاقسا جومات هم د لمونځ کونکو پرمخ بېرته پرانستل شو.

په لندن کې بیا په سلګونو اعتراض کونکو پرلویو غونډو د لګول شویو بندیزونو پام ونه کړاو د امریکا د سفارت په مخکې یې په متحدو ایالتونو کې د یوه سپین پوستي پولیس له خوا د هغه تورپوستې کس د وژل کېدو په اعتراض کې لاریون وکړ چې د امریکا په ګڼو ښارونو کې یې قهرجنې مظاهرې راپارولې دي.

په عین حال کې په ډېرو هېوادونو کې چې د کرونا ویروس د خپرېدو له امله یې بیساري بندیزونه لګولي، د دغو بندیزونو د نرمولو بهیر دوام لري.

د وروستیو شمېرو له مخې په ټوله نړۍ کې پر کرونا ویروس د اخته شویو کسانو شمېر پرون یکشنبې له شپږ میلیون او دوه نیم لکه کسانو واوښت او د دغه کرونا ویروس له امله د مړو شویو شمېر هم نژدې ۳۷۴ زره کسانو ته رسېدلی دی.

د امریکا یوه خصوصي ستور بېړۍ نړیوال فضایي تمځي ته ورسېده

د راګون کرو ستور بېړۍ شنبه له فلوریډا توغول شوې وه چې پکې دوه امریکايي ستور مځلي ناست و.

هغه دوه امریکایي ستورمځلي چې د لومړي ځل لپاره په یوې خصوصي فضایي بیړۍ کې فضا ته استول شوي و، نړیوالې فضایي اډې ته ننوتل.

د دغو ستورمځلو د سپرلۍ بیړۍ ډراګون چې سپیس اکس کمپنۍ جوړه کړې، د شنبې په ورځ له فلوریډا د فالکون ۹ توغندي په واسطه له توغول کېدو وروسته پرون ماښام نړیوالې فضايي اډې ته رسېدلې وه.

ډاګ هرلي او باب بینکین په دې فضایي اډه کې له دوو روسي او یوه امریکایي ستورمځلو سره یوځای شول او ښایي تر څلورو میاشتو پورې په دې اډه کې تېر کړي.

دا په نژدې یوه لسیزه کې لومړی ځل دی چې د امریکا متحده ایالات په خپله ستورمځلي فضا ته استوي.

په دې موده کې امریکا د روسیې په سیوز توغندیدو چې د قزاقستان له بایکانور فضایي اډې به توغول کېدل، متکي وه.

دغه ماموریت چې د سپیس ایکس کمپنۍ جوړه شوې بیړۍ پکې آزمویل شوې، خصوصي کمپنیو ته لاره هواروي چې ستورمځلي نړیوالې فضایي اډې ته ولېږدوي او هم د سوداګریزو فضایي الوتنو یونوی باب پرانېزي.

امریکا کې د یوه تور پوستي د وژنې په غبرګون اعتراضونه وغځېدل

امریکا کې اعتراضونه

په امریکا کې د نژادي عدالت غوښتنې لپاره اعتراضونه چې د یو سپین پوستي پولیس په لاس د یوه تور پوستي وګړي له مړینې وروسته وپارېدل، پرون د مې په د۳۰مه څو لویو ښارونو ته هم وغځېدل.

دا اعتراضونه په نیویارک، واشنګټن، اتلانتا، شیکاګو، لاس انجلس او یو شمیر نورو ایالتونو کې وشول.

۴۶ کلن تور پوستي جورج فلوید د دوشنبې په ورځ وروسته له هغه ساه ورکړه چې د پولیسو یوه سپین پوستي افسر د میناسوتا ایالت د مینیاپولیس ښار په یوه سړک کې د هغه په لاسونو کې زولنې واچولې، مخ پر ځمکه‌یې څملاوه او خپل زنګنونه‌یې د هغه پر اورمېږ کېښودل.

په هغو وېډیويي تصاویرو کې چې پر ټولنیزو شبکو خپاره شوي ښکاري چې فلوید د پولیسو دې افسر ته څو ځلې زارۍ کوي چې ساه یې بندېږي، خو هغه‌یې نه‌پرېږدي.

دا اعتراضونه چې په سر کې سوله‌ییز وو، وروسته له هغه په تشدد واوښتل چې معترضانو د ګرځ‌بندیز مقررات له پامه وغورځول، لارې یې بندې کړې، ځیني ځایونه‌یې وسوځول، ښیښې یې ماتې کړې او د مظاهرو ضد پولیسو سره لاس ګرېوان شول.

په واشنګټن کې سلګونه معترضان په داسې حال کې د عدلیې وزارت مخې ته راټول شول چې په خپلو شعارونو کې یې ویل، (زه ساه نه‌شم ایستلی) او (د تورو ژوند هم اهمیت لري).

معترضان وروسته د سپینې ماڼۍ پر لور وخوځېدل چې هلته‌یې بیا پولیسو مخه ونیوله.

ولسمشر ډونالد ټرمپ د فلوید وژنه سخته غمیزه بللې ده، خو په عین حال کې یې ویلي، د هغو مظاهرو زغم نه‌لري چې په تشدد واوړي.

د میناسوتا ایالت چارواکو ویلي د پولیسو افسر دیریک شاوین د فلوید په وژنه تورن ګڼل شوی او هغه افسران چې په قضیه کې دخیل وو، له دندو ګوښه شوي دي.

سعودي کې ۹۰ زره جوماتونه بېرته پرانیستل شول

سعودي عربستان کې یو جومات

په سعودي عربستان کې له مکې مکرمې پرته د نورو ښارونو زرګونه جوماتونه چې د کرونا ویروس د مخنیوي د اقداماتو په ترڅ کې بند شوي و نن د لومړي ځل لپاره بیا پرانیستل شول، خو لمونځ کوونکو ته ویل شوي دي چې د دې وبا د مخنیوي لپاره باید لازم مقررات په کلکه مراعات کړي.

د سعودي حکومت شاوخوا ۹۰ زره جوماتونه وروسته له دې چې د هغو پر غالیو، د اوداسه پر ځایونو او الماریو یې عفوني ضد مواد وپاشل پرانیستل.

د سعودي د اسلامي چارو وزارت وايي د 'SMS' له لارې په میلیونونو پیغامونو کې یې خلکو ته د لمانځه د دوه متره فاصلې د ساتنې، د ماسک د جبري اغوستو او په لاس او غېږو د روغبړ نه‌کولو په ګډون د نویو مقرراتو خبر ورکړی دی.

د نویو مقرراتو له مخې د جوماتونو دروازې له لمانځه ۱۵ دقیقې مخکې پرانیستل کېږي او د لمانځه له خلاصېدو ۱۰ دقیقې وروسته بندېږي.

د مکې مکرمې جوماتونه لاهم د عوامو پر مخ بند دي، خو په بیت‌المقدس کې د الاقصی جومات چې له مکې او مدینې وروسته د مسلمانانو درېیم سپېڅلی مکان ګڼل کېږي هم پرانیستل شوی دی.

انګېلا مېرکل واشنګټن ته د ورتګ لپاره د ټرمپ بلنه رد کړه

د جرمني صدراعظمه انګېلا مېرکل

د جرمني صدراعظمې انګېلا مېرکل واشنګټن ته د ورتګ لپاره د ډونالډ ټرمپ بلنه رد کړه.

د امریکا ولسمشر انګېلا مېرکل ته بلنه ورکړې وه چې د نړۍ د سترو ۷ صنعتي هېوادونو د مشرانو په غونډه کې ګډون وکړي.

پولیټیکو خبري اژانس د جرمني د حکومت د ویاند په حواله لیکلي چې صدراعظمې انګېلا مېرکل له ولسمشر ټرمپ څخه مننه کړې چې د جون د میاشتې په وروستیو کې یې غونډې ته ور بللې وه.

خو له دې کبله چې د کرونا وبا خپره شوې صدراعظمه مېرکل لا نه شي کولای چې واشنګټن ته له سفر وکړي خو د کرونا وبا له کبله رامنځته شوی وضعیت له نږدې څاري.

سپینې ماڼۍ د مې په ۲۶مه نېټه وویل چې ولسمشر ټرمپ فکر کوي چې په امریکا کې د سترو ۷ صنعتي هېوادونو د غونډې پيل د نړۍ د اقتصادي مارکېټونو د بیا پرانیستل کېدو ښه بېلګه ګڼل کېدلای شي.

روحاني: ایران کې به ژر جوماتونو کې د ورځې لمونځونه پیل شي

حسن روحاني

د ایران ولسمشر حسن روحاني پرون، د مې په ۳۰مه، وویل چې په دې هېواد کې به ډېر ژر په جوماتونو کې د ورځې لمونځونه پیل شي.

دا په داسې حال کې ده چې د ایران په ځیني برخو کې د کرونا ویروس لا هم د خپرېدو په حال کې دی.

حسن روحاني پرون وویل: "د ایران جوماتونه به ډېر ژر د ورځني لمانځه لپاره پرانیستل شي او روغتیايي سپارښتنې باید په پام کې ونیول شي."

په ایران کې حکومت له یوې مودې راهیسې د کرونا د وبا له کبله د لګول شوو بندیزونو په نرمولو لګیا دی.

د ایران د رسمي خبري سرچینوپه حواله، ۱۵۰ زره کسان په دې هېواد کې په کرونا ویروس اخته شوي او تر ۷۷۰۰ زیات وګړي په دې خطرناک ویروس مړه شوي دي.

خو یو شمېر څارونکي شک لري چې حکومت له اصلي شمېر کموي او ريښتیني ارقام ښايي تر دې ډېر لوړ وي.

اروپايي ټولنه: امریکا دې روغتیا نړیوال سازمان سره په پرې کړو اړیکو غور وکړي

بروکسل کې د اروپايي ټولنې مرکزي دفتر

اروپايي ټولنې له امریکا غوښتنه کړې چې د روغتیا نړیوال سازمان سره د اړیکو د پرې کولو پر پرېکړه له سره غور وکړي.

د امریکا متحدو ایالاتو د کرونا ویروس د خپرېدو د مخنیوي لپاره د روغتیا د نړیوال سازمان پر فعالیت د سخت انتقاد له کبله ویلي چې له دې سازمان سره مالي مرستې به په نړۍ کې د نورو روغتیايي ادارو لپاره ځانګړې کړي.

امریکا د روغتیا د نړیوال سازمان تر ټولو لوی تمویلونکی هېواد دی.

د اروپا د کمېسیون مشرې او د اروپايي ټولنې د بهرني سیاست مشر دواړو پرون د مې په ۳۰مه، په ګډه اعلامیه کې وویل چې د کرونا ویروس پر ضد د مبارزې لپاره د همکاریو زیاتېدو ته اړتیا ده ځکه دا خطر ټولې نړۍ ته متوجه دی.

د روغتیا نړیوال سازمان تر اوسه پردې مسئله خبرې نه دي کړی.

د امریکا د متحدو ایالاتو ولسمشر ډونالډ ټرمپ بیا بر چین نیوکه کړې چې د وهان په ښار کې یې د کرونا ویروس د خپرېدو په اړه معلومات تر ډېرې مودې له نړیوالو پټ کړي وو او له دې کبله دا خطرناک ویروس ټولې نړۍ ته خپور شوی دی.

کرونا ویروس تېر کال په ډېسېمبر کې د چین په وهان ښار کې پیدا او له هغه ځایه ټولې نړۍ ته خپور شو.

امریکا کې د یوه افریقايي الاصله امریکایي د وژلو په غبرګون لاریونونه دوام لري

لاریون کونکي کوونکي دا شعارونه ورکوي چې (د تور پوستو ژوند ارزښت لري).

په امریکا کې د یوه افریقایي الاصله امریکایي د وژلو په غبرګون کې لاریونونه له څو ورځو راهیسې دوام لري او ځینو ځایونو کې په تاوتریخوالي اوښتي.

لاریون کونکي کوونکي دا شعارونه ورکوي چې (د تور پوستو ژوند ارزښت لري).

تېره شپه واشنګټن ډي سي کې ملي ګارد ځای پر ځای شوی و ځکه هلته د سپینې ماڼۍ مخې ته د لاریون کونکو یوه غصه ناکه ډله ټوله شوې او د ډونالډ ټرمپ پر ضد له کرکې ډک شعارونه ورکوي.

د سپینې ماڼۍ د خوندیتوب اقدامات جدي شوي او هلته لاریون کونکي په همدې شعارونو سره ټول شوي چې ( له عدالت پرته سوله نه شته) او د تورپوستو ژوند ارزښت لري.

دا لاریونونه وروسته له هغه پيل شوې چې یو سپین پوستی پولیس امریکا کې یو تورپوستی پر سړک خفه کوي او وژني یې.

امریکا: لیبیا کې د روسیې ۱۴ جیټ الوتکې ځای پر ځای شوي

ارشیف

په افریقا کې د امریکا د پوځ د قومندې مرکز د مسکو هغه ادعا رد کړې چې وايي، د دې هیواد جنګي جیټ الوتکې په لیبیا کې نه دي ځای پر ځای شوي.

د دې مرکز مرستیال ګریګوري هاډفیلډ ویلي، د متحده ایالاتو د څارنې پر بنسټ د روسیې ۱۴ جنګي جیټ الوتکې چې په کې میګ ۲۹ او سو ۲۴ شامل دي، له روسیې څخه تر الوتنې وروسته د لیبیا په الجُفره هوايي ډګر کې ښکته شوي دي.

دا اډه دا مهال د خلیفه حفتر د وسله وال ځواک مهم مرکز بلل کېږي.

په افریقا کې د امریکا د قومندې د مرکز مرستیال د جمعې په ورځ د خبریالانو یوې وړې ډلې ته وویل، په لیبیا کې د روسیې فعالیتونه او د خلیفه حفتر له ځواکونو څخه د مسکو ملاتړ ” اندېښمنونکی “ دی.

د امریکا متحده ایالتونه او نړیواله ټولنه د لیبیا هغه حکومت په رسمیت پېژني چې د خلیفه حفتر د ځواکونو سره په جګړه کې ښکېل دی.

بل خوا داسې راپورونه خپاره شوي چې مسکو د خلیفه هم حفتر د ځواکونو ملاتړ کوي.

خو روسیه وايي، د لیبیا د کورنۍ جګړې له ټولو ښکېلو اړخونو سره تماس کې دي څو د دې هېواد کړکېچ د خبرو له لارې هوار شي.

د تور پوستي امریکايي د وژنې په تور پولیس نیول شوی

د دې پېښې پر ضد درې شپې په پرله پسې ډول د امریکا په مینیا ښار کې خلکو مظاهرې کولې او د پېښې له قرباني سره دي انصاف وشي نارې یې وهلې.

هغه سپین امریکايي پولیس چې د یوه تور پوستي امریکايي پر غاړه یې ځنګون ور ايښې او هغه یې مړ کړی و، نیول شوی او د قتل تور ورباندې لګېدلی دی.

تورن پولیس، ډېرېک چاوین نومېږي.

هغه د مې په ۲۶مه نېټه د جورج فلوید په نوم یو تور پوستی امریکايي سړی نیولی و، لاسونو ته یې ولچکونه ور اچولي او بیا یې هغه پرځمکه غورځولی و.

دا صحنه په سیمه کې یوه ولاړ سړي په ويډیو کې ثبت کړې وه چې پر انټرنټ تر خپرېدو وروسته په ټوله نړۍ کې ډېرو خلکو ولیده.

په ویډیو کې لیدل کېږي چې ۴۶ کلن فلوید په مکرر ډول له پولیسه غوښتنه کوي چې له غاړي یې ځنګون لرې کړي او ورته وايي چې ساه نه شي اخیستلای، خو پولیس د هغه د خبرو پروا نه کوي.

فلوید تر دې پېښې وروسته په روغتون کې مړ شو.

د دې پېښې پر ضد درې شپې په پرله پسې ډول د امریکا په مینیا ښار کې خلکو مظاهرې کولې او د پېښې له قرباني سره دي انصاف وشي نارې یې وهلې.

د مینیسوتا ایالت والي ټیم والز پرون وویل چې په وروستیو مظاهرو کې چور او چاپول او نور غیر قانوني کارونه شوي له دې کبله د ملي ګارد ځواکونه په دنده ګومارل شوي او غږ یې وکړ چې مظاهرې باید بندې شي.

ټېم والز وايي: "دا د مینیسوتا په وروستي تاریخ کې له ډېرو سختو اوونیو وه، ښايي زموږ په ټول تاریخ کې ډېره سخته اوونۍ وه، زموږ ولس، په ځانګړي ډول زموږ د تور پوستو ټولنه داسې خوږ شوې چې په خبرو کې یې نه شم ویلای، په مینیا پولېس او سنټ پاول کې اور بل دی."

تورن پولیس او له هغه سره درې نور همکاران له دندې شړل شوي او د امریکا د استخباراتو فدرالي اداره له ایالتي پولیسو سره په ګډه د پېښې په اړه څېړنې کوي.

د اوکراین او هنګري چارواکو پر دوه اړخیزو اړیکو خبرې کړي

د اوکراین او هنګري د بهرنیو چارو وزیران

د اوکراین او هنګري د بهرنیو چارو وزیرانو پرون، د مې په ۲۹مه، پر دوه اړخیزو اړیکو خبرې وکړې.

اوکراین هڅه کوي چې د ناټو غړی شي خو د رپوټونو په حواله، هنګري په اوکراین کې پر اقلیت ژبو د بندیز د قانون له کبله د دې کار مخنیوی کوي.

هنګري د ناټو غړی هېواد دی.

د اوکراین په لویدیځ کې د زاکراپاتیا په نوم سیمه کې د هنګریانو اقلیت اوسېږي.

په اوکراین کې میشت اقلیتونه د هغه هېواد د نفوس لس فیصده جوړوي.

د اوکراین حکومت په وروستیو کې یو نوی قانون تصویب کړ چې په هغه هېواد کې يې له میشتو اقلیتونو دا حق واخیست چې په خپلو سیمو کې خپلې ژبې دود کړي.

د اروپا پارلماني شورا پردې قانون انتقاد کړی او ویلي یې دي چې په قانون کې په واضح ډول د رسمي ژبې او د اقلیتونو د مليتي ژبو ترمنځ سم توپير نه دی شوی.

د هنګري د بهرنیو چارو وزیر ویلي چې دوي د ناټو په تړون کې د اوکراین د غړیتوب لپاره د خنډ جوړولو هڅه نه کوي بلکه یوې موافقې د رسېدو په لټه کې دي.

ځینو اروپایي هېوادونو کې د کرونا ویروس له امله لګيدلي بندیزونه نرمېږي

ارشیف

په یو شمېر اروپايي هېوادونو کې د کرونا ویروس د مثبتو پېښو د کمېدو له کبله ځیني حکومتونه د بندیزونو د لا زیات نرمېدو پر لور ګامونه پورته کوي.

د بریتانیا حکومت پرېکړه کړې چې له راتلونکې اوونۍ څخه به یو شمېر زده کونکي بېرته ښوونځيو ته د تګ اجازه لري او دوکانونه به هم پرانیستل شي.

د فرانسې حکومت رسټورانټونو ته اجازه ورکړه چې د جون د میاشتې له دوهمې نېټې کولای شي چې خلکو ته په انګړونو او خلاصو ځایونو کې ډوډۍ ورکړي.

موزیمونه به هم راتلونکې اونۍ پرانیستل شي خو خلک به مجبور وي چې ماسک واغوندي.

د بریتانیې او ایتالیا د کورني فوټبال چارواکو ویلي چې د جون میاشتې په نیمايي کې به سیالي هم ولري خو خلکو ته به اجازه نه ورکوي چې د نندارې لپاره په لوبغالي کې را غونډ شي.

خو په روسیه کې وضعیت نازک دی او په نړۍ کې درېیم هېواد دی چې ډېر وګړي په کرونا ویروس اخته شوي دي.

په دې هېواد کې پرون د مثبتو پېښو شمېر درې لکه او اتیا زرو ته رسېدلی و.

په مسکو کې روغتیايي چارواکو پرون وویل چې د کوېډ-۱۹ ناروغۍ له کبله یوازې د اپرېل په میاشت کې لږترلږه ۱۵۶۱ تنه مړه شوي وو.

د مسکو پولیسو لږترلږه ۳۲ کسان نیولي

دا کسان د پېژندل شوي روسي ژورنالیست، اییا اذر د نیول کېدو پر ضد داعتراض لپاره را وتلي وو. 

په مسکو کې پولیسو لږترلږه ۳۲ تنه چې د دوما یو غړی، د ښاروالۍ د شورا یو شمېر استازي او ژورنالیستان هم په کې شامل دی، نیولي دي.

دا کسان د پېژندل شوي روسي ژورنالیست، اییا اذر د نیول کېدو پر ضد داعتراض لپاره را وتلي وو.

ایلیا اذر ۳۵ کلن دی او د نوایا ګزیتا په نوم ورځپاڼې سره یې د ازاد ژورنالیست په توګه کار کاوه.

هغه په روسیه کې د مظاهرو له قانونه په مکرر ډول د سرغړونې له کبله تېره اوونۍ په ۱۵ ورځو زندان محکوم شو.

ایلیا او پلویانو یې په انفرادي مظاهره کې په روسیه کې د کرونا ویروس د لا خپرېدو د مخنیوي لپاره د لګېدلو بندیزونو پر ضد مظاهره کړې وه.

دا معلومات په روسیه کې د څار یوې خپلواکې ادارې، پرون، د مې په ۲۹مه، خپاره کړي دي.

دې ادارې ویلي چې ۸ تنه مدني فعالان هم نیول شوي دي.

دا کسان د روسیې په دوهم لوی ښار، سنت پیترس برګ کې پولیسو نیولي دي.

خو ډېر کسان بېرته خوشې شوي دي.

تاجکستان کې پر یوه خبریال بریدونه شوي

عبدالله غربتي

په تاجکستان کې په یوه خبریال باندې دوه وار په وروستیو څو ورځو کې بریدونه شوي.

عبدالله غربتي د اشیا پلس په نوم یوه ازاد خبري اژانس ته کار کوي چې وروستي کارونه یې په تاجکستان کې د ځمکې د ښووېدو په پېښه باندې د راپورونو جوړول و.

عبدالله غربتي ازادي راډیو ته ویلي چې دریو کسانو نن جمعه پرې لاس پورته کړی او تورن کړی یې دی چې دی خلک پاروي.

غربتي په ختلون سیمه کې د ځمکې ښوویدو په هغې پېښه راپور جوړ کړی و چې پکې دوه کسان مړه شوي و.

دری اوونۍ مخکې هم عبدالله غربتي په پلازمینه دوشنبه کې وهل شوی و او وايي چې له بېلابېلو ځایونو ورته ګواښوونکي پیغامونه لېږل کېږي.

په تاجکستان او په ټوله منځنۍ اسیا کې خبریالان په خپلواکه توګه خبرونه او راپورونه نه شي جوړولای او تل په داسې چارو کې له خنډونو سره مخ کېږي چې په خرابه وضعه کې ان د خبریال په وهل ټکولو، شکنجې، حبس او وژلو تمامېږي.

د ازادې اروپا راډیو تاجکي سرویس څانګې خبریالان هم له ځینو کاري محدودیتونو سره مخ وي او دولت یې وخت په وخت د کار جوازونه په یوه او بله پلمه نه تمدیدوي.

د اروپايي ټولنې او منځنۍ اسیا چارواکو ترمنځ ویډیويي کنفرانس

اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

د اروپايي ټولنې چارواکو پرون د منځنۍ اسیا او افغانستان د بهرنیو چارو د وزارتونو له مرستیالانو سره په سیمه کې د کرونا ویروس د خپرېدو په وضیعت او یو لړ نورو مسئلو د ویډیويي کنفرانس له لارې خبرې کړي دي.

د افغانستان د بهرنیو چارو وزارت په یو بیان کې ویلي چې د پنجشنبې په ورځ په دې کنفرانس کې په سیمه کې د کرونا ویروس پر ضد د شریکې مبارزې او د منځنۍ اسیا هېوادونو او افغانستان سره د اروپايي ټولنې د اړیکو په لرلید تفصیلي بحث وشو.

له بلې خوا د اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

نوموړې زیاته کړې، اړتیا ده چې د سیمه ایزو او نړیوالو ننګونو او افغانستان کې د سولې په اړه ګډ کار دوام وکړي.

په دې کنفرانس کې د اروپايي ټولنې د یو شمیر لوړپوړو ډیپلوماټانو سربېره د افغانستان او منځنۍ اسیا د پنځو نورو هېوادونو د بهرنیو چارو د وزارتونو مرستیالانو برخه درلوده.

نور راوښيه

XS
SM
MD
LG