د افغانستان د کرکټ ملي لوبډله د مې په څلورمه نېټه اروپا ته سفر پیلوي.
د افغانستان د کرکټ بورډ وياند فريد هوتک په دې اړه د دوشنبې په ماښام ازادي راډیو ته داسې وويل:
"افغان کرکټ ملي لوبغاړي به د مې په څلورمه نېټه له کابله د اروپا پر لور سفر وکړي، هلته به له سکاټلنډ او ایرلنډ سره لوبې ولري چې د مې په ۸مه او ۱۰مه نېټه به له سکاټلنډ سره لوبې او په ۱۹مه او ۲۱مه نېټه به له ایرلنډ سره لوبې وکړي."
دا سفر وروسته له هغه دی چې د افغانستان د کرکټ ملي لوبډله تر ۲۴ ورځني سفر وروسته د شنبې په ورځ بېرته هېواد ته ستنه شوه.
افغان ملي کرکټ لوبډله جنوبي افريقا ته د تمرین په هدف تللې وه، چېرته چې يې په بېلابېلو برخو کي تمرینونه وکړل.
د دې سفر په لړ کې د افغانستان کرکټ بورډ د نړیوال جام لپاره د غوراوي کمېټې د ۱۵ لوبغاړو نوملړ هم اعلان کړ چې درې احتياطي لوبغاړي هم پهکې شامل دي.
ښاغلي هوتک زیاته کړه چې افغان کرکټ لوبډله به د اروپا په بېلابېلو برخو کې د نړیوال جام لپاره تمریناتي لوبې وکړي او له بشپړ چمتووالي سره به په نړیوال جام سیالیو کې ګډون وکړي.