پولیسو د جمعې په ورځ د قزاقستان په پلازمېنه استانه او نورو ښارونو الماتې او شېمکینت کې لسګونه کسان نیولي دي.
دا هغه اعتراض کوونکي دي چې د پخواني ولسمشر نور سلطان نظربایف په نوم د دې هېواد د پایتخت د نومولو په حکومتي پریکړه اعتراض لري.
حکومت دا پریکړه د پخواني ولسمشر نور سلطان نظربایف له ناڅاپي استعفا څو ورځې وروسته وکړه.
د اعتراضونو کوونکو دا نیونې د نوروز د رخصتیو پر مهال شوي دي.
په استانه کې پولیس له څو هغو اعتراض کوونکو سره په شخړه واوښتل چې اعتراضي پوسټرونه ورسره وو، دوی وروسته ونیول شول او د اعتراض له ځایه یوړل شول.
د ازادي راډیو د روسي ژبې د ټلوېزیونې شبکې «کرنټ ټایم» خبریاله سیوتلانه ګلوشکوا هم په نیول شویو کسانو کې شامله ده.
کرنټ ټایم د روسي ژبې ټلوېزیونې شبکه ده چې د ازادې اروپا/ ازادي راډیو یې د امریکا غږ سره په ګډه پر مخ بیايي.
په عین حال کې د ځوانو ښځو او سړیو یوې ډلې چې د نوروز دودیزې جامې یې په تن وي، په استانه کې د ازادي راډیو له خبریالانو راتاو شوي و او هغوی یې نه پریښودل چې د پولیسو لهخوا د معترضانو د نیول کېدو تصویرونه واخلي.
دوی د ازادي راډیو د خبریالانو د کمرو په وړاندې ورځپاڼې نېولې وې او هغوی نه پرېښودل چې فلم واخلي.
په الماتې کې هم د ازادي راډیو خبریالان په ورته توګه د ځینو ځوانانو لهخوا منعه شوې چې د معترضانو د نیول کېدو په اړه له سیمې راپورونه چمتو کړي.
د پنجشنبې په ورځ په استانه کې پولیسو د شلو په شا او خوا کې هغه کسان ونیول چې د نور سلطان په نوم یې د استانې د ښار په نومولو اعتراض درلود.
نورسطان نظربایف په قزاقستان کې له ۳۰ کاله واکمنۍ وروسته د مارچ په ۱۹ مه نېټه ناڅاپي استعفا وکړه.