فیفا یا د فوټبال نړیوال فدراسیون یوسف کارګر د افغانستان د فوټبال فدراسیون د رئیس په توګه انتخاب کړی.
د فیفا په وېبپاڼه دا خبر وروسته له هغه راغی چې د افغانستان لویې څارنوالۍ د فوټبال فدراسیون د مرستیال په توګه د یوسف کارګر د کار تعلیق رفع کړ.
کارګر داسې وخت د فیفا لهخوا د فوټبال فدراسیون د رئیس په توګه انتخاب شوی چې د دغه فدراسیون د رهبري چارې له خلا سره مخ وې.
ښاغلي کارګر بېګاه شپه د فیفا د تصمیم په اړه ازادي راډیو ته وویل:
"کله چې زما دنده له تعلیق راووته فیفا پرېکړه وکړه چې د سم نظم ساتلو او په نړیوالو میدانونو کې د افغانستان د حضور لپاره ما د رئیس په توګه معرفي کړي."
یوسف کارګر د هغو پنځو کسانو په ډله کې و چې د فوټبال فدراسیون په مخکېني رئیس کرامالدین کریم د ښځینه فوټبالرانو د جنسي ځورونې په تور یې دندې ځنډول شوې وې.
کرامالدین کریم په ځان لګېدلي تورونه رد کړي، خو لویې څارنوالۍ ویلي چې پهدې اړهیې تحقیقات په بشپړېدو دي.