د امریکا د متحده ایالاتو د مرکزي قوماندانۍ قوماندان جنرال جوزف ووټل د پاکستاني پوځ له لوی درستیز جنرال قمر جاوید باجوه سره د افغانستان د سولې د پروسې په اړه خبرې کړې دي.
جنرال ووټل په داسې مهال د پاکستان سفر کړی چې پهدې وروستیو کې د افغانستان لپاره د امریکا د بهرنیو چارو ځانګړي استازي زلمي خلیلزاد هم د افغانستان د سولې پر لارو چارو د خبرو لپاره د پاکستان سفر وکړ او د دې هېواد له صدراعظم عمران خان، د پوځ له مشر او نورو چارواکو سرهیې ولیدل.
د پاکستاني پوځ مطبوعاتي څانګې «ISPR» د یکشنبې په ورځ په یوې خپرې کړې خبرباڼه کې ویلي چې د امریکا د مرکزي قوماندانۍ قوماندان جوزف ووټل په مشرۍ پلاوي د پاکستاني پوځ له لوی درستیز جنرال قمر جاوید باجوه سره په لیدنه کې پر دوه اړخیزو اړیکو او د سیمې پر امنیتي وضعیت سربېره د افغانستان د سولې پر پروسې خبرې کړي.
خبرپاڼه وايي، جنرال باجوه جنرال جوزف ته یو ځل بیا ویلي:
"د سیمې د امنیت لپاره په افغانستان کې سوله ضروري ده، پاکستان پر خنډونو سربېره د سیمې د امنیت لپاره په ټولو هڅو کې پراخه برخه اخیستې او دا لړۍ به جاري وساتي."
له بلې خوا بیا د امریکا پر پوځي پلاوي سربېره د سناتور لېندسي ګراهام په مشرۍ یوه سیاسي پلاوي هم پاکستان ته د خپل سفر پر مهال د دې هېواد د بهرنیو چارو له وزیر شاه محمود قریشي سره پر دوه اړخیزو مسایلو، پر سیمهییزو او نړیوالو حالاتو او د افغانستان پر وضعیت خبرې کړې دي.
د امریکا دغه سیاسي او پوځي پلاوي پهداسې وخت کې د پاکستان سفر کړی چې پهدې وروستیو کې د افغانستان د سولې د پروسې په لړ کې د امریکا د متحده ایالاتو هڅې زیاتې شوي او د سولې لپاره د امریکا د بهرنیو چارو ځانګړي استازي زلمي خلیلزاد هم سیمې ته د خپل سفر په اوږدو کې د تېرې جمعې په ورځ د پاکستان سفر وکړ.
خلیلزاد د دغه سفر په اوږدو کې د پاکستان د پوځ پر مشر او د بهرنیو چارو پر وزیر سربېره د لومړي ځل لپاره له صداراعظم عمران خان سره هم ولیدل او د افغانستان د سولې پر پروسهیې ورسره خبرې وکړې.
نوموړي تر پاکستان مخکې د هند، چین او افغانستان سفر هم کړی و.
د یادونې وړ ده چې ښاغلي خان پهدغه لیدنه کې یو ځل بیا د پاکستان هغه هوډ تکرار کړ چې په افغان سوله کې به خپلې هڅې نهسپموي.
