سره له دې چې د افغانستان او د سیمې د ځینو هېوادونو رسنیزو بنسټونو، ۲۰۱۸ میلادي کال د افغان خبریالانو لپاره خونړی کال بللی او افغان حکومت ژمنه کړې چې د خبریالانو خوندیتوب به ډاډمن کړي، خو د راپورونو له مخې بیا هم د ۲۰۱۹ میلادي کال په لومړیو کې په فراه ولایت کې یو افغان خبریال د وسلهوالو مخالفینو لهخوا ووژل شو.
جاوید نوري چې په فراه ولایت کې د یوې سیمهییزې راډیو خبریال و، د روانې اوونې د شنبې په ورځ «۱۳۹۷ کال د مرغومې ۱۸» وسلهوالو طالبانو د سپرليو له موټره کوز او د خلکو په مخکې په ډزو وواژه.
د ده په وژنه د هېواد په مرکز او ولایتونو کې خبریالانو او رسنیزو بنسټونو اندېښنې ښودلي او دغه عملیې د بیان له ازادۍ سره څرګنده دښمني بللې ده.
ارشیف، د افغانستان د ازادو ژورنالېستانو د ملاتړ ادارې اجرائیوي رئیس مجیب خلوتګر په یوه خبري غونډه کې
د افغانستان د ازادو رسنیو د ملاتړ ادارې اجرائیوي رئیس مجیب خلوتګر د پنجشنبې په ورځ «۱۳۹۷ کال د مرغومې ۲۰» پهدې اړه ازادي راډیو ته وویل:
"په خواشينۍ سره چې ښاغلی نوري د رسنۍ د لومړي کارکوونکي په توګه په فراه ولایت کې په ډزو ویشتل کېږي، دا ښيي چې د خبریالانو د امنیت تأمینول چې د حکومت دنده ده، حکومت دغه مسؤلیت په سمه توګه نهترسره کوي. هره ورځ موږ د یو خبریال د وژل کېدو یا له تاوتریخوالي سره د مخامخ کېدو شاهدان یو."
ښاغلي خلوتګر له حکومته وغوښتل چې له کړو ژمنو سره سم دې د خبریالانو خوندیتوب ته تدابیر جدي کړي.
سربېره پر دې، د بخښنې نړیوال سازمان هم پر ټویټرپاڼه د جاوید نوري په وژل کېدو اندېښنه ښودلې ده.
د افغانستان د ازادو رسنیو ملاتړه اداره، نی وايي تېر کالیې په مرکز او ولایتونو کې د خبریالانو او د رسنیو د کارکوونکو په وړاندې د تاوتریخوالي ۱۹۸ او د دوی د وژلو ۲۰ قضیې ثبتې کړې دي.
وسلهوالو طالبانو تر اوسه پهدې اړه څه نهدي ویلي.
د افغانستان د کورنیو چارو وزارت وايي، د خبریالانو او د رسنیو د کارکوونکو خوندیتوب د دوی په لومړیتوبونو کې دی.
د کورنیو چارو وزارت د ویاند مرستیال نصرت رحیمي
د دغه وزارت د ویاند مرستیال نصرت رحیمي پهدې اړه ازادي راډیو ته وویل:
"د جمهور رئیس د صریح هدایت پر اساس ټول اړوندو کشفي، استخباراتي او امنیتي ارګانونو ته جدي سپارښتنه شوې چې د خبریالانو او ژورنالېستانو امنیت ته ډېره توجه وکړي. په هغو مواردو کې چې له ګواښونو سره مخ کېږي، پاملرنه اړینه ده او پهدې برخه کې کوټلي ګامونه واخلي."
افغان چارواکي له ۲۰۰۱ کال راهیسې په هېواد کې د رسنیو پراختیا او فعالیت د دولت لویه لاسته راوړنه ګڼي، خو خبریالان وايي د دې لپاره چې په هېواد کې رسنیز فعالیتونه نور هم اغېزمن شي، حکومت ته پهکار ده چې خوندي چاپېریال او کاري اسانتیاوې ورته برابرې کړي.
راپور: خان محمد سیند