د لاسرسۍ وړ لېنکونه

تازه خبر
سه شنبه ۲۱ زمری ۱۳۹۹ کابل ۰۸:۳۶

نړۍ

ډونالد ټرمپ په عراق کې د امریکایي سرتېرو لیدنې ته ورغی

ډونالد ټرمپ په عراق کې د امریکایي سرتېرو څخه د لیدنې پر مهال

د امریکا ولسمشر ډونالد ټرمپ په یوه نااعلان شوي سفر په عراق کې د امریکایي سرتېرو لیدنې ته ورغی.

سپینې ماڼۍ د ډسمبر په ۲۶مه اعلان وکړ چې ولسمشر ټرمپ د بغداد په لوېدیځ کې د الاسد په نوم هوایي اډې ته ورسېد.

نوموړی تر دې یوه ورځ دمخه له واشنګټنه روان شوی و.

په‌دغه سفر کې د ولسمشر ټرمپ مېرمن میلانیا ټرمپ هم د ده ملګرې ده.

تر دې وړاندې پر ډونالد ټرمپ له‌دې کبله انتقادونه کېدل چې ولسمشرۍ ته له رسېدو راهیسې یې په هېڅ جګړه‌ییزه سیمه کې د خپلو ځواکونو لیدنه نه‌ده کړې.

ډونالد ټرمپ په اکټوبر کې ویلي و چې تصور نه‌کوي دا لیدنه دومره لازمه وي.

شااوخوا پنځه زره امریکایي پوځيان په عراق کې دېره دي چې د اسلامي دولت ډلې یا داعش پر وړاندې جګړه کې د عراق د سیمه‌ییزو امنیتي ځواکونو ملاتړ کوي.

ولسمشر ټرمپ د ډسمبر په ۲۶مه وویل چې له عراقه د خپلو پوځیانو د کمولو پلان نه‌‌لري او له عراقه کولای شي په سوریه کې د داعش وسله‌والو پر وړاندې د بریدونو لپاره د یوې اډې په توګه کار واخلي.

د ورځې تازه خبرونه دلته ولولئ

بیلاروس کې پولیسو یو شمېر اعتراض کوونکي نیولي

د اګست پر نهمه هم پولیسو شاوخوا زر کسان یوازې په منسک کې او په ټول هېواد کې ېې درې زره کسان نیولي وو.

پولیسو د بیلاروس په پلازمېنه منسک کې یو شمېر اعتراض کوونکي مخکې تر دې چې د ټاکنو د کمېسیون د وروستۍ پرېکړې پر ضد لاریونونو ته دوام ورکړي، نیولي دي.

لسګونه کسان د اګست پر لسمه داسې مهال ونیول شول چې د ټاکنو کمېسیون الکساندر لوکاشینکا رسماً د بیلاروس د ولسمشر په توګه اعلان کړ.

د اګست پر نهمه هم پولیسو شاوخوا زر کسان یوازې په منسک کې او په ټول هېواد کې ېې درې زره کسان نیولي وو.

دغو کسانو د هغې نظر پوښتنې له کبله اعتراض کړی وو چې ویلي یې وو څه باندې اتیا سلنه خلکو د لوکاشینکا د ولسمشرۍ لپاره مثبته رایه ورکړې ده.

اعتراض کوونکي دا ټاکنې له وړاندې پلان شوې بولي.

د یوې مخکښې مخالف کاندیدې سویتلانا څیخانوسکایا پلویانو ویلي وو چې دوی به د کمېسیون د پرېکړې پر ضد پراخ اعتراضونه وکړي.

د بیلاروس د کورنیو چارو وزارت د بشري حقونو د فعالانو هغه راپورونه ردوي چې وایې په دې اعتراضونو کې یو کس وژل شوی دی.

پخپله لوکاشینکا د اګست پر لسمه دا اعتراض کوونکي پسونه وبلل چې د ده په وینا له بهرنیو هېوادونو څخه د ټیلیفون له لاري رهبري کېږي.

نوموړي ویلي له دغو کسانو سره له پولنډ، بریتانیا او چک جمهوریت څخه ټیلیفوني اړیکې نیول شوي.

امریکا په روسیه کې د بهرنیو رسنیو پر نښه کولو اندېښنه څرګنده کړه

د امریکا د بهرنیو چارو وزیر مایک پومپیو

د امریکا د بهرنیو چارو وزیر مایک پومپیو وایي، واشنګټن د روسیې لخوا په هغه هېواد کې د بهرنیو رسنیو په نښه کولو د نویو هڅو له کبله ژوره اندېښنه لري.

ښاغلي پومپیو په هغې اعلامیې کې چې د اګست پر لسمه خپره شوه ویلي، د روسیې دولت لخوا د رسنیو د تنظیم تګلاره چې مسوده یې په دې وروستیو کې خپره شوه، پر آزادې اروپا / آزادي راډیو او امریکا غږ چې له وړاندې له غیرعادلانه محدودیتونو سره مخامخ دي، نوي او درانه مقررات وضع کوي.

پومپیو ویلي په روسیې کې د خپلواکو رسنیو د پرله پسې ځپلو څخه ناخوښ دی او پر دغه هېواد یې غږ وکړ چې د بیان د آزادۍ په برخه کې خپل مکلفیتونه پرځای کړي.

د روسیې د رسنیو د تنظیم فدرالي ادارې په جولای میاشت کې د یوه فرمان مسوده خپره کړه چې پر اساس یې هغه ټولې رسنۍ، چې د بهرنیو رسنیو د استازو په توګه ثبت شوي، څه چې چاپوي یا خپروي باید څرګند کړي.

د نوي سپارښتنې څخه سرغړونه کېدای شي د افرادو لپاره ۱۰۰ زره روبله چې د ۱۴۰۰ ډالرو معادل کېږي، جریمه ولري او یا به سرغړونکي ۱۵ ورځي په توقیف کې تېروي.

لویې ادارې به د سرغړونې په صورت کې ۵ میلیونه روبله چې د ۷۰ زره ډالرو معادل کېږي جریمه ورکوي.

د آزادې اروپا/ آزادي راډیو سرپرستې دیسې سندلار د جولای پر ۲۳ ویلي وو چې دا نوې سپارښتنه پر رسنیو لا ډېر محدودیت او د اورېدونکو ترمنځ د وېرې خپرولو په هدف کېږي.

د بیلاروس ټاکنو کمېسیون: الکساندر لوکاشینکا ولسمشریزې ټاکنې وګټلې

الکساندر لوکاشینکا

د بیلاروس مرکزي ټاکنو کمېسیون اعلان وکړ چې ولسمشر الکساندر لوکاشینکا د رايو په اکثریت خپلولو سره ولسمشریزې ټاکنې وګټلې.

دا وروسته له هغه چې د دې هېواد امنیتي ځواکونه په پلازمېنه منسک او نورو ښارونو کې له لاریون کوونکو سره لاس او ګرېوان شول.

دوی وايي په ټاکنو کې درغلي شوې ده.

شخړه وروسته له هغې پیل شوه، چې د رایې ورکولو له مرکزونو د باندې په نظرپوښتنو کې ولسمشر الکساندر لوکاشینکا د ولسمشرۍ په ټاکنو کې مخکښ وګڼل شو.

خو د اپوزیسیون عمده کاندیدې دغه پايلې رد کړې.

له پاکستان څخه افغانستان ته د افغان کډوالو د ستنېدو لړۍ بېرته پیل شوه

ارشیف

له پاکستانه، افغانستان ته د کرونا ویروس له کبله د افغان کډوالو د ستنېدو ځنډېدلی بهیر نن بېرته پیل شو.

په اسلام اباد کې د ملګرو ملتونو د کډوالو ادارې ویاند قيصرخان اپريدي ازادي راډيو ته وويل چې نن د دوشنبې په ورځ د اګست په لسمه نېټه د افغان کډوالو داوطلبانه ستنېدل بېرته پیل شول.

له مارچ میاشتې راهیسې د افغان کډوالو د بېرته ستنېدو بهیر درېدلی وو.

د اپريدي په وينا دا کډوال به له دوو مرکزونو ستنېږي.

افریدي وویل چې يو مرکز د خیبرپښتونخوا نوښار او بل د بلوچستان ایالت په کوټه ښار کې دی.

هلته د خلکو د تثبیت لپاره چارواکي شته او د دوشنبې او سې شنبې په ورځو به دا مرکزونه پرانیستې وي.

د ملګرو ملتونو د کډوالونړیوالې ادارې د معلوماتو له مخې له ۲۰۰۲ کال راهیسې تر دې دمه خوا اوشا څلور څلویښت لکه افغان کډوال بېرته افغانستان ته ستانه شوي دي.

د دې ادارې د شمېرو له مخې اوسمهال په پاکستان کې څه باندې څوارلس لکه ثبت شوي او اته لکه پرته له ثبته کډوال مېشت دي.

امریکا کې د کرونا ویروس د مثبتو پېښو شمېر له ۵ میلیونو واوښت

ارشیف

د امریکا په متحدو ایالتونو کې د کرونا ویروس د مثبتو پېښو شمېر تر پنځو میلیونو واوښت.

په دغه هېواد کې چې د نړۍ په سطحه کرونا ویروس سخت ځپلی، د دې وبا د خپرېدو د سوکه کېدو یو څه نښې لیدل شوي دي.

ویل کېږي چې په امریکا کې به د معاینې ظرفیت ته په پام سره د کرونا ویروس د مثبتو پېښو واقعي شمېر خورا زیات وي، ځکه په دې ویروس په ګڼو اخته کسانو کې د ناروغۍ نښې نښانې نه ښکاري.

د امریکا په سویل او لوېدیځ کې د ویروس د خپرېدو له زیاتوالي سره د جون له نیمايي ګڼې سیمې مجبوره شوي چې کارونه بارونه وځنډوي یا یې بیا پرانیستل بل وخت ته پلان کړي.

په دغه هېواد کې په کرونا ویروس د مړو کسانو شمېر تر یولک او ۶۲۰۰۰ زیات دی.

بلخوا نیوزیلنډ پرون اعلان وکړ، چې په دغه هېواد کې په ۱۰۰ ورځو کې چا ته دغه ویروس نه دی انتقال شوی دی.

بیلاروس کې امنیتي ځواکونه له لاریون کوونکو سره په شخړه اوښتي

د تُت ټکی بای خپلواک خبري ویبسایت د ټویټر په حساب کې د زورزیاتي د ځینو صحنو تصویرونه خپاره شوي دي.

د بېلاروس امنیتي ځواکونه په پلازمېنه منسک او نورو ښارونو کې له لاریون کوونکو سره په شخړه واوښتل.

شخړه وروسته له هغې پیل شوه، چې د رایې ورکولو له مرکزونو بهر په نظرپوښتنو کې ولسمشر الکساندر لوکاشینکا د ولسمشرۍ په ټاکنو کې مخکښ وګڼل شو، خو د اپوزیسیون عمده کاندیدې دغه نتایج رد کړي دي.

د بېلاروس دولتي ټلویزیون پرون راپور ورکړ، چې رسمي نظرپوښتنې ښيي لوکاشینکا د پرونیو ټاکنو کې ۷۹ اعشاریه ۷ فیصده رایې ګټلې دي.

د دغو اټکلونو له مخې د اپوزیسیون عمده کاندیدې سویتلانا څیخانوفسکایا په سلو کې ۶ اعشاریه ۸ فیصده رایې ګټلې دي.

تر دغه اعلان وروسته په زرګونو کسانو د منسک پر لارو سړکونو لاریونونه وکړل.

د تُت ټکی بای خپلواک خبري ویبسایت د ټویټر په حساب کې د زورزیاتي د ځینو صحنو تصویرونه خپاره شوي دي.

په ځینو لومړنیو راپورونو کې د ګڼو کسانو د نیول کېدو خبره شوې ده.

د پسرلي په نوم د بشري حقونو یوه ډله د نیول شویو کسانو شمېر ۱۲۶ تنه ښيي او په وینا یې په دوی کې ۱۶ ژورنالیستان او ۴۰ څارونکي شامل دي.

نایجیریا کې د ۶ فرانسوي ګرځندویانو په ګډون ۸ کسان وژل شوي

ارشیف

پرون د نایجیریا په یوه توریستي سیمه کې د شپږو فرانسوي ګرځندویانو په شمول اته کسان وژل شوي.

د نایجیریا د جَنوب لویدیځ ولایت تیلابیري والي تادجاني ابراهیم کاتیلا د فرانسې خبري اژانس ته ویلي چې په دغو خلکو باندې وسله والو کسانو ډزې کړې دي.

هغه ویلي په وژل شویو کې شپږ فرانسویان، د هغوی یو محلي لارښود او موټر چلوونکی شامل دي.

په دغو ګرځندویانو باندې د برید مسئولیت تر پرون ناوخته کومې ډلې په غاړه نه و اخیستی.

پاکستان کې سیلابونو نږدې ۵۰ تنه مړه کړي

د راپورونو په اساس د پاکستان پوځیان په سیلاب ځپلو سیمو کې د خلکو مرستې ته وردانګلي.

په پاکستان کې تېرې درې ورځې سیلابونو لږ تر لږه پنځوس تنه مړه کړي.

په بېلابېلو سیمو کې سخت موسمي اورښتونه د سیلابونو د راوتلو او خلکو ته د زیان رسېدو لامل شوي.

ډېر زیان په خیبرپښتونخوا کې خلکو ته رسېدلی.

د پاکستان د بېړنیو حالاتو سره د مبارزې ادارې ویلي په خیبر پښتونخوا کې ۱۹ کسان، په سند کې دولس، په ګلګت کې لس او په پنجاب کې اته کسان مړه شوي.

دوی له خلکو سره د مرستو لپاره له پوځ همکاري غوښتې.

د راپورونو په اساس د پاکستان پوځیان په سیلاب ځپلو سیمو کې د خلکو مرستې ته وردانګلي.

جرمني د افغان سولې ټینګښت کې د فعال رول لوبولو ته چمتووالی وښود

د افغانستان لپاره د جرمني ځانګړی استازی مارکُس پوتزل

جرمني په افغانستان کې د سولې د ټینګښت په پروسه کې د فعال رول لوبولو ته چمتووالی ښودلی دی.

د افغانستان لپاره د جرمني ځانګړي استازي مارکُس پوتزل په یوه خبرپاڼه کې چې د سولې د مشورتي لویې جرګې د پرېکړه‌لیک له خپرېدو وروسته خپره شوه ویلي د ۴۰۰ طالب بندیانو د خوشې کېدو د فرمان له لاسلیک سره دواړه لوري باید د بین‌الافغاني خبرو پیل ته چمتو شي.

ښاغلی پوتزل وايي چې له دې خبرو سره په یوه وخت کې باید د ټول هېواد په کچه اوربند ټینګ شي.

پاکستان د ۴۰۰ طالب بندیانو د خوشې کېدو پرېکړه وستایله

د افغان حکومت له لوري یو شمېر خوشې شوي طالب بندیان

پاکستان د ۴۰۰ طالب بندیانو د خوشې کېدو په اړه د ولسمشر اشرف غني پرېکړه ستایلې او هیله‌یې څرګنده کړې چې له دې سره به بین‌الافغاني خبرې ژر تر ژره پیل شي.

د پاکستان د بهرنیو چارو وزارت په یوه بیان کې ویلي دي چې نړیواله ټولنه باید د افغانانو ترمنځ د خبرو د بریا او په افغانستان کې د خبرو له لارې د دایمي سولې او ثبات د ټینګښت ملاتړ وکړي.

روحاني: ایران کې به بېړنی حالت د ۲۰۲۱ کال د جنورۍ تر پایه پاتې وي

د ایران ولسمشر حسن روحاني

ولسمشر حسن روحاني وايي چې په ایران کې د کرونا ویروس د مخنیوي لپاره بېړنی حالت به د ۲۰۲۱ کال د جنورۍ تر پایه پر ځای پاتې وي.

ښاغلي روحاني نن په یوه بیان کې چې د ده پر وېب‌پاڼه خپور شو ویلي دي چې په ایران کې له شپږو میاشتو راهیسې دا حالت روان و، نو خلک باید د لږترلږه همدومره نور وخت لپاره هم چمتووالی ولري. هغه زیاته کړه چې د اوس لپاره د صحي محدودیتونو د لیرې کولو پلان نه‌شته.

د ایران حکومت دوه میاشتې مخکې د ځینو محدودیتونو لیرې کول پیل کړل چې په نتیجه کې یې ډېری خلکو د دې وبا د مخنیوي لپاره وضع شویو مقرراتو ته ډېره پاملرنه ونه‌کړه.

په ایران کې په 'کووېډ-۱۹' ناروغۍ د اخته کسانو شمېر له ۳۲۰ زرو او له دې کبله د مړو شمېر له ۱۸ زرو اوړي.

نن د جاپان پر ناګاساکي د اټومي بمب د غورځولو ۷۵ کلیزه ده

متحدایالاتو د ۱۹۴۵ کال د اګست په ۹مه نېټه، له غرمې مخکې یو اټومي بمب چې وزن یې څلورنیم ټنه و، پر دې ښار راوغورځاوه

نن د جاپان پر ناګاساکي ښار د اټومي بمب د غورځولو ۷۵ کلیزه ده.

متحدایالاتو د ۱۹۴۵ کال د اګست په ۹مه نېټه، له غرمې مخکې په ۱۱:۰۲ یو اټومي بمب چې وزن یې څلورنیم ټنه و، پر دې ښار راوغورځاوه، چې له اویازرو زیات کسان په کې ووژل شول.

د ناګاساکي ښار اوسېدونکو په دې مناسبت د یادغونډو په جوړولو سره دې قربانیانو ته درناوی وکړ او د نړۍ له مشرانو یې وغوښتل چې پر اټومي وسلو د محدودیتونو د لګولو په برخه کې نور اقدامات وکړي.

متحدایالاتو د ناګاساکي له بمبارۍ مخکې درې ورځې مخکې پر هیروشیما هم اټومي بم وغورځاوه چې د نړۍ لومړنۍ اټومي حمله وه.

پر هیروشیما په اټومي حمله کې ۱۴۰ زره کسان ووژل شول.

په بلاروس کې د ولسمشرۍ ټاکنې پیل شوې

الکساندر لوکاشینکا

د بلاروس د انتخاباتو خپلواک کمېسیون په دې هېواد کې د ولسمشرۍ روان انتخابات بااعتباره بللي او وايي د رای ورکولو په شرایطو د برابرو ۶،۸ میلیون وګړو په سلو کې ۵۴ خلکو ګډون په‌کې کړی دی.

د رای ورکولو بهیر نن یکشنبه د سهار په اتو پیل شو او د ماښام تر اتو دوام کوي. په دې انتخاباتو کې واکمن ولسمشر الکساندر لوکاشینکا د شپږم ځل لپاره د بیا غوره کېدو په تمه دی.

د انتخاباتو په درشل کې د اپوزېسیون له زرو زیات فعالان ونیول شول او څو احتمالي کاندیدان د انتخاباتي سیالیو له بهیر څخه وایستل شول.

د ازادۍ راډیو د بلاروس څانګې د راپور له مخې د رای ورکولو د مرکزونو مخې ته د هغو خلکو اوږدې لیکې لیدل کېږي چې د اپوزېسیون د کاندیدې سویتلانا څیخانوسکایا د پلوۍ د نښې په توګه‌یې سپین بازو بندونه تړلي دي.

د راپورونو له مخې چارواکو د پلازمېنې مېنسک په مرکزي برخه کې کې ظاهراً انټرنټ بند کړی چې په نتیجه کې یې د موبایل ټیلیفون د انترنټ په وسیله د فېسبوک، مسنجر، یوټیوب، انستاګرام، وټسپ اپ او وایبر شبکې له ستونزو سره مخ شوې دي. تمه ده چې د دې انتخاباتو مقدماتي نتایج سبا اعلان شي.

زلزلې د ایران د کرمانشاه سیمه لړزولې

په راپورونو کې راغلي دي چې د زلزلې مرکز د کرمانشاه په ګیلان غرب ولسوالۍ کې و.

د ایران د دولتي رسنیو د راپورونو له مخې د رېښتر په مقیاس ۵،۱ درجې زلزلې د دې هېواد لویدیځ ولایت کرمانشاه لړزولی دی.

په راپورونو کې راغلي دي چې د زلزلې مرکز د کرمانشاه په ګیلان غرب ولسوالۍ کې و.

سمدستي د دې زلزلې له کبله د انساني او مالي تلفاتو جزییات نشته.

پاکستان سر له ننه بېرته نړیوالې الوتنې پیلوي

ارشیف

پاکستان اعلان کړی چې سر له نن یکشنبې به ټولې نړیوالې الوتنې بېرته پیل کړي.

څه باندې څلور میاشتې وړاندې دغه هېواد د کرونا ویروس د خورېدو د مخنیوي لپاره دغه الوتنې ځنډولي وې.

د پاکستان د ملکي هوایې چلند ادارې پرون شنبه په دې اړه اعلامیه خپره کړه.

تر دې یوه ورځ دمخه حکومت د ټولو اقتصادي او ټولنیزو سکټورونو د پرانیستلو اعلان کړی و.

پاکستان د اګست پر شپږمه نیټه په خپلو ټولو هوایې ډګرونو کې کورنیو الوتنو ته اجازه ورکړه.

په دې هېواد کې تر ۲۸۳۰۰ ډېر کسان په کرونا ویروس اخته شوي دي

نور راوښيه

XS
SM
MD
LG