- مېل انلاین
مېل انلاین خپرونې په خپله وروستۍ ګڼه کې یو مطلب لیکلی چې عنوان یې دی د افغانستان ولسمشر اشرف غني غواړي بیا دغه څوکۍ تر لاسه کړي.
د لیکوال په خبره ولسمشر غني غواړي له جګړې ستړو رأيه ورکوونکو ته خپل ځان داسې ور وپېژني چې کولی شي د دغه هېواد ۱۷ کلن بحران ختم کړي.
د مېل انلاین په لیکنه اشرف غني خپل ځان د سولې بهیر ته ژمن بولي او د لیکوال په خبره هڅې یې ظاهراً بې نتیجې هم نهوې.
د افغانستان په تېرو ولسمشریزو انتخاباتو کې چې د پراخو درغلیو ادعا ورسره وې، ولسمشر اشرف غني عبدالرشید دوستم خپل لومړی مرستیال وټاکه، خو دا معلومه نهده چې په راتلونکو انتخاباتو کې به دغه څوکۍ چا ته ورسېږي.
مېل انلاین لیکي:
دا هم معلومه نهده چې په راتلونکو انتخاباتو کې به د ښاغلي غني اساسي رقیب څوک وي؟
تراوسه د افغان حکومت اجرائیه رئیس عبدالله عبدالله او د ملي امنیت پخوانی سلاکار محمد حنیف اتمر چې په اګسټ کې یې له خپلې دندې استعفا وکړه، احتمالي کاندیدان بلل کېږي.
د بلخ پخوانی والي عطا محمد نور چې یو وخت یې نه غوښتل د ولایت څوکۍ پریږدي، هم دغې څوکۍ ته لېوالتیا ښودلې ده.
مېل انلاین زیاتوي د اشرف غني اوسنۍ ولسمشرۍ دوره له تاوتریخوالي، پراخو ملکي تلفاتو، کورنیو سیاسي شخړو او د فرقهیې او قومي تفرقو سره مل ده.
- واشنګټن اګزماینر
یوه بله خپرونه واشنګټن اګزماینر په خپله وروستۍ ګڼه کې په افغانستان کې د امریکا د بیارغونۍ د سرمفتش ادارې یا سیګار وروستي راپور ته په اشارې یو مطلب لیکلی دی چې وایي، په افغانستان کې د سلګونو امریکایانو د قربانۍ، میلیاردونو ډالرو لګښتونو او په ۱۷ کلنه جګړه کې د امریکایي سرتيرو د ګډون سره-سره د کابل حکومت نهدی توانیدلی:
- د افغانستان پر ټولو برخو واک ولري.
- اداري فساد په یوې ساري ناروغۍ بدل شوی.
- انتخاباتو له تاوتریخوالي سره مله ول.
- ډموکراسي نهده توانیدلې اساسي بنسټ ولري.
- د نشهیي موادو پر وړاندې مبارزه هم له ناکامۍ سره مخامخ ده.
واشنګټن اګزماینر د امریکا د عدلیې وزارت له قوله لیکي:
د افغانستان لویه څارنوالي کمزورې ده او نهشي کولی زورواکي عدالت ته راولي، نو له همدې کبله یې خپل اعتبار له لاسه ورکړی دی.
د لیکوال په خبره که څه هم امریکا په ورځ کې یو نیم میلیون ډالره د نشهیي موادو د لهمنځه وړلو لپاره لګوي، خو په افغانستان کې د کوکنارو کښت د ۲۰۰۲ میلادي کال په مقایسه څلور برابره ډېر شوی دی.