د امريکا متحدو ايالتونو د بهرنيو چارو وزير وايي تمه لري، چې په نيويارک کې د روسيې د بهرنيو چارو له وزير سره وګوري.
د امريکا متحدو ايالتونو د بهرنيو چارو وزير مايک پامپيو پرون له خپل روسي سيال سرګي لاوروف سره د کتنې د احتمال اعلان په داسې حال کې وکړ، چې تر دې څو ساعته مخکې روسيې ويلي وو، چې غواړي سوريې ته د هوايي مدافع اس ۳۰۰ ډوله دستګاه ورکړي.
روسيه وايي له دې کاره يې هدف د سوريې د دفاعي ځواک پياوړتيا او له دې سره مرسته ده، چې بيا د تېرې اوونۍ هغه پېښه تکرار نه شي، چې د سوريې دولتي ځواکونو د روسيې يوه جنګي الوتکه په تېروتنې وويشتله.
ويل شوي چې د مايک پامپيو او د هغه د روسي سيال سرګي لاوروف ترمنځ به دغه کتنه په نيويارک کې د عمومي اسمبلۍ په څنډه کې وشي.
د ملګرو ملتونو عمومي اسمبلۍ نن د سپټمبر پر ٢٥مه پرانيستل کېږي.
د امريکا د بهرنيو چارو وزير مايک پامپيو پرون په نيويارک کې يوه کنفرانس ته، چې د امريکا د ملي امنيت سلاکار او په ملګرو ملتونو کې د امريکا سفيره هم په کې حاضره وه، وويل:
”د ملګرو ملتونو د عمومي اسمبلۍ په څنډه کې به له روسي لوري سره پر ګڼو مسايلو خبرې وکړو. ډېر باوري يم چې په دغو موضوعاتو کې به د اس ۳۰۰ ډوله دفاعي سيسټم په اړه د روسيې د لوري وروستۍ پرېکړه هم کې شامله وي. موږ به د مشترکو زمينو د موندلو هڅه وکړو، چې له روسانو سره په کې کار وکړو. موږ ګڼ نور موارد هم پيدا کوو، چې دوى په کې د امريکا د ګټو خلاف عمل کوي. موږ به دوى د دغو کارونو له کبله مسوول وګڼو.“
بلخوا پرونۍ غونډې ته د امريکا د ملي امنيت سلاکار جان بولټن وويل، د روسيې دا پرېکړه چې غواړي سوريې ته د الوتکو ضد پرمختللي ميزاييل ورکړي، يوه ”لويه تېروتنه“ ده او د سوريې په اووه کلنه جګړه کې به ”د پام وړ زياتوالى“ راولي.
بولټن ټينګار وکړ، تر هغو چې ايراني ځواکونه له سوريې وتلي نه وي، امريکايي پوځيان به ورڅخه ونه ځي.
د روسيې دفاع وزير سرګي شويګو پرون وويل، چې مسکو به د هوايي مدافع اس ۳۰۰ ډوله دستګاه په دوو اوونيو کې سوريې ته ورکړي او د سوريې دولتي ځواکونو ته به د هوايي دفاع د شبکې لپاره عصري اتومات دستګاوې هم وسپاري.
د روسيې دفاع وزير: چې مسکو به د هوايي مدافع اس ۳۰۰ ډوله دستګاه په دوو اوونيو کې سوريې ته ورکړي
دا په داسې حال کې ده چې له نن څخه اته ورځې مخکې ،د سپټمبر پر١٧مه، د سوريې دولتي ځواکونو په لاذقيه ولايت کې يوه روسۍ Il-20 ډوله اکتشافي الوتکه وويشتله او په کې سپاره ١٥ پوځيان يې ووژل.
د روسيې دفاع وزير اسرائيل ملامت کړل او تور يې ولګاوه، چې د اسرائيل پوځ له روسۍ الوتکې د سوريې د هوايي دفاع د دستګاوو د ګمراه کولو لپاره د سپر په توګه استفاده کوله.