د افغانستان د کرکټ ملي ټیم سبا سې شنبه د هند په وړاندې د اسیا جام په لوبو کې خپله وروستۍ لوبه ترسره کوي.
افغان ټیم د اسیا جام په لوبو کې د څلور غوره ټیمونو تر منځ دوه لومړنۍ لوبې په پاکستان او بنګله دیش بایللي.
افغان ټیم د بنګلهدیش په وړاندې پرون د ۲۵۰ منډو هدف پوره نهکړ او لوبه یې په څلورو منډو بایلوده.
تر دې ماتې وروسته د افغان لوبډلې کپټان اصغر افغان وویل:
"بنګلهدیش ته دې مبارکه وي هغوی ډېره ښه لوبه وکړه. واقعاً دردونکې لوبه وه. موږ ته په شپږو بالونو اته منډې پاتې وې چې ډېره سخته نهوه. زموږ اصلي توپ وهونکي سمیع، ګلبدین او راشد هم راغلل خو ونه شوه. وروستي بنګالي بالر ډېر ښه بال وکړ ځکه یې هم لوبه وګټله."
افغان ټیم سږ کال د اسیا جام په ګروپي دور کې د بنګلهدیش او سریلانکا ټیمونه مات کړي وو.
د اسیا جام د څلور غوره ټیمونو په یوه بله پرونۍ لوبه کې بیا هند د پاکستان لهخوا د ۲۳۷ منډو هدف د یوې ویکټې په سوځېدو داسې حال کې پوره کړ چې شیکر داون او روهیت شرما خپلې سلیزې هم ووهلې.