د لاسرسي لېنکونه

اېشچي: محقق څو ځله غوښتنه کړې، څو زما او دوستم ترمنځ منځګړیتوب وکړي


احمد اېشچي

احمد اېشچي تأییدوي چې عبدالرشید دوستم ته نږدې کسانو څو ځلې دا هڅه کړې چې له ده سره شوی چلند د قومي جرګې له لارې حل کړي.

ښاغلي اېشچي د دوشنبې په ورځ «۱۳۹۷ کال د زمري ۰۱» له ازادي راډيو سره په مرکه کې وویل چې له دې وړاندې محمد محقق څو ځله دا غوښتنه کړې چې د ده او عبدالرشید دوستم ترمنځ منځګړیتوب وکړي.

نوموړی وايي:

"ما ته یو دوه ځلې پیغام راکړل شو چې استاد محقق غواړي د دې قضيې په اړه منځګړيتوب وکړي، کله چې ماته پیغام راورسېد ما وویل چې که محقق د دې کار لپاره راځي، زه‌يې نه‎شم منلی او غوره به دا وي چې رانه‎شي.​"

احمد اېشچي په کابل کې د ازادي راډیو د خبریال نصرت پارسا پوښتنې ځوابوي.
احمد اېشچي په کابل کې د ازادي راډیو د خبریال نصرت پارسا پوښتنې ځوابوي.

د افغانستان د ملي جنبش ګوند ویاند بشیر احمد ته‌ینج او د اجرائیه ریاست دوهم مرستیال محمد محقق په دې اړه له نظر ورکولو ډډه وکړه.

ښاغلی اېشچي وايي، دولتي ارګانونه په ځانګړي ډول لویه څارنوالۍ او ستره محکمه باید د ده قضیه حل کړي.

نوموړی وايي چې په‎دې برخه کې قومي جرګه کول، ده ته د منلو وړ نه‎ده.

د جوزجان پخواني والي احمد اېشچي د ۱۳۹۵ لمریز کال د لیندۍ په میاشت کې ادعا وکړه چې د جمهوري ریاست لومړي مرستیال عبدالرشید دوستم دی له وهلو ډبولو وروسته جنسي ځورولی دی.

که څه دوستم ته نږدې کسانو د اېشچي دغه ادعا بیا بیا رد کړې، خو حکومتي چارواکو په ځانګړي ډول ولسمشر محمد اشرف غني له دې وړاندې ویلي چې دغه قضیه د لویې څارنوالۍ له لوري څېړل کېږي.

وړاندې له دې د ملي جنش ګوند ویاند بشیر احمد ته‌ینج ویلي دي، د اساسي قانون پر بنسټ لویه څارنوالي د ولسمشر له لومړي مرستیال نه د څېړنې صلاحیت نه‌لري، خو احمد اېشچي بیا ویلي چې که دا قضیه ونه‌څېړل شي دی به د عدالت د ټینګښت لپاره نړیوالو بنسټونو ته مراجعه وکړي.

د هغه اسنادو پر بنسټ چې یو کال وړاندې ازادي راډيو ته رسېدلي وو د ښاغلي دوستم اته وسله‎وال ساتونکي د دغې قضیې په تړاو د کابل د یوې ابتدايي محکمې له لوري د بند په سزا محکوم شوي وو.

د دغو اسنادو پر بنسټ دا چې له دوستم څخه هېڅ ډول څېړنې نه‌دي شوي د دوستم نوم د صورت دعوا څخه ایستل شوی دی.

د دغو اسنادو پر بنسټ، دا چې له دوستم څخه هېڅ ډول څېړنې نه دي شوي، د دوستم نوم د صورت دعوا څخه ړنګ شوی دی.

د دوشنبې په ورځ تازه د افغانستان د سترې محکمې یوې سرچینې چې نه‎يې غوښتل نوم‌يې واخیستل شي ازادي راډیو ته وویل، تر دې دمه د ښاغلي دوستم اړوند هېڅ ډول دوسیه دوی ته نه‎ده رسېدلې.

دا په‎داسې حال کې ده چې د احمد اېشچي له ادعا وروسته عبدالرشید دوستم ترکیې ته ولاړ او هلته تر ۱۴ میاشتو پاتې کېدو وروسته پرون یکشنبه کابل ته راستون شو.

احمد اېشچي د دوستم د بېرته راستنېدو په تړاو ازادي راډیو ته وویل، له دوستم نه د حکومت تود هرکلی ښيي چې حکومت د ده د قضيې پر سر معامله کړې ده.

جمهوري ریاست او د افغانستان لويې څارنوالۍ په‎دې اړه له څه ویلو ډډه وکړه.

له دې سره د حقوقي چارو یو شمېر افغان کارپوهان که څه هم افغانستان ته د عبدالرشید دوستم راستنېدل او د جمهور رئیس د مرستیال په توګه کار ته دوام قانوني ګڼي، خو وايي چې لویه څارنوالي د ده د دوسیې په بشپړولو مکلفه ده.

کابل ته د دوستم راستنېدل له تود هرکلي سره مخ شو
کابل ته د دوستم راستنېدل له تود هرکلي سره مخ شو

د دغو کارپوهانو له ډلې سبحان مصباح د دوشنبې په ورځ ازادي راډیو ته وویل:

"​که اېشچي له جرمه د متضرر شخص په توګه عبدالرشید دوستم ته ابرا ورکړي، یعنې له خپل حق‌العبده تېر شي کولای شي، خو د حق‌الله موضوع په لويې څارنوالۍ پورې اړه لري او لویه څارنوالۍ د یوه خپلواک بنسټ په توګه چې دا قضیه پیل کړې، مکلفیت لري چې پای ته‌یې هم ورسوي."

ښاغلی مصباح وايي، دوستم هم باید پر ځان د لګېدلو تورونو په اړه دفاع ته حاضر شي.

د ده په وینا، که نوموړی دا تورونه ردوي هم باید د اړوندو ارګانونو له لارې یې ثابت کړي.

راپور: یوسف خان ځدراڼ

XS
SM
MD
LG