کابل چاپ ورځپاڼو په خپلو نننیو ګڼو کې د حکومت لهخوا د یو شمېر زورواکو د نیول کېدو او په تړاو یې د غبرګونونو په اړه لیکلي دي.
- سرخط
سرخط خپلواکې ورځپاڼې پهدې اړه په خپله سرمقاله کې لیکلي، څو ورځې کېږي چې د هېواد په بېلابېلو برخو کې پخواني جګړهماران او اوسني زورور د حکومت روغې سترګې ته برابر شوي او څو تنهیې یو په بل بسې لاس تړلي کابل ته راوړل شوي دي.
سرمقاله لیکونکی لیکلي، په دوی کې زورور او مشهور یې د فاریاب نظامالدین قیصاري او د ارزګان رحیمالله خان دي چې تر نښتو او د دوی د پلویانو تر ژوبلېدو او وژل کېدو وروسته نیول شوي او کابل ته رالېږدول شوي دي.
ورځپاڼې لیکلي، د قیصاري تر نیولو وروسته د ولسمشر لومړي مرستیال جنرال دوستم له ترکیې نه حکومت ته ګوته وڅنډله او ګواښیې وکړ چې که دا سړی بېرته خوشې نهشي، ورته به ښه نهوي او د شمال ډېری سیمې به ناامنه شي او هم په کور دننه د حکومت او نظام پر ضد بېلابېلې هڅې، شورشونه او خوځښتونه پیل شول.
د ورځپاڼې په باور دغه ډله کسان اوس تر طالب او بل هر ترهګر د خلکو، وطن، خاورې نظام او حکومت لپاره ډېر خطرناک دي او حکومتیې باید په وړاندې دوه زړه نهشي او د نیولو دغه لړۍ جاري وساتي.
- هېواد
هېواد دولتي ورځپاڼې هم پهدې اړه په خپل یو مطلب کې لیکلي دي.
هیواد لیکي، د جنایتکارانو پر ضد د حکومت پرېکړه د ټول ملت غوښتنه ده.
ورځپاڼه لیکي، په کور دننه یو شمېر داسې کسان شته چې وسله او زور کاروي او په تېرو څو لسیزو کې یې د ټوپک او برچې په زور پر ملت باج چلولی دی او له حکومتیې راج اخیستی دی.
د مطلب د لیکونکي په وینا، د دوی مخنیوی ستره اړتیا ده او باید د خپلسریو مخهیې ونیول شي.
- ویسا
ویسا خپلواکې ورځپاڼې بیا پهدې اړه په خپله سرمقاله کې لیکلي، حکومت د دوستم د ملېشو قوماندان او د بدخشان یو غیر مسؤل کس ونیوه، په غبرګون کې یې د شمال په اوو ولایتونو کې خلک لاریونونو ته راووتل، لارې یې وتړلې، د اقینې بندر یې بند کړ او د هېواد د ملي یووالي پر خلافیې بیرغونه پورته کړل.
- سرمقاله لیکونکي پوښتنه مطرح کړې چې حکومت دغه کار د څه لپاره وکړ؟
که هدفیې د غیر مسؤله وسلهوالو محاکمه وي، دوه نورې پوښتنې باید ځواب شي:
- لومړی دا چې درې نیم کاله ولې د ملېشې جوړولو او د غیر مسؤله وسلهوالو د پیاوړتیا لپاره کار وشو؟
- دوهم دا چې ایا له مرکز تر ولایتونو دا نور غیر مسؤل وسلهوال هم باید د قانون منګولو ته وسپارل شي او که نه هغوی معاف دي؟
د سرمقاله لیکونکي په باور، دلته د ابهام ټکی اندېښنې زیاتوي.
ویسا پهدې اړه په خپل یو بل مطلب کې لیکلي چې د قیصاري د نیول کېدو په تړاو په شمال کې د مظاهرو په اړه د جنرال دوستم د دفتر رئیس عنایتالله بابر فرهمند ویلي چې که حکومت د خلکو په وړاندې له وسلې کار واخلي له ورته عمل سره به مخ شي.