- سټارز اېنډ سټرایپس
سټارز اېنډ سټرایپس امریکایي ورځپاڼې د افغانستان په ختیځ کې د داعش ډلې د یو مهم مرکز د نیولو په اړه مطلب خپور کړی دی.
دا پوځي ورځپاڼه د افغانستان په ختیځ کې د ناټو ځواکونو د قوماندان په حواله لیکي چې هسکه مېنه ولسوالۍ کې د افغان او امریکایي ځانګړو ځواکونو په ګډو عملیاتو کې د داعش مرکز چې دې ډلې په سیمه کې خپل پایتخت ګاڼه، نیولی دی.
ورځپاڼه زیاتوي، پهدې ګډو عملیاتو کې د افغان او امریکایي ځانګړو ځواکونو یا سپېشل فورس ۶۰۰ سرتېرو او افسرانو برخه درلودله.
سټارز اېنډ سټرایپس ته امریکایي پوځي چارواکو ویلي دي چې شااوخوا ۱۷۰ داعشیان چې پهدې مرکز کې وو، د سیمې غرونو ته په شا تمبول شوي دي.
د مطلب لیکوال وایي چې د ننګرهار هسکه مېنه ولسوالۍ چې د ډیورند په کرښه پرته ده، داعش ډلې ته د اکمالاتو اساسي لار بلل کېږي.
د هسکې مېنې ولسوالۍ غرهییزې جغرافیې ته په پام طالبان، القاعده او اوس داعش ډله له دې سیمې څخه د خپلو فعالیتونو لهپاره کار اخلي.
سټارز اېنډ سټرایپس ورځپاڼې په یو بل مطلب کې د افغان ځواکونو له لیکو څخه پر امریکایي سرتېرو وروستۍ حملې ته کتنه کړې.
ورځپاڼه په افغانستان کې د امریکا په مشرۍ د ائتلافي ځواکونو د یو بیان په استناد لیکي چې د افغانستان په جنوب کې د یو افغان سرتېري په ډزو کې یو امریکایي سرتېری وژل شوی او دوه نور ژوبل شوي دي.
د ورځپاڼې په وینا د تېر ۲۰۱۷ میلادي کال د ډسمبر له میاشتې راپهدېخوا دا لومړی ځل وو چې د افغان ځواکونو له لیکو څخه پر بهرنیو ځواکونو دا لومړنۍ حمله وه، له دې مخکې هم په ورته دوو حملو کې امریکایي سرتېري په نښه شوي وو.
د مطلب لیکوال وایي، د افغان ځواکونو له لیکو څخه د دوی پر بهرنیو همکارانو زیاتې او مرګونې حملې د ۲۰۱۰ نه تر ۲۰۱۲ میلادي کلونو ترمنځ شوې وې.
سټارز اېنډ سټرایپس د مطلب په پای کې لیکلي چې د امریکا دفاع وزارت یا پنټاګون، تېر کال کانګرس ته په خپل یو راپور کې خبرداری ورکړی وو چې په افغانستان کې د امریکایي ځواکونو او پوځي روزونکو په زیاتېدو سره به یو ځل بیا دا ډول حملې زور واخلي.
که څه هم امریکایي ځواکونو د دې حملې ځای نهدی په ډاګه کړی، خو طالبانو د دې حملې مسؤلیت منلی او ویلي دي چې دا حمله په ارزګان ولایت کې شوې ده.
- ګارډین
د بریتانیا ګارډین ورځپاڼې بیا په افغانستان کې د جګړو او د طالبانو لهخوا د افغان حکومت د سولې د وړاندیز د ردولو موضوع راخیستې ده.
ګارډین لیکي چې په کوچني اختر کې تر درې ورځني اوربند وروسته په افغانستان کې جګړو زور اخیستی دی.
ورځپاڼه وایي چې د بیا پیل شویو جګړو او تاوتریخوالي وروستي قربانیان، د غزني ولایت درې ماشومان وو چې د سړک د غاړې د یو ماین په چاودنه کې ووژل شول.
ورځپاڼه زیاتوي، افغانستان چې دوه مهم انتخابات په وړاندې لري، د جګړې تر څنګ له سیاسي کړکېچونو سره هم مخامخ دی.
ټاکل شوې ده چې د افغانستان د ولسي جرګې او ولسوالیو شوراګانو انتخابات په راتلونکي اکټوبر میاشت او د ولسمشرۍ انتخابات د راتلونکي ۲۰۱۹ میلادي کال په پسرلي کې ترسره شي.