نن د روژې مياشتې ۲۷مه ده او سر له نن نه د افغان حکومت لهخوا له طالبانو سره اعلان شوی اوربند عملي کېږي.
اوربند به د اختر تر پنځمې پورې دوام وکړي.
طالبانو هم د اختر د لومړيو درېيو ورځو لپاره اوربند اعلان کړی دی.
د نړۍ ګڼو رسنيو همدې موضوع ته کتلي دي.
- واشنګټن پوسټ
امريکايۍ ورځپاڼې واشنګټن پوسټ د افغانستان په اړه يوه مقاله خپره کړې چې وايي، په افغانستان کې د طالبانو د اوربند اعلان بېساری دی.
طالبانو خپل لومړی اوربند د شنبې په ورځ اعلان کړ او پهدې کار سرهيې د افغان حکومت د مؤقتي اوربند وړانديز ومانه.
دغې ډلې په يوه اعلاميه کې چې له خبريالانو سره شريکه شوه وويل چې له افغان ځواکونو سره د اختر د درېيو ورځو لپاره اوربند اعلانوي، خو پر بهرنیو ځواکونو به حملو ته دوام ورکړي.
واشنګټن پوسټ ورځپاڼې د طالبانو دغه اعلان ته په اشارې ليکلي چې د اوربند پر دې بېساري اقدام سربېره په افغانستان کې تاوتريخوالی دوام لري.
د جمعې او شنبې په ورځو د طالبانو په حملو کې ګڼ شمېر افغان ځواکونه ووژل شول.
ورځپاڼه د دفاع وزارت له قوله لیکي چې وایي، د افغانستان په ۱۰ ولايتونو کې د نښتو پر مهال طالبانو ته هم تلفات اوښتي دي.
- ګارډين
بریتانيا چاپ ګارډين ورځپاڼې هم پر همدې موضوع مقاله خپره کړې ده.
مقاله ليکي چې طالبانو د افغان ولسمشر محمد اشرف غني هغه اعلان ته په عکسالعمل کې د اختر درې ورځې اوربند اعلان کړ چې د روژې د مياشتې له ۲۷مې څخهيې د اختر تر پنځمې ورځې د اوربند اعلان وکړ.
دا يو څو ورځې وروسته له هغه چې په کابل کې تر دوه نيمو زرو زياتو ديني عالمانو فتوا ورکړه چې ځانمرګي بريدونه حرام دي او د اوربند غوښتنهيې وکړه.
خو یو ساعت وروسته لهدې فتوا يوه ځانمرګي بريدګر د غونډې ځای ته نږدې په ځان پورې چاودېدونکي مواد وچاودول او ۷ کسانيې ووژل.
- ابزرور
د بریتانيا چاپ ابزرور ورځپاڼې هم په افغانستان کې د دولت او طالبانو لهخوا د اوربند موضوع ته کتلي دي.
ورځپاڼه ليکي:
دا په ۱۷ کلونو کې لومړی ځل دی چې طالب سخت دريځو د اوربند اعلان کړی دی.
ورځپاڼه د طالبانو دا اعلان حيرانوونکی بولي.
په مقاله کې راغلي، پهداسې حال کې چې په افغانستان کې د بهرنیو ځواکونو قوماندان جنرال جان نېکلسن، افغانستان ته د ملګرو ملتونو د عمومي منشي ځانګړي استازي تداميچي ياماموتو او په کابل کې د بریتانيا سفير «نيک کې» د افغان حکومت د اوربند د اعلان ملاتړ او هرکلی کړی، په ټول هېواد کې لږ تر لږه ۵۰ افغان سرتېري او پوليس وژل شوي دي.
مقاله يادونه کوي چې د جمعې په ورځ د هرات ولايت په زاول ولسوالۍ کې ۱۷ سرتېري، د بادغيس ولایت په بالامرغاب ولسوالۍ کې نهه سرحدي پولیس، د کندز ولايت په قلعهزال ولسوالۍ کې لږ تر لږه ۲۰ افغان پوليس ووژل شول او د دغو ټولو وژنو مسؤليت طالبانو ومانه.