د لاسرسۍ وړ لېنکونه

تازه خبر
پنجشنبه ۱۴ کب ۱۳۹۹ کابل ۰۲:۱۶

افغانستان

رادمنش: پاکستان کې ځیني بریدونه د دوی روزلي ترهګر کوي

د دفاع وزارت د ویاند دفتر سرپرست جنرال محمد رادمنش

د افغانستان دفاع وزارت وايي، په پاکستان کې ځیني بریدونه هغه ترهګر کوي چې دوی په خپله روزلي دي.

د دفاع وزارت د ویاند دفتر سرپرست جنرال محمد رادمنش پرون شپه دا خبره وروسته له هغه ازادي راډیو ته وکړه چې د پاکستاني پوځ د عامه اړیکو دفتر «ای. اېس. پي. ار» وویل، له افغانستانه وراوښتو ترهګرو په پوله‌ساتو ځواکونو بریدونه کړي دي او پنځه سرتېري یې ټپيان کړي دي.

«ای. اېس. پي. ار» ویلي، دا ترهګر د خېبر پښتونخوا او د بلوچستان په قمرالدین کارېز کې د افغانستان له هغو سیمو وراوښتي چې دولتي حاکمیت په‌کې کمزوری دی.

خو جنرال رادمنش وویل، د پاکستان استخباراتي کړۍ د دې ډول پېښو مسؤل دي.

هغه وویل، د افغانستان په خاوره کې ترهګر ځالې نه‌لري او افغان پوځیان‌یې مدام د ځپلو هڅه کوي.

پاکستان په داسې حال کې د وروستیو بریدونو مسؤلیت د هغو ډلو بللی چې د دوی په خبره له افغانستان وراوښتي چې د دواړو هېوادونو ترمنځ د امنیت او سولې په سر په لویه کچه خبرې شوې دي.

د ورځې تازه خبرونه دلته ولولئ

د غور- هرات لویه لاره له بندښت وروسته بېرته پرانېستل شوه

ارشیف، عکس تئزیني بڼه لري

د غور- هرات لویه لاره له نژدې شلو ورځو بندښت وروسته بېرته خلاصه شوه.

دغه لاره د دې لپاره بنده وه چې په اوږدو کې یې د حکومتي ځواکونو عملیات روان وو او چارواکو ادعا کوله چې طالبانو دغې سیمه کې د عملیاتو پر ضد ماینونه خښ کړي دي.

د غور امنیه قوماندان عبدالقادر ولي زاده ازادي راډیو ته وویل، د قومي مشرانو او سپین ږېرو په منځګړیتوب پرون چهارشنبه (د کب ۱۳مه) ماښام دا لاره خلاصه شوه.

د دغې لارې له بندېدو سره په غور کې د خوراکي موادو بیې هم لوړې شوې.

چارواکي: بزګرو ته د کوکنارو پرځای د بدیلو محصولات د کښت پروګرام جوړېږي

ارشیف، عکس تئزیني بڼه لري

د افغانستان د کرنې اوبو لګونې او مالدارۍ وزارت کروندګرو ته د کوکنارو د کښت پرځای د بدیلو زراعتي محصولات د کښت پروګرام د جوړېدو خبر ورکوي.

د دې وزارت له لوري خپرې شوې خبرپاڼه کې راغلي چې د کرنې اوبو لګونې او مالدارۍ وزارت، د متحده ایالاتو د قانون اجرا او د مخدره توکو چارو نړیوال دفتر يا INL او د ملګرو ملتونو پراختیایي ادارې هوډ کړی چې د کرنې او د کلیو د پراختیا پروژه نویو سیمو ته وغځوي.

دا پروژه د مشروع معیشت ته لاسرسی، کرنې او کليوالي پرمختیا ودې په نوم جوړه شوې ده.

د دې پروژې موخه په هغو سیمو کې چې کوکنار کرل کېږي، د هغو پرځای د میوو، سبزیو او نورو با ارزښته کرنې محصولاتو کښت دود کول دي.

یاده پروژه د ملګرو ملتونو پراختیایي ادارې او ROP یا «د سولې ریښې» بنسټ له خوا چې پر کرنې کار کوي د ۳۰ میلیونه ډالرو په ارزښت پلي کېږي.

د کرنې اوبو لګونې او مالدارۍ وزارت معلومات ښیې چې د کوکنارو د کښت پر ځای د بدیلو محصولاتو کښت پروژه به په بادغیس، فراه، کندها، بلخ، لغمان، او ننګرهار ولایتونو کې تر پنځو کلونو دوام وکړي.

مالیې وزارت: د افغانستان د نړیوالو شریکانو د رهبرۍ ناسته وشوه

ارشیف، عکس تئزیني بڼه لري

د افغانستان د نړیوالو شریکانو د رهبرۍ ناسته ترسره شوه.

د افغانستان د مالیې وزارت وایي، دا ناسته د ماليې وزارت د پالیسۍ معين په مشرۍ د افغانستان د نړیوالو شریکانو د رهبرۍ پلاوي سره 'Heads of Donor Agencies Meeting' د ویډیو کنفرانس له لارې جوړه شوه.

د دې وزارت مطبوعاتي مسوول فرید نوښت ازادي راډیو ته وویل، دغه ناسته کې د ۵۰ بهرنیو پراختیایي بنسټونو رئیسانو، د ملګرو ملتونو او نورو نړیوالو سازمانونو استازو ګډون درلود.

د ښاغلي نوښت په خبره، په یاده ناسته کې د مالیې وزارت مسوولینو له خوا نړیوالو شریکانو ته د ماليې وزارت د وروستیو مثبتو بدلونونو، د مرستو د مدیریت او مؤثریت د ښه والي، د ماليې وزارت په تشکيل کې د بنسټیزو اصلاحاتو او د ماليې وزارت په کليدي او رهبري بستونو کې د ښځو د بيا حضور په اړه معلومات ورکړل شول.

نوموړی زیاتوي، د نړيوالو بنسټونو استازو د افغانستان د مشارکت چوکاټ (AFP) د ژمنو د پلي کولو لپاره د جمهوری ریاست د چارو ادارې او د ماليې وزارت تر منځ د ګډ مېکانېزم د جوړېدو هرکلی وکړ.

سراج: بدخشان کې ترهګر د طالبانو په همکارۍ پلان لري چې امنیت خراب کړي

د افغانستان د ملي امنیت د ادارې رئیس احمد ضیا سراج

د افغانستان د ملي امنیت د ادارې رئیس احمد ضیا سراج خبرداری ورکوي چې هغه بهرني ترهګر چې په بدخشان کې حضور لري او د طالبانو پر مټ فعالیتونه ترسره کوي، ښايي په نوي کال کې د دې ولایت د یو شمېر ولسوالیو د نیولو یا یې د امنیت د خرابولو هڅې وکړي.

ښاغلي سراج چې د بدخشان ولایت د امنیتي وضعیت د څېړنې لپاره هغه ولایت ته تللې دغه څرګندونې پرون چهارشنبه(د کب ۱۳مه) په فیض کې آباد کې په یوه غونډه کې وکړې.

ښاغلي سراج زیاته کړه: "ترهګر او هغه بهرنۍ ډلې چې په بدخشان کې حضور لري، د دې ولایت له طالبانو سره په همکاري پلان لري چې د یو شمېر ولسوالیو امنیت خراب کړي."

سراج وویل، افغان امنیتي ځواکونو هم تیاری نیولی چې د دغو ترهګرو د فعالیتونو مخه ونیسي.

د بدخشان سیمه ییز چارواکي د هغو بهرنیو سخت دریځو چې دې ولایت کې دېره دي، شمېر شااوخوا نهه سوه تنه یادوي.

چارواکو دا هم ویلي چې د دولت وسله وال مخالفین د دې ولایت پر نژدې څلویښت سلنه ساحې نفوذ لري.

امریکا: خلیلزاد هڅه کوي افغان سولې ته نړیوال ملاتړ جلب کړي

د افغانستان د سولې لپاره د امریکا ځانګړی استازی زلمی خلیلزاد

د امریکا د بهرنیو چارو وزارت وایي، د افغانستان د سولې لپاره د امریکا ځانګړی استازی زلمی خلیلزاد هڅه کوي چې په افغانستان کې یوه سیاسي جوړجاړي ته د رسېدو لپاره د افغانانو ترمنځ د سولې د روانو هڅو لپاره سیمه ییز او نړیوال ملاتړ جلب کړي.

د دې وزارت ویاند نېډ پرایس پرون چهارشنبه (د کب ۱۳مه) په واشنګټن کې په یوه خبري کنفرانس کې وویل چې خلیلزاد د طالبانو له استازیو سره د خبرو لپاره اوس په دوحه کې دی او کابل ته درې ورځنی سفر یې ګتور و.

پرایس زیاته کړه: "خلیلزاد او ټیم یې په کابل کې له حکومتي چارواکو سره درې ورځنۍ ګټورې سلا او مشورې نن پای ته ورسولې. دوی د مدني ټولنې له مشرانو سره وکتل. دوی له نورو افغان سیاسي مشرانو سره وکتل چې تمرکز یې د سولې پر لور د پرمختګونو ګړندي کول و."

د امریکا د بهرنیو چارو د وزارت ویاند نېډ پرایس وویل، خلیلزاد به په دوحه کې هم دغو هڅو ته دوام ورکړي او د اړتیا په صورت کې به نورو ځایونو ته هم ولاړ شي.

په جلال اباد ښار کې چاودنې یوه ډاکټره ووژله

دوه ورځې وړاندې په جلال اباد کې د یوه خصوصي ټلوېزیون درې ښځینه کار کوونکې هم په دوو جلا-جلا وسله والو بریدونو کې ووژل شوې.

د ننګرهار په مرکز د جلال اباد ښار درېیمې ناحیې اړوند عربانو ګولايي سیمه کې د یوه ماین په چاودنه کې یوه ډاکټره وژل شوې او ماشومه لور یې ټپي شوې.

د ننګرهار مطبوعاتي دفتر ازادیو راډیو ته په استول شوېو معلوماتو کې ویلي، دا چاودنه نن پنجشنبه (د کب ۱۴مه) سهار سهار شااوخوا اته بجې په ریکشا پورې د نښلول شوي ماین د چاودنې له امله شوې ده.

د دغو معلوماتو له مخې پر نوموړې ډاکټرې په داسې مهال چاودنه شوې چې له کوره روغتون ته د دندې لپاره پر لاره وه.

د ننګرهار د عامې روغتیا ویاند ظاهر عادل ازادي راډیو د خبر د تایید ترڅنګ وویل چې وژل شوې ډاکټره صدف نومېده او په حوزوي روغتون کې د تخصص د برخې زده کړیاله وه.

تراوسه د یادې پېښې مسؤلیت چا نه دی منلی.

دغه ډاکتره په داسې حال کې وژل کېږي چې تر دې دوه ورځې وړاندې په جلال اباد کې د یوه خصوصي ټلوېزیون درې ښځینه کار کوونکې هم په دوو جلا-جلا وسله والو بریدونو کې ووژل شوې.

هندوستان د چابهار بندر ورځ لمانځي

ارشیف، د هند صدراعظم د ایران له ولسمشر سره

هندوستان د چابهار بندر ورځ لمانځي.ټاکل شوې ده نن پنجشنبه (د کب ۱۴مه) په دې مناسبت په مجازي غونډه کې د هندي، افغان، ارمني، ایراني، قزاق، روسي او ازبکستاني چارواکي ګډون وکړي.

هندوستان چې له پاکستان سره یې اړیکې ترینګلي دي، د ایران د دې سمندري بندر له طریقه له افغانستان او منځنۍ اسیا هېوادونو سره وصلېږي.

د افغانستان د سوداګرۍ وزارت ویاند فواد احمدي د چهارشنبې په ورځ ازادي راډيو ته وویل چې د چابهار بندر د افغانستان د سوداګرۍ د پراختیا لامل ګرځېدلی دی: "چابهار بندر له هغو بندرونو دی چې کولای شي موږ د اوبو له لارې له ډېری هېوادونو سره وصل کړي او د دې بندر د افتتاح له څو کلونو وروسته له نېکه مرغه له نېږدې او لېرې هېوادونو سره پراخې سوداګریزې اړیکې لرو."

هندوستان د مرستو یو شمېر محمولې د چابهار بندر له لارې افغانستان ته لېږلي دي.

اروپايي ټولنه: افغانستان کې پر ملکیانو د ډېریو بریدونو مسؤلین طالبان دي

جلال اباد کې د یوې رسنۍ د وژل شوې کارکوونکې جنازه

په افغانستان کې د اروپايي ټولنې دفتر وايي، په دې هېواد کې باید تاوتریخوالی ودریږي.

دې ټولنې په جلال اباد کې د رسنیو د درېيو ښځينه کار کوونکو پر وژل کېدو خواشیني څرګنده کړې او ویلي یې دي چې په افغانستان کې پر ملکیانو د اکثریت حملو مسؤلین طالبان دي.

دغې ټولنې د چهارشنبې (د کب ۱۳مه) په ماښام په یوه اعلامیه کې ویلي چې د رسنیو د درېيو کار کوونکو مرسل واحدي، شهناز روفي او سعدیه سعادت وژنه سخته خواشینوونکې پېښه ده.

د انعکاس ټلوېزیون دا کار کوونکې د مارچ په دوهمه نېټه د سې شنبې په ورځ په جلال اباد ښار کې په ډزو ووژل شوې.

داعش سخت دريځې ډلې د دې حملې مسؤلیت منلی.

که څه هم طالبانو په جلال اباد ښار کې پر ښځينه خبریالانو د حملې مسئولیت رد کړی، خو اروپايي ټولنې په دې اعلامیه کې ویلي چې طالبان په مستقیمه او یا هم د اوربند په مخالفت سره د ملکیانو د اکثریت مرګ ژوبلې او هدفي حملو مسؤل دي.

د اروپايي ټولنې اعلامیه زیاتوي چې په ډسمبر میاشت کې وروسته له هغه چې خبریاله ملاله میوند ووژل شوه، دا حملې ښيي چې د رسنیو کار کوونکي، په ځانګړي توګه ښځې، له څومره زیانمنونکي او خطرناک وضعیت سره مخامخ دي.

طالبانو د اروپايي ټولنې دې اعلامیې ته ځواب نه دی ویلی.

افغانستان کې د تېر کال په پرتله ۳۵ په سلو کې ورښت کم شوی

د کابل قرغې بند کې ورېدلې واوره

د افغانستان د هوا پېژندنې اداره وايي چې روان کال د تېر کال په پرتله ۳۵ په سلو کې ورښت کم شوی.

پېښو ته د رسېدنې په چارو کې د دولت وزارت هم د راتلونکي کال وچکالۍ ته په اشارې سره وايي چې په معمول ډول په هېواد کې د ورښت کچه ۲۵۰ ملي متره وي، خو روان کال د هېواد په ځینو سیمو کې ۴۰ ملي متره ته راښکته شوې.

په افغانستان کې په کروندو بوخت کروندګر وچکالۍ او د څارویو له‌منځه تلو ته اندېښمن دي.

د کارپوهانو په باور د ورښت کچې کموالی نېغ په نېغه له بې‌وزلي، د حاصلاتو له کموالي او د کورنیو بې‌ځایه شويو له ډېروالي سره اړیکې لري. دوی په احتمالي توګه اقلیمي بدلون، د ګلخانه‌یي ګازونو زیاتوالی او د نفوسو ډېروالی د ورښت د کموالي اصلي لاملونه بولي.

افغانستان یو کرنیز هېواد دی، د معلوماتو له مخې ۴۵ سلنه افغانان په کرکېلې لګیا دي چې له ورښت او اوبو سره نېغ په نېغه اړیکې لري.

په ورته وخت کې پېښو ته د رسېدنې په چارو کې د دولت وزارت وايي چې حکومتي بنسټونه د وچکالۍ کنټرول او زیانمنو ته د رسېدنې لپاره بشپړ چمتووالی لري.

د افغانستان د ټاکنو خپلواک کمېسیون په مشرتابه کې بدلون راغی

د افغانستان د ټاکنو خپلواک کمېسیون مخکېنۍ مشره حوا علم نورستانۍ او یو شمېر نور کمېشنران

د افغانستان د ټاکنو خپلواک کمېسیون په خپل‌منځیو ټاکنو کې د کمېسیون نوی مشر، مرستیال او منشي وټاکل.

د دغو ټاکنو له مخې اورنګزېب د کمېسیون د مشر، مولانا محمد عبدالله‌یې د مرستیال او مسافر قوقندي یې د منشي په توګه وټاکل شول.

دا خبره د ټاکنو کمېسیون ویاند ذبیح‌الله سادات ازادي راډیو ته وکړه.

له دې وړاندې حوا علم نورستانۍ د کمېسیون د مشرې، عصمت‌الله مل د مرستیال او رحیمې ظریفي د منشي په توګه فعالیت کاوه.

د مېرمن نورستاني د کار موده درې کلنه وه.

ننګرهار والي-مسولینو ته:که د وروستۍ پېښې قاتلین ونه نیسئ استعفا وکړئ

د ننګرهار والي ضیاالحق امرخېل

د ننګرهار والي وایي، د دغه ولایت امنیتي مسولینو ته یې ویلي، که د انعکاس راډیو ټلوېزیون د درېیو ښځینه کارکوونکو وژونکي ونه نیسي، استعفا دې وکړي.

ضیاالحق امرخېل پر خپله ټویټرپاڼه لیکلي چې دا امر یې نن چهارشنبه (د کب ۱۳مه) سهار د ولایت په نظامي شورا کې مسولینو ته ورکړی دی.

امرخېل وړاندې لیکلي چې د جلال اباد ښار د ټولو حوزو جنایي او د منطقوي کنټرول مسولین بدل شول او په خبره یې د حوزو د امرینو او د پولیسو د نورو جوړښتونو ادلون بدلون هم تر کار لاندې دی.

د انعکاس راډیو ټلوېزیون درې کار کوونکي پرون مازدیګر په دوو بېلابېلو پیښو کې په ډزو ووژل شوې چې چارواکو وویل، د پېښې یو عامل یې نیولی دی.

ځایي چارواکو دا د طالبانو کار وباله او ادعا یې وکړه چې نیول شوی کس هم د طالبانو غړی دی.

اوس داعش وسله والې ډلې پر دغو نجونو د برید مسولیت منلی دی. دا معلومات سایټ انټلجنس ګروپ چې د جهادي ډلو انلاین فعالیتونه څاري ورکړی دی.

تردې وړاندې د دغې رسنۍ بله کار کوونکې ملاله میوند هم په ورته برید کې وژل شوې وه چې مسولیت یې داعش منلی و.

محب: د ملکي مرګ ژوبلې له وېرې له ۲زرو عملیاتو ډډه شوې

ارشیف، په سرپل کې د افغان ځواکونو عملیات

د افغانستان د ملي امنیت سلاکار وایي، د دوی هوایي ځواکونو له شااوخوا دوه زره عملیاتو د دې لپاره ډډه کړې چې د ملکي مرګ ژوبلې وېره په کې وه.

حمدالله محب نن چهارشنبه (د کب ۱۳مه) د سرتیري د ورځې په مناسبت یوې غونډه کې دا خبرې وکړې: "دوه زره عملیاته یې صرف د دې لپاره نه دي کړي چې هلته د ملکي تلفاتو امکان وجود درلود، که دښمن واضح سنګر معلوم کړي او را ووځي، دا جنګ ډېر په اسانۍ سره زموږ امنیتي او دفاعي ځواکونه ګټلی شي."

دا څرګندونې داسې مهال کېږي چې د یوناما د وروستي راپور له مخې د ۲۰۲۰ میلادي کال په وروستیو درېیو میاشتو کې ملکي مرګ ژوبله ډېره وه.

د یوناما په راپور کې د ۲۲ سلنې دغې مرګ ژوبلې پړه پر افغان ځواکونو، ۴۶ سلنې پر طالبانو او ۸ سلنې پر داعش اچول شوې ده.

هرات کې ۳۴ تنه د طالبانو له یوه زندانه ژغورل شوي

د هرات په ادرسکن کې د افغان ځواکونو عملیات چې په پایله کې یې ۳۴ تنه د طالبانو له زندانه خوشې کړل

په هرات کې د پولیسو، ملي اردو او ملکیانو په شمول ۳۴ تنه د طالبانو له یوه زندانه ژغورل شوي.

دا خبره د هرات والي عبدالوحید قتالي رسنیو ته په استولي پيغام کې کړې ده.

د ښاغلي قتالي په خبره افغان کمانډو ځواکونو چې د هوايي ځواکونو ملاتړ هم ورسره وو، د طالبانو له زندانه د یادو ۳۴ کسانو د خوشې کولو لپاره بېګا د هرات په ادرسکن ولسوالۍ کې عملیات وکړل.

د هرات والي زیاته کړې چې د عملیاتو پر مهال لس وسله وال طالبان هم وژل شوي او افغان پوځيانو ته کوم زیان نه دی اوښتی.

وسله والو طالبانو تر اوسه د هرات د والي د دې ادعا په اړه کومه تبصره نه ده کړې.

د کونړ په ناړۍ ولسوالۍ کې ۲۵ کلنه دښمني په دوستۍ بدله شوه

د کونړ د ناړۍ ولسوالۍ اړوند تورسان سيمه کې ناسته جرګه

د کونړ د ناړۍ ولسوالۍ اړوند تورسان سيمه کې ۲۵ کلنه دښمني په دوستۍ بدله شوه. په دوه نیمو لسېزو دښمنۍ کې له دواړو خواوو څخه ۹ تنه وژل شوي وو او یو شمېر نور ټپیان شوي وو.

دښمنې د ځمکې او ځنګل پرسر رامنځته شوې وه.

د ولایت خان او خانزمان ملک د کورنیو ترمنځ د روغې جوړې په جرګه کې د کونړ له بېلابېلو سيمو په لسګونو قومي مشرانو ګډون کړی وو.

د جرګې غړي حاجي شېر محمد ازادي راډیو ته وویل، دوی (ولایت خان او خانزمان ملک) د دښمنۍ ختمولو لپاره ډېرې هڅې وشوې او قومي مشران په دې خوښ دي چې دواړو غاړو يې پرېکړې ومنلې.

په کونړ او د هېواد په نورو برخو کې داسې ډېرې شخصي دښمنۍ شته چې له امله يې زیات شمېر کسانو ته مرګ ژوبله اوښتې او لا هم د یو بل مرګ ته ګوته په ماشه دي.

خلک وايي، د ټولو سيمو قومي مشرانو، دیني عالمانو او مخورو کسانو ته په کار دي چې د دغه ډول بدبېنیو او دښمنیو د ختمولو لپاره هلې ځلې وکړي.

نامعلومو وسله‌والو کابل کې استاد مولوي فیض محمد فایز وواژه

ارشیف، عکس تئزیني بڼه لري

په کابل کې یو بل سهار، له هدفي وژنې سره پیل شو.

نن سهار ۶ بجې د کندز د علماوو شورا پخوانی مشر او د عربي دارالعلوم استاد مولوي فیض محمد فایز د نا څرګنده وسله‌والو له‌خوا په ډزو ووژل شو.

د کابل امنیه قوماندانۍ ویاند فردوس فرامرز وایي، ښاغلی فایز د کابل د ۱۷مې حوزې اړوند د جکشن پر سړک هغه مهال وویشتل شو چې د سهار له لمانځه وروسته کور ته روان و.

په څه کم یوه میاشت کې دا درېیم دیني عالم دی چې وژل کېږي، خو مسؤلیت‌یې هېڅ کومه وسله‌واله ډله نه‌مني.

تېره میاشت د سلواغې په ۱۴مه د جمعیت اصلاح مرکزي شورا مشر ډاکتر محمد عاطف او له هغه وروسته د همدې میاشتې په ۳۰مه د کابل پوهنتون د شرعیاتو پوهنځي استاد مبشر مسلمیار د چسپکي ماینونو په چاودنو کې ترور شول.

د يادونې ده چې مخکې تر دې په همدې کال کې وزیر اکبر خان جومات خطیب محمد ایاز نیازی او د شېرشاه سوري جومات خطیب عزیزالله مفلح هم جومات کې د ځای پر ځای شویو ماین په چاودنو کې وژل شوي وو.

په ورته وخت کې دیني عالم محمد ابراهیم بارکزی وایي، د علماوو قتل د اسلام خلاف عمل دی، نو باید یې مخه ونیول شي.

نور راوښيه

XS
SM
MD
LG