- ګارډين
بریتانيا مېشتې ګارډين ورځپاڼې په کابل کې د دوشنبې د ورځې غبرګو ځانمرګو حملو ته کتلي دي.
مقاله لیکي چې دا حمله په ځانګړي توګه د خبريالانو لپاره خونړۍ وه. مقالې هغو خبريالانو ته اشاره کړې چې په دغو حملو کې ووژل شول.
د کابل په حمله کې د ازادي راډيو دوه خبريالان او يوه همکاره هم وژل شوي.
دوهم ځانمرګی بريدګر د خبريال په بڼه د لومړۍ حملې د پېښې ځای ته ورغلی و او په ځان پورې تړلي چاودېدونکي مواد یې چاودلي وو.
د افغانستان د حکومت مشرانو دا پېښه وغندله او دا حملې يې د انسانيت پر وړاندې برید وبللې.
په کابل کې د امريکا سفارت هم دا حملې وغندلې او ويې ويل چې په افغانستان کې رسنۍ او نور انساني حقونو له لوی تهديد سره مخامخ دي.
په افغانستان کې د اسلامي دولت سخت دريځې ډلې يا داعش څانګې په چټکۍ سره پر خپله ویبپاڼه اعلاميه خپره کړه او د کابل د غبرګو ځانمرګو بريدونو مسؤليت یې ومانه.
تېره اوونۍ هم داعش ډلې په کابل کې د انتخاباتو لپاره د نوملېکنې پر مرکز د حملې مسؤليت ومانه. په هغه حمله کې ۶۰ کسان ووژل شول او لږ تر لږه ۱۳۰کسان ټپيان شول.
- ډيفینس پوسټ
ډيفینس پوسټ خپرونې د افغانستان امنيتي وضعيت ته کتلي دي.
خپرونې پهدې عنوان یوه مقاله خپره کړې ده، طالبان غواړي په خپلو پسرلني عملیاتو سره په افغانستان کې خونړۍ تاريخ تکرار کړي.
خپرونه لیکي چې دقيق ۴۰ کاله مخکې د ۱۹۷۸میلادي په اپرېل مياشت کې د افغانستان د خلق ډموکراټ ګوند د خونړۍ کودتا له لارې د محمد داود خان حکومت ړنګ کړ.
لس کاله وروسته د امریکا په مرسته افغان مجاهدين واک ته ورسېدل خو د واک پر سر یې په خپلو کې جګړې پيل کړې.
اوس د ۲۰۱۸میلادي کال په پسرلي کې طالبانو له افغان حکومت سره د سولې مذاکرات رد کړي.
مقاله لیکي چې طالبانو د پسرلني عملياتو له اعلان سره د سولې يو لوی فرصت رد کړ.
مقاله همدا راز لیکي چې طالبان د حکومت نسکوره کولو ته لږ فيصدي هم نهدي نېږدې خو د عادي ملکيانو ژوند يې ور دوزخ کړی دی.