د تکواندو افغان لوبغاړو د اسیايي کلپونو په کچه په سیالیو کې هندوستان، پاکستان او عراق ته په ماتې ورکولو سره د برونزو مډالونه وګټل.
د تکواندو د ملي لوبډلې روزونکي بشیر ترکي نن پنجشنبه ازادي راډيو ته وویل چې د ۱۲ اسیایي هېوادونو ترمنځ دا سیالۍ له دوو ورځو راهیسې د ایران په پلازمېنه تهران کې پیل شوې وې چې پرون ناوخته پای ته ورسېدلې.
د ده په وینا په دغو سیالیو کې څلورو افغان تکواندو کارانو برخه اخیستې وه، خو له ډلې يي صفيالله اوریاخېل، توحیدالله اخندزاده او داود حسیني وکړای شول مډالونه وګټي.
ښاغلی ترکی وايي، د ګروپ سیالیو په درجه بندی کې بیا افغانستان اووم مقام تر لاسه کړ.