د افغانستان د کرکټ ملي لوبډلې د ایرلېنډ د کرکټ لوبډلې ماته ورکړه او د کرکټ د نړیوال جام سیالیو ته یې لار پېدا کړه.
د افغانستان د کرکټ ملي لوبډلې پرون جمعه د زېمبابوې په پلازمېنه، هرارې کې د ایرلېنډ له لوبډلې سره مخامخ شوه او په پینځو وکټو یې لوبه وګټله.
د کرکټ د ملي لوبډلي کپتان، اصغر ستانکزي تېره شپه له هرارې، ازادي راډیو ته په ټلیفوني مرکه کې وویل:
"په رښتیا، دا ستر بری دی. موږ یوازې په ښه لوبه نه، بلکه د افغانانو د دعاوو له برکته د نړیوال جام سیالیو ته لار پېدا کړه."
د کرکټ د نړیوال جام سیالۍ په ۲۰۱۹ میلادي کال کې په وېلز کې کېږي.
افغانستان تردې مخکې هم د کرکټ د نړیوال جام د ګټلو لپاره، د ۵۰ اورونو په نړیوالو سیالیوکې ګډون کړی دی.