د لاسرسي لېنکونه

سه شنبه ۱ غبرګولی ۱۳۹۷ کابل ۰۴:۵۹

پنټاګون: افغان جګړه د امریکا لپاره د کال ۴۵ میلیارده ډالر لګښت لري


پنټاګون وايي، د افغانستان جګړه د امریکا لپاره د کال ۴۵ میلیاره ډالره لګښت لري.

دا خبره د اسیا او پاسیفیک په چارو کې د امریکا د دفاع وزارت مرستیال رينډر شریور د سې شنبې په ورځ د امریکا د سنا د بهرنیو اړیکو په کمېټه کې د سناتورانو د پوښتنو په ځواب کې وکړه.

ښاغلي شریور وویل په دې کلني لګښت کې پنځه میلیارده د افغان ځواکونو، ۱۳ میلیارده په افغانستان کې د مېشتو امریکايي ځواکونو او ډېره برخه نوره‌یې په لوژیستکي اکمالاتو او نورو چارو لګېږي.

په عین حال کې د امریکا د بهرینو چارو وزارت مرستیال جان سالیون د امریکا د سنا د بهرنیو اړیکو کمېټې ته د خبرو پر مهال که څه هم په افغانستان کې د طالبانو وروستي خونړي بریدونه د شا تګونو په توګه یاد کړل، خو ټینګار یې وکړ چې د جګړې په ډګر کې د طالبانو ځواک کم شوی دی.

د سالیون په وینا، دا ډله د خپلو ټولو هڅو سربېره د کومې ګڼ مېشتې سیمې او یا مرکز په نیولو نه‌ده توانېدلې.

د امریکا د دفاع وزارت مرستیال رينډر شریور د امریکا د سنا د بهرنیو اړیکو کېمټې ته وویل، د افغانستان د کرکېچ سیاسي هواری او پخلاینه د امریکا د نوې ستراتېژۍ مهمه برخه ده او دوی به د افغان امنیتي ځواکونو سره د طالبانو خلاف جګړه کې په ټول وس مرسته وکړي، څو طالبان د سولې خبرو کې شمولیت ته حاضر شي.

XS
SM
MD
LG