د لاسرسي لېنکونه

دوشنبه ۷ غبرګولی ۱۳۹۷ کابل ۰۷:۳۷

د افغانستان په ځینو ولایتونو کې د سختې واورې او بارانونو خبرداری!


د افغانستان د طبیعي پېښو پر وړاندې د مبارزې ریاست وایي، د احتمالي طبیعي پېښو د خطراتو د مخنیوي په هدف‌یې له وړاندې د افغانستان په بېلابېلو سیمو کې خلکو ته خبرداری ورکړی دی چې په خطرناکو سیمو کې ونه‌ګرځي او یا د واورې او بارانونو د ورښت پر مهال له کورونو ونه‌وځي.

د دغې ادارې مرستیال محمد اسلم سیاس وایي، په همدې تړاو یې له اړوندو ادارو هم غوښتي چې د اړتیا په صورت کې خپل ټول لازم چمتووالی ولري که هغه د روغتیا په برخه کې وي یا د احتمالي بې‎ځایه کېدو په برخه کې.

محمد اسلم سیاس
محمد اسلم سیاس

ښاغلي سیاس ازادي راډیو ته وویل:

"کله چې له کوره راوځئ له هغو سیمو او درو څخه چې پېچلې دي، تېر نه‎شئ او یا له هغو سیمو چې د واورې د ښویېدو احتمال په‎کې شته او یا هم د ډبرو د رالوېدو امکان په‎کې شته، نېښاني شوي دي او خلک په‎خپله هم پوهېږي، نو دوی دې هغو سیمو ته نه‎نږدې کېږي. که جدي اړتیا یې وي، نو بیا دې د راوتلو پر مهال له ځان سره ابتدايي خوراکي مواد او ګرمې جامې ولري."

تر دې وړاندې د همدې ادارې له‎خوا په یوه خبرپاڼه کې په ځینو شمالي، مرکزي او جنوب ختیځو ولایتونو کې د سختې واورې او په نورو لوېدیځو، ختیځو، شمال ختیځو، مرکزي او یو شمېر شمالي ولایتونو په ځینو ولسوالیو کې د سختو بارانونو د ورېدو خبرداری ورکړل شوی دی.

په‎دې خبرپاڼه کې ویل شوي چې له سالنګ پرته په نورو سیمو کې ښایي تر شااوخوا ۳۰ سانتي متره پورې واوره او باران وشي.

بل‎خوا د سالنګ لویه لاره د سختې واورې له کبله د دوشنبې په ورځ د ټرافیکو پر مخ وتړل شوه.

د سالنګونو د حفظ او مراقبت مشر جنرال رجب له ازادي راډیو سره په مرکه کې وویل چې پر دغه لاره شااوخوا ۹۰ سانتي متره واوره ورېدلې ده.

دی وايي:

"د واورې ورښت په لومړي سر کې لږ، خو د شپې په اوږدو کې شدید شو چې په جنوبي سالنګ کې شااوخوا ۹۰ سانتي متره واوره وشوه او په شمالي سالنګ کې همدا اوس هم واوره د سخت توپان سره جریان لري. موږ د خلکو د خوندیتوب په هدف دغه سړک د ټرافیکو پر مخ وتاړه او تر هغو به تړلی وي چې وضعیت ښه شوی نه‎وي."

افغانستان له هغو هېوادونو څخه دی چې هر کال د همدې طبیعي پېښو له کبله ډېر مالي او ځاني زیانونه ویني.

د مرستو رسوونکو ټیمونو روزل، استنادي دېوالونه او په زیان منونکو سیمو کې خلکو ته د خوندي ځایونو جوړول هغه څه دي چې په دې برخه کې د افغانستان د خلکو له اساسي اړتیاوو څخه بلل کېږي.

افغان دولت وړاندې د یوې داسې طرحې د پیلېدو خبره کړې وه چې په ټول افغانستان کې طبیعي خطرات وپېژندل شي او بیا له پنځو تر ۱۰ کلونو پورې په تدریجي ډول دغه ګواښونه له‎منځه یوسي.

ملګرو ملتونو په ۲۰۱۷ میلادي کال کې د طبیعي خطرونو سره د مقابلې په اړه یوه کنفرانس کې له حکومتونو وغوښتل چې تر ۲۰۳۰ میلادي کال پورې له طبیعي پېښو څخه د انسانانو په مړینې او اقتصادي زیانونو کې د پام وړ کموالی راولي.

XS
SM
MD
LG