د لاسرسۍ وړ لېنکونه

تازه خبر
جمعه ۲۶ سلواغه ۱۴۰۳ کابل ۰۸:۲۴

نړۍ

د سوريې د سولې مرکچيانو په ويانا کې سره وکتل

د سوريې د سولې مرکچيانو پرون پنجشنبه په ويانا کې د ۲ ورځنۍ غونډې په اوله ورځ سره وکتل.

د ملګرو ملتونو په منځګړيتوب دا خبرې د دې لپاره کېږي چې د سوريې د نېږدې اووه کلنې جګړې د ختمولو لپاره يوه سياسي حل لار پيدا شي.

د ښکېلو خواوو خبرې د اساسي قانون پر مسايلو داسې متمرکزې وې چې تېره مياشت د خبرو ۸ پړاوونه له کوم پرمختګ پرته پاى ته ورسېدل.

د سوريې د دولتي هيئت مشر بشار الجعفري دا کتنه ښه وبلله.

بل خوا د سوريې د اپوزسيون د هيئت وياند يحيى العريضي وويل:

"دا غونډه هغسې چې د ملګرو ملتونو ځانګړي استازي ښاغلي ډي ميسټورا توضيح کړه، مهمه وه، موږ هم په همدې باور يوو او موږ ازادې سوريې ته ژمن يوو، يوې ډموکراتيکې سوريې ته چې خپلو خلکو ته خوندي ځاى وي او دوى بېرته ورستانه شي."

د سوريې لپاره د ملګرو ملتونو ځانګړي استازي سټيفن ډي ميسټورا اول د سوريې له چارواکو سره وکتل، وروسته يې د سوريې د اپوزسيون د مرکچيانو له کمېسيون سره جلا کتنه درلوده.

د ورځې تازه خبرونه دلته ولولئ

فرانسې د سوریې په اړه لا زیاتو اقداماتو ته چمتووالی اعلان کړ

د فرانسې ولسمشر امانویل مکرون د پنجشنبې په ورځ (د سلواغې ۲۵مه) په پاریس کې د سوریې نړیوال کنفرانس ته په وینا کې وویل چې فرانسه چمتو ده چې د سوریې په جګړه کې د سختدریځو ډلو پر ضد لا زیات اقدامات وکړي.

هغه ټینګار وکړ:«سوریې ته باید ایران پلوه ملېشې بیا را نه شي.»

مکرون وړاندیز وکړ چې د لویدیځ تر ملاتړ لاندې د «سوریې دیموکراتیک ځواکونه» دې د سوریې له ملي ځواکونو سره یو ځای شي.

ده همداراز د سوریې له موقت حکومت څخه وغوښتل چې د امریکا تر مشرۍ لاندې ائتلاف سره د سختدریځو ډلو پر ضد همکاري وکړي.

یاد کنفرانس، چې د اروپايي او عربي چارواکو په ګډون جوړ شوی و، د بشار اسد د حکومت له پرزېدو وروسته د سوریې په اړه درېیمه نړیواله ناسته وه.

په دې غونډه کې د سوریې د موقت حکومت د بهرنیو چارو وزیر، اسعد الشیباني، هم ګډون درلود.

ولسمشر ټرمپ د تعروفو او مالیو فرمان لاسلیک کړ

د امریکا ولسمشر د «متقابل تجارت او تعرفو» فرمان لاسلیک کړ.

د دې فرمان پر اساس به امریکا ته د هغو هیوادونو پر وارداتي توکو مالیې او تعرفې لګول کېږي چې د امریکا پر صادراتو تعرفې لګوي.

دونالډ ټرمپ د پنجشنبې (د سلواغې ۲۵مه) په ماښام، د دې فرمان د لاسلیک پر مهال خبریالانو ته وویل:

«د انصاف د تامین لپاره» یې دا پرېکړه کړې.

ده همداراز وویل، دا د ټولو لپاره عادلانه ده، هېڅ هېواد شکایت نه شي کولای.

ټرمپ زیاته کړه:

«نور هېوادونه زموږ څخه مالیې اخلي، نو زه غواړم همدومره مالیې له دوی واخلم.»

دونالډ ټرمپ له خبریالانو سره په خبرو کې ومنله چې دا پالیسي کېدای شي لنډمهاله انفلاسیون رامنځته کړي، خو په پایله کې به یې د امریکا د سوداګرۍ بازار ته وده ورکړي او هر ډول تجارتي ناانډولي به له منځه یوسي.

حماس وايي، د پلان سره سم د شنبې په ورځ درې برمته اسراییلیان راخوشي کوي

حماس وسله والې ډلې د پنجشنبې په ورځ اعلان وکړ چې د پلان سره سم درې برمته اسراییلیان به راخوشي کړي.

د دې ډلې ویاند عبدالطیف القانوع اسوشيټدپرس خبري اژانس ته ویلي، دا برمته کسان به د شنبې په ورځ ازاد شي.

حماس ډلې د تیرې دوشنبې په ورځ ویلي و، اسراییلو په غزه کې اوربند نقض کړی نو ځکه د برمته وو، ازادیدل ځنډوي.

د اسراییلي برمته وو په راخوشي کیدو کې رامنځته شوي ځنډ ته په ځواب کې د امریکا ولسمشر ډونالډ ترمپ د سه شنبې په ورځ خبرداری ورکړی و، که چیرته ټول اسراییلي برمته کسان د راتلونکې اونۍ د شنبې تر ورځي راخوشي نشي، د اسراییلو او حماس ترمنځ د اوربند شوی توافق به لغوه کړي.

حماس وسله واله ډله د امریکا او اروپايي ټولنې له خوا د ترهګریز سازمان په توګه پیژندل کیږي.

پاکستان او ترکیې په خپل منځ کې د همکارۍ ۲۴ موافقې لاسلیک کړې

پاکستان ته د ترکیې د ولسمشر رجب طیب اردوغان د سفر په لړ کې د دوو هیوادونو ترمنځ په بېلابېلو برخو کې د همکاریو ۲۴ موافقې او د تفاهم یادښتونه لاسلیک شول.

دواړو هیوادونو نن (پنشجنبې) په خپل منځ کې د ستراتیژیکو اړیکو د لا پیاوړتیا اعلامیه هم لاسلیک کړه.

د دواړو هیوادونو د چارواکو ترمنځ په لاسلیک شویو موافقو او یادښتونو کې د پوځي او ملکي هیتونو تبادله، د هوايي ځواکونو د الیکترونیکي جګړې همکاري، د پوځي روغتیا په برخه کې روزنه او همکاري، د هایډروکاربن په برخه کې د همکارۍ په تړون کې بدلون، کان‌کيندنه، د انرژۍ انتقال، د اوبو سکتور، کرنیز تخمونه، صنعت، روغتیا، درمل جوړونه او ګڼ شمېر نورې برخې شاملې دي.

د ترکیې ولسمشر رجب طیب اردوغان پرون د یوه پلاوي په مشرۍ پاکستان ته په دوه ورځیني سفر لاړ.

ده د دې سفر په لړ کې د پاکستان له ولسمشر او صدراعظم سره جلا جلا ولیدل.

د اسراییل پوځ د حماس د ګواښ په غبرګون کې احتیاطي سرتېري وروبلل

د اسراییل پوځ د دې لپاره احتیاطي سرتېري وروبلل، چې که د حماس افراطي ډله د اسراییلي یرغمل شوو د خوشي کولو بهیر ودروي، دوی د جګړې بیا بیلولو ته چمتو وي.

اسراییل خبرداری ورکړی، که نوې جګړه پیل شي، «سخته» به وي.

له تېرو ۳ اوونیو راهیسې د اوربند دوام ته د خلکو اندېښنې زیاتې شوې دي.

اسراییل د چهارشنبې په ورځ (د سلواغې ۲۴مه) د احتیاطي سرتېرو د وربللو پرېکړه وروسته له هغه وکړه چې حماس اعلان وکړ، دوی به د اسراییل او امریکا «ګواښونو» ته تسلیم نه شي. د اوربند د موافقې له مخې به د اسراییلي یرغمل شوو د خوشې کولو پر سر فشار ونه مني.

امریکا او ډېری لوېدیځ هېوادونه حماس یوه ترهګره ډله بولي.

د امریکا ولسمشر ډونالډ ټرمپ خبرداری ورکړی چې ټول اسراییلي یرغمل شوي باید د شنبې تر غرمې خوشي شي، کنه نو د غزې د اوربند تړون باید لغوه شي.

په جرمني کې په موټر ۲۸ تنه لارویان ټپیان کړل

د پېښې ځای
د پېښې ځای

د جرمني په مونشن ښار کې یوه موټر چلوونکي خپل موټر پر لارویانو وروستی دی چې له کبله یې لږ تر لږه ۲۸ تنه ژوبل شوي دي.

اسوشیتید پریس د جرمنی پولیسو له قوله لیکلي چې پیښه نن سهار شاوخوا ۱۰:۳۰ بجې مونشن ښار کې د خدماتي کارګرانو د اتحادیې له خوا د لاریون پر مهال شوې ده.

د جرمني پولیسو پر ایکس/ پخوانی ټویټر کی لیکلي چې موټر چلوونکی یې نیولی او د پیښې په اړه پلټنې کوي.

د جرمني پولیسو په وینا نیول شوی شکمن کس یو ۲۴ کلن دی او اصلاً افغان پناه غوښتونکی دی.

د مونشن ښاروال ډیتر ریټر رسنیو ته وویل چې هغه د پیښې له امله اندیښمن دی. د هغه په وینا ماشومان هم د ټپیانو په ډله کې شامل دي.

دا پیښه په جرمني کې په داسی حال کې کیږیي چې ټاکل شوې ده د مونشن امنیتي کنفرانس د جمعې په ورځ پیل شي او د متحده ایالاتو مرستیال ولسمشر جي ډي وینس او د اوکراین ولسمشر ولادیمیر زیلینسکي به په دې کنفرانس کې د ګډون لپاره نن ناوخته دې هیواد ته ورسیږي.

ټرمپ: د اوکراین د جګړې د پای ته رسولو لپاره مې له پوتین سره خبرې کړې

د امریکا ولسمشر ډونالډ ټرمپ او د روسیې د ولسمشر پوتین د یوې پخوانۍ لیدنې پر مهال- عکس له ارشیف اخیستل شوی.
د امریکا ولسمشر ډونالډ ټرمپ او د روسیې د ولسمشر پوتین د یوې پخوانۍ لیدنې پر مهال- عکس له ارشیف اخیستل شوی.

امریکا ولسمشر ډونالډ ټرمپ د چهارشنبې په ورځ د دلوې ۲۴مه اعلان وکړ چې د اوکراین د جګړې د پای ته رسولو لپاره یې له د روسیې ولسمشر ولادیمیر پوتین سره خبرې کړې دي.

د رویټرز خبري اژانس د راپور له مخې، ټرمپ په خپله ټولنیزه رسنۍ کې په یو پوست کې لیکلي: "موږ موافقه وکړه چې زموږ ټیمونه به سمدستي خبرې اترې پیل کړي، او زه به د اوکراین له ولسمشر زیلیسکي سره اړیکه ونیسم څو هغه د دې خبرو له جریان څخه خبر کړم. دا هغه کار دی چې زه یې همدا اوس ترسره کوم."

کرملین ویلي چې پوتین او ټرمپ نږدې یو نیم ساعت د تلیفون له لارې خبرې کړې دي.

د کرملین د معلوماتو له مخې، دواړو مشرانو موافقه کړې چې سره وویني.

د کرملین د اعلامیې له مخې، د روسیې ولسمشر ولادیمیر پوتین د چهارشنبې د ورځې په تلیفوني خبرو کې ټرمپ ته ویلي چې د "سوله‌ییزو مذاکراتو" له لارې د اوکراین جګړه پای ته رسېدای شي.

د کرملین په وینا، دواړو لوریو موافقه وکړه چې د اوږدمهاله هوکړې لپاره سوله‌ییز مذاکرات ترسره شي.

د عرب لیگ مشر: د فلسطینیانو بې‌ځایه کول د منلو نه دي

د عرب لیگ مشر، احمد ابوالغیط، وايي چې د فلسطینیانو بې‌ځایه کول، که له غزې تړانګې وي او که له لویدیځه غاړې، د منلو وړ نه دي.

د فرانس پرېس خبري آژانس د راپور له مخې، ابوالغیط دغه څرګندونې نن، د چهارشنبې په ورځ، د سلواغې ۲۴مه، د عرب لیګ په غونډه کې وکړې، چې د متحده عربي اماراتو په دوبۍ ښار کې جوړه شوې وه.

هغه د امریکا د ولسمشر ډونالډ ټرمپ د وړاندیز په اړه، چې فلسطینیان له غزې څخه انتقال او دغه سیمه د بیا رغونې لپاره تر کنټرول لاندې روالي، وویل چې دا وړاندیز د عربي نړۍ لپاره، چې له سلو کلونو راهیسې له دې نظر سره مبارزه کوي، د منلو وړ نه دی.

ټرمپ د سلواغې پر ۱۷مه، د اسرائیل له صدراعظم بنیامین نتنیاهو سره په ګډه خبري ناسته کې وړاندیز وکړ چې امریکا دې د غزې تړانګه تر کنټرول لاندې راولي او هلته دې بیا رغونه وکړي.

اسرائیل د دې وړاندیز هرکلی وکړ، خو ګڼو هېوادونو دا وړاندیز رد کړ او ویې ویل چې دا اقدام به د منځني ختیځ د شخړې لمنه پراخه کړي.

د امریکا نوی دفاع وزیر: د نړیوال نظامي وضیعت بیا کتنه د شاتګ په معنا نه ده

د امریکا د دفاع وزیر، پیت هګست، وايي که که د نړۍ مشران دا انګیري چې د ولسمشر ډونالډ ټرمپ له لوري د امریکا د نړیوال نظامي وضعیت د بیا کتنې هڅه د واشنګټن د شاتګ په معنا ده، نو هغوی تېروتنه کوي.

ښاغلي هګست دا څرګندونې د سه شنبې په ورځ، د سلواغې ۲۳مه، د امریکا د دفاع وزیر په توګه د لوړې مراسمو وروسته د خپلې لومړۍ بهرنۍ سفر پر مهال، د جرمني په اشتوتګارت ښار کې خبریالانو ته وکړې.

دا څرګندونې د ناټو د دفاع وزیرانو او د اوکراین د دفاعي تماس ډلې له دوه ورځني غونډې وړاندې شوې دي.

د امریکا دفاعي چارواکي وايي، تمه کېږي چې هګست به د ناتو پر متحدینو فشار راولي ترڅو په اروپا کې له موجودو ننګونو سره د مقابله کولو لپاره د رهبرۍ رول زیات کړي او همداراز خپل دفاعي لګښتونه لوړ کړي.

تمه کېږي چې هګست به نن، چهارشنبه، او سبا، پنجشنبه، د بلجیم په پلازمېنه بروکسل کې د ناتو په مرکزي دفتر کې په یوه غونډه کې ګډون وکړي.

ډونالډ ټرمپ د روسیې له زندانه د امریکايي ښوونکي مارک فوګل د خوشې کېدو هرکلی وکړ

امریکايي مارک فوګل د روسیې له بند څخه تر خوشې کیدو وروسته د امریکا له ولسمشر ډنالډ ټرمپ سره
امریکايي مارک فوګل د روسیې له بند څخه تر خوشې کیدو وروسته د امریکا له ولسمشر ډنالډ ټرمپ سره

د امریکا ولسمشر ډونالډ ټرمپ د روسیې له زندانه د یوه امریکايي ښوونکي مارک فوګل د خوشې کېدو هرکلی وکړ.

ښاغلي ټرمپ د سې شنبې په ورځ، د سلواغې ۲۳ مه، په سپینه ماڼۍ کې له فوګل سره په لیدنه کې وویل، چې د روسیې په زندان کې له درې نیم کلونو وروسته د هغه خوشې کېدل، د اوکراین د جګړې په پای ته رسولو کې د روسیې د ښه نیت نښه وه.

ښاغلی فوګل، د سپینې ماڼۍ د ملي امنیت سلاکار مایک والټز او د یرغمل نیونکو د چارو لپاره د ټرمپ ادارې د ځانګړي استازي ادم بولر سره یوځای، د سې شنبې په ورځ ناوخته د میریلینډ په انډریوز هوايي اډه کې له الوتکې څخه د امریکا خاورې ته ننوته.

د سپینې ماڼۍ د ملي امنیت سلاکار مایک والټز لخوا په خپره شوې اعلامیه کې ویل شوي، چې فوګل د ولسمشر ټرمپ، د منځني ختیځ لپاره د ټرمپ د ځانګړي استازي استیو ویتکاف او د روسیې سره د هغه د سلاکارانو ترمنځ د خبرو اترو په پایله کې خوشې شو.

فوګل د ۲۰۲۱ کال په دوبي کې په روسیه کې د ماریجوانا د درملو د قاچاق په تور ونیول شو او په ۱۴ کاله بند محکوم شو.

نور راوښيه

XS
SM
MD
LG