د لاسرسي لېنکونه

چهارشنبه ۲ لړم ۱۳۹۷ کابل ۰۵:۱۵

اردوغان: عفرین به تصفیه کوو او یو ګام به هم شاته نه ځو


د ترکیې ولسمشر رجب طیب اردوغان ژمنه کړې چې د سوریې په شمال کې به د کُرد ملېشو تر واک لاندې سیمو کې د خپلو عملیاتو څخه په شا نه‎شي.

ولسمشر اردوغان د دوشنبې په ورځ «۱۳۹۶ کال د سلواغې ۰۲» داسې مهال دا څرګندونې کړي چې د ترکیې پوځ په عفرین سیمه کې هغو عملیاتو ته زور ورکړی چې هدف‌یې له‎دغې سیمې څخه د خلکو د ساتنې د ځواک «y.p.g» چې امریکا یې ملاتړ کوي، ایستل دي.

ترکیه دغه ځواکونه تورنوي چې د کُردستان د کارګرانو له منع کړای شوي ګوند «پي. کې. کې» سره اړیکې لري، هغه ګوند چې د ترکیې په جنوب ختیځ کې له څه باندې ۳۰ کلونو راهیسې وسله‌واله مبارزه مخ ته وړي.

ترکیه، متحده ایالات او اروپایي ټولنه «پي. کې. کې» یوه ترورېستي ډله بولي.

د امریکا متحده ایالاتو خبرداری ورکړی چې دا اقدام به سیمه لا ډېره بې‌ثباته کړي.

اردوغان په انقره کې د وینا پر مهال ویلي چې پر خپله ژمنه ولاړ دی، عفرین به تصفیه کوي او یو ګام به هم شاته نه‌ځي.

د ترکیې ولسمشر وایي، په‎دې اړه‌یې له روسیې سره خبرې او موافقه کړې ده.

تر دې وړاندې د کرملېن ویاند دمیتري پسکوف ویلي و چې مسکو په محتاطانه ډول په عفرین کې عملیات څاري او د ترکیې او سوریې دواړو له حکومتونو سره په تماس کې دی.

XS
SM
MD
LG