د لاسرسي لېنکونه

شنبه ۲۷ زمری ۱۳۹۷ کابل ۱۰:۳۵

د جرمني پولیسو د ۱۰ مشکوکو ایراني جاسوسانو د پلټنې عملیات پیل کړي


د جرمني د فدرالي څارنوال دفتر وايي، پولیسو د ۱۰ مشکوکو ایراني جاسوسانو په اړه د څېړنو په ارتباط په ټول هېواد کې یو لړ تلاشۍ ترسره کړې دي.

چارواکو ویلي چې د سې شنبې د ورځې په دې چاپو کې هېڅ‌څوک نه‌دي نیول شوي.

د جرمني د فدرالي څارنوالۍ ویاند سټیفن بیهل ویلي، د تلاشیو دا چاپې وروسته له هغې ترسره شوې چې د اساسي قانون د ساتنې د دفتر په نوم د جرمني د کورنیو استخباراتو ادارې څخه‌یې چې د جاسوسۍ ضد عملیاتو مسؤلیت لري، معلومات تر لاسه کړل.

نوموړي ویلي، ګومان کېږي چې مشکوکو کسانو له ایران سره د تړلي یوه سازمان په استازیتوب په جرمني کې د ځینو ادارو او اشخاصو جاسوسي کوله.

د فوکس په نوم یوې جرمنۍ اوونیزې راپور ورکړی چې مشکوکو کسانو په جرمني کې د اسرائیلي وګړو په اړه پټ فعالیتونه ترسره کول.

د جرمني فدرالي څارنوالۍ د هغو راپورونو په اړه له تبصرې ډډه کړې چې وايي، مشکوک کسان د ایران د سپاه پاسداران اړوند د قدس ځواک غړي دي.

XS
SM
MD
LG