روسیه او سوریه چې د سوریې د مخالفینو د ځپلو په هدف عملیات مخ ته وړي اوس د جګړې د پای ته رسولو او د سیاسي حللارې په لټه کې دي.
د روسیې جمهور رئیس ولادیمیر پوتین د سوریې له ولسمشر بشارالاسد سره وکتل.
د روسیې ولسمشر ولادیمیر پوتین په هغه ناسته کې چې د روسیې ټلوېزیون خپره کړه، خپل سوري سیال بشارالاسد ته وویل چې اوس سیاسي خبرې مهمې دي او جګړه پای ته په رسېدو ده.
پوتین وویل:
"هغه «د سوریې ولسمشر بشارالاسد» پوهېږي او له مانهیې په خبرو کې هم مننه وکړه چې د روسي ځواکونو په هڅو د سوریې دولت خوندي دی. په سوریه کې د ثبات د راوستلو لپاره ډېر څه شوي او هیله ده، نږدې راتلونکي کې موږ په سوریه کې د ترورېزم ضد جګړې ته د پای ټکی کېږدو."
پوتین له هغه څه دوه کاله وروسته د سوریې له ولسمشر سره وکتل چې روسیې په سوریه کې د حکومت په ملاتړ پوځي عملیات پيل کړل.
دوی تېر وار په مسکو کې د ۲۰۱۵ میلادي کال د اکټوبر په ۲۰مه یوازې څو اوونۍ وروسته له هغه سره وکتل چې روسي پوځیانو په سوریه کې عملیات پيل کړل.
هغه وخت سوري ځواکونه د مخالفینو په ځپلو کې کمزوري وو.
د روسیې د پوځي عملیاتو په خاصه توګه هوايي بمباریو په نتیجه کې د سوریې د کورنۍ جګړې د ګټلو تله د بشار الاسد په خوا درنه شوه.
د سوریي جمهور رئیس بشارالاسد هم وویل چې په سوریه کې شرایط د سیاسي خبرو لپاره برابر شوي او په دغو خبرو کې د بهرنیو هېوادونو د نهمداخلې د یقیني کولو لپاره د روسیې همکاري اړینه ده.
بشار الاسد د دې لپاره چې ځواکونهیې د روسي پوځیانو په مټ د دولت په ساتلو بریالي شول له روسیې مننه وکړه.
تمه ده، د دې خبرو په دوام سبا د روسیې ولسمشر ولادیمیر پوتین د ایران او ترکیې له مشرانو سره هم د سوریې د کړکېچ د هواري او سولې پر سر خبرې وکړي.
ولادیمیر پوتین وویل، دا خبرې به وروسته له لوېدیځو مشرانو او د متحده ایالاتو له ولسمشر ډونالد ټرمپ سره هم تعقیب کړي.
ترکیه د سوریې د رژیم له مخالفینو ملاتړ کوي، خو ایران او روسیه بیا د سوریې د رژیم تر شا ولاړ دي.
ایران د شیعه ملېشو او سپاه پاسداران په استولو په ځمکنیو عملیاتو کې د سوریې ملا تړلې ده، خو د هوايي عملیاتو ډېر مسؤلیت د روسي ځواکونو په غاړه دی.
ترکیه د سوریې د رژیم له مخالفینو ملاتړ کوي.
سوري ځواکونو تازه د ابو کمال کلی هم چې د داعش یا اسلامي دولت نومې ډلې وروستی پتڼځای بلل کېده د روسیې د هوايي بمباریو په مټ ونیوه.
د سوريې په کورنۍ جګړه کې چې د ۲۰۱۱ میلادي کال په مارچ کې پیل شوه، د راپورونو پر اساس شااوخوا څلور لکه کسان وژل شوي او میلیونونه نور سوريایان بېکوره کړای شوي دي.
راپور: صفيالله ستانکزی
