د لاسرسي لېنکونه

چهارشنبه ۱ لیندۍ ۱۳۹۶ کابل ۰۳:۴۶

ارګ: ازبکستان د نساجي په برخه کې پانګې اچونې ته لېوالتیا ښودلې


جمهوري ریاست وايي، د افغانستان او ازبکستان د ولسمشرانو ترمنځ په کتنه کې د سوداګرۍ او ټرانیزیڼ په برخه کې د دواړو هېوادونو ترمنځ یو نوی باب پرانېستل شو.

د افغان ولسمشر د ویندوې د دفتر سرپرست شاه حسین مرتضوي د سې شنبې ورځ په یوه خبري ناسته کې وویل چې ولسمشر غني قراقستان ته د خپل سفر پر مهال د ازبکستان له ولسمشر سره هم کتلي دي.

ښاغلي مرتضوي وویل چې ازبکستان د افغانستان د نساجي په برخه کې پانګونې ته لیوالتیا ښودلې ده.

دی وايي:

"ازبکستاني لوري ټینګار کړی چې د افغانستان او ازبکستان سوداګر دې په خپلو کې مرستې زیاتې کړي، له افغان سوداګرو سره به د صادراتو په برخه کې همکاري کوي او په مالیاتو کې به هم کموالی راشي، ازبکستاني لوري چمتوالی ښودلی چې په افغانستان کې به د نساجي په برخه کې پانګونه کوي."

د افغان ولسمشر د ویندوې د دفتر سرپرست شاه حسین مرتضوي
د افغان ولسمشر د ویندوې د دفتر سرپرست شاه حسین مرتضوي

دې وویل، د دې ترڅنګ ازبکستان ژمنه وکړه چې افغان سوداګرو ته به په بېلابېلو برخو کې اسانتیاوې برابرې کړي.

ښاغلي مرتضوي دا هم وویل، ازبکستاني چارواکو له دې هېواده افغانستان ته د برېښنا د مزو تمدید، په ازبکستان کې افغان محصلینو ته د زده کړو د زمینې برابرول، له افغانستان سره په وارداتو او صادراتو کې د ټیکس او ماليې راکمول او د ټرانزیټ په برخه کې د اسانتیاوو د رامنځ ته کولو ډاډ ورکړ.

د راپورونو له مخې د ازبکستان ولسمشر ښاغلي غني سره په لیدنه کې دا هم ویلي، هېواد يې چمتو دی چې په ترمز ښار کې افغان سوداګرو ته اسانتیاوې برابرې کړي.

د میرضائیف په حواله دا هم ویل شوي چې ازبکستان به د افغان سوداګرو پر مالونو مالیه هم کمه کړي.

په ورته وخت کې د اقتصادي چارو یو شمېر کارپوهان د نساجي په برخه کې د ازبکستان پانګه اچونه ګټوره بولي وايي، په دې سره به افغانان د نورو له احتیاجه خلاص او په کور دننه په ځان بسیا شي.

له ډلې یې سعید قیاس سعیدي د سې شنبې په ورځ ازادي راډيو ته وویل:

"که په دې برخه کې پانګونه وشي دا به هغه څه وي چې موږ به د سیمې د هېوادونو له احتیاجه خلاص شو او دا به د اوسني حکومت یوازینۍ ستره لاس ته راوړنه وي چې له مخې به يې د هېواد اقتصاد په پښو ودرېږي."

ښاغلي سعیدي له افغان حکومته دا غوښتنه هم وکړه چې په دغه هېواد کې د بهرنۍ پانګې د جلب په هدف د پانګوالو د امنیت د خوندیتوب په برخه کې جدي هڅه وکړي.

راپور: اکرام الله اکرام

XS
SM
MD
LG