د پولنډ واکمن قانون او عدالت ګوند هڅه کوي په دغه هېواد کې د عدالت محلي سيسټم عملي کړي، چې اروپايي ټولنه يې غيرډيموکراتيک ګڼي.
دغه ګوند دغه راز غواړي په پولنډ کې د اروپا د يوه لرغوني ځنګله د وهلو پرآخ عمليات پرمخ بوځي.
د پولنډ حکومت پر دغو دواړو اقداماتو د اروپايي ټولنې انتقادونه رد کړي دي او د عدالت د اروپايي محکمې هغه حکم يې هم له پامه غورځولى چې د دغه ځنګله د وهلو مخه نيسي.
د اروپايي شورا رئيس ډونالډ ټوسک خبريالانو ته وويل: داسې نه ښکاري چې پولنډ دې اروپايي ټولنې ته اړتيا ولري. زما اندېښنه دا ده چې موږ هغې شېبې يعنې له اروپايي ټولنې د پولنډ د وتلو پړاو ته نور هم ورنږدې شوي يو.
ټوسک وروسته له هغې دا څرګندونې وکړې چې د اتو ساعتونو لپاره د پولنډ څارنوالانو ورڅخه پوښتنې ګروېږنې وکړې.
دغه څارنوالان په ٢٠١٠میلادي کال کې د هغې الوتکې د سقوط د قضيې په اړه څېړنې کوي چې د روسيې په سمولينڅک کې يې په نتيجه کې د پولنډ د وخت ولسمشر ليخ کاچينسکي او ٩٥ نور کسان وژل شوي وو.
د واکمن ګوند رئيس د پخواني ولسمشر ليخ کاچينسکي ورور دى.
د پولنډ د واکمن ګوند مشر يوريسلاف کاچينسکي ډونالډ ټوسک چې هغه وخت د پولنډ صدراعظم و او د هغه ګوند د هغې پېښې مسوول بللي دي.
ده ويلي، د الوتکې د نسکورېدو هغه پېښه تصادفي نه وه، ده پر ټوسک تور پورې کړ، چې اخلاقاً د ده د ورور ليخ کاچينسکي په مرګ تورن دى.
دا څرګندونې په داسې حال کې کېږي چې د پولنډ د حکومت له انتقادونو سره- سره اروپايي ټولنې د مارچ پر نهمه، ډونالډ ټوسک د دويمې دورې لپاره د اروپايي شورا د مشر په توګه تاييد کړ.