اسرائیل نن اعلان وکړ چې اقصی جومات ته په تلونکو لارو به د اوسپنیزو الاتو د کشف دروازې لیرې کړي.
د اسرائیل د صدراعظم بنیامین نتانیاهو له دفتره نن په خپره شوې اعلامیه کې ویل شوي چې د اوسپنیزو الاتو د کشف دروازې به لیرې او پر ځای بهيې د څار نسبتاً معتدله دستګاوې ځای پر ځای کړي.
خو دا چې دا نوې دستګاوې څه ډول دي او څه ډول فعالیت کوي؟ څه نهدي ویل شوي.
دا پرېکړه پر همدې موضوع نن د اسرائیل د حکومت د کابینې په دوهمه غونډه کې چې څو ساعتهيې دوام وکړ، وشوه.
اسرائیل د روانې جولای میاشتې په ۲۱مه نېټه وروسته تر هغې اقصی جومات ته پر تلونکو لارو د اوسپنیزو الاتو د کشف دروازې ولګولې چې تر هغې یوه اوونۍ وړاندې دوه اسرائیلي سرتېري د فلسطینیانو په برید کې ووژل شول.
فلسطینیانو د دې امنیتي دروازو له لارې د اقصی جومات ساحې ته له داخلېدو انکار وکړ او دباندې پر لارو او سړکونو يې لمونځونه وکړل.
فلسطینیان وايي، په امنیتي موانعو او د کشف د دروازو په نصبېدو سره اقصی جومات ته د داخلېدو لپاره د دوی له حقونو سرغړونه شوې ده.
د اسرائیل لهخوا د اوسپنیزو الاتو د کشف د دروازو لګولو، په سیمه کې د تاوتریخوالي نوې څپه راپورته کړه چې له املهيې تر اوسه پورې پنځه فلسطینیان او درې اسرائیلیان وژل شوي دي.
ملګرو ملتونو د دوشنبې په ورځ خبرداری ورکړ چې دا شخړه باید ژر تر ژره حل شي.
دغهراز د امریکا د متحده ایالاتو یو لوړرتبه چارواکی هم سیمې ته رسېدلی دی چې اسرائیل او فسلطینیان د دې مسئلې حل ته وهڅوي.
