د لاسرسي لېنکونه

ځینې وکیلان: د سرپرستیو دوام د افغانانو ترڅنګ بهرنیان هم اندېښمن کړي


د افغانستان د ولسي جرګې یو شمېر غړي وايي، په افغان حکومت کې د سرپرستۍ د لړۍ دوام یوازې افغانان نه بلکې بهرنیان هم اندېښمن کړي دي.

دوی وايي، د سرپرستیو د لړۍ دوام حکومتوالي کمزورې کړې او د حکومت او ولس ترمنځ باور ته یې هم زیان رسولی دی.

د جرګې غړي نادر شاه بهر د شنبې په ورځ د جرګې په عمومي غونډه کې وویل چې له زیات ټینګار سره سره حکومت د سرپرستۍ لړۍ ختمه نه کړه او اوس دې مسئلې بهرنیان هم اندیښمن کړي دي.

نوموړي زیاته کړه:

"حتا بهرنیان د دې موضوع په اړه اندېښمن شوي او خپلې جدي سپارښتنې یې لرلې، د ملي یووالي حکومت دومره کمزوری دی او یا هم په اختلافونو کې راګیر دی چې نه شي کولای د کابینې یو وزیر معرفي کړي کومه موضوع چې ولسمشر یې په اړه بشپړ اختیار لري."

دا په داسې حال کې ده چې تازه په کابل کې د اروپايي ټولنې سفیر فرانز مایکل مېلېبن له رسنیو سره په خبرو کې د سرپرستیو دوام د افغان حکومت یوه کمزوري بللې ده.

فرانز مایکل مېلېبن
فرانز مایکل مېلېبن

د ښاغلي مېلېبن په خبره په افغانستان کې ډېر وړ خلک شته چې باید په خالي پوسټونو وګمارل شي خو د سرپرستانو موجودیت به ستونزې نورې هم ډېرې کړي.

ازادي راډیو وغوښتل چې په کابل کې د اروپايي ټولنې د سفیر د اندېښنو په اړه د ارګ ماڼۍ نظر هم ولرې خو د ولسمشر د ویاند د دفتر سرپرست په دې اړه له څه ویلو ډډه وکړه.

تر دې وړاندې ولسمشر محمد اشرف یوې مطبوعاتې ناستې ته په خبرو کې ویلي و چې تر راتلونکو شپږو میاشتو به د سرپرستۍ لړۍ ختمه کړي خو د ولسي جرګې غړی نادر شاه بهر وايي، ډاډه نه دی چې ولسمشر دې بیا هم پر خپلې ژمنې وفا وکړي.

دا مهال د افغان حکومت ۱۱ وزارتونه، یو شمېر ولایتونو او مهمي حکومتي ادارې د سرپرستانو له خوا اداره کېږي چې په دې وروستیو کې یو شمېر وزارتونوته د ولسمشر له خوا ته نوي سرپرستان هم معرفي شوي دي.

دا چې د حکومت مشران له شااوخوا درېیو کلونو وروسته ولې نه شي کولای د هغو ادارو لپاره چې چارې یې د سرپرستانو له لورې اداره کېږي وړ کسان وګوماري په اړه یې د ولسي جرګې غړی عبیدالله بارکزی وايي:

عبیدالله بارکزی
عبیدالله بارکزی

"د اساسي قانون پر ستونې چې په خپله ولسمشر او اجرائیه رئیس پښه کېږدي نو له نورو څه ګیله کېدای شي، په اساسي قانون کې له یوې میاشتې وراخوا د سرپرستۍ دوام ګناه نه بلکې کفر دی، خو موږ ګورو چې بعضي وزیران د مصلحتونو له مخې کال کېږي چې چارې مخ ته وړي نو حکومت د قانون نه بلکې د مصلحتونو تابع دی."

د ښاغلي بارکزي په خبره د سرپرستانو له لورې د مهمو ادارو د چارو مخ ته وړل په حقیقت کې له ولس سره لوی ظلم دی نو څومره ژر چې امکان لري باید په دې اړه تصمیم ونیول شي.

راپور: محمد حدیث پردېس

XS
SM
MD
LG